1 Yisasia mage huno hu-maine “Mukia veamogatama tamaipamoa kanaage huno tamakesa kumoa ohino. Anumaya Kotife havitama tamakupi maletama tamametiti haya kava nehutama nagaifena havitama tamakupi maletama tametiti hiho. 2 Nenafa nopina veala maisaya nona kasagoya hane. Ani yama omalesina nagaya mani kea ohuleasine. Nagaya kumatamia molina talo tala hu-lama-tegahe ugahue. 3 Nagaya kumatamia mo lalo tala hu-maletena etena me lamavalesugetama visua kumatela visageta nagaiene mo lokaeta maigahune.

4 Tamakaya nagayama visua kumamo kana ago age-mainae.” huno hie. 5 Higeno Tomasia mage huno hie “Alatimogae tagaya visana kumala oagenone. Hanaa huta ani kana agesune?” huno hie. 6 Higeno Yisasia mage huno hapaiye “Nagaya ikapinaga visaya kamona Nefanae. Nagaya ke-lamage kemona aepaa mainoe. Nagaya agola maige maige yamo hamaimula aepaa mainoafe nagoa veamoya Nenafatega visayana alu katetila ougahagi nagaiteke esae. 7 Tamakaya nagaima havimainaleasipa Nenafafena ania hutama havileasine. Tamakaya menia aepa hetama Nenafana ago havitetama age-mainae.” huno hie.

8 Higeno Filipia mage huno hapaiye “Alanimogae negafana taveligeta agesunageno tagu tamemoa tamu hisie.” huno hie. 9 Higeno Yisasia mage huno hapaiye “Filipigae ayaaya kanale tamakaienena maime emainoana kagaya nagaila onagenano? Nagoa veamoya nagaima nage-mainayana ania huya Nenafana age-mainae. Naa higeka ‘Negafana lave-lio huka nehane?’ 10 Nagaya Nenafa aguafina maugeno Nenafaa ania huno nagai naguafina mainea yafena havika kagupina nomalano? Tamaha-pai-mainoa kea nagesafiti kea tamaha-opainoe. Aao. Nenafaa nagai nagupi maineno agaia aliyamaa nealie. 11 Nagaya Nenafa aguafi maugeno ania huno Nenafaa nagaila naguafina maigetaa hu-mainoema hunama hua kea havitama tamakupina maletama tamametiti hiho. Mani kema ohavinutama tamakaya mukia aliyama ali-mainoa aliyama age-mainesayana nagaifena havitama tamakuafi ali maletama tamametiti hiho. 12 Tamage-lafa huna tamaha-nepauve nagoa veamoya nagaifema haviya amakupi nemalaya veamoya mukiama ali-mainoa aliyana ania huya aligahae. Nagaya Nenafatega visua yafe anima alisaya aliyamoa ali-mainoa aliyana agaseya aligahae. 13 Nafaneamonife huya Nenafaa agima ali-saga hisaya yafe tamakaya nagai kema havitetama nagai nagi ayetama mukia yafena naha-vi-gesagena ania hu-lama-tegahue. 14 Mukia yafema nagai nagima ayetama naha-vi-gesayana afaa ani yana hu-lama-tegahue.” huno hu-maine.

15 Mani kea huteno mage hie “Tamakaya nagaifema tamahau tamayamopafima tama-haisigetamahena tamaha-pai-mainoa kemona akave malegahae. 16 Akave malesagena Nenafatega havigesugeno tamaya hisia Avamula hu-tesigeno tamakaite eno agola tamakaiene emaige maige huno maigahie. 17 Ani Alu Aotage Avamula tamageage kemona aepaa maineno hulama-ve-ligahie. Mukia ma mopale yafema amaugafama aliya nehaiya veamoya Alu Aotage Avamula ageya havilama ohunaya yafe oavalegahagi tamakaya ago age-lama hutama age-mainaya yafe tamakaienena emaineno tamakupi haino maigahie.

18 Na yafe tama-talesugetama megusa nafane kana hutama omaigahayanagina tamakaitela etena egahue. 19 Okasi kanaa ma mopale yafema amaugafama aliya nehaiya veamoya nagoene onagegahayanagitama tamakaya nagegahae. Agola maige maige yamona aepaa mainoafe tamakaya ania hutama maige maige hisaya tamahaimula alitama maigahae. 20 Mainesageno Alu Aotage Avamumoma esia kanafina nagaya Nenafaene mainoanagitama tamakaya ania hutama nagaienena maisagena nagaya ania huna tamakaienema mainoa yafena havilama hutama havigahae.

21 Nagoa veamoya nagai kema haviya akave malenuya nagaifena hamau amayamopafifna hamau-maine. Nagaifema hamau amayamopafima hamau-mainesia veamoya Nenafaa ania huno amakaifena hau ayamopafina nehaiye. Nehaigena nagaienena ania huna nahau nayamopafina nenahaigena nagua amamisugeya nagaila nage-lama huya nagegahae.” huno hie. 22 Higeno nago kanoa, Yutasi Isakalioti omagi, hamoamoa mage huno Yisasina havige “Alanimogae naa higeka kagaya tagaila taulagafina kagaika aepakaa tave-nelinagi mukia ma mopale yafema amaugafama aliya nehaiya veamogami amaulagafina hu-falote huka ohunanane?” huno havinege. 23 Havigegeno Yisasia mage huno hie “Nagoa veamoyama nagaifema hamau amayamopafima hamaisigeyahena nagai kemona akave malesagenofena Nenafaa amakaifena ania huno hau ayamopafina haugahie. Nenafaene nagainienena amakaiene emaigahue. 24 Nagoa veamoya nagaifema hamau amayamopafima ohamaisiana nagai kemona akavela nomalae. Manima tamaha-nepauva kea nagainige kea omalegi hu-na-tenea Nenafa ke hane.

25 Tamakaienema mainena mani kea ago tamaha-pai-mainoe. 26 Tamaha-pai-mainoanagino Nenafaa nagai nagilema hu-tesia kanomoa, tamayama hisia Alu Aotage Avamulagino emaineno mukia yana hulamave-liteno mukia tamaha-pai-mainoa kea alino tamakesa hao hinagetama havigahae.

27 Tama-talena ugahe tamaipa falu hutama maisaya tamaku tamakesa nelamamue. Nagayama naipa falu huna nemauva nagu nagesa nelamamue. Anima tamaipa falu hutama maisaya yama tamamua yana ma mopale veamoya amaipa falu nehaya ya kana ohunegi kanaage tamaku tamakesa havitama kolia ohiho. 28 ‘Tamatalena utena etena tamakaitega egahuema.’ huna tamaha-pauva kea ago havilinae. Nagaifema tamahau tamayamopafima nelamahaisigetamahena Nenafa mainelega visua yafena muse haleasine. Nenafaa nagaseno ala kano mainea yafe Nenafa mainelega visua yafena muse haleasine. 29 Tamatalena visua kanafina nagaife havitama tamakupi maletama tamametitima hisaya yafe yaufa ani kana falote ohunea kanafi menia mani kea tamaha-nepauve. 30 Satania, ma mopalema kava hu-mainea kanoa ago neeanagina nagaya nagoene kea ohugahue. Satanina tokiyaamoa nagaila onagaseneanagi Nenafa nahapai-mainea kava huna faligahue. 31 Nagayama Nenafafema nahau nayamopafi nenagea kavala ma mopale veamoya havisaya yafe Nenafa naha-pai-mainea kava nehue. Hai nehugi vigetao.” huno nehie.