Ụ́ꞌdụ́kọ́ Múké Múngú vé rị Mãtáyo 1

Ụ́ꞌdụ́kọ́ múké

Mãtáyo

ní sĩí rĩ

Tã búkũ rĩ vé rĩ ã ũlũngárá

Mãtáyo ri Yẹ́sụ̃ vé ꞌbá áyúãyũ mụdrị́ drị̃ ni ị̃rị̃ rĩ pi vé ọ́gụ́pị. Tã ã pá ãmbúgú ĩri ní búkũ ꞌdĩri sĩzú rĩ, lẽ lũú Yãhụ́dị̃ rĩ pi ní kínĩ, Yẹ́sụ̃ ri ꞌbá ꞌbâ paápi ni, (ĩri Mãsíyã) Múngú sõ ũyõ ni nĩ, ĩpẽ Yẹ́sụ̃ ri ímụ́ kộpi ní. Sẽ búkũ rĩ vé íꞌdóngárá gá, Mãtáyo ní rụ́ Yẹ́sụ̃ ẹ́ꞌbị́pị́ị vé rĩ sĩzú ãní, búkũ rĩ agásĩ céré, iꞌda kĩnĩ, tã nẹ́bị̃ rĩ pi ní ũlũú búkũ Múngú vé Ũndĩ Ụ̃kụ rĩ rụzú rĩ agá rĩ, tã ni nga ꞌi fũú tị ni gé gí Yẹ́sụ̃ ã rụ́ꞌbá gá.

Mãtáyo ũlũ kpá ꞌbá ní tã Yẹ́sụ̃ ní ímbá kínĩ, mãlũngã Múngú vé rĩ ĩri adri ꞌbá tã Múngú ní lẽé rĩ ꞌdụꞌbá ngaꞌbá rĩ pi vé ni ãngũ rĩ pi agásĩ céré ꞌdĩri rá. Cápĩtã 5-7 agá, Yẹ́sụ̃ ri mãlũngã Múngú vé rĩ vé ífífí ũlũú. Cápĩtã 10 agá, ímbá tã mãlũngã rĩ ní ímụ́zú ꞌi írézú mụzú vũ drị̃gé sĩ rĩ vé tã. Cápĩtã 13 agá, ímbá mãlũngã rĩ vé tã nãpí sĩ. Cápĩtã 18 agá, ímbá lẹ́tị ꞌbá ní adrizú mãlũngã Múngú vé rĩ agá rĩ. Cápĩtã 24-25 agá, iꞌda lẹ́tị mãlũngã Múngú vé rĩ ní ímụ́zú vũ drị̃gé nõgó rĩ.

Búkũ ꞌdĩri ũlũ úꞌdógúꞌdógú Yẹ́sụ̃ vé adrizú rĩ. Búkũ rĩ vé íꞌdóngárá gá, ũlũ Yẹ́sụ̃ vé tịngárá, ĩrivé bãtízĩmũ ã rụngárá, ãzini tã ãdróko ní ĩri ụ̃ꞌbị̃zú rĩ. Ũlũ kpá tị ĩri ní sẽé rĩ ã tã, tã ĩri ní ímbá rĩ ã tã, ãzini tã ĩri ní ꞌbá ídrízú Gãlĩláyã gá rĩ vé tã. Búkũ rĩ agá, sĩkí ẹ̃cị̃ Yẹ́sụ̃ ní ngazú Gãlĩláyã gá, ĩri ní cazú Yẹ̃rụ́sãlémã gá rĩ vé tã, ãzini sĩkí tã ꞌi ngaápi rụ́ꞌbá ni gé sẹ̃bị́tị̃ ụ̃dụ̃ vé rĩ agá vũ drị̃gé nõgó rĩ vé tã. Búkũ rĩ vé ụ̃dụ̃ gé, sĩkí Yẹ́sụ̃ vé gbãngárá pẹtị alambaku sị́gé rĩ vé tã, ãzini ĩrivé íngángárá gõó ídri rú drãngárá gálésĩ rĩ vé tã.

Ẹ́ꞌbị́pị́ị Yẹ́sụ̃ vé rĩ pi ã rụ́

(Lúkã 3:23-38)

1 Ẹ́ꞌbị́pị́ị Yẹ́sụ̃ Kúrísítõ vé rĩ pi ã rụ́ ꞌdĩ, Yẹ́sụ̃ Kúrísítõ ri úyú Dãwụ́dị̃ vé ni, Dãwụ́dị̃ ri úyú Ãbũrámã vé ni.

