Aaleluya (Hallelujah) - A vapaling aanabeꞌ ve ti lana pok Hibru e a malasuf ina a malaan: Nangus a Piran! A xavil ina vapaling ‘halle’ a toxan a malasuf ‘naangus’, e ‘ya’ a savat ti la tangpat ina vapaling Yah-weh, a saxa isina Piran e a toxan a malasuf malaan: “ne waan”. Senaso laso ta buk yaan o bina no vubuk ferawai xe sina, nane taxa waan.

Angelo (Angel) - Lana pok Griik a vapaling aanabeꞌ a toxan a malasuf ina malaan: ‘mataa ina lisan a lagasai’ o ‘fefeng.’ Lana pok bina sitaara layaan no xalum a vapaling aanabeꞌ i taxa kuus pana mu vovau aava ri sisiak sina Piran.

Baali (Barley) - Saxa buk fanganan a faasilak malaan sena rais o wiit, taasaxa bret ina pife roxo temasaat e a mamareiai ina pife molava temasaat e voxo a mu valagof ri fuuna maraane. Saxanu yaan maam xalie pana ‘rais baali.’

Babilon (Babylon) - A saxa bina lava aava fo waan la nobina taara xalie pa Iraak tanin. Kavai a toxan a saxano rabuna pave aava ri texaas faagut sena vilaana ina neng e ri fuuna neng punuk a rabuna. A kaalum malaan a Piran taxa ferawai paap pana bina aanabeꞌ e a isin aanabeꞌ taxa fakalimaan a saxa gavaman saat paaliu aava i taa savat la yaan fataxapiak. A Piran i taa kawaasan a bina e mu rabuna aava ri taagul lana. (Kf palagasai 18 e 19)

Bilsibul (Beelzebul) - Saxa isina paamua sina mu vovau saat, na Setan.

Bret Maanaa (Manna) - La yaan ina sangasan sina mu Juda pe la xobingil, a Piran a tavai nari pana fanganan xari. A fanganan aanabeꞌ a modak malaan sena toea e sivimaan ti la xunavata. Ri pife faxuvul a bret maanaa la Yaan ina Fangaafusan, taasaxa la xasano paanen ri faxuvule. La yaan paamuina Yaan ina Fangaafusan ri faxuvule fexaxaas sena yaan taragua. (Tln 16:4-5)

Donki (Donkey) - Saxa tiir malaan sena ‘hos’ modak aava mu Israel ri fuuna nai e timin a maana mo siri xuluna xena falet xolai. Na Yesus a laak xe lana Jerusalem xuluna donki malaan seꞌ na Aisaia fo kuus fatuxai sena. (Ais 62:11)

Fasufan (Baptism) - A vapaling aanabeꞌ fuuna ferawai pana vilaana sina mu lotu layaan ri taa fadui a mataa lapaana raarum. (A mu popo mi pi fadui nari lapaana raarum, mi fuuna fatuluk mon a raarum la nori.) A vilaana malaan a fakalimaan o a mataa aave i taxa puk tapin nane xa xasena mu vilaana saat xe sina Piran. (Mk 1:4)

Fatataganan Sina Piran (the Kingdom of God) - A mu rabuna aava ri namkai se Yesus, a Natuna Piran, ri waan la fatataganan sina Piran. E voxo a Piran i taa faxatang faroxoi nari; i taa fakaxup nari sena saatan e tavai nari pana maana mo xena waanan siri nabeꞌ la xavala e mui la xunavata. A mu rabuna tatagan, ri taa usi fatak a Piran e sangas la salan sina. Ri taa nanguse mon e kuus fati a isina. Ri taa kuusan fasavat a Ferawaian sina e fapiti a xasanofuna pana vilaana sina talo ri taa savat fefeng sina sait. Saxano yaan sait ri xalie pana Fatataganan ti la Xunavata. Na Yesus a ferawai paap faaxaves xena xuus fatexaas a rabuna pana vilaana ina fatataganan aave. (Matiu 13, Matiu 21 e Luuk 15)

Fefeng si Yesus (Disciples) - A maana mu rabuna aava ri buk usi na Yesus, maam xali nari pana mu fefeng sina senaso a faisok sina maana rabuna aava ri namkai ve a malaan: ri taa nai lapaana fepitaian se Yesus e ri taa fe kuusan fasavate xe sina xasano rabuna. Nari aava na Yesus a bur nari xena waan xuvul pana, nari sangafilu saxa pana taragua, taara xali nari pana mu yaamut sina.

