10
Havigu ayelavataga hisia yapi asaga hu lavisunagi kaꞋyeta maisune.
1-2 NafuꞋnagana-gatama Yuta taginagomo-gamifena tamakesa havisae huꞋna nehue. Mosese akaveꞋma umainayana nago siaꞋmoꞋa mukiꞋa aiso humateneno kana amaveligeꞋya kanaleꞋya huꞋya vayana mukiꞋamoꞋya Haesa tina lakae-mainayafe MoseseꞋene ailokaeꞋya maineꞋya siatetiꞋene hage litetiꞋene tima fale neamataya avame kavala humaine. 3-4 MukiꞋamoꞋya ti omale kotega umaineꞋya nagoke ikapinagati kaveꞋene yafapiti falote hia alu aotage tiꞋene ne-mainae. Ne-mainagi ani yafana KalaisiꞋe. Agaya maineno amakaiꞋene vaiyatete humaine. 5 MukiꞋamoꞋya nayanagi kasagoꞋya veaꞋmoꞋya Anumaya Koti kea akave omalageno Anumaya KotiꞋa musena hu oꞋamateno amatalegeꞋya nagoꞋa veala faligeꞋya amaugafa kaꞋme kopi atalegeno mopagopi haneme umaine.
6 NaꞋama humainaya kavala tagaiti hulamakesa hisunafe hu-mainayanagita amakaya humainaya avamete huta age lahaꞋye nehuna kavala ohisune. 7 NagoꞋa veaꞋmoꞋya afa anumaya, amayateti talo humaleteꞋya amakuꞋa amiteꞋya Anumaya Koti kea atalenayane. Tagaya ani kavala ohisunafe Anumayamo avopina mage huno kae-maleneane
“Afa anumayamofena muse huꞋya kaveꞋene tiꞋene neteꞋya amoa ayeꞋya aꞋnene yokaloa lemainae.” huno avopina kae-maleneane.
8 NagoꞋa veaꞋmoꞋya kumai haya yateti nagoke yupa tueti tali tauseniꞋa (23,000) veaꞋne fali haꞋno humainae. NaꞋa humainayafe tagaya kumai kavala ohisune. 9 Anumayamofe “Ma kava huo.” huꞋya ayevataga hayafe osifaꞋvemoꞋya hamae haꞋno hageꞋya fali-mainagi aniꞋa huta Anumayamona ayevataga ohisune. 10 NagoꞋa veaꞋmoꞋya “AnumayamoꞋa havi kava nehie.” huꞋya kalu kalu ke hutageno ensole kanomoꞋa nagoꞋa veala me hamaegeꞋya fali-mainayane. Tamakaya Anumayamofena kalu kalu kea vaioꞋateho.
11 MukiꞋa anima falote humainea yana ageteta fatago huta maisunafene huno Anumaya KotiꞋa avopina kae-maleneane. Tagaya menima mainona kanafina mopamoꞋa aupaꞋa fanane hugahe nehiafe mani kea haviteta kefo yana ohisunafene huno kae-maleneane.
12 NaꞋa humaineafe “KanaleꞋya huta heti-mainone.” hutama nehisaya veaꞋmogatama havigu asaga hu laviyafenagi yagaitama maiho. 13 Yagaitama mainesageno kana yano “Havi yama hiho.” hunoꞋma ayelamavataga hisia yano falote hisiana ani yana tamakaitamige ayelamavataga nohigi mukiꞋa veala aniꞋa huno ayemavataga nehie. NaꞋa nehianagi Anumaya KotiꞋa huno tokiya vaino humalenea kele tole agesa ohavinegi ani kele akave maleno tamaya hugahie. Ayelamavataga hisigetama “TokiyaꞋnia omalene.” hutama hugahe hageno tokiya vaitama maisayafe Anumaya KotiꞋa tusiya huno tamaya huno “Haegafa katela male viho.” huno tamave-ligahie.
Anumaya KotiteꞋene Kefo AvamuteꞋene tolemogani anakia alisaka ohiho.
14 Nahau-mainea nafuꞋnagana-gatama ago fali-mainaya veaꞋmogamife “Anumayati maine.” hutama amakisana neꞋvaiya yana ohiho. Anumaya KotifekeꞋya muse huteho. 15 Tamakaya tamaku tamakesaene veaꞋne mainagi tamahapaisua kea havitama ali fako hiho. 16 “KalaisiꞋa tagai kefo yafene huno fali-maine.” huta tagesa havi havi hisuna yafe nofi alagamo tina, Kalaisi kolanagita alita Anumayamotega muse hutama nonana Kalaisi kolana tokaeta nenone. “KalaisiꞋa augafa agata aimainea yamo kefo yatia ago alitalene.” huta maya alita aposita nenona yamo Kalaisi augafa tokaeta nenone. 17 Nagoke maya haneanagi mukiꞋa veaꞋmogata nagoke mayafiti aposita nenonafe tagaya nagoke veaꞋne nagoke kanomo augafa kana huta mainone.
