1 Nago kanoa KoniliasiꞋe ati kava kanoa Sisalia maineno Itali kumateti vani hataletiꞋa (100) ati vayate kava yagai-maineane. 2 Ani kanoene anagaꞋaene Anumaya Koti kema nehaviꞋya nemaiya yafe “Agayama haiya kava hugahune.” huteꞋya afenoꞋamima omalenea veala monea amamite amamite nehuꞋya mukiꞋa kanafina nunamuna huꞋya muse huꞋya havinegayane. 3-4 Nago unena ani kanomoꞋa heti-maineno himona kana yana ageana nagola Anumaya Koti ensole kanomoꞋa agaite evaꞋyi huno mage huno humaine “Koniliasigae mainapio?” huno higeno KoniliasiꞋa aulu neheno tusiꞋa amaꞋyo neꞋaino mage huno hie “Ala kanomogae naꞋa higeka nehane?” huno higeno ensole kanomoꞋa mage huno hie “Kagayama Anumayamotega havinegana yaꞋene afenoꞋamima omalenea veala hamaꞋmaeka amamite amamite hana yaꞋene Anumaya KotiꞋa ageteno kagaifena agesa nehavie. 5 Kagaya menia nagoꞋa vayala humategeꞋya Yopa kumateti Saimoni Pitana movaleꞋya eho. 6 Ani kanomoꞋa nago pulamakamo augafa laga huno talo nehia kanoene nemaiye. Ani kanomo agia SaimoniꞋe. NomaꞋa hagelimo agegayalega hane.” huno hapaiye.

7-8 Ani kea hapaiteno ataleno vigeno KoniliasiꞋa tole aliꞋya kanolatamaꞋaene nagola Anumaya Koti kema nehavia ati kanoꞋamoꞋenefe ke higeꞋya ageno ani ensole kanomoꞋma evaꞋyi huno humainea kea hamapaiteno humategeꞋya Yopa umainae.

9 Katega mo-faeteꞋya kotigeꞋya hetiꞋya Yopa evaꞋyi hugahe hageno yagemoꞋa amuꞋno-kaꞋno higeno PitaꞋa nunamu hugahe nomona amega agotofulega haino maine. 10 Mainegeno tusiꞋa agateanagi kavela yaufa talo tala nehageno nagola himona kana yana age-maine. 11 Ageana ikamoꞋa aihagalo higeno nagola tusiꞋa kena kana yana aluga aluga atupale nofi aye-maleteꞋya atalageno mopafi enelavigeno age-maine. 12 Ageana ani yapina mukiꞋa yaka kafa afua osifaꞋvea nama vayupala yagaene mainageno elavi-maine. 13 Elavigeno PitaꞋa neꞋagegeno nagola age aino mage huno hapaiye “Pitagae hetika ani memeyana heka no.” huno hie. 14 Higeno PitaꞋa mage huno hapaiye “AꞋao, Alanimogae ma ma yaga kafa kagai kaufina oniꞋyaꞋage humainegeꞋna nagaluma humalenana yamofe tamage huꞋna onenoa yaꞋyaga hane.” huno humaine. 15 Higeno nagoꞋene agea aino mage huno humaine “Anumaya KotiꞋa ago alino sese humalenea yafena ‘OniꞋyaꞋagela ohunegi afaꞋa alika no.’ huno humainea kavefena nagoꞋene ‘OniꞋyaꞋage humaineanagiꞋna onegahue.’ huka ohuo.” 16 Ani kavala taliꞋa (3) yupa huteno aupaꞋa ani kenamoꞋa ikapinaga eteno haimaine.

17 Haigeno PitaꞋa maineno anima agea himonamo aepaꞋahe agesa havige havige huno nehavigeꞋya KoniliasiꞋma humategeꞋya aya vayaꞋmoꞋya Saimoni nofe hamavige hamavige hume hume uꞋya ani nona ageteꞋya fiate mehetiꞋya mainae. 18 HetiꞋya maineꞋya ke huꞋya mage huꞋya hae “SaimoniꞋa nago agia PitaꞋe kanoa mani nopina mainefi omaiye?” huꞋya hae. 19 Hageno PitaꞋa himonahe agesa havige havige huno mainegeno AvamuꞋmoꞋa mage huno hapaiye “Havio taliꞋa (3) vayaꞋmoꞋya kagaife megatineꞋayae. 20 MekatineꞋayagi hetika afepinaga lavika mogo. Nagaya humatogeꞋya emainagi tole kagesa ohavika afaꞋa amakaiꞋenena vuo.” huno humaine.

