1 Nago kanomo agia Lasalusie kali ali-maine. Ani kanoa Petani kumate kanoe. Mataene aganaamoa Maliagani kumale. 2 Ani Maliaa nago yupa manaage masavena Yisasina aiyale takino fale-teneno ayolagefaleti ali hau hu-teneane. Ani munamona asaamoa Lasalusi kali ali-maine. 3 Kali alino mainegeana ani tole nanukana-latamogania Yisasitega nago kano hu-taageno mage mo hie “Alatimogae kagaikama kahau kayamopafima negahaiya kanoa kali nealie.” huno hapaiye. 4 Hapaigeno Yisasia ani kema nehavinoa mage hie “Lasalusia kali alino fae-maineanagi falisia yafe oalinegi mani kalimoa Anumaya Koti agi alisaga hisayafene huno ali-maine. Ani kalia Anumaya Koti nafanemo agi alisaga hisaya yafe falote hu-maine.” huno hie.

5 Yisasia Mataene aganaamoene Lasalusiene ani anagafena tusiya huno hau ayamopafi nehaiya anagale. 6-7 Yisasia Lasalusima kalima alia kea havianagi ouno tole yupa afaa nemaiya kumate maiteno agaiaenema tokaeya nemaiya anagaahe mage huno hama-paiye “Yutia kotega eteta visune.” huno hu-maine. 8 Higeya agaiaenema tokaeya nemaiya anagamoya mage hae “Hu-lave-nelina kanomoga menia Yuta vayamoya yafateti aliya kahaegahema haya kotega kagaya ani kotega nagoene ugahe nehano?” huya havinegae. 9-10 Havigageno Yisasia mopafi mainea kanaamoa hano ohunea yafe kenonaamia avame kea mage huno hie “Tuelufua (12) auva nagoke yagefina omalenefi? Veamoyama yagefima vai-yesayana ma mopafi yagemoa ai vasa humainea yafe asaga hu otavigahayanagi veamoya kegema vaiyatete hisayana aye-vasa hu yamaa amakupina omaleanagino vailino hamaegahie.” 11 Yisasia mani kea huteno nago kea mage huno hu-maine “Tagaila kanapatia Lasalusia faeno maineanagina nagaya visuaamona mogafa huna avale he-ti-tegahue.” huno hama-paiye. 12 Higeya agaiaenema tokaeya nemaiya anagamoya mage hae “Alatimogae agayama kalima alino fae-mainesiana afaa kanale hu-tegahie.” huya hu-mainae. 13 Hageno Yisasia mani avame kema hiana Lasalusia ago fali-maine huno nehianagi agaiaenema tokaeya nemaiya anagamoya ohavinaya yafe “Afaa faeno mainegeno nehie.” huya hu-mainae. 14 Hageno Yisasia ani avame kea neataleno hu-falote huno hama-paiye “Lasalusia ago fali-maine. 15 Tamakaya nagaifena havilama hutama ‘Tamage nehie.’ hutama tamakupi maletama tamametiti hisaya yafe omainogeno fali-maineanagina nagaya muse nehugi menia aligeta mogamano.” huno hie. 16 Higeno Tomasina, nago agia Titimasie, tagai kefina kuyave nafane, Yisasienema tokaeya nemaiya anagafe mage hie “Mukiamogata vigetao. Nagopi nevisunageya tahaesageta faligahune.” huno hie.

17 Lasalusina foa (4) yupa komufi he-vai-tenageno Yisasia uvayi higeya he-vai-tenaya kanahe hapaimainae. 18-19 Petaniti Yelusalemua tagufa (3) kilomita aupate hanea yafe mukia Yuta veamoya Yelusalemutila etele huya Matagani Maliaganina anasaanimoma fali-mainea yafe hamau hu-nateya emainae.

20 Emainageno Mataa Yisasife “Nee.” huya haya kea haviteno katega viayamo mo fotu hu-mainegi Maliaa nomaafi maine. 21 Mainegeno Mataa Yisasife mage hie “Alanimoga kagayama malema mainateasina nasanimoa ofalileasine. 22 Ago havimainoe menia kagayama Anumaya Kotitega nago yafema havigesanana afaa kamigahie.” huno hie. 23 Higeno Yisasia mage huno hapaiye “Kasakamoa fali-maineanagi eteno haimula alino he-tigahie.” huno hie. 24 Higeno ani munamoa mage hie “E, nagaya ago havimainoe ma mopama hanoma hisia kanafina mukia fali-mainaya veama he-tisaya kanafina eteno he-tino haimula aligahie.” huno hie.

25 Higeno Yisasia kenonaa mage hie “Nagaya fali-mainaya veala amavale he-tina hamaimula amamisua kano mainoe. Nagaya maige maige hisaya hamaimu amami yamona aepaa mainoe. