1 Кесария вошән и ху ус, нэмәԓ Корнилий, Италийский когорта* 10:1 когорта (италийский) - щит хутсот арат ԉаԉ йох; кўт эԓты уԓты сот ԉаԉ йох куща,

2 хот тэԓәԓ пиԓән Турма эвәԓты хŏйат пӑ Турәм эԓты пӑԓты хŏйат, мира ар йӑм верыԓыйәс пӑ иса Турәм пеԓа пойәкщәс.

3 Ԓўв вантәм щирәԓән хӑтԓәԓән йӑрәтйаӈ щос кемән Турәм ангел тŏрԓы ватсәԓԓы, ԓўв хŏщайәԓ ԓŏӈәс пӑ ԓўвеԓа йастәс: «Корнилий!»

4 Корнилий пӑ, ԓўв пеԓайәԓ аӈкәрмәмаԓ пӑ хŏԓт пӑԓтамәмаԓ кемән, йастәс: «Мўй, куща?» Ангел ԓўвеԓа йŏхԓы йастәс: «Нӑӈ пойәкԓан пӑ нӑӈ меԓащԓан Турәм хŏща нŏпса питсәт.

5 Щӑԓта, хŏйатәт Иоппия воша кита пӑ, Петрайа айәԓты, Симон вохи.

6 Ԓўв Симон ԋўки ԓэщатты ху хŏща мойԓәԓ, ԓўв хотәԓ щарәс питарән уԓ; ԓўв нӑӈен щи йасӈәт йастәԓ, мўй йурән нӑӈ нŏх пайәтԓайән пӑ нӑӈ хот тэԓэн па».

7 Хун, Корнилий пиԓән пŏтәртәм, ангел йэԓ мӑнәс, ԓўв митйохԓаԓ эԓты кӑтән пӑ ԓўв пўӈԓәԓән уԓәм Турма эвәԓты ԉаԉ ху вохсәԓы

8 пӑ ԓывиԓаԓа иса хŏԓ пŏтәрмаԓ йўпийән, ԓывиԓаԓ Иоппияйа китсәԓы.

9 Кимет хӑтәԓ, хун ԓыв шушсәт пӑ воша ванамәты питсәт, Петра хут щос кемән хот ԓоӈԓа нŏх хуӈхәс, пойәкщәты урәӈән.

10 Щӑԓта ԓўв сӑмәԓ вохты питса, пӑ ԓэты ԓӑӈхаса. Щи кўтән, ԓэтот ԓэщатты эԓты, ԓўвеԓа ватты щир ус

11 пӑ ваттаԓән пел пўншаԋщәм турәм хӑр пӑ ԓўв хŏщайәԓ иԓ эсԓәщты мŏԓты пўт, ищи мӑтты ун сŏх, ԋӑԓ щуӈәԓ сӑхат йӑрман уԓԓа пӑ мўва иԓ эсәԓԓа;

12 щи ԓыпийән кӑмән хŏрпи ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт.

13 Пӑ ԓўвеԓа тўр сый ус: «Петра ԓойа, веԓа пӑ ԓэва».

14 Петра пӑ йастәс: «Ӑнтом, Турәм Куща, ма нэмәԓты пŏрайән нэмәԓты атәм мўй пӑ ӑнта сыстам ŏт ӑт ԓавәнтысәм».

15 Щиӈәԋща кимет пўш ԓўвеԓа тўр сый ус: «Мўй Турәм сыстапсәԓы, щит атма мўй пӑ ӑнта сыстама нӑӈ аԓ ԓўӈты».

16 Щит хуԓәм пўш ус, – щӑԓта пўт турма па нŏх эԓәтса.

17 Хун пӑ Петра ԓўв турмәԓән ощатымаԓән, ԓўв вантәм щирәԓ, щит а мўй, – Корнилийән китәм йохәт, Симон хŏт эԓты иԋщәсман, вана йŏхәтсәт пӑ пушас овән иԓ ԓойсәт.

18 Ўваԓман, ищмәсэԓ: «Петрайа айәԓтты Симон мўй тӑта?»

