1 NafuꞋnagana-gatama menia Alu Aotage AvamuꞋmoꞋa tokiya neꞋamamia ke havisae huꞋna nehue. 2 Nayona Yisasi kema ohavinaya kanafina SataniꞋa tamavayu higetama agea oꞋaino ago fali-mainaya veafena “Anumayati mainae.” hutama amakisana neꞋvaitama havi kate umainaya yafena tamakaya ago havilinae. 3 Anumaya Koti AvamuꞋmoꞋa nago kanomo aguꞋafima mainesigenoꞋa mani kea ohugahie “Anumaya KotiꞋa Yisasife hai vaiteno hani yapi maiyo huno hutesie.” huno Yisasina hu-haviya hu oꞋategahie. Nago kanomona Alu Aotage AvamuꞋma agupi omainesia kanomoꞋa “YisasiꞋa AlaniꞋamo maine.” huno ohugahie.

4 Anumayamo aliꞋya aligahe aluꞋa luꞋa muse yamo tokiya nelamianagi nagoke Alu Aotage AvamuꞋmo nelamie. 5 Anumayamo aliꞋyana aluꞋa luꞋa aliꞋya hanegeta neꞋalunanagi nagoke Anumaya maine. 6 Mainegi aluꞋa luꞋa aliꞋya alisuna tokiyatia hanegeta neꞋalunagi nagoke Anumaya KotiꞋa aliꞋyamaꞋa alisuna tokiya nelamianagino agaiꞋa aliꞋyana neꞋalie. 7 MukiꞋa veaꞋne amaya hisunafe AvamuꞋmoꞋa tokiyaꞋa tave-nelino tahaote tahaote tamine. 8 Alu Aotage AvamuꞋmoꞋa nagoꞋa veaꞋmogamina Anumaya Kotina agu agesaene kea hamapaisia tokiya amamiteno nagoꞋa veaꞋmogamina falaki-mainea kemo aepaꞋa havisaya amaku amakesa amamine. 9 Ani AvamuꞋmokeꞋya nagoꞋa veaꞋmogamina Anumayamofe haviꞋya tokiyaꞋage amametiti hisaya amakuꞋa neꞋamamino nagoꞋa veaꞋmogamina kalima neꞋaliya veaꞋne aliꞋya kanale humatesaya tokiya nagoke AvamuꞋmokeꞋya amamine. 10 NagoꞋa veaꞋmogamina tokiyaꞋage avame yama hisaya tokiya neꞋamamino nagoꞋa veaꞋmogamina Anumayamo kea amakupinaga humainea kea huhaleꞋya hisaya tokiya amamine. NagoꞋa veaꞋmogamina havilama huꞋya fako hisaya tokiya amamigeꞋya “Mani kavala Anumayamo AvamuꞋmo nehio? VeaꞋmoꞋya amaku amakesafiti nehao? Kefo AvamuꞋmo nehio?” huꞋya havisaya tokiya amamine. NagoꞋa veaꞋmogamina nohaviya kefiti alu amake alu amakefiti hisaya tokiya amamine. Ani kemona aepaꞋa hu yahae huꞋya hisaya tokiya nagoꞋa veaꞋmogamina amamine. 11 Haote haote tokiya nagoke AvamuꞋmokeꞋya tamine. AgaiꞋa haiya kava huno tahaote tahaote alu lokiya alu lokiya fako huno lamine.

12 Taugafafitila taiya, tayana, taulaga aote aote haneanagi taugafa nagoke yane. AniꞋa huta Kalaisife havita lagupi malenona veala alu veaꞋne alu veaꞋne mainonanagi mukiꞋa veala Kalaisina nagoke augafa mainone. 13 Nagoke AvamuꞋmoꞋa tina falelamatea kava huno nagoke augafale alino aikaꞋmaelategeta Yuta vea omainaya veaꞋnene, Yuta veaꞋnene, nofipi maineꞋya mone oꞋali aliꞋya veaꞋnene, miyaꞋamima alisaya aliꞋya neꞋaliya veaꞋnene alino aigaꞋmaelategeta nagoke taugafa mainonageno nagoke AvamuꞋmona timoꞋma hia kava huno ani li nesunafe nelamie.

