1 Isa bǝla Jerikoyero ngaye reje kodu badiyeno. 2 Bǝladǝn kam laa mbeji, cunju Jakaya. Ti kura akki mowomasoye ye, jauro gaɍiwu ye. 3 Wundu ti Isa wo cǝne tia kuroro maji, amma kǝla jama kadayen rangǝme kuroro tiro katkero, ti kori nangaro. 4 Daji Isaa kuroro cǝgase fuwuro leje na Isa kojidǝyen kǝla tarmu laayero tatkeno. 5 Isa nadǝro kadinniya, kǝla sapce tiro: «Jakaya, duwan jǝmme, ku sai fannǝmlan jǝmmǝkkiya!» yeno. 6 Jakaya ganje jǝpce karwu kǝjiaro tia kapciye sosayeno. 7 Jamadǝ adǝa kerunniya, karwunja waje: «Fado biwumayen jǝpcǝna!» cani. 8 Amma Jakaya cije daje Kǝmadǝro: «Kǝma, reda kǝndaniyedǝa talaawaro yikki. Koro kam laayen wuɍi cukkowonaro mowokkǝnaa, kawak dewu tiro kalakkǝgǝkki,» yeno. 9 Daji Isaye: «Ku fado adǝn njǝkkawo jǝpcǝna, dalilnjudǝ kam adǝ ye kaduwu Nawi Ibrahimbe* 19.9 kaduwu Nawi Ibrahimbe - Jakaya ye Nawi Ibrahim gai Alaa kasacce na Alayen njǝkkawo cuwandǝna. Adǝma nangaro Jakaya kaduwu jireye Nawi Ibrahimbe. nangaro. 10 Nonowo, Tada Kambedǝ am faccaanaa maje njǝkkaworo kadio,» yeno.

11 Jamadǝ awo ania kǝrǝnjai ngai duwon, Isa tayiro misal wulduwu badiyeno, dalilnjudǝ Jerujalemba karǝnjǝna ye, koro tayidǝ nodo bargaa Alaye sadǝman duniaro jǝpciyiro tǝmajana ye nangaro. 12 Tayiro: «Maina laa lardu kuruwu laaro leje kǝrmai lardunjuye cuwande walde isi cǝne sapturo ciyeno. 13 Daji wolodiyanju mewu bowoje wundunja yayero mina† 19.13 mina - Mina faldǝ alwasi kida kawu miaye. fal fal ce tayiro: “Kawu waldǝkke isǝkkiro tilan sawur dewo,” yeno. 14 Amma am lardudǝye tia wajane, har ngawonjun am canode: “Kam adǝ maindero waljidǝa rayiyende!” yera.

15 «Maije kadinniya, wada ce wolodiyanju tayiro wuɍi cinadǝa bowoja isa awiso sawurlan cawandoro nojo yeno. 16 Burwoyedǝ ise tiro: “Barganǝmmin, akko mina simmadǝn mina gade mewu fandǝkko,” yeno. 17 Maiye tiro: “Wuse, wolodi ngǝlama! Awo ganan aman dimma nangaro, nia lawan bǝla mewuyero galanjǝkki,” yeno. 18 Yindiyedǝ ye ise tiro: “Barganǝmmin, mina simmadǝn gade uwu fandǝkko,” yenniya, 19 Maiye: “Nia lawan bǝla uwuyero galanjǝkki,” yeno. 20 Daji wolodi gade ye ise tiro: “Barganǝmmin, akko minanǝm. Tia kesolan kǝrnǝkke dam gǝnayekko. 21 Ni kam jau nangaro, ringekko. Awo gǝnanǝmmidǝa ngonǝmi, awo nadǝmmidǝ yea kalanǝmi,” yeno. 22 Maiye tiro: “Mana cinǝmben shara njǝddǝkki, wolodi kǝlado! Wu kam jau, awo gǝnakkǝni ngokki, koro awo nadǝkkǝni kalakkiro nonǝmma, gǝna? 23 To, awiro gǝle wuɍinidǝa bankilan gǝnanǝmmidǝ? Ca ngai dimmaa, waldunidǝn wuɍini riwanjua mowokkǝna,” yeno. 24 Daji Maiye am nadǝn daadadǝro: “Minadǝa nanjun mowowo, kam nanjun mewuadǝro yowo!” yeno. 25 Tayiye: “A! Barganǝmmin, nanjun mewu mbeji, diye!” yeranniya, 26 Maiye: “Nayiro wulnjagakki, wundu duwon nanjun awoamadǝ,‡ 19.26 wundu duwon nanjun awoamadǝ - Kam mana Isaye fanjidǝ, nodunju cǝrgane caye kojǝnaro asuji. tiro casargai, amma kam nanjun bawomadǝ,§ 19.26 kam nanjun bawomadǝ - Kam mana Isaye fanjiwawodǝ, nodunju ganadǝmaa tilan camoyi. awo cǝdanadǝmaa tilan camoyi. 27 Kǝladowani mainjaro wallǝkkiro wajanadǝa kudowo fuwunin roro yejowo!” yeno.»