19 Петра вантәм ŏтәԓ эԓты нумисытаԓ кўтән, Йэмәӈ Ԓыԓ ԓўвеԓа йастәс: «Тӑм, хуԓәм хŏйат нӑӈен кӑшԓәт;

20 ԓойа, иԓ ŏхԓа пӑ ԓўв пиԓԓаԓән, йэша нэш ӑт нŏмәнԓыман, мӑна; ԓывиԓаԓ Ма китсәԓам».

21 Петра, Корнилия эԓты ԓўв хŏщайәԓ китәм хŏйатәт хŏща иԓ ŏхԓәс пӑ йастәс: «Mа щит, хŏй нын кӑшԓәты; мўй вер урәӈән нын йŏхәтсәты?»

22 Ԓыв пӑ йастәсәт: «Корнилий сот ԉаԉ йох куща, йӑм сӑмпи пӑ Турәм эԓты пӑԓты ху, иудея мирән хŏԓ йӑма нумман тӑйԓа, йэмәӈ ангел эԓты ԓўв хотәԓа нӑӈен вохты партәпса йŏхтәс пӑ нӑӈ пŏтәрԓан хуԓәтты».

23 Щиӈәԋща Петра, ԓывиԓаԓ йŏхи вохмаԓ йўпийән, ԓапәтсәԓы. Кимет хӑтәԓ пӑ нŏх киԓмаԓ кемән, ԓыв пиԓԓаԓән мӑнәс, тухәԓ Иоппия хӑнам йох па ԓўв пиԓәԓән мӑтсәт.

24 Йухәт хӑтәԓ ԓыв Кесарияйа йŏхәтсәт. Корнилий пӑ, ԓўв рутԓаԓ пӑ ван пиԓ йохԓаԓ и йӑха вохман, ԓывиԓаԓ ԓавәԓсәԓы.

25 Хун Петра йŏхи ԓŏӈты ўтщийәс, Корнилий ԓўв хŏщайәԓ йэщаԓт этәс пӑ ԓўв кўрԓаԓ шŏма шанша керәптыман, иԓ ԋўрәс.

26 Петра пӑ ԓўвеԓ нŏх ԓощәԓтәсԓы, пŏтәрман: «Нŏх ԓойа; ма ищи хŏйат».

27 Пӑ, ԓўв пиԓәԓән пŏтрэмәман, хота йŏхи ԓŏӈәс пӑ ар ӑктәщәм хŏйат уйтәс.

28 Щӑԓта ԓывиԓаԓа йастәс: «Нын уйәтԓәԓән, иудея хŏйата па сыр хŏйат пиԓән пŏтрэмәты пӑ вана рӑхиԓыты ӑт рӑхәԓ; туп мӑнэма Турәм аԉәс, ма и хŏйат нэш атма мўй пӑ ӑнта сыстама ӑт ат ԓўӈәтсәм.

29 Щишән ма, хун вохсайәм, пӑ йŏхи ӑт ԋŏсәрщәман йŏхәтсәм. Щӑԓта, иԋщәсԓәм: Мўй вер урәӈән нын мӑнэм вохсәԓән?»

30 Корнилий йастәс: «Ԋӑԓмет хӑтәԓән ма тӑм щос унты вўщԓәсәм пӑ йӑрәԏйаӈ щос пеԓа мӑнәмән йŏԓән хотэмән пойәкщәсәм; щӑԓта щи, ма йэԓпемән нŏвийән ворԓәты ԓумтәӈәӈ ики этәс

31 пӑ пŏтәртәԓ: 'Корнилий! Нӑӈ пойкен хуԓса пӑ меԓащԓан Турәм хŏща нумәԓмәсайәт'.

32 Щиӈәԋща, Иоппияйа кита пӑ Петрайа айәԓты Симон вохи: ԓўв ԋўки верты ху Симон хотән щарәс питарән мойԓәԓ; ԓўв йŏхәтәԓ пӑ нӑӈена йастәԓ'.

