2
Efesusi mono note mainaya veatega ma kemoꞋa umaine.
1 Efesusi mono note mainaya veate kava kanohena* mage huka kao nagaya tamaga nayapina seveniꞋa (7) kaꞋnefi atafa hulineꞋna seveniꞋa (7) kanileta yafateti talo humalenaya lamumo amuꞋnopi ute ete nehua kanomoꞋna mani kea tamahanepauve. 2 Nagaya tamakai auꞋava yatamia ago age-mainoe. TusiꞋa kasageke-voke hutama aliꞋyama neꞋaliya yafeꞋene mailava hutama tokiyaꞋageꞋma hutama nemaiya yaꞋenena ago age-mainoe. Kefo yama nehaya veafena “HavigegeꞋyama nehaya yamo otahaiya vayala mainayanagita tamakai kea ohavigahune.” hutama nehae. NehageꞋya ani vayaꞋmoꞋya havige huꞋya “Tagayaenena Aposolo vaya mainone.” huꞋya nehayanagi tamakaya keꞋamia ago havitama fako hutama haviyana “HavigegeꞋya maiꞋya nehaya vaya mainae.” hutama nehae. 3 Tamakaya nagai nagima alilinageꞋya ali haviyama hulamatayanagi kasalola otamahaenegi lokiya vaitama mainaya yafena ago tamake-mainoe. 4 NaꞋa nehayanagi nagoꞋa kavala havi kava nehae. Hagotetama nagai kea havitama lamakupi maletama tamakuꞋa kanaleꞋya hutama namitetamagi menia ani yana ago neꞋataletama ali hataga huligeno osi nehie. 5 Nayoma tamahau tamayamopafi tamahau-mainea yafena tamakesa havi havi hiho. Menia ago neꞋataletama asaga hulavi-mainagi tamakuꞋa aiyahae hutama nagoꞋene eheꞋma humainaya kavala etetama hiho. TamakuꞋama aiyahae ohisageꞋna nagaya esuaꞋamoꞋna lamutamia meliꞋna atalegahue. 6 Atalegahugi tamakaya nagola kanale auꞋava yana ago hageꞋna age-mainoe. Tamakaya Nikolasi mono kema nehaviꞋya amaugafa age hamaꞋyema nehaya yafena tusiꞋa lamaipa kafa he neꞋamatae. Nagayaenena aniꞋama nehaya kavaꞋamihena naipa kafa he neꞋamatoe.
7 Nagi tamakesama hanesimogatama AvamuꞋmoꞋma Yisasi kema haviya melitaluma nehaya veaꞋmogamifema hia kea haviho. “NagoꞋa veaꞋmoꞋya SataniꞋene tuma huꞋya agasesayana Anumayamo kumate ikapinaga hanea yosa, agola maige maige hisaya hamaimu amamisia yosamo alaga ‘Neho.’ huꞋna amamisugeꞋya negahae.” huno humaine.
Simena mono note mainaya veatega ma kemoꞋa vie.
8 Simena mono note mainaya veate kava kanohena* mage huka kao nagaya uhagoteꞋna maiteꞋna haenagalafana mainoe. Fali-mainofitila ago eteꞋna hetiꞋna mainoe. 9 Tamakaya kana yapi mainetama mukiꞋa yatamia omale veaꞋne mainayanagi Anumaya KotiꞋa kanale yana ago tamamigeꞋna nagaya ago age-mainoe. NagoꞋa veaꞋmoꞋya “Tagaya Yuta veaꞋne mainone.” huꞋya nehayanagi Yuta veaꞋnea omainagi Satani anaga maineꞋya huhaviya hu-lamataya yana nagaya ago age-mainoe. 10 Tamakata aisia yana aligahayanagi kolia ohiho. Haviho SataniꞋa aye lamavataga hisigeꞋya nagoꞋa veaꞋmogatamina nofila hulamategahae. TeniꞋa (10) kanafi* ani kana yaꞋene tamakata aisia yaꞋenena aligahayanagi havitama lamakupi malenaya yana atafa hu-linetama falisageꞋna ani yateti kanale miyana anonatamia maige maige hisaya tamahaimula tamamigahue.
11 Nagi tamakesama hanesimogatama AvamuꞋmoꞋma mono note mainaya veaꞋmogamifema hia kea haviho. “SataniꞋenema tuma hutama agasesaya veaꞋmogatama tole yupama etetama falisaya yamoꞋa, hani yapima tegelege nehia atafina visaya yamoꞋa, ali haviya hu otamategahie huꞋna nehue.”
Pegamumu mono note mainaya veatega ma kemoꞋa umaine.