14 Taugafa nagoke yamaꞋagela omalegi taugafafitila taiya, tayana, taulaga hane. 15 AiyamoꞋa “Nagaya ayana omainoafe mani augafafiti kanoa omainoe.” hunoꞋma hisiana havige afaꞋa ani augafafiti kano maine. 16 AgesamoꞋa “Aulaga omainoafe mani augafafiti kanoa omainoe.” huno hisiana havige afaꞋa ani augafafiti kano hane. 17 MukiꞋa augafafima aulagaꞋageꞋma haneleꞋasina hanaꞋa huno agesa havileꞋasine? MukiꞋa augafafima agesama haneleꞋasina hanaꞋa huno mana havileꞋasine? 18 NaꞋa ohunegi Anumaya KotiꞋa agesa haviteno agaiꞋa haiya kava huno taulaga, taiya, tayana talo hulateteno aote aote yana nagoke taugafafina alino malete malete higeno hane. 19 Nagoke yamaꞋageꞋma hanesina mukiꞋa laugafa omalesine. 20 Alu tupa-tapama alino talo higenoꞋa taiya, tayana haneanagi nagoke taugafale hane.

21 AulagamoꞋa ayafena “Kagayama omaiteꞋasina nagaya kanaleꞋya huꞋna mauleꞋasine.” huno ohugahie. AnumoꞋa aiyahena “Kagayama omaiteꞋasina nagaya kanaleꞋya huꞋna mausine.” huno ohugahie. 22 NaꞋa ohugahigi nago kaiyaga taugafamofema “TokiyaꞋa omalene.” huta nehunanagi ani kaiyaga taugafamoꞋa tusiꞋa aliꞋyamaꞋa hane. 23 Nago kaiyaga taugafamofena “Afa ya kana humaine.” huta ali hilato huneꞋatonanagi tagaye hisuna kaiyaga falakita kena fai neꞋalune. 24 Fai neꞋalunagi kanaleꞋma humainea kaiyagatia afaꞋa kena nofaunagi Anumaya KotiꞋa agaiꞋa agesa haviteno mukiꞋa laugafa talo humaleteno afa ya kana huno haviya humainea taugafamo kaiyaga kanaleꞋya huno agia alisaga nehie. 25 MukiꞋa laugafamoꞋya ali fako ohisayafe ani kavala humalegeno “Nagoke taugafa hane.” nehuta nago avamete maineta kava yagai-mainone. 26 Nago kaiyaga taugafamoꞋa tagatama aiyana mukiꞋa laugafamoꞋa tagata neꞋaiye. Nago kaiyaga taugafamoꞋa ala agima aligenoꞋa mukiꞋa taugafamoꞋa muse nehie.

27 Lamakaya mukiꞋa Yisasina augafa aiya, aya, aulagaꞋa mainae. 28 Yisasife havita lagupi malenona veaꞋmogatama nagopima maunana alu aliꞋya alu aliꞋyana Anumaya KotiꞋa agaiꞋa huyogino lamine. Hagoteno Aposolo vayala humateteno anile Anumayamo amakupi humainea kema huhaleꞋya hisaya veala humateteno anile Anumaya Koti ke huge amavelige hisaya veala humateteno anile tokiya avame yama hisaya veala humateteno anile kali vea ali hetimatesaya veala humateteno anile vea amaya hisaya veala humateteno anile kava veala humateteno anile amakesamoꞋa nohavia kefiti hisaya veaꞋnene alino hetimatene. 29 MukiꞋa vayaꞋmogata Aposolo vaya mainao? Ifi mukiꞋa veaꞋmogata Anumayamo amakupi humainea kea huhaletama hisaya vea mainao? Ifi mukiꞋa veaꞋmogata huge amavelige aliꞋyana neꞋaliyo? Ifi mukiꞋa veaꞋmogata tokiyaꞋage avame yana nehao? 30 Ifi mukiꞋa veaꞋmogata kalima aliya veala ali kanale huneꞋamatao? Ifi mukiꞋa veaꞋmogata tagesamoꞋa ohavinea kefitila nehao? Ifi mukiꞋa veaꞋmogata ani amakema aiya kea hu yahae hutama nehao? 31 AꞋao naꞋa nohunagi tamakaya AvamuꞋmo uhagote hanea muse yana alisayafe tokiyaꞋage huno tamahaisie huꞋna nehue.

Menia nagaya nago yamoꞋa lamage huno uhagote hanea auꞋavafe tamahapaigahe hugi haviho.