1 Nago Sapati kanale YisasiꞋene agaiꞋaene tokaeꞋya nemaiya anagaꞋaene nago atili hoya amuꞋnopi neꞋuꞋya anagaꞋamoꞋya nago atilia kaleꞋya atafaiꞋya nae. 2 NenageꞋya nagoꞋa Falasia vayala anile mainaleti ageteꞋya mage huꞋya hae “Sapati kanama katilemalenaya yana naꞋa higetama ani kavala nehae?” huꞋya hae. 3 Hageno YisasiꞋa mage huno hie “Tamakaya TevitiꞋene avagi huꞋya umainaya vayaꞋene amakatemainaya yafena hapalitama ohavinafio? 4 Amakategeno TevitiꞋa Anumaya Koti nopi hai faleno ageana ‘Afa vayamoꞋya onesageꞋya mono nopi kava vayaꞋmoꞋya amakaiꞋamige negahae.’ huꞋya katilemalenaya maya Anumaya Koti aulagale malenaya kaihame alino neneno avagi huꞋya emainaya vayala amamine. Tamakaya ani kea hapalitama ohavinafio?” huno hie. 5 YisasiꞋa mage huno hie “Nagaya ikapinagati emainoa kanoa vayaꞋmo natenea kanomoꞋna Sapati kana kava yagaimainoe.” huno hie.

6 Nago Sapati yupa YisasiꞋa mono nopi haino mono ke hamanepaigeno nago kanoa tamaga aya avayu hulavimainea kanoa anile maine. 7 MainegeꞋya nagoꞋa kahegi kema havilinaya anagaꞋene Falasia vayaꞋene YisasiꞋa havi kavaꞋma hisiafene huꞋya ati neꞋayeꞋya “YisasiꞋa Sapati kanale ani kali kanoa alino kanale hutesifi huotesifi?” huꞋya Yisasina amata huꞋya mainae. 8 Mainageno YisasiꞋa ani vayaꞋmoꞋyama haviya amaku amakesa ago haviteno ayama avayu hulavimainea kanomofe mage huno hapaiye “Hetika vayaꞋmogami amuꞋnoꞋamifi me hetio.” huno higeno hetino anile me hetimaine. 9 Me hetimainegeno YisasiꞋa amata huꞋya maiya vayafe mage huno hie “Tamahavinegoe Sapati yupahe mono kemoꞋa naꞋane ke nehie? Sapati yupa veaꞋne ali hilato humatesifi alino haviya humategahie ifi Sapati yupa veaꞋnea amavaleno avina me mategahafi ifi veala tavata hamaegahie?” huno hamavige.

10 Hamavigeteno mukiꞋa vayaꞋmogami amaulagafi ageno ute ete nehuno kali kanomofe mage huno hapaiye “Kayana aipi huo.” higeno aipi hiana ayamoꞋa ago kanale hute. 11 HutegeꞋya amata huꞋya maiya vayaꞋmoꞋya tusiya huꞋya amaipa kafa heteteꞋya “Yisasina na kava hutesune.” huꞋya humainae.

12 Nago yupa YisasiꞋa Nefatega nunamu huno havigegahe agoꞋyafi haino ani kegela Anumaya Kotitega ke huno havige havige nehigeno kola ali halemaine. 13 Kola alino halegeno agaiꞋenema tokaeꞋya nemaiya anagaꞋamofe ke higeꞋya ageno ani anagapiti tuelufuꞋa (12) anaga hapalimateteno “Nagai kema nehavigeꞋna hunelamatoa anagala Aposolo anaga maiho.” huꞋna hapalinelamatoe. 14-15 Anima agaiꞋene tokaeꞋya nemaiya anagaꞋamogami amakia SaimoniꞋe kanomo agia YisasiꞋa PitaꞋe huno malene. Pitana aganaꞋamoꞋa EtaluꞋe, YemesiꞋe YoniꞋe FilipiꞋe PatolomayuꞋe MatiuꞋe, TomasiꞋe, YemesiꞋa Alafiusi nafaꞋne Saimonina hamoꞋamoꞋe nago agia SelotiꞋe. 16 YutasiꞋa Yemesi nafaꞋne, Yutasi IsakaliotiꞋa haenaga ani kanomoꞋa Yisasina agesi huno kame hutesia kanoe.

17-18 YisasiꞋa agaiꞋenema tokaeꞋya nemaiya anagaꞋaene tavino otufi hetimainegeꞋya nagoꞋa kasagoꞋya agai kema nehaviya veaꞋnea YutiatiꞋene YelusalemutiꞋene hage limo agegayalega tole kumatalana Taiyaene SaitonitiꞋene kasagoꞋya vea elitalu huꞋya agai kea nehaviꞋya “Kalitia alino kanale hulatesie.” huꞋya emainageno YisasiꞋa Kefo AvamuꞋyaga veaꞋmogami amakupiti amanati neꞋataleno alino kanale humatene. 19 TokiyaꞋamoꞋa efalote higeno mukiꞋa veaꞋnea alino kanale humategeꞋya mukiꞋa veaꞋmoꞋya ageteꞋya augafale avate hugahe hae.