12 Ma kemoꞋa Pegamumu mono note mainaya veate kava kanohena mage huka kao tole kaiyaga aveꞋneꞋne nehia naepe kaꞋyona alilinoa kanomoꞋna mage huꞋna nehue. 13 Tamakaya SataniꞋma mainea siamo hanea kumate mainageꞋna ago tamake-mainoe. Ani kumate mainayanagi nagai nagia atafa hulitama tokiyaꞋage hulinageno nago kanoa, AtipasiꞋa, tamakaiꞋene maineanagino kolia ohunegi mukiꞋa kanafina efi efi huno Yisasi kea huhaleno nehigeꞋya atafa huꞋya ani kumate hayageno fali-maineanagi ani kanafiꞋenena tamakaya nagia atafa hulinetama nagaifena havitama tamakupi malenaya yana oꞋatalenae. 14 OꞋatalenagi nagoꞋa kefo yana nehageno naipamoꞋa haviyana nehie. Tamakai amuꞋnopina nagoꞋa veaꞋmoꞋya PalamuꞋma humainea kea atafa huꞋya akave nemalae. Nayona PalamuꞋa Isaleli veaꞋmoꞋya asaga hu lavisae huno Palakina mage huno hapai-maine “Mage huka hamapaiyo ‘Amayateti talo humalenaya afa yafe ‘Anumayati maine.’ hutama amiya kavela nenetama kumai kavala hiho.’ huka amaipa ayesana kea hamapaiyo.” huno humaineane. 15 NaꞋa hianagi tamakaipitila nagoꞋamoꞋya NikolasiꞋma hia mono kemona akave nemalae. Ani kemoꞋa PalamuꞋma hia avamete humainea ke. 16 Ani kefo yafena tamakuꞋa aiyahae hutama nagoꞋene ohisaya tamakesa haviho. Aiyahae ohisageꞋna nagaya osi kana kanoꞋa maiteꞋna tamakaitela esuaꞋamoꞋna navayafima hanea aveꞋneꞋne naepe kaꞋyoteti amakaiꞋenena tua hugahue.
17 Nagi tamakesama hanesimogatama AvamuꞋmoꞋa mono noteꞋma neꞋvaya veaꞋmogamifema hia kea haviho. SataniꞋenema tuma huꞋya agase-mainesaya veaꞋmogamina falakino hanea kavela, manae huꞋya nehaya kavela neꞋamamiꞋna nagola efeꞋage yafatela hamaote hamaote haegafa amakima kae-malenoa yafana amamisugeꞋya nagoꞋa veaꞋmoꞋya ani amakiyaga oꞋagegahagi agaiꞋa yafama alisimoꞋa agaiꞋage agegahie.
Taiyataila maineꞋya mono note neꞋvaya veatega ma kemoꞋa umaine.
18 Taiyataila maineꞋya mono noteꞋma neꞋvaya veate kava kanohena* mage huka kao nagaya Anumaya Koti nafaꞋnemonia naulagamoꞋa ata nefeꞋmo hia kava humainegeno naiyamoꞋa haesa yafamo vagaꞋyo vagaꞋyo hia kava humainegeꞋna tokiyaꞋage huꞋna heti-mainoa kanomoꞋna mani kea nehugi kao. 19 Nagaya tamakai auꞋava yatamia ago age-mainoe. Nagaifena tamahau tamayamopafi nelamahaigetama havitama tamametiti hutetama nagai aliꞋyama aliyana mailava hutama tokiyaꞋage humainageꞋna tamake-mainoe. Menima nehaya yamoꞋa hagotetama humainaya yamona ago agasetama kanale kava nehae. 20 Nehayanagi nagoꞋa kefo yama nehagenoꞋa naipamoꞋa haviya nehie. Nago aꞋmo agia YesepeliꞋe mage huno humaine “Nagaya Anumayamo aune a mainoe.” huno havigea nagai aliꞋya veaꞋmogamina ayemavataga huno mage nehie “Kumai yana nehutama amayateti talo humalenaya afa anumayamoma amiya kavela neho.” huno humaine. 21 HigeꞋna nagaya ani aꞋmofena “Kumai yakahena kaguꞋa aiyahae huka nagoꞋene ohisana kagesa havio.” huꞋna agava mauvanagi aguꞋa aiyahae nohie. 22 Aiyahae nohiafe nagaya tusiꞋa agata aisia kalia neꞋamiꞋna ani aꞋenema kumaima nehaya veaꞋnene kefo yaꞋamihema amakaye huꞋya amakuꞋama aiyahae ohisageꞋnahena tusiꞋa kana yana amamigahue. 23 NeꞋamamiꞋna ani aꞋmo kema akave nemalaya veaꞋmogamina hamaesugeꞋya faligahae. FalisageꞋya mukiꞋa Anumaya Koti anagaꞋmoꞋya ageteꞋya nagaya veaꞋmogami amaku amakesa tamagelegatiꞋma huꞋna fako nehua kano mainoa yafena havigahae. MukiꞋa veaꞋmogatama nehaya kavala ageteꞋna agoꞋma humainaya yateti anonatamia tamamite lamamite hugahue.
24 Hugahugi nagoꞋa Taiyataila mainaya veaꞋmogatama ani aꞋmo kea akave omaletama Satani kema falakino hanea kema ohavinaya veaꞋmogatama nagoꞋa kahegi kea tamahaopaigahue. 25 Tamahaopaigahugi mukiꞋama atafa hulinaya kea atafa hutama tokiyaꞋage hu-linetama maime maime neꞋvigeꞋna nagaya eteꞋna ano. 26 SataniꞋene tuma huꞋya agaseꞋya nagai kema akave maleme maleme haisaya veaꞋmogamina nagaya tokiyaꞋnia amamisugeꞋya mukiꞋa veatela kava yagaigahae. 27 NenafaꞋa tokiya namigeꞋna kavama neꞋyagauva tokiyaꞋnia aniꞋa huꞋna tamamisugetama tokiyaꞋage hutama kava yagaigahae. VeaꞋmoꞋya mopa susufaneleꞋma aiko neligeno aposino yagi-yagipe nelavia avamete kava huꞋya yagaigahae. 28 Kava yagai-mainesageꞋna natema evaꞋyi nehia kaꞋnefiꞋmoꞋa tusiya huno aivasa huno hale yamaene kaꞋnefila tamamigahue.
29 Nagi tamakesama hanesimoga-tama AvamuꞋmoꞋa mono note neꞋvaya veaꞋmogamifema hia kea haviho.