1 Иисус утәԓтәты йохԓаԓа па йастәс: "Хўщәпсайәт ӑт йŏхәтты щир ӑнтом, туп щи хŏйата шук, хŏй мŏхты хўщәпсайәт йŏхәтԓәт;

2 ԓўвеԓа, тӑм ай ŏтәт эԓты ит нэш хўщты эԓты, йӑмшәк ус ԓуԓән, сапԓәԓа ун кев шуп ки тӑхәртса пӑ щарса вŏщкәса.

3 Ныныԓән ватман тӑйаԓән. Нӑӈ пеԓайэна йайән мўй апщен нўр туԓ ки, ԓўвеԓа йŏхԓы йасты; ԓўв нўрәԓ эԓты шӑшән керԓәԓ ки, щи нўрәԓ йŏрэми;

4 хӑтәԓ хўват ԓапәт пўш кепа нӑӈена нўр верәԓ, пӑ ԓапәт пўш хӑтәԓ хўват нӑӈ хŏщайэна йŏхәтәԓ пӑ йастәԓ: "Ма нўрэм эԓты шӑшән керԓәԓәм", - нўрәԓ эсԓы, йŏрэми".

5 Щӑԓта апостоләт Турәм Кущайа йастәсәт: "Мўӈ эвәԓты верэв арамты!"

6 Турәм Куща йастәс: "Нын горчица ԓат сэм ԓŏват эвәԓты вер тӑйсәты ки, пӑ тӑм смоква йўха йастәсты: мўв эԓты нŏх лакәптыйа пӑ щарса опсанта", ԓўв ԓуԓән нынана хуԓәнтәс.

7 Хŏй нын эԓтан, мўв хӑрән рупитты мўй пӑ тащ шавиты митху тӑйман, ԓўв мўв хӑр эԓты йŏхәттаԓән, ԓўвеԓа йастәԓ: "Сорашәк мӑна, пӑсан сурыйа опса"?

8 Аԓт пӑ ԓўвеԓа йастәԓ: "Йэтән ԓэтәт мӑнэм кавәрта пӑ, ӑнтпен нŏх йӑрман, мӑнэм ԓавәԓман, ма ԓэтэм, йищтэм эԓты ванән ԓойа, пӑ щӑԓта веԉщи нӑӈ ԓэва, йиԋща"?

9 Хотәӈ куща щи митхуйәԓ, ԓўв партәм щирәԓа вермаԓ урәӈән, пумащипа йасӈәтән йастәԓԓы а мўй? Щиты ӑт нумәсԓәм.

10 Нын ищиты, хун партыԓыйәм щирән иса верԓәты, пŏтәртаты: "Мўӈ туп митху лэӈкет, мўй верты мосәс, щит версув".

11 Иерусалим вош пеԓа мӑнман, Иисус Самария пӑ Галилея мўвӈән кўтән шушәс.

12 Пӑ хун Ԓўв и кўрта йŏхәтмаԓән, йаӈ йэмәӈ ԓайӈәӈ ԋўлмәт тӑйты хŏйатәтән йэщаԓт этса. Ԓыв йэԓән иԓ ԓойсәт

13 пӑ сыйәӈ тўрән пŏтәртсәт: "Иисус Утәԓтәты Ху! Мўӈев щаԉиты!"

14 Ԓывиԓаԓ шийаԓәмаԓ кемән, Ԓўв йастәс: "Мӑнаты, Турма йир верты хŏйатәта аԉисыйаты". Хун ԓыв шушсәт, сыстама йисәт.

15 Ԓыв эԓтэԓ и хŏйат, тўмтака йўвәм шийаԓәмаԓ кемән, сыйәӈ тўрән Турәм вŏԓаӈа айәԓтман, йŏхԓы керԓәс,

16 пӑ Иисус кўр ԋŏԓаԓ шŏма, пумащипа йастыман, хŏмта иԓ керәптыйәс; щит Самария ики ус.

17 Иисус йŏхԓы йастәс: "Ӑнта мўй йаӈ хŏйат сыстапман усайәт? Йӑрәԏйаӈ пӑ хŏта?

18 Мўй щирән, тӑм па мўв хŏйат тўмпийән, ԓыв йŏхԓы ӑт керԓсәт, Турма ишәк йасәӈ йастәты урәӈән?"