28 Ngawo Isa adǝa wuljǝnayen, koro walde kǝla fuwunna Jerujalembo ledu badiyeno. 29 Gǝre bǝlawa Baitfaje-a Baitani-aye na Kau Jaitunne canidǝa karǝngeranniya, Isa fuwurawanjuye yindi cunode 30 tayiro: «Bǝla fuwundoyedǝro lenowo! Ngawuwiyama, koro kutta wunduma tiro ngalte juwanni tuwada nagǝwi. Fǝrangowo kudowo! 31 Kam laaye: “Awiro fǝranguwi?” cǝne nayia njaworia, tiro: “Kǝmadǝ tilan mǝradunjua,” wulgǝnowo!» 32 Daji am tayia cunodǝnadǝ lejane Isa tayiro wuljǝgǝnadǝ gai nayeyera. 33 Kuttadǝa fǝrakcai duwon, kǝmanjusoye tayiro: «Awiro fǝranguwi?» yeranniya, 34 tayiye: «Kǝmadǝ tilan mǝradunjua,» yera. 35 Daji kuttadǝa* 19.35 kuttadǝa - Noduwuram Isa mai gai rokura bawoa Jerujalembo kǝlewan ngayiye. na Isayero cawude kalwunja kǝladǝro ferjagane tia ngoyeyera. 36 Leji adǝgai duwon, am kalwunja kǝla jawallen feryera. 37 Na jawal Kau Jaitunnedǝn jǝpcidǝa karǝngenniya, fuwurawanju samma karwu kǝjiaro kowo sapcane kǝla awo ajabba ajabba carunayen Alaa njungoro badiyera. 38 Tayiye: «Bargaa mai cu Kǝmandeyen isimadǝ! Kǝrma duwon katte Ala-a amnju-ayen nanlewa kǝrga, Mai Samemaro daraja tio!»† 19.38 Jaw 118.26 cani. 39 Curo jamadǝyen Farisawa laaye Isaro: «Sayinna, fuwurawanǝmbo wulgǝne gǝm cado!» yeranniya, 40 tiye: «Nayiro wulnjagakki, nǝmgeraa, dongur kauyesoma burwu casakki,» yeno.

41 Isa Jerujalemba del karǝnje bǝrnidǝa kirunniya, tiro kikkiro. 42 Bǝrnidǝro: «Kai! Ca ku awo nanlewa njukkudidǝa nonǝmmaa, amma kǝrma nodu adǝ niro gǝraaadaro waljǝna. 43 Adǝ nangaro yim laa ise kǝladowanǝm dirinjane kǝlnjane kanji fiyen yaye kikiminjagane garunǝmbo cidi capcagane tiyen kojane 44 ni-a am curonǝmlan dasaana-a sammaa tǝgǝmbo sinjagai, har kau falma kǝla kamanjuyen gǝnaada baworo cadi, dalilnjudǝ sa Kǝmande amnjua cǝkkayiye isǝnaro nonǝmmi nangaro,» yeno.

45 Daji Isa balballa Fado Alayero kǝrgaanniya, kare ladomasoa dudu badiyeno. 46 Tayiro: «Kitawulan ruwuwada: “Fannidǝ fado moduwaye!”,† 19.46 Ish 56.7 amma nayidǝ tia jongo gǝndewuyero kalakkew!»† 19.46 Iri 7.11 yeno.

47 Yim nguson Isa Fado Alayen jamaa alamdu cǝdi duwon, wurawa ɍimannaye-a malǝmba Attauraye-a amwurawa jamaye-a tia njejoro majai, 48 amma jawal cawandǝnni, dalilnjudǝ jama samma hangalnja nanjun tia fanjana nangaro.