49
Иаков пŏхԓаԓ йӑмән мӑԓԓы
1 Иаков пŏхԓаԓ вохсәԓы пӑ йастәс: «Йӑха ӑктәщаты, пӑ ма нынана йастәԓәм, мўй нын пиԓанән йэԓԓы уԓты хӑтԓәтән питәԓ.
2 Ӑктәщаты пӑ хуԓәнтаты,
Иаков пŏхәт,
Израиль ащан ики хуԓәнтаты.
3 Рувим, оԓәӈ пŏхем!
Нӑӈ – ма йурэм
пӑ ма ху йурэм оԓәӈ ԋаврэмем,
мет ԓӑтәӈ пӑ мет йурәӈ;
4 туп нӑӈ хўмпәт иты йэшащсән,
– ащен ŏԓттӑхайа ŏԓсән,
нӑӈ ма ŏԓттӑхайэм шӑкатсэн,
щишән, мет уна нӑӈ ӑт питԓән.
5 Симеон пӑ Левий, йайсакӈән,
аԓтты кешиԓән пӑратты урәӈән тӑйԓәԓән;
6 ԓын нŏмәсԓән хŏща ма вер ӑт тӑйԓәм,
ԓын пиԓанән ӑт ӑктәщиԓәм,
ԓын хŏйатәт ԉикащман веԓԓыстән
пӑ каш урәӈән хор кўр ԓон эвтыԓыстән;
7 ԓын ԉикән мўԓман ат уԓ, мŏрт тўмпи так урәӈән
пӑ йэшащты щирән мўԓман ат уԓ, мŏрт тўмпи йурәӈ урәӈән;
Иаков тыхәԓ тэԓ кўтән лакки йŏвәԓԓыԓам
пӑ Израиль мўв ԓŏватән лакки рӑԋӈәԓԓыԓам.
8 Иуда! Йайԓанән нӑӈ ишәкты питԓайән.
Вўракԓан нӑӈ эԓтэн пӑԓты питԓәт;
ащен пŏхәт нӑӈ йэщаԓтэн, ŏх пŏнман, иԓ ԋўрԓәт.
9 Иуда, нӑӈ энәмты лев вой,
нӑӈ йӑм веԓпәс эԓты йŏхәтԓән, пŏхийэ.
Лев ху вой иты пӑ лев нэ вой иты,
ԓўв мўвән ŏԓтаԓән,
хŏйән нŏх кўрәтты верәтԓа?
10 Скипетр хон пос Иуда хŏща хӑщәԓ
пӑ ԓўв хот тэԓәԓән хон катәԓты пос йэԓԓы тӑйты питԓа,
Йӑмащты Ŏт йŏхәттаԓ унты,
Хŏй йэщаԓт хŏԓ мирәт шаншŏхән ԓойты питԓәт.
11 Виноград йўха осёл вой пŏшхәԓ ԓўв йӑрԓәԓы,
виноград мет йӑм йўх хŏща осёл пŏшхәԓ ԓощәԓтәԓԓы;
сŏхԓаԓ ўнайән пусԓәԓы
пӑ ԓумтәмәԓ виноград ўрән ԉŏхәтԓәԓы.
12 Сэмԓаԓ ўна иты вŏԉиԓәт
пӑ пекԓаԓ мис йик иты нŏвет.
13 Завулон щарәс питарән уԓты питәԓ
пӑ ун хопәт ԓойты шитам лух йўкана питәԓ,
Сидон унты ԓўв мўв сыԓәԓ йŏхәтәԓ.
14 Иссахар
– йŏханӈән кўтән ŏԓты йурәӈ осёл вой;
15 ԓўв кащаԓәсԓы, щўтщәты лотәԓ йӑм,
мўвәԓ ԓӑтәӈ:
ԓӑӈкәрԓаԓ ԓавәрт аԓтты урәӈән иԓ эсәԓсәԓы,
пӑ мит сŏхәптәты урәӈән рупитты питәс.
16 Дан, Израиль и тыхәԓ иты,
ԓўв мирәԓ сўтәтты питԓәԓы;
17 Дан ŏхты вой иты йушән ŏԓты питәԓ,
атәм ŏхты вой иты йушән ԓавԓәсәԓ,
ԓов кўрәԓ эԓты пŏрэмәтаԓән
ԓов шӑшән омәсты хŏйат йŏхԓы рӑкәнәԓ.
