1 HaenagaꞋa Yuta veaꞋmoꞋya ala imu Yelusalemu negiya kana falote higeno YisasiꞋa anilega hai-maine. 2 Yelusalemu kegiꞋyafi nago fiana sipi sipi afuyagamo fiana hane. Ani fiama hanelela ti kotuna male-maine. Ani li kotumo agia Yuta vayaꞋmogami* kefina Petesaitae. Ani kotutela faefuꞋa (5) fugagiꞋeta nona hane. 3-4 MukiꞋa kali veala aulaga asu hu-mai anagaꞋene aiya avayu hu-mainea anagaꞋene aiyaꞋaya api hu-mai anagaꞋene ani fugagiꞋeta noꞋyagafi alitalu huꞋya fae-mainae.

5 Nago anile nemaiya kanomona kaliꞋamoꞋa teti eitiꞋa (38) kafu hu-maine. 6 YisasiꞋa anima faeno mainea kanoa mogeteno “Mani kanoa ayaꞋaya kana kalia alino maine.” huno huteno mage hie “KalikamoꞋma haꞋnoma hisia yafena muse nehapio?” huno havige-maine. 7 Havigegeno kali kanomoꞋa Yisasife mage hie “Humave-nelina kanomoga tima aikalafuꞋma nehia kanaleꞋma naya huno navaleno tipi natesia vayala omaiya yafe nagaiꞋnige oanagi nagaila ago nagaseꞋya tipi aupaꞋa neꞋvae.” huno hie. 8 Higeno YisasiꞋa mage hie “Hetika fae omanakaꞋa neꞋalika ka vuo.” huno hu-maine. 9 Higeno aupaꞋa kaliꞋamoꞋa kanale hu-tegeno hetino fae omanaꞋa neꞋalino ka umaine. KanaleꞋma hu-tenea kana Sapati kanalele.

10 Ani yafe Yuta vayaꞋmoꞋya kaliꞋama haꞋno hutea kanomofe mage hae “Meni kana Sapati kanalele. NaꞋa higeka faesana omanaka alika neꞋvane? TagaiꞋma kahegi kemoꞋa Sapati kanalela ani kavala ohuo huno hu-maineane.” huꞋya hae. 11 Hageno kenonaꞋamia mage hie “KaliꞋniꞋa alino kanaleꞋma hu-na-tea kanomoꞋa mage huno naha-pai-maine ‘Fae omanakaꞋa neꞋalika vuo.’ huno hu-na-tene.” huno hie 12 HigeꞋya mage huꞋya havigae “Mani kanoa hana kanomo kaha-paigeka faesana omanaka alika neꞋvane?” huꞋya hae. 13 Hayanagi mukiꞋa veaꞋma anile alitaluma hagenofena YisasiꞋa aluꞋale ago umainegeno anima kaliꞋama haꞋnoma hutea kanomoꞋa mage hie “OꞋagoa kanomo ani kea hu-natene.” huno ha-mapaiye.

14 HaenagaꞋa YisasiꞋa kanale hu-tenea kanomona mono nopi mainegeno mogeteno mage hie “Kagaya ago menia kalikaꞋa haꞋno hu-ga-tegeka kanale huka mainanagi kefo kavala nagoꞋene ohuo. Kefo kavaꞋma hisanana nagoꞋa kana ya aligane.” huno hie. 15 Higeno mani kanomoꞋa viaꞋyamo Yuta vayafena mage huno hama-paiye “YisasiꞋa alino kanale hu-natenea kanoe.” huno nehie. 16 Hianagi YisasiꞋma Sapati kanaleꞋma kaliꞋama alino kanaleꞋma hu-tenea yafena Yuta vayaꞋmoꞋya aepa heꞋya amaipa kafa heteꞋya Yisasina aliꞋya haviꞋya hu-neꞋatae.

17 YisasiꞋa mage huno hama-nepaiye “NenafaꞋa mukiꞋa kanalela aliꞋyana neꞋaligeꞋna nagaiꞋenena aniꞋa huꞋna aliꞋyana neꞋalue.” huno hie. 18 Mani kehena YisasiꞋa “Anumaya KotiꞋa nagai NenafaꞋe.” huno nehuno “Nagaya Anumaya KotiꞋene nago kana kana hutaꞋa mainoꞋe.” hunoꞋma nehia kene Sapati kanale kahegi kema atagae-mainea yafeꞋene Yuta vayaꞋmoꞋya nagoꞋene ke vaiteꞋya “Haegahune.” huꞋya hu-mainae.

