1 YisasiꞋa mage huno hie “Nagaya tamage huꞋna vaini alagamo nofi maugeno NenafaꞋa ani vaini alagamo nofi hoyalela yagai-maine. 2 Agaya mukiꞋa nagai vaini nofi akopaꞋmoꞋa alagama oꞋayea akopaꞋyaga atagi neꞋataleno alagama ayea akopaꞋyaga ‘NagoꞋene alaga ayesie.’ huno aiꞋa alino hagalo nehie. 3 Tamaha-pai-mainoa kemoꞋa tamakaila ago alino hagalo higeno oniꞋyatamia omalenegi kanale tamahau-maine. 4 Tamakaya nagaiꞋenema ai-gaꞋmaesayana nagaya tamakaiꞋenena ai-gaꞋmaeꞋna maigahue. Nago vaini alagamo nofiꞋmo akopamoꞋma nofiteꞋma ai-okaꞋmaesiana alaga oꞋayegahie. NaꞋa hu-maineafe tamakaya nagaila navaꞋaleꞋma ai-okaꞋmaesayana tamakaya alaga oꞋayegahae.

5 Nagaya vaini alagamo nofi maugetama tamakaya ani vaini alaga nofiꞋmo akopaꞋa mainae. Tamakaya nagaiꞋenema ai okaꞋmaesayana nagoꞋa kanale kavala ohugahae. Kanale kavaꞋma hinutamahena nagaiꞋene ai-kaꞋmaetama maiho. NagoꞋa veaꞋmoꞋyama nagaiꞋenema ai-gaꞋmaeꞋya maisageꞋna nagayama amakaiꞋenema ai-kaꞋmaeꞋna maisuana kasagoꞋya nofi alagamo kaveꞋa ayegahae. 6 NagoꞋa veaꞋmoꞋya nagaiꞋenema ai-okaꞋmaesayana oꞋayea vaini nofiꞋmo akopaꞋma atagiꞋya hagaꞋyu hu-talagenoꞋma hagage nehia kava nehae. Ani akopayaga alitalu huꞋya atafi kae-talenae. 7 Tamakaya nagaiꞋenema aigaꞋmaetama maisayana nagai kemoꞋa tamakupina hanesigetama nagoꞋa yafema naha-vi-gesayana naha-vi-gesaya yana hu-lama-tegahue. 8 Tamakayama kasagoꞋya nofi alagamo kaveꞋma aye-gasagoꞋma hisaya yateti NenafaꞋa ala agia aligahie. Alinagetama-nagitama tamakaya nagaiꞋenema tokaeꞋya nemaiya anaga maigahae. 9 NenafaꞋa nagaifena hau ayamopafi hau-mainea kava huꞋna tamakaifena aniꞋa huꞋna nahau nayamopafi nenahaiye. Nahau nayamopafima nenahaiya yamo aguꞋafinaga faletama maiho. 10 Nagaya NenafaꞋma hu-mainea kahegi kema haviꞋnama akave maloa yafe NenafaꞋa nagaifena hau ayamopafina nehaiye. Tamakaya aniꞋa hutama hu-mainoa kahegi kea havitama akave malesayana tamakaifema nahau nayamopafi nenahaiya yamo aguꞋafinaga faletama maigahae.

11 Nagai naguꞋafima muse yama hanea yana tamakai tamakupi male hava-telama-tesua yafe mani kea tamaha-pai-mainoane. 12 Nahau-mainea kavala mage huꞋna nehue ‘Nagaya tamakaifema nahau nayamopafima nahaiya kava hutama nelama-fugamifena tamahau tamayamopafi tamahainageno aniꞋa huꞋya amakaya tamakaifena hamau amayamopafina hamaino.’ huꞋna tamaumonola nemaloe. 13 Nago kanomoꞋma nefufema ‘Kagai kaugafama ali-gatisua yafene huꞋna nagaya faligahue.’ hunoꞋma hisiana mukiꞋa veaꞋmogami hamau amayamopafima nehamaiya kavala amakasegahie. 14 Nagayama nehua kema akave malenutamahena nagaiꞋni nenafugatama maigahae. 15 Nagaya tamakaifena ‘AliꞋya vayaꞋnimogatama mainae.’ huꞋna nagoꞋene ohugahue. Nago aliꞋya kanomoꞋa kava kanoꞋamoma aliꞋyama alia aepaꞋa oꞋagenegi nagaya mukiꞋa yama NenafaꞋma naha-pai-mainea kea ago tamaha-pai-mainoa yafe ‘AliꞋya vayaꞋnimogatama mainae.’ huꞋna ohugahugi agoꞋma tamaha-nepauva yafe ‘Tamakaya nagai kanapa mainae.’ huꞋna nehue. 16 Tamakaya nagaila nagetama hu-yoꞋokinagi nagaya hagoteꞋna tamakaila tamakeꞋna hu-yogiteꞋna tamakaitami utama Anumaya Koti haisia kava hisaya yafe hu-yogilama-tenoe. AniꞋama hisaya yapiti alagaꞋa falote huteꞋya agola mainesagetama nagai nagileꞋma Nenafatega havigesayana mukiꞋa havigesaya yana tamamigahie. 17 Kahegi kea mage huꞋna tamaumonola nemaloe nelama-fugamifena tamahau tamayamopafi tamahainageꞋya aniꞋa huꞋya tamakaifena hamau amayamopafi hamaino.”