19 Пӑ Иисус ԓўвеԓа йастәс: "Нŏх ԓойа пӑ мӑна; эвәԓты верэнән нӑӈ нŏх пайәтсайән".

20 Фарисейәтән иԋщәсса, хун Турәм Хон Уԓәпса йŏхәтәԓ? Ԓўв йŏхԓы йастәс: "Турәм Хон Уԓәпса сэмән ватман ӑт йŏхәтәԓ",

21 пӑ ӑт йастәԓәт: "Тӑм, Ԓўв тӑта", мўй пӑ "Ԓўв тўта". Пӑ тӑм, Турәм Хон Уԓәпса нын ԓыпанән уԓ".

22 Утәԓтәты йохԓаԓа па йастәс: "Хӑтԓәт йŏхәтԓәт, хун нын Хŏйат Пŏх хӑтәԓԓаԓ эԓты ит ватты ԓӑӈхаԓԓән, пӑ ӑт шийаԓәԓԓән.

23 Пӑ нынана йастәԓа: "Тӑм, тӑта щи", мўй пӑ: "Тўм, тўта щи" - аԓ мӑнаты пӑ аԓ ԋухԓысыйаты,

24 пӑ хутԓыйәм пŏхәл ԋоԓ иты турәм и кимԓәԓ эԓты, кимет кимԓәԓ унты вŏрԓыйәԓ, Хŏйат Пŏх Ԓўв хӑтԓәԓән щиты питәԓ.

25 Туп оԓәӈән Ԓўвеԓ ар шук туты мосәԓ пӑ ин уԓты хŏйатәтән вана ӑт ўты вер уԓ.

26 Пӑ хŏты Ной хӑтԓәтән ус, щиты Хŏйат Пŏх хӑтԓәтән питәԓ:

27 хŏйатәт ԓэсәт, йищсәт, нэ тутԓысәт, ху сайа мӑныԓысәт щи хӑтәԓ унты, хун Ной ики ковчег* 17:27 ковчег - ун хоп шики ԓыпийа ԓŏӈәс, пӑ ун йик йŏхтәс, пӑ хŏԓ пӑратсайәт.

28 И щиты, Лот нэмпи ики хӑтԓәтән ус: ԓэсәт, йищсәт, ԓутәссәт, тынассәт, мўв хӑр ԓэвпәс омассәт, хот омәссәт;

29 туп щи хӑтәԓән, хун Лот ики Содом вош эԓты ким этәс, турәм эԓты тўтәӈ пӑ уӈхәӈ йэрт шошмәс, пӑ хŏԓ пӑратсайәт;

30 пӑ щи хӑтәԓән щиты питәԓ, хун Хŏйат Пŏх сэма этәԓ,

31 Щи хӑтәԓән, хŏй хот ԓоӈәԓән ки уԓты питәԓ, пŏрмасԓаԓ пӑ хот ԓыпийән, щит ԓывиԓаԓ ўты иԓ аԓ ŏхԓа; хŏй пӑ мўв хӑрән ки уԓты питәԓ, ищиты йŏхԓы аԓ керԓа.

32 Лот ики ийими нуммәԓмийаԓән.

33 Хŏй уԓәпсайәԓ шавиты утщийәԓ ки, щит ԓўвеԓ пӑратԓәԓы, хŏй пӑ уԓәпсайәԓ пӑратԓәԓы, щит ԓўвеԓ ԓыԓӈатԓәԓы.

34 Нынана пŏтәртыԓәм: "Щи ат кӑт хŏйат и ŏԓттӑхайән: итәԓ нŏх ўԓа, киметәԓ хӑйԓа;

35 кӑт нэӈӈән и йӑха ԓат сэм шўкатты питԓәӈән: итәԓ нŏх ўԓа, киметәԓ хӑйԓа;

36 кӑтән мўв хӑрән рупитԓәӈән: итәԓ нŏх ўԓа, киметәԓ хӑйԓа".

37 Щи урәӈән Ԓўвеԓа йŏхԓы йастәса: "Хŏта, Турәм Куща?" Ԓўв пӑ ԓывиԓаԓа йастәс: "Хŏта хӑԓа, щита пӑ кўркәт ӑктәщԓәт".