21 Higeno PitaꞋa tavino mage huno hamapaiye “Atimaayaya kanoa nagayae. NaꞋa higetama neꞋae?” huno hama-vige. 22 HamavigegeꞋya mage huꞋya hae “Nago kanoa KoniliasiꞋe ati vayate kava kanogino fatago kano maineanagino ‘Anumaya Kotina haiya kava hugahue.’ huno humainea kanomoꞋa hulategeta neꞋonageno ani kanomoꞋa Yuta vea omainea kano maineanagi Yuta veaꞋmoꞋya ‘Kanale kano maine.’ huꞋya hageno nemaiyane. Nago yupa nagola alu aotage ensole kanomoꞋa evaꞋyi huno mage huno hapaiye ‘Saimoni Pitafe ke hugeno kagai nopina eno nagola kea kahapaisigeka havigane.’ huno higeno hulategeta neꞋone” huꞋya hapai-mainae. 23 Hageno PitaꞋa kenonaꞋamia mage huno hie “Nopi ehaitama emaiho.” huno higeꞋya haiꞋya mo faeteꞋya kotigeno PitaꞋa hetino amakaiꞋene vigeꞋya nagoꞋa Yopa kumateti Yisasife haviꞋya amakupi malenaya vayaꞋmoꞋya amakaiꞋene tokaeꞋya umainae.

24 Katega nagoke no mo faeteꞋya ega Sisalia kumate evaꞋyi hageno KoniliasiꞋa esayafene huno amakava maineno agaiꞋa nofi vayaꞋene anagaꞋamoꞋyaenefe ke higeꞋya melitalu huꞋya mainae. 25 Mainageno PitaꞋa ani nopi hai-falegeno KoniliasiꞋa avate eno aiyafi ape humaineno muse hutene. 26 Musena hutetegeno PitaꞋa ali hetiteteno mage huno hie “Hetio nagaiꞋenena afa kano mainoe.” huno hie. 27 PitaꞋa mani kea nehuno KoniliasiꞋene kea kea hume nopinaga haino mogeana kasagoꞋya veaꞋne melitalu huꞋya mainae.

28-29 Mainageno PitaꞋa mage huno hie tamakaitamia ago havimainae Yuta veaꞋmoꞋya Isaleli vea omainaya veaꞋnene maineꞋya kea kea huyafena ago nagalu humalenaya kea ago havimainae. Anumaya KotiꞋa nagaila navelino mage hie “Nago kanohena ‘OniꞋyaꞋage kano mainane.’ huka ohuo.” huno naveligeꞋna ageteꞋna nagaifema ke hanageꞋna tole nagesa ohaviꞋna aupaꞋa emainogi naꞋa higeka nagaifena kea hanageꞋna emainoe? huno havige.

30 Havigegeno KoniliasiꞋa mage huno hapaiye “TaliꞋa (3) kana ago euno nagasegeꞋna une kanalega tali (3) kiloki noniꞋafi maineꞋna Anumayamotega nunamu huꞋna havinegogeno aupaꞋa nago kanomona kenaꞋamoꞋa efeꞋage nehuno alave alave nehigeno naule mehetigeꞋna agoe. 31 Agogeno ani kanomoꞋa nagaifena mage huno nahapaiye ‘Anumaya KotiꞋa haavigana kea ago haviteno kagayama afenoꞋamima omalenea veala hamaꞋmaeka amamite amamite hana yana ageteno kagaifena agesa nehavie. 32 Nehaviafe kagaya Saimoni Pitatega vayala humatesanageꞋya Yopa visae. Ani kanomona hamoꞋamoꞋa SaimoniꞋe pulamakamo augafa taga huno talo nehia kanomo nona hageli agegayale hanegeno yoka unemaiye.’ huno humaine. 33 HigeꞋna nagaya aupaꞋa kagaitega vayala alimatalogeꞋya vageka kanaleꞋya huka emainanageta AnumayamoꞋa ‘Hamapaiyo.’ hunoꞋma kahapai-mainea kea havigahune huta Anumaya Koti aulagafi melitalu humainone.” huno humaine.

