1-2 Anile AnumayamoꞋa sevetituꞋa (72) vaya hapaliteno “NagaiꞋnima visua kumate ali lokaete lokaete hutama uhagotetama neꞋviho.” huno humategahe amakaife mage huno hamapaiye “Nagai kema havisaya veala kasagoꞋya kaveꞋma hoyafi afulemailemai hia kava humainegi hoyafima aliꞋya alisaya veala osiꞋa veaꞋne kanoꞋa mainayafe ani hoyamona nefafe havigegeno nagoꞋa aliꞋya vayala kaveꞋma alisayafe humatesie.

3 Tamakaya neꞋutama haviho tamakaya sipi sipi nafaꞋne kana hutama mainagi nagaila ago amakaveꞋno hunenataya veala afai kala kana kaveꞋage veaꞋne mainaya amuꞋnopi hulamatesugetama ugahae. 4 Ugahagi monetamiene kutamiene tamaiya noꞋene alitama oꞋviho. Katega neꞋvisaya veaꞋnenena ayaꞋayate maitama kaiyekea ohiho. 5 Nago nopima hai falenutama hagotetama mage hutama hiho ma nopima mainaya veaꞋmogatamina ‘Anumaya KotiꞋa tamaipa falu hisaya tamaku tamakesa tamamisie.’ hutama hiho. 6 Aipa falu hisia agesaene kano ani nopima mainesiana Anumaya KotiꞋa aipa falu hisia agesa amigahigi aniꞋa kana kanoma omainesiana aipa falu hisia yana oꞋaligahie. 7 Ani nopi mainetama nesaya yama tamamisagetama afaꞋa neho. Nagai aliꞋya alisaya anonaꞋa nesaya yana afaꞋa alisayana kanale hugahie. Alu nopi alu nopi faelitetama ohiho.

8 Nago kumateꞋma visageno falu fala hulamateteꞋya tamamisaya kavela afaꞋa neho. 9 Ani kumateꞋma mainesaya kali veala ali kanale humatetama mukiꞋa veafe mage hutama hamapaiho ‘Anumaya KotiꞋa kava yagailamatesia kana ago efalote huno aupa humaine.’ hutama hamapaiho.

10-11 Nago kumateꞋma visageꞋya falu fala hu otamatesagetama ani kumala ataletama veaꞋmoꞋyama mainesaya katega utama mage hiho ‘Havi kava hae. Tamakai kumapiti kugukege yana taiyalegati aifopo hutalegahunagi tamakaya havilama hutama haviho Anumaya KotiꞋa kava yagaisia kanamoꞋa ago efalote huno aupa humaine.’ hutama hamapaiho. 12 Nagaya tamahanepauve Anumaya KotiꞋa kaiyekema hulamatesia kanafina Sotomu mainaya veaꞋmogami amaugafa amagata aigahigi tamakaiꞋma falu fala hu otamatesaya kumate veaꞋmoꞋya tusiya huno amakaseno amaugafa amagata aigahie.”

13 “AvoꞋnio Kolasini mainaya veaꞋmogatamaene Petesaita mainaya veaꞋmogatamaene tusiya huꞋna tamakaifena nahau nehue. Tamakai kumapi nagaya tokiya avameꞋyana ago huanagi tamaipa aiyahae ohageno ani tokiya avameꞋyana Taiyaene Saitoniene huleꞋasine ani kumate veaꞋmoꞋya kefo yaꞋamihena ago amaipa aiyahae huꞋya kefo yama humainaya yafena kayavo kena failiꞋya taꞋnefafi mopale maileꞋasine. 14 Anumaya KotiꞋa kaiyekema humatesia kanafina Taiya mainaya veaꞋnene Saitoni mainaya veaꞋnene amaugafa amagata yana aligahayanagi tamakaya tusiya hutama nagoꞋene tamaugafa tamagata yana aligahae. 15 Tamakaya Kapaneamu mainaya veaꞋmogatama ‘Taugafa alita anale haigahune.’ hutama nehao? AꞋao afete tavitama tamakaye nehinagetama maigahae.” huno hie. 16 NagoꞋene humatenea vayaꞋmogamife mage huno hamapaiye “Tamakai kema havisaya veaꞋmoꞋya aniꞋa huꞋya nagai kea havigahae. Tamakaifema ‘TamahaoteꞋyatamie.’ hisaya veaꞋmoꞋya aniꞋa huꞋya nagaifena ‘KahaoteꞋyakae.’ huꞋya hunategahae. Nagaife ‘KahaoteꞋyakae.’ hisaya veaꞋmoꞋya aniꞋa huꞋya hunatenea kanomofena ‘KahaoteꞋyakae.’ huꞋya hutegahae huno hamapaigeꞋya umainae.”