20 YisasiꞋa agesaga huno agaiꞋene toꞋkaeꞋya nemaiya anagaꞋamogamina neꞋamakeno mage huno hie “MukiꞋa yatamima omalenaya veaꞋnemogatama Anumaya KotiꞋa tamakaila kava yagai nelamatea yafe musena hiho. 21 Tamakaila menia tamakaꞋma nelea veaꞋmogatama haenagaꞋa nesageno tamamu hisiafe musena hiho. Menia tamakaya avi neꞋataya veaꞋnemogatama haenagaꞋa kigi hisayafe musena hiho. 22 Ikapinagati emainoa kanoa vayaꞋmo natenea nafaꞋnemonima nakave nemalayafe veaꞋnemoꞋya amaipa kafa helamateꞋya ‘AluꞋale maiho.’ hulamateꞋya kamuge vailamateꞋya ‘Otahaiya kagi hane.’ huꞋya hisagetamahena tamakaya ani kanafina afaꞋa muse hutama maiho. 23 AniꞋama hulamatenaya veaꞋneꞋmogamina amakinagomoꞋya nayona Anumaya Koti amaune vayaꞋmogamina aniꞋa huꞋya humatenayane. AniꞋama hisaya kanafina haenagaꞋa ikapinaga umainetama anonaꞋa kasagoꞋya ya alisayafe tamaipa kanale hutama muse hiho.

24 AvoꞋnio mukiꞋa yatamima hanea veaꞋneꞋmogatama tamakaya kaꞋye ho. Tamaipa kanale hisia yana hai ali mainae. 25 AvoꞋnio tamakaya menia mukiꞋa yama nelamamuꞋma nehaya veaꞋmogatama tamakaya kaꞋye ho. HaenagaꞋa tusiꞋa lamakategahie. AvoꞋnio menia kigima hutama nemaiya veaꞋnemogatama kaꞋye ho. HaenagaꞋa tamahau nelagitama avia ategahae. 26 AvoꞋnio veaꞋmoꞋya ‘Ala vaya mainae.’ huꞋya tamaki alisaga nehisaya anagala kaꞋye ho. AniꞋama humainaya veaꞋnemogamina amakinagomoꞋya nayona aniꞋa huꞋya havigeꞋage amaune vayamogami amaki alisaga humainayane.”

27 “Nagai kema havisaya veaꞋmogatama ‘Kame veaꞋnetamimofena tamahau tamayamopafi tamahaino. Amaipa kafama henelamataya veaꞋnemogamina kanale kava humateho.’ 28 ‘Anumaya KotiꞋa ali haviya hugatesie.’ huꞋya nehaya veaꞋmogamife ‘Kanale ya amamio.’ huka Anumayamotega ke huka havigo. Hu haviya hunegatesaya veaꞋnemogamifena ‘Amaya huo.’ huka Anumayamotega havigo. 29 Nago kanomoꞋma kagalamesaleꞋma kaikolisigekahena ‘Nago kaiyaga nagalamesaleꞋene naikolio.’ hisanageno kaikolisie. Nago kanomoꞋma ala yasi siotakama musufama alisigekahena nago siotakaꞋa afaꞋa kaufila ohuo. 30 Nago kanomoꞋma ‘Nago yakahema namio.’ hisigekahena afaꞋa hagaꞋyu huka amio. Kagai yama alimainesia kanomofena ‘Eteka namio.’ huka tokiya kea hu oꞋato. 31 VeaꞋneyagahe ‘Ma kava hulatesae.’ hutama hisaya kavala ani kavakeꞋya alu veaꞋnea humateho.

32 VeaꞋmoꞋya hamau amayamopafi tamakaifena nehamainagetamahena tamakaya aniꞋa hutama amakaifena tamahaisia yana afa yanagi anonaꞋa oꞋaligahae. Kefo yama nehaya veaꞋnemoꞋya aniꞋa huꞋya amahau amayamopafima amahaiya veafena nehamaiye. 33 Kanale kavaꞋma hulamataya veaꞋnemogamina aniꞋa hutama kanale ya humatesayana ani yana afa yanagitama anonaꞋa oꞋaligahae. Kefo yama nehaya veaꞋnemoꞋya aniꞋa kavala nehae. 34 ‘Eteno namigahie.’ hutama hutetama amisaya veala yoka amisayana afa yanagitama anonaꞋa oꞋaligahae. Kefo yama nehaya veaꞋmoꞋya nagoke augafa ya alisayafe kefo yama nehaya veaꞋneꞋamimona yoka neꞋamamiye. 35 Anumaya KotiꞋa kefo veaꞋnemoꞋyaene agaifena musema nohaya veaꞋnemogamifeꞋene kayone huneꞋamatea yafe tamakaya ani kava hutama kame veaꞋnetamihena tamahau tamayamopafi nelamahaisigetama kanale kavakeꞋya humateho. ‘AnonaꞋa nago yana oꞋaligahune.’ hutama hamaisia yana amamiho. NaꞋama hisayana haenagaꞋa Anumaya KotiꞋa kasagoꞋya anonaꞋa tamamisigetama ala Anumaya Koti kana hutama nafaꞋneyagaꞋa maigahae. 36 NelamafaꞋma hauma huneꞋamatea kavala aniꞋa hutama tamahauna humateho.”