Fenamo sina mu Juda (Jewish Feasts) - Lana mu vuputkai si Moses a Piran a ferawai faagut xe sina mu Juda o ri taa savat xe sina pe Jerusalem xe lana fenamo molava talatul la maana mariaas xapiak. (Tln 23:14) Na Yesus xuvul pa ninana e tamana, rutul usi a vuputkai si Moses e rutul laak xe Jerusalem pana Fenamo ina Paaliuan. (Lk 2:41-48)

Ferasi (Pharisee) - A mu Ferasi ri fuuna usi fatak a maana vuputkai ina lotu sina mu Juda. A malasuf ina isiri a malaan: nari aava ri waan patak o a mu failai. Ri bai faxuvul xuvul pana saxano rabuna aava ri pife Juda e ri pife faamamaas sena mu Juda aava ri pife lamon malaan seri.

Ferawaian (Word/Speech) - A vapaling aanabeꞌ toxan a maana malasuf. Layaan a savat malaan: ‘Ferawaian sina Piran’ a malasuf ina a saxa kuus fatuxaian o a Xakalayan ti Kavai. E saxano yaan a rabuna aava ri xalei a mu lagasai aanabeꞌ ri xali na Yesus pa Ferawaian senaso nane fuuna kuusan fasavat e faxalit a vilaana tuuna sina Piran.

Frankinsens (Frankincense) - A vulut pasak ina saxa buk wai e a vulut aave a toxan a lasan roxo. Ri fuuna faxuvule pana xasa mo aava lalas faroxo e ri farame. Lana lotu sina mu Katolik ri taxa usi a vilaana aanabeꞌ tanin. A vubun aava savat i taxa fakalimaan a fenungan sina mu rabuna aava ri namkai.

Hel (Hell/Hades) - A bina sina mu mamaat xapiak paamuina to faꞌulaian si Yesus. A kaalum malaan o a toxan a bina taragua lana: saxa ri xalie pana Bina si Abrahem aava bina roxo e saxa bina saat aava taara xalie pa Hel tanin. (Lk 16:19-31)

Hibru (Hebrew) - A pok bina sina mu Juda o Israel ri xalie pana Hibru e saxano yaan xasanofuna ri xali nari aava ri ferawai malaan pana Hibru vaxa.

Israel (Israel) - Saxa isina mu rabuna Juda o Hibru, a savat sena isina saxa buri. Layaan na Yaakop a vubuk usi tuunei a Piran, a Piran a tavaie pana isin aanabeꞌ.

Isop (Hyssop) - Saxa buk latan aava toxan a newai modus famodak pana maana fui la tana. Layaan a mu Israel ri faigot xena sinufan na Isip ri faxuvul a mu isop xena timin a ria ina natuna sipsip la xasing ina matana lifu siri.

Ivin ina Faraaman (Altar) - A mu Juda ri vesan a ivin ina faraaman pana faat o braas o gol. Xunamalei ina Tang Lifu Lotu a toxan a ivin ina faraaman molava xena faram a tatavai sina mu rabuna e lana Tang Lifu Lotu a toxan a ivin modak xena faram a vulut pana lasan roxo malaan sena frankinsens.

Juda (Jews/Judah) - Xasa isina mu Israel o mu Hibru malaan sena pok mono taxa kuus ‘Judaman’. A isin nabeꞌ a savat la yaan ina fakasanaman sina mu Israel xapiak, layaan a xasano pabung ti Israel, faasilak ri malit e a pabung Juda sang mon taxa waan lunai. A pabung aanabeꞌ a pabung sina piran ‘king’ na Devit, a bu Yosep narie Yesus.

