8
SoloꞋa tusiya huno Yisasina amakuꞋama aminaya veala alino haviya humatene.
1-2 Sitivenima hayageno falia yafena SoloꞋa “Kanale kava hae.” huno tusiꞋa muse humaineanagi nagoꞋa veaꞋmoꞋya Anumaya Koti kema nehaviya veaꞋmoꞋya Sitivenifena tusiꞋa avi ateteꞋya aliꞋya mo hevaitetageꞋya ani kanaleti aepa heꞋya Yisasi kema haviꞋya amakuꞋama aminaya vayaꞋmogamina Yelusalemuma nemaiya veaꞋmogamina aliꞋya haviya humatageꞋya ani veaꞋmoꞋya faleꞋya Yutia kotegaene Samelia kotegaene ute ete hageꞋya Aposolo vayala amakaiꞋamige Yelusalemua mainae. 3 Mainageno SoloꞋa Yisasi kema haviꞋya amakupi malenaya veaꞋmogamina alino haviya humateno amakaiꞋami noꞋyagafi haino mukiꞋa veala amavaleno kina mo humatene.
FilipiꞋa Yisasina kanale mono keꞋa nagoꞋa Samelia kumate mo huhaleno humaine.
4 Kinama humatageꞋya nagoꞋa umainaya veaꞋmoꞋya alu kote kote faleꞋya ute ete huꞋya Yisasina kanale mono keꞋa hamapai-mainae. 5 FilipiꞋa nagola Samelia hanea kumate tavino mage huno mo hamapaiye “Yisasina Anumaya KotiꞋa taugafa aligatigahema hutenea kano emaine.” huno hamanepaiye. 6-7 HamapaigeꞋya mukiꞋa veaꞋmoꞋya agai kea haviteꞋya agaiꞋama humainea tokiya avame yamoꞋa Satani AvamuꞋyaga veaꞋmogami amakupitila ala amake neꞋaiꞋya hatilaviꞋya neꞋvageno amaiya amaya avayu hulavi-mainea veaꞋnene amaiya haviya humainea veaꞋnene alino kanale humategeꞋya ageteꞋya nagoke amaku amakesa haviꞋya keꞋa aliꞋya amakupi malenae. 8 Amakupi maleteꞋya ani kumate veaꞋmoꞋya tusiꞋa muse humainae.
SaimoniꞋa tokiya avame ya talo nehia kanoe.
9 Muse hayanagi ani kumatela nago kanomo agia SaimoniꞋe “Nagaya tusiꞋa ala kano mainoe.” huno tokiya avame yana higeꞋya mukiꞋa Samelia veaꞋmoꞋya ageteꞋya tusiꞋa amamaꞋyo neꞋaiyane. 10 AmamaꞋyoa aiteꞋya ala amakima hanea veaꞋnene osi amakima hanea veaꞋnene agai kea haviteꞋya mage huꞋya humainae “Ma kanoa Anumaya KotiꞋa ala tokiyaꞋa aminea kanoe.” huꞋya humainae. 11 KasagoꞋya yupa tokiya avame yama higeꞋya agaya yafe tusiꞋa amamaꞋyo aigeꞋya agai ke havimainae. 12 Haviyanagi FilipiꞋa anile evaꞋyi huno Anumaya KotiꞋma kava yagaisia kanale kene “Yisasina Anumaya KotiꞋa taugafa aligatigahema hutenea kano emaine.” hunoꞋma hia kanale kene haviteꞋya Yisasina amakuꞋa amitafa hageno veala tina falematene. 13 SaimoniꞋenena Yisasina aguꞋa amitafa higeno tina faletetegeno FilipiꞋene vaineꞋayegeno FilipiꞋa tokiya avame yana higeno ageteno tusiꞋa amaꞋyo aimaine.
14 “Samelia nemaiya veaꞋmoꞋya Anumaya Koti kea haviꞋya amakupi aliꞋya malenae.” huꞋya haya kea Yelusalemuma nemaiya Aposolo vayaꞋmoꞋya haviteꞋya PitaꞋene YoniꞋene hunatageꞋana ani kumatela elavi-mainaꞋe. 15 ElaviteꞋana Anumaya KotiꞋma ani veaꞋmogamima Alu Aotage AvamuꞋama amamisia yafe Anumayamotega havige-mainaꞋe. 16-17 Amakaya Yisasi agile ago tina falematayanagi Alu Aotage AvamuꞋmoꞋa amakaitela eotavine. Eotavinea yafe PitaꞋene YoniꞋene anaya amaugafale avate hulinaꞋageꞋya Alu Aotage Avamula avale-mainae.
18-19 Aposolo kanolatamogania anayama nemalaꞋageꞋya Alu Aotage Avamula avalageno SaimoniꞋa ageteno mage huno hie “Mone lanamisugetana tokiya yana nagaila namisaꞋageꞋna naya malesugeno veaꞋmoꞋya Alu Aotage Avamula avalesae.” huno hanavige.
20 Higeno PitaꞋa mage huno hapaiye “Kagaya Anumaya KotiꞋa afaꞋama neꞋamamia yafema miya hugahue hukama kagesa havina yamoꞋa monikaꞋaene kagaikaꞋaene Anumaya KotiꞋa alino haviya hugatesie. 21 Anumaya Koti aulagafina kagai kagupina kanale ohunea yafe ani aliꞋyana kagai yana omaletafa huno omalene. 22 Menima kefo kavaꞋma hana yafena kaguꞋa aiyahae huka Anumayamotega havigesanageno ani kagu kagesafima havi kagesama havina yakaꞋa aigekateno kefo yakaꞋa atalegatesie. 23 Nagaya kagupima agoana kaipamoꞋa haviya humainea yafe atuꞋage nehigeno kefo yakamoꞋa nofi hugatene.” huno kenonaꞋa hapaiye.
