1 Apolosia Kolini mainegeno Poloa agoyalega hanea kumayagale vaiyatete huno Efesusi uvayi huno nagoa Yisasina amakua amitafa humainaya veanea amake-maine. 2 Amaketeno mage huno hamavike “Yisasife havitama tamakupi maletama tamametiti nehaya kanafina Alu Aotage Avamula ali-mainafi oalinae?” huno hamavigegeya “Aao, ‘Alu Aotage Avamula maine.’ huya haya kea ohavinone.” huya hae. 3 Hageno Poloa mage huno hamavige “Hanaa li falelamatenae?” huno hamavigegeya mage hae “Yoni ti falelatenae.” huya humainae. 4 Hageno Poloa mage huno hie “Yonia mage nehuno tina falematene ‘Kefo yatamihena tamakua aiyahae hisagena tina fale-lamategahue.’ huno nehuno veala mage huno hamapai-maine ‘Nagai nakavelaga esia kanomofe, havitama tamakupi maletama tametiti hiho.’ huno humaineana Yisasife huno humaineane.” 5 Huno higeya ani kea haviyanagino Efesusi veamogamina Anumayatimoa Yisasi agile tina falematene. 6 Fale-mateteno Poloa ayana amanute malegeno Alu Aotage Avamula amakaite elavino egeya amaku amakesafiti nohaviya kea, alu amake alu amake aiya Anumayamo avayafiti hamapaiya kea hufalote humainae. 7 Ani vayala tuelufua (12) vaya mainae.

8 Poloa tagufa (3) ikana Yuta veamogami mono nopi ute ete huno tokiyaage kea huno Anumaya Koti kava yagaisia yafe amakua ali hetino hamapai-maine. 9 Hamanepaiyanagi nagoa vayamoya amaku amakesa ailineleya tokiyaage ke huya “Havige nehananagita tagupina ali omalegahune.” huya mukia vea amaufi Yisasi kea hu-haviya hutageno Poloa neamataleno Yisasife haviya amakupi malenaya veala amavaleno mukia kanafina efi efi huno Tilanusi humavenelia nopi mo huhaleno hamapai-maine. 10 Tole kafu ania huno hamanepaigeya mukia Esia mainaya veanea Yuta veanene Kaliki veanene Anumayamo kea havimainae.

11 Anumaya Kotia Polo ayapi tokiya avame yana humaine. 12 Nehigeya veamoya akasipiene kenaene Polo augafale akasaseteya kali vayate aliya vageno kaliamimoa kanale humategeno amakusafiti Kefo Avamuyaga hati-laviya umainae. 13 Nagoa Yuta vayamoya Kefo Avamula veamogami amakusafinagati amanati neatalaya vayamoya Kefo Avamula amakusafima mainea veate Yisasi agi neayeya mage huya humainae “Poloma tahanepaiya kanoa, Yisasi, agile Kefo Avamumoga amakusafinagatila hati-lavika evuo huna kahanepauve.” huya humainae. 14 Ani kavama nehaya vayala sevenia (7) ne nafaneyaga ala mono nopi kava yagai-mainea kanomo nafaneyaga Sikeva nafaneyagamoya ani kavala humainae. 15 Nago yupa ani kava nehageno Kefo Avamumoa mage huno kenonaamia humaine “Yisasina ago agetena Polona age-mainogi tamakaya tagatamae?” huno humaine. 16 Higeno Kefo Avamuma agusafinaga mainea kanomoa ani sevenia (7) vayamogamite haiteno asaga hunelavino amakaseno nehamaeno amaugafa tusiya huno alihaviya humateteno kenaamiene ali hatata hutalegeya amaugafa alapaage ani nopitila hati-laviya falemainae. 17 Mani kea Efesusi mainaya veala Yuta veanene Kaliki veanene haviteya koli nehuya Anumayatimona Yisasi agia tusiya huya alisaga humainae. 18 Hageya kasagoyamoya Yisasifena haviya amakupi maleya amametiti nehuya kefo kavama haya kavafena hufalote humainae. 19 Hufalote huteya sesefe yaamiene tusa huneamataya yaamiene analisa yaamiene ani yayagahema kae-malenaya avoyaga mukia vea amaufi atafi kaesagali-talenae. Kae-mainaya avoma miya humainaya monema hapaliyana fifiti tausenia (50,000) kina hapali-mainae. 20 Anima tokiyaage kavama humainea kavafena mukia kotega mo hamanepaiya Anumayamofena haviya amakupi malageno tokiyaage humaine.

21 Ani yayagamoa hano hutegeno Alu Aotage Avamumoa Polona visia agu agesa amigeno mage huno hie “Masetonia umaigena Akaiya etena Yelusalemu uvayi hisuaamona Lomu visua nagesa nehavue.” huno humaine. 22 Huteno tole hanemayaa kanolatana Timotiene Elasatusiene hunategeana Masetonia vaageno Poloa agaiage anile nagoene Esia kotega maine.