Judia (Judia/Judaea) - A xavala sina pabung si Juda. Jerusalem taxa waan lana nobina aave.

Krais (Christ) - Nabeꞌ a vapaling ti lana pok Griik, layaan a mu Griik ri puk a vapaling Hibru, na Messia, i taa savat ‘Krais.’ A malasuf ina a malaan: nane aava fo buran o fo noxolan. A Piran fo bur na Yesus pana ngavuk ina maraan faꞌuliaana maana rabuna xapiak. Lana lotu sitaara tanin taara fuuna kuus: Kristus o Karisito.

Kaamel (Camel) - A saxa buk tiir sina rabuna ti la mu bina pe Israel. A faasilak rao i malaan sena bulmakau senaso a mu rabuna ri fexaxaas sena nai o timin a mo siri xuluna. A kaamel i taa sangas la nobina ruus la xobingil senaso pi maꞌiu fataapus.

Laion (Lion) - Saxa buk vupung aava waan lana bina sina mu Israel. A vupung aanabeꞌ a molava sena mataa e fuuna ngaapunuk a mu tiir xena fanganan sina. A mu mono ri xalie pana piran ‘king’ sina maana buk vupung.

Laion ti Juda (the Lion of Judah) - A saxa isin si Yesus Krais senaso a pabung sina va Juda e nane taxa waan a matalava paaliu ina.

Lak Tomexaan [Fatak] Sina (His [Only] Son) - Taara texaas o a Piran sitaara a Piran Saxa, taasaxa Piran Talatul ve na Tamataara, Natuna e a Vovau Xaradak. E vaxa a isin aanabeꞌ a saxa isin si Yesus, na Natuna, aava filimaan xe la xavala e falak a vipin ina mataa layaan na Maria a luxe. E voxo nane savat matatuuna, taasaxa nane ve Piran.

Lifu Ina Faxuvulan (Synagogue) - A Tang Lifu Lotu sina mu Juda taxa waan pe Jerusalem taasaxa pe la maana mu bina aava mu Juda ri taagul lana, ri toxan a lifu in faxuvulan. La maana Yaan ina Fangaafusan ri faxuvul pave xena lotu. E xasano yaan a mataa ina fepitaa o ‘Raabai’ fuuna fapiti a mu rafulak tomexaan lana e mu matalava ri fuuna faxuvul e ri irimai pave.

Malang (Light) - Malaan sena lang ina ngaas, taasaxa saxanu yaan a Xakalayan i taxa xali na Yesus pana Malang senaso nane faxalit a maana rabuna pana vilaana fatak sina Piran. A mu rabuna aava ri namkai se Yesus, ri fuuna sangas la malang e nari ve ri mu rafulak sina malang. E saxa yaan lumui nane sang i taa famalang a bina sina Piran, na Jerusalem faꞌui.

Malangan (Glory) - Lana Lagasai Roxo na Jon fo xaleie i taxa kuus o na Yesus ve a malang. A maana rabuna la yaan si Yesus ri pife fexaxaas sena xalum a malangan taxa waan xulu Yesus malaan sena saxano xaxaalua no fo xalume. Taasaxa a malangan aanabeꞌ a savat senaso na Yesus a pi fafaasaal paaliu e voxo nane siak a roxoyan sina Piran. Layaan nane taxa waan xuluna saxa put xuvul pana yaamut talatul sina e xuvul pa Moses narie Ilaija, a malangan tuuna a savat xuluna. E layaan i taa filimaan fulaa, a maana rabuna xapiak ri taa xalum a malangan sina Piran xuluna.

Maaradaang (Idol) - Pe la saxano bina a mu rabuna ri fuuna vesan a xaxaalua ina mataa o vupung o tiui o xasano mo e ri lotu xe sina. A Piran sitaara a marala faagut pana vilaana aanabeꞌ e i taa fakasanam a mu rabuna malaan senaso nane ve a Piran aava to, e a mu maaradaang aave, a rabuna mon ri vesan nari pana wai o faat o mo malaan.

