1 KasagoꞋya veaꞋmoꞋya Yisasi kea haviꞋya amakupi maleneꞋya amaku aminaya kanafina nagoꞋa ani veaꞋmoꞋya Kaliki ke havilinaya vea mainagi nagoꞋa veaꞋmoꞋya Hipalu ke havilinae. Kaliki kema havilinaya veaꞋmoꞋya mage hae “Tagai megusa aꞋneyaga havi kava hutama osi kanoꞋa kavela neꞋamamiyanagi Hipalu amakema neꞋaiya megusa aꞋneyaga kasagoꞋya kave neꞋamamiye.” huꞋya amaipa haviya huꞋya ke vai-mainae. 2-3 Kema vaiya yafe Yisasina tuelufuꞋa (12) Aposolo anagaꞋamoꞋya mukiꞋa Yisasina amakuꞋama aminaya veafe ke hageꞋya ageꞋya mage huꞋya hae “Havigu tagaya Yisasi ke hamanepauna aliꞋyatia ataleta kaveꞋma fako faka hisunana haviya huyafenagi nafuꞋnaganagatama tamakaitami amuꞋnotamifi atiyetama seveniꞋa (7) kanale amaku amakesaene vayaꞋma, mainesigenoꞋma Alu Aotage AvamuꞋmoꞋa amakupima hiya humainenageꞋya veaꞋamimogami amaulagafima kanale kavaꞋma nehisaya vayafe atiyetama ani aliꞋyatela humatesune. 4 Humategahunanagi tagaya mukiꞋa yupa nunamu huta havige havige nehuta Yisasi kea hamapaige hamapaige huta maigahune.” huꞋya humainae. 5 HageꞋya mukiꞋa veaꞋmoꞋya mani kea haviteꞋya muse nehuꞋya ani vayala hapaliꞋya humataya vayala SitiveniꞋa, Yisasi kea aguꞋafi tokiyaꞋage huno malegeno Alu Aotage AvamuꞋmoꞋa agupina hiya humainea kanoene FilipiꞋene PolokolasiꞋene NikanaꞋene TimoniꞋene PamenasiꞋene NikolasiꞋe. NikolasiꞋa Atioku kanoa nayona Yuta nofi kanoa omaineanagi eaꞋyamo “Yuta vayaꞋmogami Anumaya KotiꞋamimo ke aliꞋna nagupi malegahue.” huno Isaleli nofi vayapi maineane. 6 Ani vayala amavalageꞋya Aposolo vayatega ageꞋya ani vayaꞋmogami amanute amaya maleꞋya nunamuna humatenae. 7 Anumaya Koti kemoꞋa mukiꞋa kotega ute ete higeꞋya kasagoꞋya Yelusalemu nemaiya veaꞋmoꞋya Yisasi kea haviꞋya amakupina malenae. KasagoꞋya mono note kava vayaꞋyagaene aniꞋa huꞋya Yisasi kea aliꞋya amakupi maleꞋya amametiti humainae.

8 SitiveniꞋa tusiꞋa kanale kanogino kayone hisia yaꞋene tokiyaꞋaene agupina hiya humainegeno tusiya huno ani vayapina tokiya avame yana humaine. 9 AniꞋa nehianagi nagoꞋa vayaꞋmoꞋya hetiꞋya SitiveniꞋene ke neꞋvaiye. Ani vayala miya oꞋali vaya maiteꞋya eteꞋya afaꞋa maineꞋya nago mono nopi neꞋvaya vayale. Sailinia vayaꞋene Alekasatalia vayaꞋene nagoꞋa vayala Silisia vayaꞋene Esia vayaꞋene Sitivenina ke vaitenae. 10 Kea vaitayanagi Alu Aotage AvamumoꞋa haꞋmaegeno kanale agu agesaene kanomo kea amigeno humaine. Higeno amakai kemoꞋa Sitiveni kemona oꞋagasene. 11 OꞋagasegeꞋya nagoꞋa vayafe “Sitivenifena havige hutesageta mone lamamigahune.” huꞋya hageꞋya ani vayala mage mo hae “Mani kanomoꞋa MosesefeꞋene Anumaya KotifeꞋene tusiya huno hu-haviya hunategeta havimainone.” huꞋya mo humainae. 12 Mani kema haya yafe mukiꞋa vayaꞋmoꞋyaene vayatamaene kahegi kema havilinaya anagaꞋmogamina amakuꞋamoꞋa haviya higeꞋya Sitivenina motafa huꞋya Kanisole vayate avaleꞋya umainae. 13 UteꞋya nagoꞋa havigema nehaya vayala amavaleꞋya hetimatageꞋya ani vayaꞋmoꞋya mage hae “Mani kanomoꞋa mukiꞋa yupa tagaila alu aotage mono notiene kahegi kene huno haviya hie. 14 Higeta havunana YisasiꞋa Nasaleti kanomoꞋa ma ala mono nona aliꞋna lagaꞋya vaineꞋataleꞋna ‘MoseseꞋma tahapai-mainea kahegi kea ataletama alu kava hiho.’ huno higeta havimainone.” huꞋya hae. 15 NehageꞋya mukiꞋa Kanisolefi mainaya vayaꞋmoꞋya Sitivenina aulu hayana augosamoꞋa alave alave nehuno ensole vayaꞋmogami amaugosamoꞋma nehia kava higeꞋya age-mainae.