18 “Ma mopale yafema amaugafama aliꞋya nehaiya veaꞋmoꞋya tamakaila kamema hu-lama-tesagetamahena tamakesa hao hinagetama haviho. HagoteꞋya nagaila aniꞋa huꞋya kamea hu-na-tenayane. 19 Tamakaya ma mopale veaꞋmoꞋya nehaya kavaꞋma hutama mainaleꞋasipa mani mopale veaꞋnemoꞋya hamau amayamopafi tamakaifena hamaileꞋasinagi nagaya ma mopafi vayapiti tamakeꞋna hu-yogi-malenoafe tamakaya mani mopale vea kana veaꞋne omainae. Na yafe ma mopale yafema amaugafama aliꞋya nehaiya veaꞋnemoꞋya amakesa nehaviꞋya kamea hu-nelama-tae. 20 Nagaya mage huꞋna ago tamaha-pai-mainoe ‘AliꞋya kanoꞋamoꞋa kava kanoꞋamona oꞋagasene.’ huꞋna hu-mainoane. Ani kehe tamakesa havitama maiho. NagoꞋa veaꞋmoꞋya nagaiꞋma, tamakai kava kanotamimonima, aliꞋya haviyama hu-na-taya kava huꞋya aniꞋa huꞋya tamakaila aliꞋya haviya hu-lama-tegahayanagi nagoꞋa veaꞋmoꞋya nagai kema haviꞋya akave nemalesaya veaꞋmoꞋya tamakai kea aniꞋa huꞋya haviꞋya akave malegahae. 21 Hu-na-tenea kanomona havilama huꞋya ohavinaya yafe ani kavala hu-lama-tegahae. Tamakaya nagai veaꞋnema mainaya yafenagiꞋya ani kavala hu-lama-tegahae. 22 Nagaya eꞋnama kema hama-opauleꞋasina ‘Kefo katia hane.’ huꞋya ohaleꞋasine. AfaꞋa ago me hama-pauvanagi kefo yama hu-mainaya yafena kalagi aiteꞋya agasesaya katamia omalene. 23 NagaiꞋma kamema hu-na-tesaya veaꞋnemoꞋya NenafaꞋene kamea hu-neꞋatae. 24 Nagaya amakaipima maineꞋnama nagoꞋa veaꞋmoꞋyama tokiya kavaꞋma ohuleꞋasina ‘Kefo yatia hane.’ huꞋya ohaleꞋasinagi ago alugeꞋya ageteꞋya nagaiꞋene NenafaꞋenena kamea hu-nelaꞋa-tae. 25 Amakai kahegi kema kae-malenaya kemoꞋa nagaifena mage hu-mainayane ‘Havi kavala ohunegeꞋya kamea afaꞋa hu-neꞋa-tae.’ huꞋya kae-malenayane. Mani kemoꞋa ago falote huno tamage hisia yafe nagaila kamea hu-nena-tae. 26 Nenafategati tamaya hisia vekaꞋa hu-tesugenoꞋma esiana tamageꞋage ke huno tamaha-paisia vekaꞋa, Alu Aotage Avamula NenafategatiꞋma esiana nagaifena tamaha-paigahie. 27 Tamaha-paigahianagitama nagaya aliꞋyama aepa heꞋna ali-mainoa kanaleti tamakayama nagaiꞋenema mainaya yafe nagaifena veaꞋmogamina hama-paigahae.”