1 Pailatia Yisasina avaleno “Nofi kayoteti haifu amiho.” huno hama-paigeya haifu aminae. 2-3 Amiteya ati vayamoya avetanafa nofiteti tumano kula talo huteya anute vai-teteya ala kava kanomo fai-nealia augafa haesa kena vai-teneya Yisasima he-tino mainele eya Yisasifena “Felugae. Yuta vayamogami ala sauve kanomogae.” huya nehuya augosafi amayateti ainagolapeya nehaeya hu-mainae.

4 Hageno Pailatia kumatega hati-lavino eayamo alitaluma hu-mainaya Yuta vayafe mage huno hie “Atiyena agoana nagoke kefo ya kanoa omalegena tamakaya mani kea havisae huna avalena tamakaite hati-lavina neoe.” huno hie. 5 Higeno Yisasia kumategama hati-lavino eana avetanafa nofitetima talo hu-malaya tumano kula anute vai-teteya haesa kena fai-tetageno hati-lavino elavigeno Pailatia mage huno hie “Ageho mani kanoa ma maine.” huno hama-pai-maine. 6 Hama-paigeya mono note kava vayamoyaene ati vayaene Yisasina ageteya ala kegefafiti mage huya hae “Yafaga yosale nili hetama asaigeno falino. Yafaga yosale nili hetama asaigeno falino.” huya hae. Hageno Pailatia kenonaamia mage huno hama-paiye “Tamakaitami avaletama yafaga yosalela nilia hetama asaiho. Nagaya nago kefo yamaahena ati-yoana omaleanagina ohaegahue.” huno hie. 7 Higeya Yuta vayamoya kenonaa mage huya hapaiye “Yisasia agaiahena mage huno hu-maine ‘Nagaya Anumaya Koti nafane mainoe.’ hunoma hiana tagaipina kahegi kemoa mage hu-maine ‘Mania augafa kema hisia kanomoa falisie.’ huno hu-maineafe menia Yisasia mani kema hu-mainea yafe falisie.” huya hae.

8 Hageno Pailatia ani kea haviteno tusiya huno amayoa neaiye. 9 Amayo aigeno Pailatia eteno kaiyekema nehavia nopinaga hai-faleno maineno Yisasifena mage huno havige “Kagaya hanategati emainane?” huno havigeanagi Yisasia kenonaa ohune. 10 Ohigeno Pailatia mage huno hapaiye “Kagaya naa higeka nagelela noaline? Nagaya tokiyaniene kanogina ‘Kina nopitila atalegahae.’ hunama hisuana afaa katalegahae. ‘Yafaga yosale nili hetama asaigeno falino.’ hunama hisuana ania hu-ga-tegahae. Kagaya mani kea nohavino?” huno havige. 11 Havigegeno Yisasia kenonaa mage huno hapaiye “Anafinaga mainea Anumaya Kotia kagaima tokiyama okamineleasipa nagaila natafa ohateasinagi amakayama navaleya kagai kayapima natenaya vayamogamina kefo yaamimoa kagai kefo yakamona agaseno kasagoya kefo yaami hane.” huno hie. 12 Higeno Pailatia anima hia kea haviteno “Hanaa huna atalesugeno visie?” huno kafe ati-neayegeya Yuta vayamoya ala kegefafiti mage huya hu-mainae “Nagoke kanomoa Yisasima hia kava huno agaiahe ‘Nagaya ala sauve kanoma mainoe.’ hunoma hisia kanomoa Sisana kamea maine. Kagaya mani kanoma atalesanageno visiana kagaya tagaila ala sauve kanotia, Sisana, kanapaa omainane.” huya hae. 13 Hageno Pailatia ani kema haya kea haviteno Yisasina avaleno hati-lavino kumatega elavino eayamo ala kaiyekema havi kanomo siale emaine. Ani siama malenaya aupaligahena Yuta vayamogami kefina Kapatae huya nehae. Ani aupaligahena tagai kefina amalagu aiya yafa malenaya aupaligae huta hugahune.

