1 Антиохия вошән, щита уԓты пойәкщәты хойатәт ӑктәщиты вер хŏща тухәԓ Турәм айкеԓ туты хŏйатәт пӑ утәԓтәты йох усәт: Варнава, пӑ Нигера айәԓтты Симеон, пӑ Луций, Киринея ху, пӑ Манаил, Ирод ԋӑԓмет мўв щуӈ куща пиԓән энмәм ху, пӑ Савл.

2 Хун ԓыв Турәм Кущайа верәт версәт пӑ вўщԓәсәт, Йэмәӈ Ԓыԓ йастәс: «Варнава пӑ Савл Мӑнэма щи вер пеԓа мийаԓән, мўй урәӈән Ма ԓынан вохсәԓам».

3 Щиӈәԋща ԓыв, ўщԓәмеԓ пӑ пойәкщәмеԓ йўпийән пӑ йошԓаԓ ԓын эԓтыԓән поныԓымеԓ йўпийән, ԓынан эсәԓсэԓ.

4 Щитӈән, Йэмәӈ Ԓыԓән китман уԓман, Селевкияйа йŏхәтсәтән, щиԓта пӑ Кипр пухра хŏпән мӑтсәӈән;

5 Щӑԓта Саламинән уԓман, иудейәт пойәкщәты хотәтән Турәм йасәӈ пŏтәртсәтән; ԓын ԉэпәнән Иоанн па ус, ԓынана ԋотты урәӈән.

6 Пухәр мўв ԓŏватәԓән Паф унты мӑнман, ԓыв и мŏԓты иудей ху, нэмәԓән Вариисус, уйәтсәтән. Ԓўв щӑртәӈ пӑ ԋаԓмәӈ ики ус, Турәм айкеԓ туты икийа верәсәс.

7 Ԓўв проконсул Сергий Павел, ŏшәӈ ху, пиԓән ус. Проконсул Турәм йасәӈ хуԓты ԓӑӈхас, щишән Варнава пӑ Савл вана вохсәԓы.

8 Елима, щӑртәӈ ики, пӑ (ԓўв кимет нэмәԓ щит айәԓԓәԓ) ԓыв пиԓԓаԓән ӑт кашащәԓ, эвәԓты вер эԓты проконсул пўӈԓа ԓавәԓԓәԓы.

9 Туп Савл, ԓўв хŏԓна Павел, Йэмәӈ Ԓыԓән тэкәнман пӑ сэмӈиԓаԓ ԓўв пеԓайәԓ пайәтман,

10 йастәс: «Йээй, кӑмән ŏщмарән пӑ кӑмән атәмән тэкнәм ŏт, хиԋ пŏх, кашәӈ вещкат вер пеԓа ԉик туты ŏт! Нӑӈ Турәм Куща тўӈ йушәт эԓты йŏвра хўщты а мўй вŏԓыԓән пеԓа?

11 Ин тӑм, Турәм Куща йош нӑӈ пеԓайэн нŏх аԓԓәмман уԓ: нӑӈ сэмԓы питԓән пӑ пŏра унты хӑтәԓ ӑт ватԓэн». Щӑԓта шӑмкап ԓўв эԓтэԓ тўрма пӑ пӑтлам лаӈкантәс, пӑ ԓўв, сӑм мӑнман, тыйэԓ–тохэԓ шушиԓыйәс, ватәԓтәты хŏйат кӑншәс.

12 Щиӈәԋща проконсул тыйәм вер кащаԓәмаԓ кемән, Турәм Куща утәԓтәпса эԓты, ощатыман, эвԓәс.

13 Паф эԓты нык хўвԓәмеԓ кемән, Павел пӑ ԓўв пўӈԓәԓән уԓәм ŏтӈән Памфилия мўвән уԓты Пергияйа йŏхәтсәт. Туп Иоанн, ԓын эԓтыԓән пўӈԓа йирԓәман, Иерусалима йŏхԓы мӑнәс.

14 Ԓын пӑ, Пергия эԓты мӑнман, Писидия ԉэпән уԓты Антиохияйа йŏхәтсәтән пӑ, иудейәт пойәкщәты хота шаббат хӑтәԓән ԓŏӈман итән, иԓ омәссәтән.

15 Закон пӑ Турәм айкеԓ туты хŏйатәт нэпекәт ԓўӈтәм йўпийән иудейәт пойәкщәты хот кущайәт ԓынана йастәты китсәт: «Хӑнам йохӈән! Нын мир пеԓа нŏмәс такапты йасәӈ тӑйԓәтән ки, пŏтәртатән».

16 Павел, нŏх ԓойман пӑ йошәԓән пос верман, йастәс: «Израиль йох пӑ Турәм эԓты пӑԓты мŏхет! Хуԓәнтаты.

