1 Daji Isa misalnin wurawa adinwuyesoro manaduwu badiyeno. Tayiro: «Kam laa jǝrwu inabbe cǝde garje curodǝn bǝlaa ingi inabbe tuluwoye laje soro kuruwu juworoye kidando. Daji jǝrwudǝa jǝrwuwu laaro agǝrijiye bǝlawuroro sapkada. 2 Sa fǝrdoye kidǝnniya, nuwanju cuwandoro kaɍeanju laaa na jǝrwuwudǝyero kinodo. 3 Amma jǝrwuwudǝ tia cadane bakcane mukko dea duyera. 4 Koro walde kaɍea gade kinodo. Ti yea cadane kǝlanju bakcane tia basaryera. 5 Koro walde kaɍea gade kinodǝnniya, tia roro keyeso. Koro kaɍeawa gade kada kinodo. Laanjaa bakkera, laanjaa keyeso. 6 Kamnju falma tiro gapcuwo, tadanju jauro cǝraanadǝ. Darye tiye: «Tadaniro daraja cadi,» cǝne tia nanjaro kinodo. 7 Amma jǝrwuwudǝ kattenjan: «Adǝma warasamadǝ wo! Arowo tia yejiyo, warasadǝ kaandero walji!» yera. 8 Daji tia cadane roro ceyese ngawo jǝrwudǝyen gǝpkera. 9 To, kǝma jǝrwuyedǝ awi cǝdi? Ise jǝrwuwu ania roro ceje am gadero jǝrwunjudǝa ci. 10 Awo kitawulan ruwuwada adǝa kǝranuwwi wa?

12 Jawal tia taye majai duwon, jamadǝa riyera, dalilnjudǝ kǝlanjaman misaldǝa kidoro asujana nangaro. Daji tia koljane sapkadara.

13 Daji wurawa adinwuyesodǝ Isaro curo mananjuyen bǝlaa lajaa cane Farisawa laa-a am Mai Hirudussa jaana laa-aa nanjuro kenodo. 14 Kadiranniya, tiro: «Sayinna, ni kam jirema ye, wundumaa rinǝmbawo yero noniyena, dalilnjudǝ gayirnǝmbawo, jawal Alaye kalkallo yikkǝrami nangaro. To, Kaisarro* 12.14 Kaisar - Gomna kura Rombe. akki njodǝ halal ra haram? Yiye ra bare yiyende?» cane tia keworo. 15 Amma Isa nanmǝnafǝknjadǝa asuje tayiro: «Awiro wua rijamsuwi? Wuro dinariyus† 12.15 dinariyus - Wuɍi tilan akki biyajai. sukkudowo rukke!» cǝne 16 dinariyus tiro kekkudo. Tayiro: «Cu-a kǝla-a wunduye tilan dasaa?» cǝne tayia kiworǝnniya, tiro: «Kaisarre,» yera. 17 Daji Isaye tayiro: «Awo Kaisarredǝa Kaisarro yowo, koro awo Alayedǝa Alaro yowo!» yeno. Adǝgaima tia jauro ajapkera.

18 Sadusiya laa, tayi cinowo duniaye bawo wuljaidǝ, na Isayero isane tiro koro cadde: 19 «Sayinna, Nawi Musaye: “Kam laa yanjugǝna tada bawo bawoje kamu koljia, kamu yanjugǝna faccǝgǝnayedǝa niyajo yanjugǝnaro kaduwu majuwo!”† 12.19 SK 25.5 ruwujǝna. 20 Akko yaana tulur mbeji. Burwoyedǝ kamu ngoje tada cuwandǝnnin bawoyeno. 21 Yindiyedǝ ye kamudǝa niyaje tada cuwandǝnnin bawoyeno. Yakkuyedǝ ye ngai. 22 Adǝgaima tayi tulurdǝ tada cawandǝnnin bawoyera. Darye kamudǝ ye bawoyeno. 23 To, tayi tulurso tia camowonadǝ, cinowo duniayen kamu wundunjayero walji?» cane tia keworo.