Mataa - Layaan a Piran a vesan a rabuna nane vesan a tomexaan e tefin. E nane vesan nare talo re taa xaxaalua ina. A mu rabuna ri toxan a xavil talatul: ri toxan a vipin, ri toxan a xunus o viu e ri toxan a vovau. A vipin ina mataa a mo ti la xavala e i taa maat e masiik. Taasaxaa Piran i taa faigotan a vipin faꞌui xana mu rabuna aava ri namkai se Yesus. Nari aava piau, a mu angelo taa tapin nari xe lana Ulim Ina Fata Aava Taxa Raam Vulai lamina tiisaan nari.

Mataa Failai/Messia (Messiah) - A saxa isi Yesus Krais aava savat ti lana pok Hibru, a malasuf ina a malaan: a saxa aava Piran fo fanei pataxe. Nane waan la palou ina rabuna taasaxa nane a patak paaliu seri senaso a toxan a gutan sina Vovau Xaradak.

Mataa ina Kuus Fatuxai (Prophet) - La maana yaan vulai ti la tangpat a Piran a toxan a saxanu rabuna aava ri kuus fangaasik sena. A rabuna aave a Piran pana Vovau Xaradak sina, fuuna xel patak nari e tavai nari pana texaasan, masaman e gutan sina. Nane faxalit nari pana so ta vilaana o ferawaian nane vubuk o a maana rabuna ri taa usie o sena so ta buk mo ri taa savat lumui. A maana yaan xaves ri ferawai pana savatan si Yesus e a mataan sina. E vaxa ri ferawai pana fakasanaman i taa savat xuluna rabuna aava ri langai pesalai sena. Saxanu yaan a Piran a tavai a rabuna aave pana gutan ina vil a mo faꞌipul xena turoxoian a ferawaian siri.

Melkesadek - Saxa priis ti kavai sina Piran Tuuna. Nane vaxa a piran king ti Selem. (Hb 7)

Mo Tawaane Taap (Ark of The Covenant) - A mo aanabeꞌ a toxan a xasanu isina maan fulaa, taasaxa, a mo saxa mon. A mo aanabeꞌ taxa fakalimaan o a Piran taxa taagul la palou ina mu rabuna Israel layaan ri taxa usi fatak a mu vuputkai sina. Na Moses a xuus nari pana xakaaluman ina e mu rabuna ina vavesai ri vesane pana wai e ri xafute pana ‘gol.’ A mu priis ri fuuna fepaꞌusane layaan ri falet xe la xasano bina, taasaxa ri pife fexaxaas sena tawe senaso a mo aanabeꞌ ve a ivin sina Piran. A toxan a mo talatul lana: ro faat aava mu vuputkai sangafilu fo xaleian xulure, saxano ‘bret maanaa’, e a newai aava fuaa si Eron. E vaxa a toxan a xaxaalua ina ro angelo laaꞌui xuluna.

Mur (Myrrh) - A vulut ina saxa wai pana lasan roxo aava toxan a mamareiai molava paaliu. Saxano yaan ri faxuvul a vulut aanabeꞌ pana xasano mo aava musung ina a roxo paaliu e ri taa vesan a wel ina noxolan pana. A mu Juda ri fuuna timin a mur la mu mamaat.

Naart (Nard) - A saxa maxi aava ri vesane pana xarei e funa saxa buk latan. A latan aanabeꞌ a pife boak pe la bina sina mu Juda e ri maa lisane ti lasuun paaliu, e voxo a mamareiai ina a laaꞌui temasaat. A rabuna pana tangop xaves ri taa maraane xena noxol nari xa senaso a lasan ina a roxo paaliu.