19 YisasiꞋa mage huno hie “Tamage-lafa huꞋna tamaha-nepauve NafaꞋneꞋamoꞋa agaiꞋage nagoke kavala nohianagi NenafaꞋma nehia kavala age-maineafe ani kavala nehie. NenafaꞋma nehia kavala NafaꞋneꞋamoꞋa ani kavala nehie. 20 NenafaꞋa NafaꞋneꞋamofena aguꞋafina nehaigeno agaiꞋma mukiꞋa nehia kavala ave-nelie. Ave-ligeno ala kavaꞋma ago hu-mainea kavala agaseno haenagaꞋa tusiꞋa ala kavakefa ave-linegetama agetama atali atalu hugahae. 21 NenafaꞋa fali-mainea vayala ali he-ti-mateno hamaimuꞋa neꞋamamianagino NafaꞋneꞋamoꞋa aniꞋa huno haiya veaꞋmogamina hamaimula neꞋamamie.

22 NenafaꞋa nago kanomona fako hu noꞋateanagi mukiꞋa veala fako hu-ma-tesia tokiya yana NafaꞋneꞋamona ago amine. 23 Aminea yafe Nenafafema mukiꞋa veaꞋmoꞋya agima alisaga hayana aniꞋa huꞋya NafaꞋneꞋamo agia alisaga hisae. NagoꞋa veaꞋmoꞋya NafaꞋneꞋamo agima alisaga ohisayana aniꞋa huꞋya hu-tenea Nenafa agiene alisaga nohae.

24 Magi nagaya tamage-lafa huꞋna tamaha-pauve nagoꞋa veaꞋmoꞋya keꞋniꞋa haviꞋya hu-natenea kanomofe ‘Tamage nehie.’ huꞋya amakupi maleꞋya amametiti hisayana ani veaꞋmogamina agola maige maige hisaya hamaimula ago ali-mainae. Ani veala hagoteꞋya fali-mai vaya kana huꞋya mainafiti hetiꞋya hamaimuꞋamia ali-mainae. HaenagaꞋa Anumaya KotiꞋa kaiyeꞋkea hu oꞋama-tegahie. 25 Tamage-lafa huꞋna tamaha-nepauve nago kanamoꞋma agoꞋma falote hisiana amaku amamemaꞋamoꞋa fali-mainaya veaꞋmoꞋya Anumaya Koti nafaꞋnemo ke haviteꞋya akave malesayana he-tiꞋya agola maigahae. Ani kana ago falote hu-maine. 26 Nenafana agaiꞋafi haimuꞋmo aepa haneanagi aniꞋa huno NafaꞋneꞋamofena ‘HamaimuꞋmona aepaꞋa maiyo.’ huno hu-tene. 27 NafaꞋneꞋamofena ikapinagati emainea kanoa vayaꞋmo atenea kanoginofe kaiyeꞋkema hu-ma-teno fako hu-ma-tesia tokiyaꞋa amine. 28 Mani kehena atali ohiho. Nago kana falote hisiana mukiꞋa agoꞋma faligeꞋyama komufi he-vai-matenaya veaꞋmoꞋya Yisasini nagea havigahae. 29 HaviteꞋya ani komufinagati he-tiꞋya hati-lavisageꞋya kanale kava hu-mainesaya veaꞋnea hetiꞋya agola maigahayanagi kefo kava hu-mainesaya veaꞋnea he-tisageno Anumaya KotiꞋa kaiyeꞋkea hu-ma-teteno kina hu-ma-tenageꞋya haviya hugahae.

30 NagaiꞋnige nago kavala nohuanagi Anumaya KotiꞋa nahapai-mainea keleti kea fako hu-neꞋama-toe. Ani yafe fatago hulama huꞋna kea fako hu-neꞋama-toe. NagaiꞋniꞋa nagesafiti ani kavala nohuanagi hu-na-tenea kanomoꞋa agaiꞋa huo hea kavaꞋage nehua yafe fatago hu-lama huꞋna kea fako hu-neꞋama-toe.” huno hie.