33 Ищи кумат ма нӑӈ хŏщайэн китсәм, пӑ нӑӈ йӑма версэн, йŏхәтсән. Ин мўӈ хŏԓ Турәм йэԓпийән ԓойԓув, мўй нӑӈена Турәм эԓты партман уԓ, иса хŏԓ хуԓәтты урәӈән».

34 Петра ўӈԓәԓ пўшсәԓы пӑ йастәс: «Йӑна мŏштәԓэм, Турәм веш пеԓа ӑт ватәԓ,

35 туп кашәӈ мир хŏща Ԓўв эԓтэԓ пӑԓты ŏт пӑ тўӈа–щира уԓты ŏт Ԓўвеԓа рӑхи.

36 Ԓўв Израиль пŏхәта йасәӈ китәс, пайԓы уԓәпса Иисус Христос сӑхат аԉәс; Тӑм хŏԓ хŏйатәта уԓты Турәм Куща.

37 Нын Иудея ԓŏватән, Галилея эԓты ўйман, Иоаннән утәԓтыйәм йиӈка ԓŏӈәԓтыты вер йўпийән, уԓәм верәт уйәтԓәԓән:

38 Хŏты Турәм Назарет эԓты уԓты Иисус Йэмәӈ Ԓыԓән пӑ йурән ԋŏсәтсәԓы. Пӑ Ԓўв йӑм верман пӑ хŏԓ хŏйатәт, хŏй хиԋән катәԓман усайәт, тўмтака верман, йӑӈхәс, Турәм Ԓўв пиԓәԓән ус, щишән.

39 Мўӈ пӑ щит хŏща иса вантәм ŏтәт, мўй Ԓўв Иудея мўвән пӑ Иерусалимән верәс, пӑ мет йухәт Ԓўв, акԓа нŏх сэкман, пӑратса.

40 Турәм хуԓмет хӑтәԓән Тӑмен нŏх ԓыԓӈатсәԓы, пӑ Ԓўвеԓа этԓыты щир мӑс

41 ӑнта хŏԓ мира, туп вантәм ŏтәта, Турәм эԓты пирыйәм хŏйатәта, мўӈева, пӑ мўӈ Ԓўв пиԓәԓән ԓэсув пӑ йищсув, щи йўпийән, хун Ԓўв пӑрмаԓ эԓты нŏх ԓыԓәӈԓәс.

42 Щӑԓта Ԓўв мўӈева мира пŏтәртты пӑ вантәм ŏтәта уԓты партсәԓы, Ԓўв Турәм эԓты ԓыԓәӈ пӑ пӑрәм хŏйатәта Сўта уԓты пŏнәм Ŏт.

43 Ԓўв эԓтэԓ хŏԓ Турәм айкеԓ туты хŏйатәт аԉԓәт, кашәӈ Ԓўвеԓа эвәԓты ŏт Ԓўв нэмәԓән кӑрэк йŏрэмәты щир мŏщатәԓ».

44 Хун Петра хŏԓна щи пŏтрәԓ йэԓԓы тусԓы, Йэмәӈ Ԓыԓ кашәӈ йасәӈ хуԓәнтәм хŏйата эсԓәщәс.

45 Пӑ Петра пиԓән йŏхтәм, иудейәт эԓты эвәԓты ŏтәт ӑԓ пакнысысәт, Йэмәӈ Ԓыԓ мойԓәпса па рут йоха па эсәԓман уса;

46 ԓыв хуԓсәт, хŏты щитәт па йасӈәтән пŏтәртсәт пӑ Турәм вŏԓаӈа айәԓтсәт, щишән. Щиӈәԋща Петра йастәс:

47 «Хŏй щитәта йиӈка ԓŏӈәԓтыты ӑт эсәԓты верәтәԓ, хŏйтат, мўӈ итэвән Йэмәӈ Ԓыԓән мойԓысайәт?»

48 Щӑԓта ԓывиԓаԓ Иисус Христос нэм хўватән йиӈка ԓŏӈәԓтыты партсәԓы. Щи йўпийән ԓыв ԓўвеԓа кӑмәтса хӑтәԓ ԓыв хŏщайэԓ уԓты вохсэԓ.