23 Ani kanafina Yisasi kea nohaviya veamoya Yisasi akave nemalaya kehena tusiya huya hetiya ke vaiya amakoya ke humainae. 24 Ani kotega vayamoya yafateti nago akefa amayateti talo huya “Anumayati maine.” huteya agia Atemisie huya nehae. Huya hageno nago kanomo agia Temitiliusie efe mone atafi kaeteno ani moneleti ani akefamo agima alisaga nehaya nona, osi osi nona talo higeya veamoya miya hageya taloma nehaya vayamoya tusia mone nealiyane. 25 Nealiyanagino Temitiliusia mukia agaia aliya vayaene mukia osi osi Atemisina nomaa taloma nehaya vayaene ke higeya melitalu hageno mage huno hama-paiye “Vemogatama tamakaya havimainae ani aliyateti kanale monetia nealune. 26 Nealunanagi ani kanoa, Poloe, mukia Efesusi nemaiya veanene mukia Esia kotega nemaiya veanenefe ‘Amayateti taloma haya anumaya afa yatafa hanegi Anumaya omainae.’ huno higeya mukia veamoya ‘Tamage nehane.’ huya akave malaya kea ago havitama age-mainae. 27 Poloma hia kemoa tagai aliyatimo agia alino haviya havaya hutegeya Esia nemaiya veanene alu mopalega veanene agima alisaga nehaya Atemisina atalesageno lavisigeya veamoya ‘Anumayati maine.’ huya agia alisaga ohisageno Atemisi agima alisaga nehaya nofena ‘Afa yatafa hane.’ huya hugahae.” huno humaine.

28 Higeya alitalu humainaya veamoya ani kea havigeno amaipamoa tusiya huno ata legeya mage huya hae “Atemisia Efesusi mainona vayamogatina tusia ala anumayati maine.” huya humainae. 29 Hageya mukia ani kumate veamoya ala kenake nehuya Poloenema vaiyatete nehaa kanolatana tolea Masetoniati kanolatane Kaiyusiene Alisatakusiene anavayu huya alitaluma nehaya kumapi anavaleya amaiyayeya umainae. 30 Vageno Poloa “Amunoamifi kaiyeke mo hisue.” huno hianagi afuaganaya “Ougane.” huya atafa humainae. 31 Atafa hageya nagoa Polona kanapaamoya ani Esia kumate Lomu kava vayamoya ania huya agaitega kea atalageno egeya mage huya tokiyaage kea hae “Kagaya veama alitalu haya kumapina ovuo.” huya humainae. 32 Hageya alitalu humainaya veamoya amaku amakesamoa yagalegeya nagoa veamoya nago kea hageya nagoa veamoya alu kea hageya tusiya huya ala kenakea hageya kasagoya veanema alitalu humainaya yamona aepaa ohavinae. 33 Ohavigeya nagoa Yuta veamoya “Mage huka huo.” huya Alekasatana ayetufageno amunoamifi mo hetino ani kemo aepaa hamapaigahe “Afaa maiho.” huno ayana aligosi-gosi humaine. 34 Aligosi-gosi hianagi Yuta kanoma mainea yafe agelama huteya nagoke amavayage ailalupeya mage hae “Atemisia Efesusi mainona vayamogatina tusia ala anumayati maine.” huyama maiya hayana tole yagemo kanafi ani keageyana maiya humainae.

35 Nehageno haenagaa ani kumate avo kae aliyate kanomoa alitalu humainaya vayamogamina ali hakayufeno mage hie “Efesusi vayamogatama Atemisina anumayatimo agima alisaga nehaya nona Efesusi kumatema kanaleya huno kava neyagaiya yafena hana veamoya ohavinae? Ikapinagati elavi-mainea yafana nagaluma humalenaya yafafena kanaleya huta kava yagai-mainonagi hana veamoya ohavinae? Mukiamoya ago havimainae. 36 Havimainayanagiya mani kea hefala okigahagi tamakaya afaa maiho. Nagola aifonafo kavala ohiho. 37 Anavaletama aya kanolatamogania Atemisi agima alisaga nehuna nopitila nagaluma humalenona yana musufa yana ohunae. Tagaiti anumayatimona Atemisife huhaviyana hu-oatenae. 38 Ala kaiyeke havisia kanomoa nagoa kanafi kaiyeke havi nopi maineno kaiyekea havigahigi Timitiliasiene agaiene aliya nealiya vayamoya ‘Kema hane.’ hinuyahena ani kanomote visae. 39 Ugahagi alu yafema hinutamahena kamani vayamoyama alitalu hisagetamahena ani kea fatago hiho. 40 Ma yagefima hu-mainona yafena kamani vayamoya ‘Tu nehae.’ huya tahavigesagetahena hana kanomo hetino anima keha keha nehaya yamona aepaa hamapaigahie?” huno humaine. 41 Avo kae aliyate kanomoa mani kea huteno “Notamilega ataletama viho.” huno hemanatigeya umainae.