34-35 PitaꞋa hetino aepa heno mage huno hie “Tamage, havuana Anumaya KotiꞋa vayaꞋmo agiꞋahepi nofiꞋahepi agesa havino notamianagi mukiꞋa nofi vayaꞋyagafitila nagoꞋa veaꞋmoꞋya Anumaya Kotina amakuꞋa amiteꞋya ‘Agaila haiya kavala kanale kava humainaya veaꞋmoꞋya Anumaya KotiꞋa ani veafe nahaiya veaꞋne mainae.’ huno hie.” 36 Huteno Anumaya KotiꞋa Yisasi Kalaisina hutegeno kanale kea huno Anumaya KotiꞋene alino nagoke taipa falu huta maisuna kea Isaleli veaꞋmogatina tahapaiya kea havimainae. Ani Yisasi KalaisiꞋa mukiꞋa veaꞋmogatina Anumayatimo maine. 37 YoniꞋa “Kefo yatamihena tamakuꞋa aiyahae hisageꞋna tina falelamategahue.” huno hamapaitegeno YisasiꞋa Kaliliti aepa heno mukiꞋa Yutia kotega kema humainea kavafena tamakaya ago havimainae. 38 Anumaya Kotina Alu Aotage AvamuꞋamoꞋene tokiyaꞋaene Nasaleti Yisasina amigeno Anumaya KotiꞋa agaiꞋaene tokaeno maineafene huno alu kumate kumate ute ete hiaꞋamo kanale kava huno SataniꞋma amatafa higeꞋya kalima ali-mainaya veaꞋmogamina alino kanale humatene. 39 Kanale humategeta tagaya mukiꞋa Yuta veaꞋma mainalegaene Yelusalemuene humainea kavala taulagafiti age-mainona ke tamahanepaune. Ani kava higeꞋya yafaga yosale asaimalageno fali-maine. 40 Falianagi tole yupa maiteno nago kanalela Anumaya KotiꞋa fali-mainefiti alino hetitegeno veaꞋmogati taule mo laveli-maine. 41 Mo lavelianagi mukiꞋa veaꞋmoꞋya agaila oꞋagenagi tagaya veaꞋma hamapaisunafene huno Anumaya KotiꞋa tagaila ago hapalilategeta mainonafe tagaya fali-mainefiti ali hetitenea kanafina YisasiꞋene tokaeta maineta tiꞋene kaveꞋene nemainone. 42 Nemainonanagino YisasiꞋa veaꞋmogamina mage hutama hamapaiho huno humaine “Nagaya fali-mainesaya veaꞋnene afaꞋa mainesaya veaꞋnene kaiyeke humatesuafene huno Anumaya KotiꞋa Yisasinia hunategeꞋna emainoe.” hutama hamapaiho. huno humaine. 43 Yisasifena mukiꞋa Anumaya Koti amaune vayaꞋmoꞋya mage huꞋya humainayane “MukiꞋa veaꞋmoꞋya agaife haviꞋya amakupi maleꞋya amametiti hisageno agaiꞋa agileti kefo yaꞋamia aigeꞋamateno alitalemategahie. huꞋya humainayane.” huno hie.

44 PitaꞋa mani kea yaufa hamanepaigeno Alu Aotage AvamuꞋmoꞋa elavino mukiꞋa mani kema maiꞋya nehaviya veaꞋmogami amakupina efalemaine. 45-46 Amakupi efalegeꞋya amaku amakesafiti nohaviya kea alu ke alu kefiti Anumaya Koti agia alisaga nehae. Ani kavaꞋma haya yafe PitaꞋene emainaya veaꞋmoꞋya Yisasi kema havimainaya Isaleli veaꞋmoꞋya haviteꞋya Anumaya KotiꞋa ago alu veaꞋmogamina Alu Aotage AvamuꞋama amamia yafena tusiꞋa amamaꞋyo aigeno PitaꞋa mage huno humaine. 47 “Anumaya KotiꞋa tagaila Alu Aotage AvamuꞋamona taminea kava huno mani veaꞋnene ago amamine. Tima falematesuna kaana ta nagalua hulategahie? Tina afaꞋa falemategahune.” huno humaine. 48 Huteno amakaife mage hie “Yisasi Kalaisi agile tina falelamatesue.” huno hamapaiteno tina falematetegeꞋya mage huꞋya hapaiye “TagaiꞋene nagoꞋa kana tagaya maigane.” huꞋya humainae.