14 Ani kanafina Anumaya Kotia amakinagomogami amaugafama ali-gati-mainea yafe Yuta veamoya amakesa hao hinageya havisaya yafe imu ki kanaamimoa aupa higeya talo tala hisaya yafe yagemoa euno amanutule evigeno Pailatia Yuta veamogamina mage huno hama-paiye “Ala sauve kanotamimona ageho.” huno hie. 15 Higeya amakaya ala kegefafiti mage huya hae “Aoteyamaae. Aoteyamaae. Yafaga yosale nili hetama asaigeno falino.” huya hageno Pailatia mage huno hama-paiye “Nagaya tamakai sauve kanotamia yafaga yosale nili hena asaisue hugetama nehao?” huno higeya mono note kava vayamoya mage hae “Tagaila nago ala sauve kanotia omaine. Sisaa agaiage nagoke maine.” huya hae. 16 Hageno Pailatia “Yisasina yafaga yosale nili hetama asaiho.” huno avaleno amayapi amamine.

17 Yisasina avaleya vageno haeya asaisaya yafaga yosa agaia ko-fino anu ayamufae huya nehaya agoyalega umaine. Ani agoyamo agia Yuta vayamogami kefina Kologotae huya nehae. 18 Ani agoyafi avaleya vayaamoya yafaga yosale nilia heya asai-malenae. Tole kanolataene hanaote yafaga yosale aluga aluga atupale hanaeya asai-maleneya Yisasina amunoanifi nilia heya asai-malenae.

19 Asai-maletageno Pailatia nago avona kaeno Yisasina nilima he-malaya yafaga yosale asai-malene. Ani avomoa mage hie “Nasaleti Yisasie, Yuta vayamogami sauve kanoa ma maine.” huno kae-malene. 20 Kae-malenegeya Yisasima yafaga yosale asai-malenaya kaiyaga ala kumamo aupaale haeya asai-malayanagiya mukia Yuta veamoya ani avona hapaliya havimainae. Pailatia tagufa (3) kefiti kae-malene. Yuta vayamogami kefitiene Lomu vayamogami kefitiene Kaliki vayamogami kefitiene kae-malenegeya hapaliya havimainae. 21 Haviya yafe Yuta vayamogami mono note kava vayamoya Pailatifena mage hae “Kagaya ‘Yuta vayamogamina ala sauve kanoami ma maine.’ huka okaeka ma ke huka kao ‘Nagaya Yuta vayamogami ala sauve kanoami mainoe hunoma hia kanoa ma maine.’ huka kao.” huya hae. 22 Hageno Pailatia mage hie “Kae-malenoa kea hai kae-malenoe.” huno hie.

23 Ati vayamoya Yisasina yafaga yosale nili heya asai-maleteya kenaa foa (4) hetama vaiya ali-mainae. Ayaaya siotaaene aligahe agayana mukia analegati afetegama lavi-maineana aye ohati siota hane. 24 Ohati siota hanea yafe ani ati vayamoya kea mohu mehu huya mage hae “Hatata ohuta afaa musufa yama nehaya yokaloa kasi nelesunageno tagasesimoa alisie.” huya amakaiami hu-mainae. Aniama haya kavala Anumaya Koti kefima nayoma kae-malenaya kemoa ago efalote huno tamage nehie. Anima nayoma kae-malenaya kemoa mage humaineane

25 Hageya Yisasima asai-malenaya yafaga yosamo avatela Yisasina itaamoene nunaamoene he-ti-mainae. Anakaiene Kalopasina aamoa Maliaene hamoamoa Magatala kumate Maliaene he-ti-mainae. 26 He-ti-mainageno Yisasia itaamona ageteno agaienema tokaeya nemaiya anagapiti hau ayamopafima hau-mainea kanomona, Yoninae, itaamo avate he-titaa mainoageno taageteno itaamofena “Amogae namona kagaikaa nafanekaae.” huno hie. 27 Huteno nagaifena “Namona itakamoe.” huno higena nagaya ani yupa Maliana yagaigahe nonialega avalena umainoe.