Natu Devit (Son of David) - A Piran a kuus fanai xe si Devit o a bu Devit i taa nai vulai xuluna ivin ‘king’ si Devit. Na Yesus a natu Devit senaso nane waan lana pabung sina, a pabung Juda.

Natuna Mataa (Son of Man) - A isin aanabeꞌ taxa fakalimaan o na Yesus ve a mataa tuuna.

Natuna Sipsip (Lamb) - La Fenamo ina Paaliuan a mu Juda ri fuuna punuk a fomirak sipsip e ri siak a ria ina. Ri taa faigotan a meska ina sipsip aave xena fangan e ri taa timin a ria ina xuluna wai la matana lifu. A vilaana aanabeꞌ i taxa fakalimaan a yaan a saxa angelo sina Piran a ngaapunuk a mu rafulak tuaan sina mu Isip taasaxa liu a mu lifu sina mu Juda aava ri toxan a ria xuluna. Na Yesus a tatavai pana ria ina e voxo a maraleian sina Piran i taa liu netaara e pife kawaasan netaara aava taara namkai sena.

Nobina Taap (The Holy Place) - Saxa baat ina Tang Lifu Lotu aava mu priis mon ri fexaxaas sena laak lana xena vil a faisok siri. A bina aanabeꞌ a toxan a ‘Lam’, a Ivin ina Bret e a fomirak ivin ina faraaman xena faram a vulut pana lasan roxo.

Nobina Taap Xasingit (The Most Holy Place) - Xasa baat lana Tang Lifu Lotu aava toxan a Mo Tawaane Taap lana. A toxan a marapi molava aava fepatoxan a ro baat aanabeꞌ. A marapi aanabeꞌ a tivotan a mataa sena laak xe lana o kaalum lana Nobina Taap Xasingit. A memai priis sang mon a fexaxaas sena laak xe lana nobina naang faasaxa mon lana mariaas saxa, la Yaan ina Saf Tapin A Lalosaat. Nane fuuna lisan a ria ina tatavai xena saf tapin a lalosaat sina e sina mu rabuna.

Olif (Olive) - A saxa buk wai aava mu rabuna pe la bina Israel ri xapise lana uma siri. A toxan a xalana modak aava ri fuuna faigotane xena fangan. Ri fexaxaas sena mimit a xalana aave e siak a ‘wel’ ina xena faraam a laam, faigotan a fanganan e irin a maana buk viis.

Pabung si Livai (clan of Levi/Levites) - Na Moses nare Eron re waan la pabung si Livai. A Piran a fakalimaan a mu rabuna la pabung si Livai xena ri taa vil a faisok sina Piran lana lotu. Taasaxa nane fakalimaan a matafetama fatak si Eron xena vil a faisok ina priis. Xasanofuna lana pabung si Liviai ri xavang a mu priis pana faisok siri.

Priis (Priest) - A Piran a siak fati na Eron e mu buna xena vil fatak a faisok sina priis; a faisok ina tatavai e paamuian a mu rabuna xena nangus a Piran. Saxa iri i taa memai priis malaan se Eron. La yaan si Yesus, na Kaiapas a memai priis sina mu Juda. Na Tama Jon ina Fasufan a saxa priis e nane fuuna faisok pe la Tang Lifu Lotu pe Jerusalem pana fulun saxa mon lana mariaas saxa. Na Sekaraia e tefin sina, na Elisabet, nare xapiak re bu Eron. (Lk 1:5)

Salfa (Sulfur) - Saxa buk faat xiis aava waan faasilak a put i taxa put. Lana Ulim ina Fata a mo aanabeꞌ a mo i taxa raam e layaan i taxa raam a mafiu faagut.

Saniidrin (Sanhedrin) - A faxuvulan sina mu matalava ti Israel aava ri paamuian a mu Juda, malaan sena ‘Parliment’ sitaara tanin. La palou iri a mu memai sina mu Ferasi e mu Sedusi e mu mataa piran ti lana mu pabung xapiak sina mu Israel ri taxa waan. A xakatan iri a sangafilu pisiguak.

