1 Kema ayeso haya kemoꞋa haꞋno hutegeno PoloꞋa Yisasina amakuꞋa amitafa humainaya veafe ke higeꞋya agaite ageno tokiyaꞋage huꞋya maisaya amaku amakesa alino hapaiteno hu falu fala humateteno amataleno Masetonia haigahe haimaine. 2 Ani kotega vai neꞋayeno mukiꞋa kanafina tokiyaꞋage huꞋya maisaya kea hamapaiteno Kaliki kotega elavi-maine. 3 Elavino tagufa (3) ika emaiteno Silia eugahe “Tipi kale alisue.” huno hiana Yuta vayaꞋmoꞋya agaila haesaya kema haya kea hageno haviteno agesa aiyahae huno tipi kalea neꞋataleno “EteꞋna mopafi Masetonia kotega agaseꞋna haigahue.” huno humaine. 4 AgaiꞋenema tokaeꞋya haiya vayala Pilusi nafaꞋnemo agia SopataꞋe Pelia kumate kanoene Tesalonaikati AlisatakusiꞋagi Sekutasigani Tepi kumateti kanoa KaiyusiꞋene TimotiꞋene Esia kanolatana Tikikusigani Talofimusiganie naꞋa vayaꞋyaga PoloꞋene hai-mainae. 5 Ani vayaꞋyaga euhagoteꞋya Taloasi kumate tagava maigahe eumainae. 6 EuꞋya mainageta tagaya Filipai maineta hale oki kaihame nenaya imu kiꞋya naya kanamoꞋa haꞋno hutegeta tipi kalefi haisaga humaita faefuꞋa (5) tau faeta tina lakaeta amakaitega Taloasi euvaꞋyi huta seveniꞋa (7) yupa ani kumatela mainone.

7 Sota yupa Anumayamo agile kave negahe alitalu humainonageno PoloꞋa egama visia yafe huhaleno mono kea tahapaino hume hume neꞋvigeno kege amuꞋnokefa maino humaine. 8 MainoꞋma hiana anafi kikalo humalenaya nopi maunanagino kasagoꞋya kaꞋniꞋyaga ayevasa humalageta mainone. 9 Mainonageno nago neyana YutikusiꞋe akalogate mopale mainegeno PoloꞋa mono kea ayaꞋayate maino hume hume vigeno Yutikusina aukalo kalo higeno aula faeno fae latapalino fae-mainefiti anale tagufa (3) ayekalo huꞋya kimalenaya nopitilagino ani akalogapiti asaga hulavino mopafi tavino haegeno faligeꞋya molisaga huꞋya agayana ago fali-maine. 10 Fali-mainegeno PoloꞋenena lavino mo anu-kilineno mage hie “Atali talua ohiho. Ago fali-maineanagi eteno haimula neꞋalie.” huno humaine. 11 Huteno ani nopinaga eteno haino maineno kaihame maya kolino higeꞋya nenageno ani kavela neteno ayaꞋaya mono ke amakaiꞋene huge huge nehigeno kola ali halegeno neꞋamataleno umaine. 12 Vigeno ani neyana eteno haegafa huno maigeꞋya avaleꞋya notega neꞋuꞋya tusiꞋa muse nehuꞋya amaipamoꞋa kanale humaine.

13 Tagaya uhagoteta tipi kale alitonageno PoloꞋa “Mopafi Asosi utesugetama anileti tipi kalefina navalegahae.” huno higeta tipi kalefi Asosi mogava mainone. 14 Asosi agava maineta Polona avaleta tipi kalefi asaga humaita Mitilini kumate umainone. 15 Uteta anileti tipi kalefi mo faeteta Kiosi kumate uvaꞋyi huta ani lipi kalefi faeteta Samosi mo faeteta Miletusi evaꞋyi humainone. 16 PoloꞋa “Afulea kanahe muse hisaya imu kisaya kana Yelusalemu evaꞋyi hisuafene.” huno ayaꞋaya kana Esia kotega omaisia agesa haviteno “Efesusia ago agaseꞋna ugahue.” huno humaine.