17 Тӑм мир Турәм мўӈ ащиԓув пирысԓы пӑ тӑм рут мир Египет мўв хŏща уԓмаԓ пŏрайән ԓӑтәӈа версәԓы, пӑ йурәӈ йошәԓән щиԓта йэԓ тусԓы,

18 пӑ ԋӑԓйаӈ тӑԓ кем ԓывиԓаԓ таԓ мўв хŏща ԓапәтсәԓы.

19 Щӑԓта, ԓапәт сыр мир Ханаан мўвән пӑратмаԓ йўпийән, щитԓаԓ мўв ԓывиԓаԓа йэԓԓы тӑйты ортсәԓы.

20 Пӑ щи йўпийән, ԋӑԓсот ветйаӈ кем тӑԓ ԓывиԓаԓа сўт йохәт мийԓыйәс Турәм айкеԓ туты хŏйат Самуил унты».

21 Йухәт ԓыв хон вохсәт, пӑ Турәм ԓывиԓаԓа Саул мӑс. Кис пŏх, Вениамин рут эԓты уԓты ху. Щиты ԋӑԓйаӈ тӑԓ хӑщәс.

22 Ԓўвеԓ пўӈԓа пайәтмаԓ йўпийән, ԓывиԓаԓа хона Давид пŏтсәԓы. Турәм ԓўв эԓтэԓ йастәс: 'Давид, Иессей пŏх, Ма сӑмема рӑхты ху, Ма уйәтсәм щит, хŏй Ма ԓӑӈхаты ŏтԓам хŏԓ тӑԓаӈа верԓәԓы'.

23 Ԓўв ԋаврэмԓаԓ эԓты Турәм аԉиԓыйәм верәԓ хўват Израиль мира Нŏх пайәтты Ŏт мӑс - Иисус.

24 Ԓўв йӑмәс эттаԓ йэԓпийән Иоанн хŏԓ Израиль мира щит эԓты пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ.

25 Иоанн, ԓўв верәԓ йэтшәты питмаԓән, пŏтәртәс: 'Хŏй йўкана мӑнэм нын тӑйԓәԓән? Ма ӑнта щит; туп ин, ма йўпемән йиԓ щит, Хŏй хŏща кўр ԓумтәмәԓ эхты ма ӑт рӑхԓәм'.

26 Хӑнам йох, Авраам рут ԋаврэмәт, пӑ нын кўтәнән Турәм эԓты пӑԓты ŏтәт! Нынана тӑм нŏх пайтәсты йасәӈ китман уԓ.

27 Иерусалимән уԓты мŏхет пӑ ԓыв кущайԓаԓ, Иисус ӑт мŏштәсэԓ пӑ сўтәтсэԓ, пӑ щишән Турәм айкеԓ туты хŏйатәт йасӈәт тӑԓаӈа версәԓаԓ, щи йасӈәт кашәӈ шаббат хӑтәԓән ԓўӈәтԓайәт.

28 Ԓыв Ԓўв хŏщайәԓ нэмәԓты нўр ӑт уйәтсәт, мўй урәӈән Ԓўв сŏрма ат пайәтса, пӑ ищипа Пилат эԓты Ԓўвеԓ паратты щир вохсәт.

29 Хун пӑ хŏԓ Ԓўв эԓтэԓ хӑншәм ŏт тӑԓаӈа версэԓ, йўх эԓты иԓ ўймеԓ йўпийән, хŏшапәӈ кев ԓыпийа Ԓўвеԓ пŏтсэԓ.

30 Туп Турәм пӑрәм эԓты Ԓўвеԓ нŏх ԓыԓӈатсәԓы.

31 Ԓўв ар хӑтәԓ хўват щитәта этԓыйәс, хŏй Ԓўв пиԓәԓән Галилей эԓты Иерусалима этәс пӑ хŏй ин мир йэԓпийән Ԓўвеԓ вантәм ŏтәта уԓԓәт.

32 Пӑ мўӈ нынана Йӑм Айкеԓ йастәԓув: ащиԓува аԉәм вер, Турәм мўӈева тӑԓаӈа версәԓы, ԓыв ԋаврэмԓаԓа, Иисус нŏх ԓыԓӈатман,

33 хŏты пӑ кимет псаломән* 13:33 псалом - йэмәӈ ар Библияйән; хӑшман уԓԓа: 'Нӑӈ Ма Пŏхем: Ма ин Нӑӈен сэма пайәтсэм'.