31-32 “NagaiꞋnigeꞋma hu-haleꞋna aepaꞋaꞋnima tamaha-paisugenoꞋa keꞋnimoꞋa haviya hugahianagi nago kanomoꞋma nagaifema hu-haleno tamaha-nepaiyana nagaya ago havimainoe agayama nagaifema hia kea tamage nehie. 33 Tamakaya vayala hu-matageꞋya Yonitega vageno YoniꞋa nagaifena ke tamage tamaha-pai-maine. 34 Nagayama vayaꞋmoꞋya nagaifema hu-mainaya kea ‘Afa ke nehae.’ huꞋna huanagi tamakaya ani kea havisageno tamaugafa ali-gatisia yafe tamaha-nepauve. 35 YoniꞋa kaꞋni kana huno maineno hanagaligenoꞋma leana osi kanafi tamakaya agai kaꞋniꞋmoꞋma lea yafena musena hu-mainae. 36 Muse hu-mainayanagi nago tusiꞋa kanale yaꞋaene nagai aepaene tamave-li-maine. Ani yana ali-mainoa aliꞋyaniꞋae. Nenafa naminea aliꞋyama aliꞋna avaya-yesua yana YoniꞋa nagaife hu-mainea kemo agase-mainegetama agetetama nagaifena havimainae. Ani aliꞋyaꞋniꞋa Nenafa hu-na-tenea yafe tamave-li-maine. 37 Hu-na-tenea NenafaꞋa nagaifena ago tamaha-pai-maineanagi tamakaya agaila ageꞋa ohavitama agai aufina oꞋagetama hu-mainae. 38 Hu-tenea kanomofena ‘Tamage nehane.’ hutama tamakupina maletama tamametiti nohaya yafe Anumaya Koti kea tamakupina alitama nomalae.

39-40 Anumaya Koti kea nayo kae-malenaya avopi hapalitama ati-yetama ago age-mainae. ‘Ani avopitila agola maige maige hisuna tahaimula aligahune.’ hutama tamakesa havimainae. Ani avona nagaife huꞋya tamaha-pai-mainayanagi nagaitega esaya tamakesa nohaviye. Agola maige maige hisaya tamahaimula tamamisua yafena nagaitega nomae.

41-42 Veala muse hu-na-teyafene huꞋna nohuanagi tamakaifena nagaya ago havimainoe. Tamakaya tamakuꞋafina Anumaya Kotifena notama-haikeꞋna neꞋagoe. 43 Nagaya Nenafa agile emainoanagi navaletama falu fala hutama nonatayanagi alu kanomoꞋa agaiꞋa agile esigetama afaꞋa avaletama ali falu fala hutegahae.

44 Tamakaya ‘Alu vayatimo alu vayatimoꞋya muse hu-lateꞋya ala tagi lamisae.’ hutama nehayanagi Anumaya KotiꞋa agaiꞋage mainegi alu Anumaya KotiꞋa omaineanagitama Anumaya KotiꞋa muse hu-lama-tesia yafena notamahaiye. NaꞋa nehayanagi hanaꞋa hutama nagaifena tamakupina maletama tamametitia hugahae? 45 Tamakaya nagaife ma ke hutama ohaviho ‘Nefate kaiyekea hu-la-tegahie.’ hutama tamakesa ohaviho. AꞋao, nagaya kaiyekea hu otama-tegahuanagino tamakayama taya hugahiema hutama nehaya kanomo, MoseseꞋma tamaha-paiya kemoꞋa kaiyekea hu-lama-tegahie.

46 Mosese kema havitama tamakupi maletama tamametitima haleꞋasina nagai kene aniꞋa hutama tamametitia haleꞋasine. MoseseꞋa nagaife huno kae-maleneafe aniꞋa haleꞋasine. 47 Tamakaya MoseseꞋma kae-malenea kema havitama tamakupi maletama tamametitia ohunayanagitama hanaꞋa hutama nagai ke havitama tamakupi maletama tamametiti hugahae?” huno hamavi-nege.