Sipsip Sina Piran (Lamb of God) - Saxa isi Yesus; i taxa fakalimaan o na Yesus a malaan sena sipsip aava ri punuxe xena tatavai pana lana Tang Lifu Lotu sina Piran. Ri fuuna siak a ria ina sipsip aave xena timine xuluna wai ina matana lifu la Yaan ina Paaliuan e vaxa xena kei tapin a lalosaat siri. Sena ria i Yesus a maraleian sina Piran i taa liu netaara aava taara namkai e vaxa i taxa kei tapin a lalosaat sitaara sait.

Tang Lifu Lotu (Temple) - Paamuina yaan ri vesan a Tang Lifu Lotu pe Jerusalem ri vesan a lifu lotu siri pana marapi e ri xalie pana ‘Tabernacle’. Layaan ri vesane ri usi fatak a xaxaalua aava Piran a tavai na Moses pana. A saxa faisok sina mu pabung si Livai, ri taa yaase lana faletan siri la xobingil. Lana mu yaan sina piran ‘king’ Solomon aava lak si Devit, ri vesan a lifu lotu tuuna pana faat e wai. A magaafan ina lifu aave a roxo paaliu. Mui a mu Babilon ri galase layaan ri faꞌonam a mu Israel. La yaan si Ezra narie Nehemiah ri vesan a fomirak Lifu Lotu pe Jerusalem. A Tang Lifu Lotu aava waan lana mu yaan si Yesus, na King Herot a vesane e a mu rabuna ina vavesai ri faisok pana mariaas sangafilu talafaat pana pisaxa xena vesanaana.

Tang-Vaaꞌul (Abyss) - A matana Ulim Ina Fata Aava Taxa Raam Vulai, a nobina ina fakasanaman e a nobina ina pis votan a saxano vovau saat fefexaxaas a yaan ri toxan a faisok. A bina aanabeꞌ a nobina aava Piran taa pis na Setan e tapine xe lana pana mariaas 1000. (Kf 20)

Tiir (Animals for Sacrifice) - Lapaana vuputkai aava Piran fo tavai na Moses pana, a mu Juda ri taa lisan a saxano bulmakau o sipsip o meme o vaalus xe sina mu priis. A mu tiir aanabeꞌ ri taa roxo paaliu pana piau ta mosaat la tari. A mu priis e nari mu pabung si Livai ri taa punuk a maana tiir e ri taa faram a xavil ina xe sina Piran e a meska aava waan lunai i taa siri xena fanganan. A ria ina mu tiir ri taa tiuane xe sina Piran senaso a toyan taxa waan lana ria e a toyan ve a mo sina Piran.

Turoxoian Faꞌui (New Agreement) - A turoxoian faꞌui a toxan a fufuna taragua malaan: a kuus fanaian sina Piran e a faisok si Natuna, na Yesus Krais. A Piran a vubuk rao i taa xel a rabuna talo ri taa faxuvul xuvul pana taasaxa toxan a lagafan molava malaan: a Piran a taap e xaradak xasingit e tang malangan e roxoyan sina taa galas xapin a maana mo xapiak aava pife malaan sena. A mu rabuna ri saat paaliu sena langai pesalaian siri e voxo a Piran i taa lisan nari faasilak la tana malaafaa? La ngusu Jeramaia (31:31) a Piran a kuus fanai o i taa vesan a turoxoian faꞌui talo a mu rabuna ri fexaxaas sena savat faasilak sina.