2 Ãbũrámã tị Ĩsákã ri,

Ĩsákã tị Yõkóbũ ri,

Yõkóbũ tị Yụ́dã pi ẹ́drị́pị́ị be,

3 Yụ́dã tị Pẽrézĩ pi Zérã be, kộpivé ẹ́ndrẹ́pị Tãmárã ꞌi,

Pẽrézĩ tị Ẽzĩrónã ri,

Ẽzĩrónã tị Rámã ri,

4 Rámã tị Ãmĩnãdábã ri,

Ãmĩnãdábã tị Nãsónã ri,

Nãsónã tị Sãlĩmónĩ ri,

5 Sãlĩmónĩ tị Bõójã ri,

Bõójã vé ẹ́ndrẹ́pị Rábã ꞌi,

Bõójã tị Õbédẽ ri,

Õbédẽ vé ẹ́ndrẹ́pị Rụ́tã ꞌi,

Õbédẽ tị Yésẽ ri,

6 Yésẽ tị ꞌbãgú Dãwụ́dị̃ ri, Dãwụ́dị̃ tị Sõlõmónã ri, Sõlõmónã vé ẹ́ndrẹ́pị ĩri ọ́tụ́ ũkú Ụ̃rị́yã vé ni,

7 Sõlõmónã tị Rõbámã ri,

Rõbámã tị Ãbíjã ri,

Ãbíjã tị Ásã ri,

8 Ásã tị Yõsĩpátã ri,

Yõsĩpátã tị Yõrámã ri,

Yõrámã tị Ụ̃zị́yã ri,

9 Ụ̃zị́yã tị Yõtómã ri,

Yõtómã tị Ãkázã ri,

Ãkázã tị Ĩjĩkíyã ri,

10 Ĩjĩkíyã tị Mãnásẽ ri,

Mãnásẽ tị Ãmónã ri,

Ãmónã tị Yõsíyã ri,

11 Yõsíyã tị Yékóníyã pi ẹ́drị́pị́ị be lókí kộpi ní ápázú mụzú Bãbẽlónã gá rĩ gé.

12 Kộpi ní ápázú mụzú Bãbẽlónã gá ꞌdãlé rĩ ã vụ́drị̃ gé,

Yékóníyã tị Sãlĩtĩyélẽ ri,

Sãlĩtĩyélẽ tị Zẽrũbãbélã ri,

13 Zẽrũbãbélã tị Ãbị̃yụ́dã ri,

Ãbị̃yụ́dã tị Ẽlĩyãkímã ri,

Ẽlĩyãkímã tị Ãzórã ri,

14 Ãzórã tị Zãdókã ri,

Zãdókã tị Ãkímũ ri,

Ãkímũ tị Ẹ̃lị̃yụ́dã ri,

15 Ẹ̃lị̃yụ́dã tị Ẽlẽzárã ri,

Ẽlẽzárã tị Mãtánã ri,

Mãtánã tị Yõkóbũ ri,

16 Yõkóbũ tị Yõsépã Mãríyã ágó ni ri, Mãríyã ní Yẹ́sụ̃ ĩ ní zịị́ Kúrísítõ ri tịzú.

17 Íꞌdózú Ãbũrámã vúgá cazú Dãwụ́dị̃ vúgá, ca úyú mụdrị́ drị̃ ni sụ. Íꞌdózú Dãwụ́dị̃ vúgá cazú ĩ ní ꞌbá rĩ pi urụzú mụzú Bãbẽlónã gá rĩ gé, ca úyú mụdrị́ drị̃ ni sụ. Íꞌdózú ĩ ní ꞌbá rĩ pi urụzú mụzú Bãbẽlónã gá rĩ gé cazú Kúrísítõ vúgá, ca úyú mụdrị́ drị̃ ni sụ.

Yẹ́sụ̃ Kúrísítõ vé tịngárá

(Lúkã 2:1-7)

18 Yẹ́sụ̃ Kúrísítõ* vé tịngárá ĩri ꞌdíni, Yõsépã ãꞌyĩ Mãríyã Yẹ́sụ̃ ẹ́ndrẹ́pị ri jeé ꞌí ní ũkú rú. ꞌBo kộpi ní drĩ ĩ úmúzú trụ́ kuyé rĩ gé, ị́sụ́ Mãríyã ri ꞌa be, ꞌa ꞌdĩri Mãríyã ị́sụ́ Índrí Uletere rĩ† vé ũkpõ sĩ. 19 Yõsépã ní adrií ꞌbá tã be pịrị rĩ sĩ, lẽ tã ꞌdĩri áyú gúnyá agá drị̃njá sẽzú Mãríyã ní ku, ụ̃sụ̃ ꞌí ẹ́sị́ agá ꞌdãlé, ꞌí lẽ Mãríyã ri gãá, ꞌbá ãzi ã nị̃ ku. 20 Yõsépã kã tã ꞌdĩri ụ̃sụ̃ụ́ ꞌdíni, Úpí vé mãlãyíkã‡ ní ꞌi iꞌdazú ĩri ní urobí agá, ꞌyozú ĩri ní kĩnĩ, “Yõsépã Dãwụ́dị̃§ ã mvá rĩ, lẽ mî ru ku, ꞌí je Mãríyã ri mí ní ũkú rú, ꞌa ĩri ní ị́sụ́ ꞌdĩri, ị́sụ́ Índrí Uletere rĩ vé ũkpõ sĩ. 21 Ĩri ímụ́ mvá rĩ tĩ ágó, mi rụ́ ni ꞌda Yẹ́sụ̃ ꞌi, ãꞌdiãtãsĩyã ĩri ímụ́ ꞌbá rĩ pi pa ĩvé ũnjĩkãnyã agásĩ.”