37 “Nelamafufena ‘NaꞋa maꞋa hana kano mainane.’ hu oꞋateho. AniꞋama ohisagenoꞋa Anumaya KotiꞋa tamakaifena ‘Havi kava haya veaꞋne mainae.’ huno hu otamategahie. Nelamafugamina kaiyekema hu oꞋamatesayana Anumaya KotiꞋa tamakaila kaiyekea hu otamategahie. Haviya hulamatenesia kanomona aigeꞋatetama kefo yamaꞋa ataleteho. AniꞋa hisagenoꞋa Anumaya KotiꞋa kefo yatamia aigetamateno atalelamategahie. 38 Nelamafugamima amamisaya kavala Anumaya KotiꞋa aniꞋa huno lamamigahie. Tamakaila kutamifina aye talako huno havatesia kava huno ku ailamategahie. Ma mopaleꞋma nelamafugamima humatesaya kavala Anumaya KotiꞋa tamakaila ani kava hulamategahie.” huno humaine.

39 Nago avame kea mage huno hie “NagoꞋma aulaga asu humainesia kanomoꞋa nago aulaga asu humainesia nefaluna avaleno kanale vaiyesaꞋafi? AꞋao avalenoꞋma vaiyesiana tolemogania komufi asaga hulavigaꞋe. 40 Nago sugulufi mainesia nafaꞋnemoꞋa huveli kanoꞋamona oꞋagaseneanagino mukiꞋa huvenelia yamaꞋa havilama hulineno huvelimainea kano kana huno maigahie”

41 Tagaya tagaiti taguꞋafima hanea yana ageteta alu veaꞋnehena “Havi veaꞋne mainae.” huta hisuna yafe YisasiꞋa mage huno hie “NaꞋa higeka negafu aulagafina osiꞋa havi yana hanegeka neꞋagananagi kagaikaꞋa kaulagafina nagola muki yosalapagefa hanegeka ‘Omale.’ huka nehane? 42 NaꞋa higeka negafufena ‘Kaulagafitila havi yana alitalegahue.’ huka hananagi kagaika kaulagafina nagola muki yosalapagefa hanegeka ‘Omalene.’ huka nehane? KaguꞋafinaga hanea yana agelama ohuneka kavayaleti havige huka vagala kano maineka kagaikaꞋa kaulagafitila muki yosalapagefa alitaleteka negafu aulagafina kanale neꞋageka osiꞋa havi yana alitalegane.” huno hie.

43 “Kanale yosamoꞋa havi yosalaga noꞋayegi havi yosamoꞋa kanale yosalaga noꞋaye. 44 NoꞋayegi veaꞋmoꞋya yosalaga ageteꞋya kanale yosalaga hanesigeꞋyahena ‘Kanale yosa hane.’ huꞋya hugahae. AvetaꞋnafa yosaletila kaimona hataga ohugahae. AvetaꞋnafa nofitetila fulutu alaga avayu huꞋya notagiye. 45 Fatago huꞋya mainaya veaꞋmoꞋya kanale amaku amakesa havilineꞋya kanale kavala nehayanagi kefo ya nehaya veaꞋmoꞋya havi amaku amakesa havilineꞋya havi kavakeꞋya nehae. VeaꞋmoꞋya amaku amakesafinaga havateteno aivalilavimainea kea amavayafiti hu falote nehae.”

46 “Nagaifena afa kava nehune hutama ‘Anumayatimogae, Anumayatimogae.’ hutama nehayanagi tamahapauva kea ali hipoꞋya nohae. 47 NagoꞋa veaꞋmoꞋya nagaite neꞋeꞋya nagai ke havige havige huꞋya ali hipoꞋya nehaya veaꞋmogamina maꞋa augafa veaꞋne mainae huꞋna tamaveligahue. 48 Nago kanomoꞋa noma kigahena ayaꞋaya komu kafiteno yafana anifinaga maleteno u posia ani komufinaga yafa agotofule maleteno aye talako huno nona kimalegeno timoꞋa tusiꞋa li hogino ani note eanagi tokiyaꞋage no kimaleneafe anima hogino ea timoꞋa alino lagape aioꞋatalene.

49 Ali lagape aioꞋatalenegi nagoꞋa veaꞋmoꞋya nagai ke haviteꞋya ali hipoꞋya nohaya veaꞋmoꞋya maꞋa veaꞋne mainae. Nago kanomoꞋa noma kiana amega komu kafiteno fulu fulu posi ayeno nona kimalenegeno timoꞋa hogino ani note eana aupaꞋa ani nomaꞋa ali lagape aino mopafi atalegeno tusiya huno haviya hulavimaine.”