18 Нӑӈ ԋотпена нŏмәс пŏнԓәм, Турәм Куща!
19 Гад ԓоԓмасты ŏтәтән иԉапты питԓа,
ԓўв пӑ ԓывиԓаԓ каԓтәмԓаԓ хўват йŏхԓы ԋухәԓԓәԓы.
20 Асир пӑ – ԋаԋәԓ мавәӈ питәԓ,
хонәт ԓэты ԓэвпәсәт тутԓыты питәԓ.
21 Неффалим – ун теревинф* 49:21 теревинф йўх – (евр.) щит дуб хŏрпи йўх; йўх,
хŏрам нўвәт ԓўв энмәԓтәԓ.
22 Иосиф – йӑм ԓыԓәӈ йўх нўв,
йӑм ԓыԓәӈ йўх нўв йик пўӈәԓән;
нўвԓаԓ пушас нўмпийән энәмԓәт;
23 ԉаԉәсман ԓўв шукатыса,
йухԓәӈ йохән ԋоԓән эсԓыса,
24 ԓўв пӑ йухԓәԓ ищипа така хӑщәс,
йошԓаԓ ищиты йурәӈәт,
Иаков йурәӈ Турәм йошәт эԓты,
Ԓыԓәт Шавиты Ŏт эԓты пӑ Израиль Так Вер эԓты,
25 ащен Турәм эԓты, Хŏйән нӑӈ ат ԋотԓайән,
Иса Верәтты Ŏт эԓты, Хŏйән нӑӈ йӑмән ат мӑԓайән
нумәԓта турәм эԓты,
иԓән ŏԓты пӑтыԓы тӑха эԓты,
эсәм шўв пӑ утрәԓ эԓты;
26 ащен йӑм йасӈәт эԓты,
ԓыв катра Кевәт йӑм эԓты
пӑ йис сӑхмәт йӑм эԓты ԓыв пӑԓшәкәт;
Иосиф ŏх пӑтыйа ԓыв ат питԓәт,
йайԓаԓ кўтән пирыйәм ŏт ŏх пӑтыйа ԓыв ат питԓәт.
27 Вениамин, ԋэԓәӈ йэвәр,
аԓәӈсӑхат веԓәм ŏтәԓ ԓэԓ
пӑ йэтнайән мŏщатәм ŏтәԓ ортәԓ».
28 Тӑм Израиль кӑтхŏщйаӈ сыр рут; щиты ԓывиԓаԓа ащеԓ ики йастәс; ԓывиԓаԓ йӑмән мӑсԓы, кашәӈ ŏтәԓ ԓўв йўкан йӑмән мӑсԓы.
Иаков пӑрәм пӑ иԓ ԓэщатәм вер
29 Щӑԓта Иаков ԓывиԓаԓа щиты партсәԓы, ԓывиԓаԓа щиты йастәс: «Ма ма мирэм хŏща мӑнԓәм; ащиԓам ŏԓты хŏшапәӈ кевән мӑнэм лоттаԓән, щит Ефрон хет ики мўв хӑр хŏща,
30 Махпела мўв хӑр хŏща, Мамре шŏма Ханаан мўвән. Авраам Ефрон хет ики эԓты щи хŏшапәӈ кев лоттәты урәӈән мўв хӑр пиԓән ԓутәс.
31 Щи хŏшапәӈ кевән Авраам Сарра имеԓ пиԓән лоттәман уԓԓайтән; щита Исаак Ревекка имеԓ пиԓән лоттәман уԓԓайтән; щита Лия имем ма лоттәсэм;
32 щи мўв хӑр хŏшапәӈ кевәԓ пиԓән хет йох эԓты ԓутса».
33 Щитәԓән, пŏхԓаԓа партәм йасәӈԓаԓ Иаков вŏԓәтсәԓы, кўрԓаԓ ŏԓттӑхайа пŏтсәԓы, пӑ пӑрәс, пӑ опращԓаԓ хŏща мӑнәс.