18 Tamakaya tamakesa haviho Yuta veaꞋmoya Anumaya Kotitega sipi sipi heꞋya kae-salamana heteꞋya tokaeꞋya anifiti aliꞋya neteꞋya AnumayamoꞋene nagopi ailokaeꞋya mainayane. 19 Manima hua kemo aepaꞋa haviho. Ago fali-mainaya veafe “Anumayati maine.” huꞋya afu heꞋya amakisana vaiꞋya amamiya yamoꞋa afa kava humainae. Anima fali-mainaya veaꞋmogamina tokiyaꞋamia omalene. 20 TokiyaꞋamia omalenegi nagaya tamahanepauve Yisasi kema nohaviya veaꞋmoꞋya Kefo AvamuꞋmo kavela malenagi Anumaya Koti kavela omalenayane. Kefo AvamuꞋene ailokaetama omaisae huꞋna nehue. Ani kavela oneho. 21 Havigu tamakaya “KalaisiꞋa tagai kefo yafe huno fali-maine.” hutama Anumayamo kapufiti nenetama Kefo AvamuꞋmogami neꞋamamiya tina mo neyafenagi ani kavala tamage hutama ohiho. Havigu tamakaya Anumayamo kave nenetama Kefo AvamuꞋmogami amamiya kaveꞋene neyafenagi ani kavala ohiho. 22 “Ani kava nehisunageno Anumaya Koti aipamoꞋa haviya hisie hutama nehao? Ifi tagai tokiyamoꞋa agai tokiya agase-maine.” hutama nehao? AꞋao, naꞋa kavala ohune.
MukiꞋa kanafina Anumaya Koti agi alisaga hisune.
23 NagoꞋa veaꞋmoꞋya mage huꞋya nehae “MukiꞋa hisuna kavala kahe okineanagita afaꞋa hugahune.” huꞋya nehayanagi ani mukiꞋa yamoꞋa taya ohugahie huꞋna nehue. MukiꞋa kavala kahe okineanagita afaꞋa hugahunanagi mukiꞋa ani yamoꞋa Yisasife havita tametiti humainona yamona alilokiya vai oꞋategahie. 24 Tagaiti laugafa haꞋmaesia yafekela tagesa ohavisune. AꞋao, alu veaꞋmogami yafe tagesa havita amaya hisune.
25 Maketifiti afumo ameꞋa miya hugahema vinutamahena “Kefo AvamuꞋma amaminaya afuo? Nesunana haviya hulatesio?” hutama tamakuꞋafinaga havio-ketama afaꞋa miya hutama neho. 26 Anumayamo avopina mage huno kae-maleneane
“Ma mopaene mukiꞋa mopafi hanea yaꞋenena Anumayamo yamaꞋage hane.” huno humaineane.
27 Yisasi kema nohavisaya veaꞋmoꞋya “Etama kavela me neho.” huꞋya hisagetama vinutamahena tamakesa ohavitama tamamisaya kavela afaꞋa neho. Havigu tamakuꞋamoꞋa “Havi kava nehae.” huno hisagetama havioketama afaꞋa neho. 28-29 Negahayanagi nago kanomoꞋa “Ma kavela Kefo AvamuꞋmo kae-salamana hutaya kavele.” huno hisigetamahena afaꞋa onetama ataleho. Tamakai tamakuꞋamoꞋa “Havi ya nehae.” huno hisia yafeꞋene kahanepaiya kanomo aguꞋa ali haviya huyafenagi ani kavela oneho.
Ani kave nesuana nago kanomo aguꞋa ali haviya hu-yafenagiꞋna nagaya ani kavela nesuo ifi onesue? 30 Nagaya ani kavela Anumayamotega muse huteꞋna nesuana naꞋa hinageno nago kanomoꞋa nagaya anima muse huteꞋna noa yafena “Havi kavala nehane.” huno kea nenamake?
31 Kave nesao aliꞋya alisao mukiꞋa yama hinutamahena Anumayamo agia alisaga hisaya yafeke hiho. 32 Yuta vealo, Yuta vea omainaya vealo, Yisasife haviꞋya amakupi malenaya vealo, mukiꞋa veaꞋmogami amaufina kanale kavakeꞋya hiho. Havigu havi kava hisageno ani kefo yamoꞋa amaiyafi akoꞋya yamo ayea kava hinageꞋya asaga hu-lavisagi. 33 Nagaya mukiꞋa kavaꞋma nehuana nagai nahaisia yafe nagesa ohaviꞋna mukiꞋa Anumaya KotiꞋa veaꞋmogamina amaku amamena aligatisiafene huꞋna hamaisifa kava nehue.