24 Isaye tayiro: «Dalil nayi fattuwuwwayedǝ, kitawu bi kǝnduwo Alaye nonuwwi, mare? 25 Karmolan cijaiya, larusa so, niya so cadiwawo, tayi alama malaiyawa samelan dasaanadǝ gairo waljai.‡ 12.25 malaiyawa gai - Sawisoro na Alayen roa dasayi, gadero sanuiwawo. Adǝma nangaro samelan kaduwu mada bawo. 26 Koro karmon cidudǝ, Attaura Nawi Musayen kǝranuwwi wa? Kitawulan na kannu dawu kǝska cambiyedǝn Alaye Musaro: “Wuma Ala Ibrahimbe-a Isakuye-a Yakubaye-a wo,”† 12.26 NL 3.6 cǝnna. 27 Ti Ala am nunaye gǝni, am roaye, diye! Nayidǝ tai danuwe fattuwuwwa!» yeno.

28 Malǝmba Attauraye falnja isǝna kambiwunjadǝa kǝrǝnji duwon, Isa tayiro jaawu ngǝla cinaro asuyenniya, tiro: «Wadawa samman finja kura wo?» cǝne tia kiworo. 29 Isaye tiro: «Sammaro kura wodǝ, tima: “Jama Israyilawuye fanowo, Ala Kǝmandedǝ ti tilonju lok. 30 Ala Kǝmanǝmba karwunǝm ngan, ronǝm ngan, hangalnǝm ngan, dunonǝm ngan raye!”† 12.29-30 SK 6.4-5 31 Koro yindiyedǝ: “Kǝmaskinǝm yea kǝlanǝm gairo raye!”† 12.31 Lew 19.18 Wadawa aniro kura wo gade bawo!» yeno. 32 Malǝm Attaurayedǝye tiro: «Jirenǝm, sayinna! Awo wullǝmmadǝ fagat: Aladǝ ti tilonju. Ti gǝnia, Ala gade bawo. 33 Tia karwunǝm ngan, hangalnǝm ngan, dunonǝm ngan raame kǝmaskinǝm yea kǝlanǝm gairo rawodǝ, layaso-a sadaaso-a sammaro kura wo!» yeno. 34 Isa malǝmdǝ hangal kǝjiaro juwapcǝgǝna kirunniya, tiro: «Ni-a nodo bargaa Alaye-a kattendo kuruwu gǝni!» yeno. Ngawo adǝyen wunduma cinju mudu kaje tiro koro gade cǝddǝnni.

35 Fado Alayen Isa jamadǝa alamdu cǝdi duwon, tayiro: «Ndayilan malǝmba Attaurayedǝye Almasiwudǝ Tada Mai Daudaye§ 12.35 Tada Mai Daudaye - Kaduwu Mai Daudaye, kaala Almasiwu Alaye. canidǝ? 36 Mai Dauda kǝlanjuma Ruhu Alayen manaje: “Kǝmandeye Kǝmaniro: ‘Namme kǝmborammilan duwon, kǝladowanǝmba cidiya sinǝmbero yakkǝkko!’ cǝnna.”† 12.36 Jaw 110.1 37 Mai Dauda kǝlanjuma tia Kǝmalan bowojǝnadǝ, ndayilan gǝle Almasiwudǝ tadanjuro walji?» yeno. Jama jauro kada karwu kǝjiaro tia kǝrǝnjai.

38 Curo alamdunjuyen Isaye: «Malǝmba Attaurayero hangal gǝnanowo! Kalwu kuruwua dadadu caraana, koro kasuwulan lewa darajaa-a 39 dandallan bi masǝna kuralan na darajaa-a jaumaro caraana. 40 Kamu kwa faccǝgǝnaasoye kǝndanja sammaa jawui ye, halnja gǝraduro fuwu jamayen moduwa kuruwuro gǝrjai ye. Am aniye ajawunja leiran jauro kura!» yeno.

41 Isa karǝn sanduwu sadaa fidaaramben napkenniya, jamadǝ curo sanduwudǝyero wuɍi fijagai lawarji duwon, arsiyiwu kada isane wuɍi ngǝwu fijagai kiro. 42 Koro kamu ngudi kwa faccǝgǝnaa laa ye ise gursu kime* 12.42 gursu kime - Kunguna yaudiyaye tamannju ganama. yindi fiyeyeno. 43 Daji Isa fuwurawanjua bowoje: «Jiremaro nayiro wulnjagakki, kamu ngudi kwa faccǝgǝnaa adǝ sadaa am gadeye sammaa kojǝnaro fijǝgǝna. 44 Tayi samma arsiyinjalan ngojane fiyeyera, amma ti ngudi duwon kǝndanju sammaa fiyeyeno. Awo ronju ɍiwoye ngaa fiyeyeno,» yeno.