Turoxoian Xavai / Turoxoian Ti Kavai (Old Agreement) - A fufuna Turoxoian Xavai ve a maana vuputkai si Moses. Ti la palou ina maana rabuna xapiak a Piran fo siak fati na Abrahem e mu buna aava ri savat se Aisaak nare Yaakop xena waan a rabuna sina. E mui nane fatiginei na Moses xena paamuian a rabuna sina e xena kuusan fasavat a maana vuputkai aava mu rabuna taa usie tamo ri vubuk savat rabuna tuuna sina Piran. Taasaxa mu vuputkai aave ri toxan a gutan xena xafut mon a vilaana saat sina rabuna e xena fakasanam nari aava ri langai psealai e laxao nari. A vuputkai aave, ri piau ta gutan xena xavang a mataa o xul a xunus ina. E voxo la nugusu Jeramaia a Piran a kuus fatuxai o a Turoxoian Faꞌui i taa savat lumui. (Jer 31:31)

Ulim ina Fata [aava taxa raam vulai] (Lake of Fire) - A bina aanabeꞌ va bina ina fakasanaman. A Piran a vesane xena fakasanam a mu angelo saat aava ri langai pesalai sina. Taasaxa la yaan fataxapiak a Piran i taa tapin a maana xaiyaas xapiak sina, mu angelo e mu rabuna, xe lana. A bina ri xalie pa Hel e na Maatan sait, re taa tapinan xe lana. (Kf 20:11-15) A Ulim ina Fata aanabeꞌ a fataraguiaana maatan e tamo a isina mataa pife waan lana Buuk ina Toyan i taa tapinan xe lana.

Vovau Xaradak (Holy Spirit) - A fatalatulaana nona Piran lapaana Tamana e Natuna. Nane toxan a faisok ina puk a xunus ina maana rabuna e waan xuluna rabuna aava ri namkai xena vil faxaradak nari. Layaan na Yesus a laak xe si Tamana, nane feng a Vovau Xaradak xena xavang a mu fefeng sina e na Yesus a xalie pana Saxa ina Famaluluman. A Vovau Xaradak i taxa kuus xakaavang tuuna e fatak mon se Yesus.

Vupung Patak (the Beast) - A saxa sisiak lava si Setan aava i taa savat ti la palou ina rabuna, faasilak a fataxapiak ina yaan. A mataa aanabeꞌ na Setan taa fapirane xena paamuian a fatataganan sina nabeꞌ la xavala. I taa faxuvul a mu bina sangafilu xapiak lapaana gutan sina e i taa toxan a vulak xuluna putuna aava viis ina a fexaxaas sena punuxe, taasaxa piau i taa maaf faꞌulaa. A xasa isina mataa aanabeꞌ ve, a Xaiyaas si Krais (Antichrist). Nane taa fe nai la Nobina Taap Xasingit e taa malalava o nane ve a Piran. E fulaa nane kuus o a mu rabuna ri pife fexaxaas sena faasot o maraan a mo tamo ri piau ta fakalimaanan sina la nori o la mari.

Vupung Yaamut (the False Prophet) - Nane vaxa, a saxa sisiak si Setan e i taa ferawai malalava sena Vupung Patak. Na Setan i taa tavaie pana gutan talo i taa fasavat a maana mo faꞌipul. A mataa aanabeꞌ i taa fasei a mu rabuna o ri taa vesan a maaradaang ina Vupung Patak e ri taa lotu xe sina e layaan ri bai vile, i taa punuk nari.

Vuputkai (Law) - A vapaling aanabeꞌ a fuuna ferawai sena mu vuputkai aava Piran fatak a tavai na Moses pana. Taasaxa mu Ferasai ri pis faxuvul a mu fepitaian siri xuvul pana vuputkai aave e voxo ri fasavat a lagafan xana mu rabuna. A mu vuputkai sangafilu aava Piran a xaleie xuluna ro faat e tavai na Moses pana, ri malaan sena kam ina vuputkai senaso a maana buk vuputkai xaves ri savat seri.

Vuputuk (Circumcision) - A saxa vilaana sina mu Juda. Layaan a lak tomexaan a toxan a yaan pisiktul ri putuk tapin a fomirak xavil ina tana. Ri fuuna vil malaane xena fakalimaan o nari, ri mu rabuna sina Piran e ri usi a mu vuputkai sina.

