1 Nagöre eede, nïïmö yeede ka asaasa ana eedi dhorro ya aꞌda tafara ka Masala neede aꞌda a kadu ma Israyil toolonadene. 2 Niji aꞌa taguꞌdaana ka nanggeedi neene ma Masala, lakiini taguꞌdaana ka nanggeedi neene taalo kama tussu eema. 3 Eege taalo kussu fïïnï ya Masala ka amana kadu kaꞌdiila nja oono, kaꞌbꞌba tanangnga nanggeyi neene kaꞌdiila unggodho eege, eege taalo kamma ka fïïnï tiya Masala ka amana kadu kaꞌdiila. 4 Almasiihi iꞌi yungngo eere ma Serïye, amang ka ömöꞌdï tiya amma kini ya, taꞌdiila nja Masala.

5 Kudumma Müüsa ka takiki aꞌda, “Ara ömöꞌdï taꞌdiila ka serïye nya, ömöꞌdï ya ümmü tumma ma serïye ya ara tefe ka ꞌdï iini.” 10.5 Lawi 18.5 6 A taꞌdiila a tamma ka Masala kiki, “Fa tiki ka eedi tiya üüdü aꞌda, Mada iꞌi yungngo ara tasïrö co ꞌdotomboꞌdo?” 10.6 Serïye ya eera ya 30.13 anangnga Almasiihi ka ööꞌdö kaja kuꞌbu. 7 Nja, “Ömöꞌdï tiya taꞌdïnggö co ööye?” 10.7 Serïye ya eera ya 30.13 nja iini ka anangnga Almasiihi ka ööꞌdö ndama inde. 8 Lakiini iki aꞌda minna? “Tumma ka kete küdü ka nïïnö nja eedi.” 10.8 Serïye ya eera ya 30.14 Eege ka tumma ma tamma naaja ka tadünügü co kadu no. 9 Küdü kara teema ana onggoꞌdo tammo üüdü aꞌda Yasu Uugaara, namma ana eedi tiya üüdü aꞌda Masala manangnga iꞌi ka fïkïꞌdö ndama inde ya ara oꞌo toolonadene. 10 Tamma ana eedi kara tanangnga aaga ka ꞌdiila nja Masala a tumma a nanggoꞌdo tanangnga ömöꞌdï ka toolonadene. 11 Sorne ma Masala iki, “Ömöꞌdï ya amma kini taalo ataama.” 10.11 Asaiya 28.16 12 Taalo taꞌbakala kada ka Yahüüdü nja ömöꞌdï tiya taalo a taga Yahüüdü ya kudumma Masala tammo eene nyeꞌdꞌde, mamana eema a kadu tanno amma kono no nyeꞌdꞌde kungngo. 13 Kudumma, “Ömöꞌdï ya amma ka eere ma Uugaara ya ara toolonadene.” 10.13 Jüwiil 2.28–32

14 Eege kara tümmünü oogo nya aꞌda taalo kamma kono? Kara tamma kono nya aꞌda taalo kaföönyö? Kara taföönyö nya aꞌda taalo ömöꞌdï ma tagadünügü eene? 15 Eege kara teema nya ara taalo Masala magürünü iꞌi? Afa ma sorne ka tiki, “Kaꞌdiila uune no kadu tanno adünnü tumma ma Masala no.” 10.15 Asaiya 52.7 16 Lakiini taalo eege ïnꞌdïlï kamma ka tumma tanno Masala, kudumma Asaiya ka tiki aꞌda, “Ka Uugaara, mada iꞌi yungngo ara tamma ka tumma tanno aja?” 17 Kamma ka tumma ma Masala aja kara taföönyö tumma na Almasiihi. 18 Lakiini ara aꞌa tiki aaga, taalo kaföönyö? Kaföönyö sorne iki,