17 UteꞋyama ayana ani sevetituꞋa (72) vayala muse huꞋya eꞋya mage hae “Anumayamoga tagaya kagai kagileti Kefo AvamuꞋa humatonageꞋya tagai ke akave malae.” huꞋya me hae. 18 Hageno YisasiꞋa amakaifena mage huno hie “Nagaya agoana SataniꞋa ikateti aulumaya alia kava huno aupaꞋa asaga hunelavigeꞋna agoe. 19 Haviho nagaya tokiya ago tamaminoe. NagoꞋa yamoꞋa tamakaila alino haviya otamahaugahie. Satani tokiyamona agasesaya tokiya ago tamaminoe. Vaya anigeno nefalia osifaꞋvene yapaveꞋene tamaiyaleti ayelatapesayana nagaiꞋni tokiya ago tamaminoafe otamahaegahie. NagoꞋa yamoꞋa tamakaila ali haviya otamahaugahie. 20 TokiyaꞋnia ago tamaminogi Kefo Avamula amakasesaya tokiya tamaminoa yafena musena ohutama Anumaya KotiꞋa tamakima ikapinaga kaemalenea yafena tusiꞋa muse hiho.” huno hamapaiye.

21 Ani kanafina Alu Aotage AvamuꞋmoꞋa tusiya huno muse hisia agu agesa amigeno YisasiꞋa muse nehuno mage huno hie “Nenafagae mukiꞋa ma mopafi yaꞋene ikapinaga yaꞋene kava yagaimainana Anumayamoga kanale kava nehane. Ma ma hamapauva kea nagoꞋa ‘MukiꞋa yafena havilinoa kano mainoe.’ huꞋya haya veaꞋmogamifena ohavisae huka falakimalenane. ‘Ala avo nopi umainona vea mainone.’ huꞋya hisaya veaꞋmogamifena ohavisae huka falakimalenanagi ‘Inamu nafaꞋne kana huta mainone.’ huꞋya humainaya veala ago huhaleka amavelimainanafe aluya huꞋna musekaꞋa nehue. E, Nenafagae kagai kagu kagesamoꞋa aniꞋa humainegeka ani kavala humainane.” huno hie. 22 VeaꞋmogamifena mage huno humaine “NenafaꞋa mukiꞋa lokiya ago namine. MukiꞋa veaꞋmoꞋya nagaila neꞋamonina aepaꞋnia ohavinagi NenafaꞋa agaiꞋage nagai aepaꞋa haviline. Havilinegi mukiꞋa veaꞋmoꞋya Nenafa aepaꞋa ohavinae. NagaiꞋnige neꞋamoꞋna havilineꞋna nahaisia veaꞋmogamina humavelisugeꞋya Nenafa aepaꞋa havigahae.” huno hie. 23 YisasiꞋene toꞋkaeꞋya nemaiya anagaꞋmoꞋya amahaote mainageno YisasiꞋa mage huno hamapaiye “Anumaya KotiꞋa tamaulagama neꞋagaya yana ago tusiꞋa kanale ya ago tamamia yafena tusiꞋa muse hutama maiho. 24 Tamahapauve nayona mukiꞋa mainaya amaune vayaꞋene sauve vayaꞋyagaene tamakayama neꞋagaya yana ‘Agesune.’ huꞋya hayanagi oꞋagenae. Havilinaya kea ‘Havisune.’ huꞋya hayanagi ohavinae.” huno hamapaimaine.

25 NagoꞋa kahegi kema havilinea kanomoꞋa hetino Yisasina ayevataga huno mage huno havige “Humavenelina kanomogae nagaya hanaꞋa huteꞋna agola maige maige hisua nahaimula alisue?” huno havige. 26 Havigegeno YisasiꞋa mage hie “Anumaya Koti autaꞋmafina naꞋane huꞋya kaemalenae? Kagaya hapaliteka ani kemo aepaꞋa naꞋane huka nehavine?” huno havige. 27 Havigegeno mage hie “Ani kemoꞋa mage humaine ‘Ala Anumaya Kotikamofena tusiya huno kahaino. KaguꞋafinagatiꞋene kahaino. Kagu kameꞋene amio. AliꞋya neꞋalina himamukaene amio. Kagesama nehavina yana amio. Kagaika kaugafahema kahaisia avamete mukiꞋa veamogami amaugafahena kahaino.’ huno humaineane.” huno hie. 28 Higeno YisasiꞋa mage hie “Kagai kemoꞋa tamage huka nehane mukiꞋa kanafina ani kava huge huge hisanana maige maige hisana kahaimula aligane.” huno hapaiye.