Wain (Wine) - A raarum ina xalana wain o ‘grep’. A fuuna matoxol la fulun Septemba o Octoba e ri faxuvul a xalana aave e ri paas mimit nari e siak a raarum iri. Saxano yaan ri vesan a mo titifai pana tana meme e ri fulung a wain faꞌui xe lana e saxano yaan ri timine lana ‘botol’ molava aava ri vesane pana xavala. Ri fuuna num a wain e vaxa ri irin pana.

Xakaavangan Xatam (Grace) - A xakaavangan sina Piran aava i taa tavai palou netaara pana, taara taa pife maraane o faisok xena siaxe. A fufuna xakaavangan xatam taxa waan lana vubuxan xasingitan sina Piran. Nane vubuxan xasingit a mu rabuna senaso nane vesan nari e i taxa xel nari xena waan xuvul pana. A salan xena savat sina taxa waan pe Yesus Krais aava Piran fo fenge xena maraan faꞌuli netaara sena vilaana saat sitaara.

Xakalayan ti Kavai/Xakalayan Taap (Scripture) - Lana pok mono taara xalie pana ‘Olpela Testamen’. A toxan a Xakalayan si Moses lana, a xakalayan sina mu rabuna ina kuus fatuxai, a ‘buuk’ ina yanganan aava ri nangus a Piran pana, e a mu xuuskuus ina waanan sina mu Juda.

Xakalayan Si Moses (Pentatuch) - A mu ‘buuk’ pama mata aava ri waan lana Buuk Baibel, la Turoxoian ti Kavai (Old Testament). Lana pok Hibru ri xalie pana ‘Torah’ a malasuf ina ve, Fepitaian. Na Moses a xaleie xena xuus fatexaas a mu Israel pana mu vuputkai sina Piran e pana so ta mo a Piran fo vile xena xavang nari. 65 Xel patak (Sanctify)- A Piran a xel patak a rabuna xasena vilaana e vubuxanan ti la xavala xena savat rabuna sina. (Rm15:16) A rabuna, ri fanei patak nari xa o xasanofuna xena vil a saxa buk faisok. Lana buuk Faisok (13:2) a Vovau Xaradak a xel patak na Pol nare Baanabas xena vil a faisok aava Piran a fakalimaan nare pana. E netaara aava taara namkai se Yesus taara fuuna fanei patak netaara xa xasena maana mo ti la xavala talo taara taa piau ta lalosaat sena.

A mu Xavil (Fractions) - A Xakalayan Taap taxa ferawai sena maana buk xavil.

Xunavata (Heaven) - A bina sina Piran. Na Jon fo xalume e ferawai pana lana palagasai talafaat e pama ina Kuusan Fasavatan. Na Pol sait a xalume. (2 Kr 12)

Yaamut (Apostle) - Nari mu Sangafilu Saxa pana Taragua aava na Yesus fo siak fati nari xena tigina paamuin a xasano rabuna sina. Lamina maatan sina nari, ri taxa paamuian a mu tinoxol sina Piran e ri lisan a Lagasai Roxo xe sina xasano rabuna. Paamua na Pol a pife saxa iri taasaxa na Yesus fo bure pana ngavuk ina yaamut e fenge xena kuusan fasavat a Lagasai Roxo xe sina mu rabuna aava ri pife Juda.

Yaan ina Fangaafusan (Sabbath) - A fapisiguakaana yaan ina ‘wiik’ sina mu Israel. Lana yaan aave ri fuuna fangaafus mon, ri muneta faisok. Ri pife fexaxaas sena sung a fata o faf a fanganan, a faisok malaan ri fuuna vile la yaan paamua. Ri pife fexaxaas sena sangas lasuun, faasilak a kilamita saxa mon e ri muneta mamareiai o faasot pana saxa mo. Ri fuuna faxuvul mon xena lotu e nangus a Piran. Ri fuuna kat a ferawaian sina Piran e ri nai irimai mon. Tanin taara taxa xali a yaan aanabeꞌ pana ‘Sarere’. Saxanu yaan lava ina lotu siri, ri fuuna fakalimaane pana Yaan ina Fangaafusan sait.