22 Tã ꞌdĩri ꞌo ꞌi ꞌdíni, átángá Úpí ní átá nẹ́bị̃* tị gé ꞌdãri ã nga rí ꞌi fũú tị ni gé bẽnĩ. 23 Átángá rĩ kĩnĩ, “Ũkú kácáŋá rú ni ímụ́ ꞌa ị́sụ́, ĩri mvá ágó tị, kộpi ímụ́ rụ́ ni ꞌda Ẽmánũẽlẽ ꞌi.” Ífífí ni Múngú ri ꞌbá be trụ́.

24 Yõsépã kã aruú ụ́ꞌdụ́ gélésĩ, ꞌdụ tã rĩ ngaá sụ̃ Úpí vé mãlãyíkã ní ẹzịị́ ꞌí ní rĩ tị́nị, jị Mãríyã ri mụzú ꞌbẹ̃tị́ ꞌí ní ũkú rú, 25 ꞌbo kộpi úmúkí ĩ trụ́ kuyé cĩmgbá Mãríyã ní mváŋá rĩ tĩngárá gá. Mãríyã kã mváŋá rĩ tĩí, Yõsépã ní mváŋá rĩ ã rụ́ ꞌdazú Yẹ́sụ̃ ꞌi.

*1:18 1:18 Yẹ́sụ̃ Kúrísítõ: Rụ́ Yẹ́sụ̃ ꞌdĩri vé ífífí, Múngú ri ꞌbâ paápi rĩ. Kúrísítõ ri ꞌbá ĩ ní ũdu dãá drị̃ ni gé, lũzú kínĩ Múngú ĩpẽ ĩri adrií ꞌbãgú rú. Ẽbérẽ tị sĩ Kúrísítõ ri ĩ zị Mãsíyã. ꞌÍ lã Yũwánĩ 1:41.

†1:18 1:18 Índrí Uletere rĩ: Índrí Uletere rĩ Índrí Múngú vé ni. Búkũ Múngú vé rĩ kĩnĩ, Ẹ́tẹ́pị ri Múngú ꞌi, ĩrivé mvá Yẹ́sụ̃ ri Múngú ꞌi, ãzini Índrí Uletere rĩ Múngú ꞌi. Ẹ́tẹ́pị ri, Mvọ́pị ri, ãzini Índrí Uletere rĩ, kộpi Múngú ãlu. ꞌÍ lã Yũwánĩ 1:1-18; Yũwánĩ 8:41-42; Ẹ̃zị́ 5:3-4.

‡1:20 1:20 Mãlãyíkã: Mãlãyíkã rĩ pi índrí, kộpi ri adri Múngú be ꞌbụ̃ gé ꞌdãlé, kộpi rụ́ꞌbá ãkó. Múngú ri sâ ãzi sĩ kộpi ĩpẽ ímụ́ vũ drị̃gé nõó ụ́ꞌdụ́kọ́ múké ívé rĩ ũlũ ꞌbá rĩ pi ní.

§1:20 1:20 Dãwụ́dị̃: Múngú ĩpẽ Dãwụ́dị̃ ri adrií ꞌbãgú Ĩsẽrélẽ rĩ pi vé ni, ẹzị kĩnĩ, ꞌbãgú úꞌdí ri ímụ́ ĩfũ ĩrivé úyú agá, ĩri mãlũngã rĩ rụ mụzú ꞌdániꞌdáni, ꞌbãgú rĩ Yẹ́sụ̃ Kúrísítõ ꞌi. ꞌÍ lã Sãwụ́mã 132:11-12; Ẹ̃zị́ 2:30. Tịkí Dãwụ́dị̃ ri ị́sụ́ ãkũdẽ ílí rĩ ca élĩfũ ãlu (1,000) gí, ílí ꞌdãri gé, ị́sụ́ tịkí drĩ Yẹ́sụ̃ Kúrísítõ ri kuyé. ꞌÍ lã 1 Sãmũélẽ 16-30; 2 Sãmũélẽ 1-24; 1 ꞌBãgú 1-2.

*1:22 1:22 Nẹ́bị̃: Múngú ri ívé tã átá nẹ́bị̃ rĩ pi ní, kộpi kúru ĩrivé ụ́ꞌdụ́kọ́ rĩ ũlũ ꞌbá rĩ pi ní.

1:23 1:23 Ĩsáyã 7:14