29 Higeno ani kanomoꞋa agesafinaga mage huno havie “YisasiꞋa nagaife kanale kagesa hanea kano mainane.” huno hisiafene huno havige “MukiꞋa veala tagamife nehane?” huno havige. 30 Havigegeno YisasiꞋa mage hie “Nago Yuta kanoa Yelusalemu kumala ataleno Yeliko kumatega ugahe katega neꞋvigeꞋya nagoꞋa musufa vayaꞋmoꞋya katega ageteꞋya atafa huꞋya mukiꞋa afenomaꞋa hanafaleteꞋya aikolimainae. AikoliteꞋya ataleꞋya vageno falisia kava huno maine. 31 Mainegeno ani yupa mono note kava kanoa ani kate taviana ani kanoa mo neꞋageno agaseno ka agegayalega umaine. 32 Umainegeno nago Yuta kanoa Livai nofi kanoa aniꞋa huno mo neꞋageno agaseno nago kaiyaga ka agegayalega umaine. 33 NaꞋa haꞋageno nagola Samelia kanoa kame kanoꞋamoꞋa anile neꞋeleti megeteno tusiꞋa hau hutene. 34 Hau huteteno avate umaineno masave tiꞋene nofi alagamo tiꞋene haemalaya amupina takino haꞋya kiteteno avaleno agaiꞋa toki afumo agupifi ateteno avaleno viaꞋyamo natu vaya nefayaya nopi moteneno kanale huno kava hutene.

35 Kava huteno mainegeno ko tigeno ani nomona nefana tole kina neꞋamino mage huno hapaiye ‘Kagaya kanaleꞋya huka mani kanoa kava huto. NagoꞋa monekamoꞋma ani kanoleꞋma haꞋno hisigeꞋna nagaya eteꞋna anonakaꞋa kamigahue.’ huno hapaiye.” 36 YisasiꞋa anima hia kea hu haꞋno hugahe mage hie “NaꞋa humainagi na kagesa nehavine? TaliꞋa (3) vayala agaseꞋya vageno hana kanomo musufa vayaꞋmoꞋya hae-malenaya kanomona alino kanapa vayaꞋmoya nehaya kavala hu-tene?” huno havige. 37 Higeno ani kahegi kema havilinea kanomoꞋa mage hie “TusiꞋa hau hutenea kanomoꞋa kanapa vaya kana kavala hutene.” huno higeno YisasiꞋa agaifena mage hie “Kagaya visanaꞋamoga mukiꞋa kanafina aniꞋageꞋya huo.” huno hapai-maine.

38 YisasiꞋene agaiꞋaenema tokaeꞋya nemaiya anagala katega neꞋvageno YisasiꞋa nago kumate vigeno nago aꞋmo agia MataꞋe Yisasina avaleno nomaꞋafinaga umaine. 39 Umainegeno Matana negana agia MaliaꞋe Yisasina aiyafi mopale emaineno YisasiꞋma hia kaiyekea nehavie. 40 Havino mainegeno nunaꞋamoꞋa, MataꞋa, mukiꞋa kavela talo tala hiana agesamoꞋa tole-lole higeno Yisasite eno mage huno hie “Anumayamogae naganaꞋnimoꞋa natalegeꞋna nakaiꞋnige kavela tusiya huꞋna neꞋalugi ani yafena kagesa nohavino? Hapaigeno me naya hino.” huno hie. 41 Higeno YisasiꞋa mage huno hie “Mataga mukiꞋa yafena kagesamoꞋa tole-lole huka aliꞋyana neꞋalinana havi kava nehane. 42 Nagoke yamaꞋage alisana kagesa havige havige huka maiyo. MaliaꞋa ani yafena agesa havi havi huno atafa nehigi ani yana nago kanomoꞋa hana-ofalegahie.” huno hapaiye.