24 Higeno SaimoniꞋa mage huno hapaiye “Nehana yamoꞋa nagai naugafalela falote ohisia yafe tanakaya nagaila nunamuna hunateꞋo.” huno hanapai-maine.
25 PitaꞋene YoniꞋene Anumayamo ke hamapaiꞋana mage huꞋana haꞋe “TaꞋagaya Yisasina agetetaꞋa agaifena taꞋagupi malenoꞋe.” huꞋana hamapaiteꞋana eteꞋana Yelusalemu ugahe kategama vaꞋana Samelia kola alu kumate kumate uꞋana Yisasifena kanale mono keꞋa hamapai-mainaꞋe.
FilipiꞋa nagola Itiopia kotega kanomona Yisasina kanale mono keꞋa hapai-maine.
26 Nago ensole kanomoꞋa Filipifena mage huno me hapaiye “Hetika Yelusalemuti Kasa kumateꞋma neꞋvaya katega vuo.” huno hapaiyana ani kana kaꞋme kotega umainea kane. 27-28 Higeno FilipiꞋa hetino ani katega viaꞋyamo mogeana nagola anupa kanoa Itiopia kotega kava kanoe mukiꞋa ala sauve aala, KanatesiꞋe huꞋya agia neꞋayaya aꞋmo, mone afenoꞋyate kava neꞋyagaiyane. Ani kanoa Anumaya Koti agi alisaga hugahe Yelusalemu uteno ani yupa eteno nomaꞋalega ugahe hosi afumoꞋma avayu huno neꞋvia kalefi haino maineno Anumaya Kotina aune kanoꞋamoꞋa, Aisaiya, kae-malenea autaꞋmafi hapalime hapalime umaine. 29 NeꞋvigeno Alu Aotage AvamuꞋmoꞋa Filipife mage huno hapaiye “Kagaya ani kalefi mo haisaga humaika agaiꞋene tokaeka vuo.” huno hapaiye. 30 Hapaigeno FilipiꞋa aiyayeno avate neꞋuno mo haviana AisaiyaꞋma kae-malenea autaꞋmafima hapalimema via kea mo haviteno mage huno hapaiye “Kagaya mani kemona aepaꞋa havilama nehano?” huno havige. 31 Havigegeno ani kanomoꞋa mage hie “Nago kanomoꞋma naveotisiana hanaꞋa huꞋna havigahue?” huno huteno Filipifena “Nagaya mainole ehaika nagaiꞋene emaiyo.” huno hapaiye.
32 Anima Anumaya Koti kema kae-malenea kema hapalia kemoꞋa mage huno humaine
“Sipi sipi haegahema avaleꞋya neꞋvagenoꞋma avovoma ohuno ako huno nemaiya avameteꞋene sipi sipi nafaꞋneyagama ayolagefama laga hugahema hia kanomote mo hetiꞋya maineꞋya avovoma ohunaya avamete kava huno ke ohuno ako huno maine. 33 Ani kanomofena ‘Afa kano mainane.’ huꞋya agaye hisifa kava huteteꞋya fatagoma hia kaiyekea huoꞋatenagi afaꞋa hayageno fali-mainegeno agaiꞋa nafaꞋnema omainea yafe nagoꞋa veaꞋmoꞋya avageꞋa ohugahae. Ma mopaleꞋma mainea kanaꞋamoꞋa ago haꞋno humaine.” huno kaemalenea ke hapalime umaine.
34 Hapaliteno ani kava kanomoꞋa Filipife mage huno havige “Ani aune kanomoꞋa tafe mani kea huno humaine? AgaiꞋahe humainefi nago kanomofe mani kea humaine?” huno havige.
35 Havigegeno FilipiꞋa aepa heno mani kemo aepaꞋa hapaiteno Yisasina kanale mono keꞋa hapaimaine. 36 Hapaime hapaime katega neꞋuꞋana nago tite uvaꞋyi huteꞋana ani kava kanomoꞋa mage huno hapaiye “Tina ma hanegi ago kanale mani lina falenategano?” huno havige.
37 Havigegeno FilipiꞋa mage huno hapaiye “Mani kema havika kagupi malekama kametiti hisanana kanalelagiꞋna lina falegategahue.” huno higeno ani kanomoꞋa mage hie “Nagaya Yisasi KalaisiꞋa Anumaya Koti nafaꞋne maine. Tagai taugafa aligatigahe hutenea kano maine huꞋna aliꞋna nagupi maleꞋna nametiti nehue.” huno humaine.
38 Nehuno hosi afumoꞋma avayu nehia kalemo talaiva kanomofe “Male atafa huo.” huno higeꞋana FilipiꞋene ani kava kanoene tipi taviteꞋana FilipiꞋa tina faletene. 39 FaletetegeꞋana tipitiꞋma ehaiꞋagenoꞋa Alu Aotage AvamumoꞋa aupaꞋa Filipina avaleno vigeno ani kava kanomoꞋa nagoꞋene Filipina oꞋageanagi katega tusiꞋa muse hume hume umaine. 40 Utegeno FilipiꞋa Asotasi evaꞋyi huteno Yisasina kanale mono keꞋa mukiꞋa kumate veaꞋmogamina hamapaime hamapaime uno Sisalia uvaꞋyi humaine.