Salmo 136
136
Din Adi Manbalbaliw Ay Layad Diyos
1 Man-iyaman kayon Diyos tan siged sisya,
komakaman din layad ya seg-ang na si eng-enggana.
2 Man-iyaman kayon Diyos ay nangato mo amin ay didiyosen,
komakaman din layad ya seg-ang na si eng-enggana.
3 Man-iyaman kayon Diyos, kangatoan ay apo sisya,
komakaman din layad ya seg-ang na si eng-enggana.
4 Sisya anggoy di makaamag si kaeetnga,
komakaman din layad ya seg-ang na si eng-enggana.
5 Babaen sin sirib na, pinarsua na ed daya,
komakaman din layad ya seg-ang na si eng-enggana.
6 Sin labaw di danom yan insaad na din daga,
komakaman din layad ya seg-ang na si eng-enggana.
7 Din agew ya bowan yan pinarsua na,
komakaman din layad ya seg-ang na si eng-enggana.
8 Insaad na din agew ay mansey-ang sin kaagawan,
komakaman din layad ya seg-ang na si eng-enggana.
9 Din maningtinggaw abe sin labi, din tatalaw ya bowan,
komakaman din layad ya seg-ang na si eng-enggana.
10 Din besag di taga-Egipto yan pinse na,
komakaman din layad ya seg-ang na si eng-enggana.
11-12 Inpango na ay komaan ed Egipto din Israelita
babaen sin panakabalina,
komakaman din layad ya seg-ang na si eng-enggana.
13 Din Baybay ay Mandalangdang et nansianena,
komakaman din layad ya seg-ang na si eng-enggana.
14 Isdi ay nandanena din ipogaw na,
komakaman din layad ya seg-ang na si eng-enggana.
15 Ngem nalned pay din arin di Egipto ya din sosoldado na,
komakaman din layad ya seg-ang na si eng-enggana.
16 Sin lugar ay magay man-ili, inpango na din ipogaw na,
komakaman din layad ya seg-ang na si eng-enggana.
17-18 Napipigsa ya mandinamag ay aari yan pinse na,
komakaman din layad ya seg-ang na si eng-enggana.
19-20 Din aari ay sana et din arin di Amorreo ay si Sihon
ya si Og ay ari ed Basan,
komakaman din layad ya seg-ang na si eng-enggana.
21 Inpatawid na din daga da sin ipogaw na,
komakaman din layad ya seg-ang na si eng-enggana,
22 sin Israelita ay mansilsilbi en sisya,
komakaman din layad ya seg-ang na si eng-enggana.
23 Adi na binaybay-an datako sin naabakan tako,
komakaman din layad ya seg-ang na si eng-enggana.
24 Insalakanas datako sin kalaban tako,
komakaman din layad ya seg-ang na si eng-enggana.
25 Idawtana si makan di amin ay naparsua,
komakaman din layad ya seg-ang na si eng-enggana.
26 Man-iyaman kayon Diyos ay wadad daya,
komakaman din layad ya seg-ang na si eng-enggana.