17-18 PoloꞋa Miletusiti vaya humateno “Efesusi utama soka vayafe nagaitega esaya ke hamapaiho.” huno higeꞋya uꞋya mo hamapaigeꞋya agaitega ageno mage huno hamapaiye tamakaya ago agemainae nagaya hagoteꞋna Esia kotega evaꞋyima humainoa kanafina aepa heꞋna humainoa kavala ago agemainae. 19 Naugafa aliꞋna ohainogi Anumayamo aliꞋya neꞋalugeꞋya Yuta vayaꞋmoꞋya mukiꞋa kanafina hu-haviya hunatageꞋna tusiꞋa avite-mainoe. 20 Avia atoanagi atalia ohuꞋna mukiꞋa lamaku tamamema ali lokiya vaisaya kea atalutamifiꞋene notamifi notamifiꞋene Anumaya Koti kea huhaleꞋna tamahapai-mainoe. 21 TamahapaiꞋna Yuta veaꞋnene Kaliki vayaꞋnenefe “Kefo yatamihe tamakuꞋa aiyahae hutama Anumayatimona Yisasife havitama lamakupi maletama tametiti hiho.” huꞋna huhaleꞋna tamaha-pai-mainoe. 22 Tamahapai-mainogi menia agegeho Alu Aotage AvamuꞋmoꞋa “Yelusalemu haiyo.” huno nahapaiyanagiꞋna anilega visugeꞋyama vayaꞋmoꞋya hunatesaya kavala nagaya ohavinoe. 23 Ohavinogi mukiꞋama umainoa kumatela Alu Aotage AvamuꞋmoꞋa mage huno nahapai-maine “TusiꞋa kanaꞋage yama hugatesaya yana falote hugateno nofipina kategahae.” huno nahapai-maine. 24 Nahapai-maineanagi nagaya falisufi afaꞋa maisufi afa yatafa hane huꞋna nagesa nehavugi AnumayatimoꞋa Yisasi naminea aliꞋyama, veafe Anumaya KotiꞋa tusiꞋa kayone hulatenea kanale mono kea huhaleꞋna hamapaisua aliꞋyana ali haꞋno hisua nagesa nehavue.

25 Tamakai amuꞋnopina vaiyatete huꞋna Anumaya Koti kava yagai-lamatesia kea tamahanepauvanagiꞋna menia lamahanepaugi haviho nagaya havimainoe haenagaꞋa nagaila naukipalela nagoꞋene onagegahae. 26-27 Ani yafe menia tamagelafa huꞋna tamahanepauve nagaya kolia ohuꞋna mukiꞋa Anumaya Koti agu agesafima hanea kea ago tamahapai-mainoafe nago kanomoga Anumaya Kotitegati fananema hisanana tamakaitami yane. Ani kemoꞋa nagaipina omegahie. 28 Omegahigi tamakaya tamaugafa kaꞋyetama maiho. Alu Aotage AvamuꞋmoꞋa “Kava yagai-mateho.” huno lamaminea vayala, AnumayamoꞋa agaiꞋa kolamaꞋaleti miya humalenea sipi sipilelela kava yagaiho. 29 Nagaya nehavue tamataleꞋnama visuana nagoꞋa vayala, kaveꞋage afela kalamo nehia kava huꞋya tamakai amuꞋnopi esayaꞋamoꞋya Yisasife haviꞋya amakupi malenaya sipi sipiyaga ali haviya hugahae. 30 Ali haviya hugahagi tamakai amuꞋnopitila nagoꞋa vayaꞋmoꞋya hetiꞋya havigea mohu haviya mehu haviya nehuꞋya Yisasife haviꞋya amakupi malenaya veala “Tagai takave eho.” huꞋya amavayu hugahae. 31 Ani kavaꞋma hisaya yafena kaꞋyeho. Nagaya tagufa (3) kafufina felugaene kegeꞋene kasaloꞋnahae huꞋna maifalua ohunoe. Avia neꞋateꞋna mukiꞋamogatamina tamaku tamakesa nagoke nagokemogatamina tamaumonola malogetama havimainagi ani yafe tamakesa ali hao hutama haviho.

32 Menia Anumaya Koti ayapi tamatogeno agaiꞋa kayone hulamatesia keꞋamoꞋa tamakaila alino tokiyaꞋage hulamateteno mukiꞋa agaiꞋa alu aotage veaꞋneꞋamogamima neꞋamatea kanale yana tamamigahie. 33 Nagaya nagoꞋa vayaꞋmogatama mone afenotamileꞋene kukenatamileꞋene ageꞋna nahaꞋyea nohuane. 34 Tamakaitamia agayana nayapiti aliꞋyana aliꞋna nesua yaꞋene nagaiꞋenema lokaeꞋya nemaiya vayaꞋmoꞋya nesaya yaꞋene ali falote hugetama age-mainae. 35 NaꞋa nehuꞋna mukiꞋa yana tamaveliꞋna mage huꞋna humainoe “AliꞋya alitetama kalima neꞋaliya vayala amaya hiho.” AnumayatimoꞋa Yisasi humainea kea mage humaine “VeaꞋmoꞋya nago yama alisayana muse hugahagi afuꞋaganana nago yana amisiana tusiya huno musena hugahie. Aminea yamo muse yamoꞋa ali-mainea muse yana agase-maine.” huno humainea kea tamakesa havi havi hutama maiho huno humaine.

36 Mani kea huteno soka vayaꞋene PoloꞋa aleꞋya ayeno Anumayamotega ke huno havige-maine. 37-38 HavigetegeꞋya mukiꞋa soka vayaꞋmoꞋya tusiꞋa avi neꞋateꞋya Polona anukiꞋya atako ataka nehuꞋya haenagaꞋama agai aukipaleꞋma nagoꞋene oꞋagesaya yafe hamaumana halegeꞋya avia ateteꞋya tipi kale hanelega avaleꞋya umainae.