34 Ԓўвеԓ пӑрәм эԓты нŏх ԓыԓӈатмаԓ йўпийән, щишән Ԓўв шимты ӑт питәԓ, тӑм эԓты щиты йастәс: 'Ма нынана, Давида аԉәм йӑмԓам мӑԓәм, йӑна'.

35 Щишән па тӑхайән па пŏтәртәԓ: 'Йэмәӈ Нӑӈ Ŏтэна шимты щир шийаԓәты ӑт мӑԓэн'.

36 Давид, ԓўв пŏрайәԓән Турәм ԓӑӈхаты щир хўват вермаԓ йўпийән, пӑрәс, пӑ ԓўв ащиԓаԓ хŏща пŏтса, пӑ шимты вер шийаԓәс;

37 Тўми, Хŏй Турәмән нŏх ԓыԓӈатса, шимты вер ӑт шийаԓәс.

38 Щишән, хӑнам йох, ма ԓӑӈхаԓәм, нын ат уйәтсәԓән, Ԓўв урӈәԓән нынана кӑрэк йŏрэмәты щир такан аԉԓа;

39 пӑ мўй хŏща иса, нын Моисей законән вещкат щира пайтәсты ӑт верәтсәты, щит хŏща кашәӈ эвәԓты ŏт Ԓўв хўватәԓән вещката пайтәсәԓ.

40 Шаващаты малы, Турәм айкеԓ туты хŏйатәт хŏща йастәм ŏт нынана аԓт хойәԓ:

41 'Вантаты, укщәпԓәты ŏтәт, ощатыйаты пӑ хŏԓт пеԓа ушаты; Ма нын хӑтәԓԓәнын щимәщ вер верԓәм, щит мӑтты хŏйатән нынана пŏтәртса ки, нын ӑт эвәԓсәты ԓуԓән'».

42 Ԓын иудейәт пойәкщәты хот эԓты ким этман пŏрайән па рут йохәтән па шаббат хӑтәԓән щит эԓты пŏтәртты партсайӈән.

43 Хун пӑ ӑктәщийәм хŏйатәт лакки эсәԓсайәт, ар пеләк иудей йох пӑ па рут эԓты иудейәт щира эвԓәптәм Турәм пеԓа сӑмәӈ ŏтәт Павел пӑ Варнава йўпи туԓәт. Ԓын, ԓыв пиԓԓаԓән пŏтрэмәман, ԓывиԓаԓ Турәм йӑм хŏща уԓты нŏмәс такапсәтән.

44 Па шаббат хӑтәԓән вош тэԓ мир Турәм йасәӈ хуԓәтты хŏԓ ӑктәщәс.

45 Туп иудейәт, мир шийаԓәмеԓ кемән, ԓоԓәмты нŏмәсән тэкәтсайәт пӑ, кӑткўтән уԓман пӑ ўӈращтыман, Павел пŏтәртты верәт пеԓа ўра вортты питсәт.

46 Щиӈәԋща Павел пӑ Варнава такан йастәсӈән: «Нынана оԓәӈән Турәм йасәӈ пŏтәртты мосәс, туп хŏты нын Турәм йасәӈ пўӈԓа ушиԓԓән пӑ нынан нын и пўша уԓәпсайа ӑт рӑхтыйа верԓәԓән, щишән, мўӈ па рут йох пеԓа йастәԓув».

47 Тӑмиты Турәм Куща мўӈева йасәӈ хӑйәс, щишән: 'Ма Нӑӈен па рут йоха нŏви кеша пŏтсэм, Нӑӈ, нŏх пайтәсты щир урәӈән, мўв сŏхәнты унты ат усән'.

48 Па рут мир, щит хуԓман, амтәтԓысәт пӑ Турәм Куща йасәӈ ишәксэԓ, пӑ хŏԓыйэ, хŏй и пўша уԓты уԓәпсайа пирысайәт, эвәԓсәт.

49 Щӑԓта Турәм Куща йасәӈ щи мўв ԓŏватән лакки ԓӑрпиԓәс.

50 Туп иудейәт, Турәм пеԓа сӑмәӈ, ԓӑтәӈ нэӈәт пӑ вошән ŏха уԓты хŏйатәт хўщмәмеԓ йўпийән, Павел пӑ Варнава пеԓа воштәты нŏмәс версәт пӑ уԓты тӑхайән эԓты ԓынан воштәсэԓ.

51 Ԓын пӑ, кўрԓын эԓты хиш ԓывиԓаԓа пӑркатман,† 13:51 кўрԓын эԓты хиш ԓывиԓаԓа пӑркатман - щит ԓывиԓаԓ атма айәԓты пос; Икония воша мӑтсәӈән.

52 Утәԓтәты йох пӑ амәтән пӑ Йэмәӈ Ԓыԓән тэкәнман усайәт.