28 Ani kea huteno Yisasia “Mukia aliyania ago alina hano hue.” huno agesafinaga havimaine. Nayoma Anumaya Koti kema kae-malenaya kemoa efalote huno tamagema hisia yafe mage hie “Life nenage.” huno hu-maine. 29 Higeya nofi alagafiti falote hia tina nagola havate-mai keayola aliya havagoyafa kana yana ani lipi ayeteya kayote vaiya ali-saga huya Yisasina avayale malenae. 30 Malageno Yisasia mayu mayu huno neteno mage hie “Nenafagae naha-pai-mainana aliyana ago alina hano hue.” huno nehuno ageya ainamagino agu nafaneamo atalegeno vigeno fali-maine.

31 Sapati yupahe talo tala hisaya yupagino ega ala Sapati kana falote hisia yafe Yuta vayamoya anima yafaga yosalema hamae-malaya vayamogami amaugafamoma Sapatilema yafaga yosale hanesia yafena ohamaigeya Pailatife mage huya mo havigae “Ati vayamoya amaiya ali kofa hisageya aupaa falisageya hipoya huya aliya visae.” huya mo havigae. 32 Hageno Pailatia ati vaya hama-paigeya mogayana Yisasienema yafaga yosale asai-malaya kanolatamogani anaiya meli kofa hu-mainae. 33 Ali kofa huteya Yisasina megayana ago fali-mainegeya megeteya aiya ali kofa ohunae. 34 Ali kofa ohageno nago ati kanomoa kevealeti Yisasina haohipafi meyegeno aupaa ani keve kapitila kolamoene timoene taki-lavi-maine.

35 Taki-lavigenoma age-mainea kanomoa tamaha-nepaiye. Tamaha-nepaiya kea tamageage ke hanea yafe agaia havilama hu-lineno tamaha-nepaiyafe tamakayaenena Yisasifena havitama tamakupi maletama tamametiti hisaya yafe tamageage ke tamaha-nepaiye. 36-37 Nayona Anumaya Koti kema kae-malenaya kemoa mage hu-maineane

38 Yosefea Alimatiyae huya nehaya kumate nemaiya kanogino Yisasi ke havino akave nemalea kanogi Yuta vayafe koli huno Yisasifema ametiti nehia yana fala-ki-lineno mage huno Pailatina mo havige “Yisasina augafaa aligahe nehue.” huno mo havige. Havigegeno Pailatia “E.” huno higeno Yosefea viayamo Yisasina augafaa mo hipoya huno alino emaine. 39 Nikotimasia hagoteno Yisasite hanipinaga emainea kanomoa Yosefena mo ha-maegahe kule fuki kana manaage tina tole yosafiti he-fino ali havigu higeno manaage tina falote higeno sigelile mo malegeno tetia (30) kilo falote higeno alino emaine. Ani tole yosalatamogani anakia meaene aloene alino emaine

40 Ani tole kanolatamogania vaayamogani Yisasina augafaa mo hipoya huana mopale maleneana manaage tina fale-teteana kefe kana kenaleti augafalela ai-galaki galaki huana haya kiteana aye-gasagi-malenae. Mukia yupa Yuta vayamoya vayaamima faligeya ania huya neamataya kava hu-tenae. 41 Ani kaiyaga Yisasina yafaga yosale nilima heya asai-malenaya kaiyaga nago hoya hane. Ani hoyafina nagola vayama he-vai-ma-tesaya yafa kana, yaufa kafi-malenayane. Anifina nago vayala he-vai-oama-tenaya yafa kapi aliya mo he-vai-tenae. 42 Ani yupa Sapatihe haviya talo tala hisaya kanafinagiana ani matimatila aupatema hanea yafe ani tole kanolatamogania Yisasina augafaa aliana anifi mo malenae.