1 Ikapinagati nago ensole kanoa elavigena nagaya Yonina agogeno ani ensole kanomoa tusia tokiyaa hanegeno elavinoma eana yagemoma aivasa nehia avamete huno konagali yamaamoa mopamona aivasa humaine. 2 Hu-malegeno ani ensole kanomoa ala kegefafiti mage huno hie “Papilonia ala kumakefamoa tusiya huno ago haviya hu-mainegeya menia Kefo Avamuyagaene nagoa fali-mai afuyaga aye laga-feya nevaiya namayagaene ani kumapina ali vai-mainae. 3 Ani Papiloni veamoya mukia kotega veafena ‘Tagayama nehuna kava hutama kumaima he auava yamoa hagaage ti kana hu-mainegi neho.’ huya hageya ani kavama haya yamo ani kumala agola ali haviya humaine. Mukia ma mopafi Sauve vayaene ania huya agaiene kumai yana hu-mainayagiya ma mopafi miyana tusia miya alisaya aliya nealiya veamoya tusiya huya kumai yana hu-liteya haya yateti ala miyakefa ali-mainaya yafe ani kumala agola ali haviya hu-talenae.” huno humaine.

4 Nagaya havugeno nago kemoa ikapinagati mage huno humaine “Mukia veanimogatama ani kumapitila neataletama hati-lavitama malaga eviho. Havigu nagopi tamakaya afalu falu hutama mainesageno ani veamogami kefo yaamimoene huyafenagi ailokaetama ani veamogami kefo yamo anonaami aliyafenagi hati-lavitama eviho. 5 Ani veamoyama humainaya kefo yaamimoa ala itugefamoma hia kava huno maleme maleme ikapi nehaiyanagino Anumaya Kotia mukia ani kumate veamoyama hu-mainaya kefo yafena agesa havino maine. 6 Anumaya Kotigae neaganageno agoma kefo yama humainea yamaamona alika tolegeya ali lokaeka hu-mainea avamete masufina takika amigeno neno. 7 Ani kumai amoa agaia augafa alino nehaino ageno hayema hia kavama hu-mainea yatetila kagaya ania huka augafa agata aisia yaene tusia aviteno augafahema kalagi aisia yaene amio. Ani amoa agupinaga mage huno nehavie ‘Nagaya ala Sauve anemo siale mainoanagina megusa akefa omainoanagino nagaitela kana yamoa falote hisigena nagaya avia oategahue.’ huno agesa havimaine. 8 Havianagi ani kefo yama humainea yateti aupaa nagoke yupa anonaa agata aisia yana falote hugahie. Ani kumate mainaya veamoya kasagoya kaliene amaka tesia yaene aliteya falisageya mukia veamoya amahau huya avi tegahae. Atamoa Papiloni kumala tesagali-talegahie. E, tusia tokiyaa hanea Anumaya Kotia havino kaiyekea humateteno anima amaugafa amakata aisia yana tusi yate amamigahie.

9 Mukia Sauve vayamoya ani kumai akefaenena kumaima heya mukia kefo yaenema humainaya Sauve vayamoyama ani kumatema kae-malesageno ata halinamoma ageteya tusiya huya hamauna huteya avia ategahae. 10 Ani veamoya agatama aiya yama alia yafena tusia koli huteya aluale hetiya maineya mage huya hugahae ‘Vaeha tahau hane tahau hane Papilonia ala kumala tokiyaage kumamogagi nagoke yagefi kaugafa kagata yana anonakaa ago ali-mainane.’ huya hutegahae.

11 Ma mopafima tusia miyama alisaya aliya nealiya veamoya afeno yaamima miya hisaya veanea omaigeya ani kumafena amakesa havi havi huya avia neateya amaipamoa kanaage hia yapi maigahae. 12-13 Ani afeno yama miya hisageya monea alisia afeno yana kanileta yafateti talo humale yaene efe yoleti talo humale yaene miyamaamoa hai-mainea seveliyaene sesuyagaene haesa ohaesa kenaene kayogayo humainea kenaene oko kenaene mukia kanale manaage yosaene afumo avete talo humale yaene miyamaamoa hai-mainea yosale talo humale yaene haesa yafateti talo humale yaene kapaleti talo humale yaene tokiyaage yafaene manaage kimamufaene hagaage higeya nenaya yamoene manaage halinama nehia yaene manaage masaveene vaini tiene atafi negayaya masaveene tanefa falauvaene vitimo alagaene pulamakaene sipi sipiene hosi afuene hosimo avayuma nehia kalene veamogami amaugafa mukia miya higeya nofipi maineya miya oali aliyama nealiya veanene, aliya vaiyatete nehaya afenoami miya hisaya veanea omaigeya avia neateya amaipamoa kanaage humainae. 14 Humainageya ani ala kumafena mage huya hugahae ‘Mukia tamahayema higetamama nealiya afenoyana ago tamahafaleya hano hutalae. Kanale miya afenotamiene konagali yatamiene ago hano hianagitama nagoene oaligahae.’ huya hugahae.

15 Huteya ani veamoya ani ala kumapitima afenoyaamileti monema hu-hatiyama nealiya veamoya ani ala kumatema mainaya veamoya kefo yamo anonaamia amakatama aiya yana aliya yafe tusia koli huteya aluale hetiya maineya avia neateya kalagila neaiya hamauna hugahae. 16 Nehuya mage huya hugahae ‘Vaeha tusia tahau nehane tahau nehane. Nayona kanale kenakaa haesa ohaesa kenaene oko kenaene fai-lineka konagalima ali-maleneka kanileta yafateti talo humale yaene kanale miyamaamo hai-mainea seveliyaene kaugafale vai-lineka konagalia ali-maleka nemainane. 17 Nemainanagi nagoke yagefi mukia ani ala mone afeno yakaa mukia ali haviya hugatae.’ huya hugahae.

Nehisageya ‘Mukia tipi kalefi kava vayaene tipi kalema aliya vai neayaya vayamoyaene ani tipi kalefima aliya nealiya yapiti miyamaa ali-mainaya veanene aluale heti-maineya Papiloni kumala agegahae. 18 Neageya Papiloni kumala atamoma teno asagaligeno halinamoma muti muti hia yana neageya mage huya hugahae ‘Ani kumala mukia kumala agase-mainea kumalageno teno ali haviya nehie.’ huya hugahae. 19 Nehuya tanefa kateya amanupi aiteya avia neateya hamauna nehuya mage huya hugahae ‘Vaeha ala kumamogae tusia lahau nehane.’ Mukia tipi kaleyagamona amafaheya anile visayaamoya miyaamima ani kumategatila ala huya nealiyanagi nagoke yagefi haviya-tafana hane.’ huya hugahae.

20 Hugahayanagi tamakaya ikapinaga mainaya veamo-gatamaene Yisasina tamakua aminaya veamo-gatamaene Aposolo vayamo-gatamaene Anumaya Koti aune veamogatamaene ani kumama ali haviya hutalea yafena muse hiho. Ani ala kumamo tamakaila ali haviya hu nelamatea yafenagino Anumaya Kotia kefo yamaamo anonaa ago amine hutama hiho.” huno humaine.

21 Higeno nagola tokiyaage ensole kanomoa nagola tusia yafakefa alisaga huteno hagelipi hagayu hu neataleno mage huno hie ani ala yafakefama hagayu hutaloa yamoa Anumaya Kotia ani avamete huno ani Papilonia ala kumala, alino tusiya huno ali haviya huteno alino hagayu hu-talenageno fanane hinageya nagoene veamoya oagegahae. 22 Yaveyamoma agema neaiya yaene alua alua yagamema nehaya yaene kapufama nehaya yaene ufema nehaya yamoenena nagoenena agea aisigeya ohavigahae. Veamoya kagaipina nagoene aliyana oaligahae. Talo tala huya imuma kiya kanafima kema yeso nehisaya kea nagoene ohavigahae. 23 Nayona kagai veamoya miyana hu hatisaya aliyama nealiya veamoya ma mopafina ala veane mainagetama tamakaya alua alua hanageke yama humatenaya yamoa mukia veala ayemavataga hu-mainayafe Anumaya Kotia tamakai kumala ali haviya hu-taleneanagino tamakai kumatela kanimoa nagoene aivasa ohugahie. Anema aligahe hageno amoa vema aligahe higeya musema nehaya kemoa tamakaipina nagoene falote ohugahie.

24 Anumaya Kotia ageana ani kumate mainaya veamoya Anumaya Kotina amakua aminaya veanene agai amaune veanenena ma mopafina kasagoya veanenena hamaeya falimatenaya kolamoa ani kumapina hanea yafe auhanageke yamaamoene hanea yateti Anumaya Kotia ali haviya hutegahie.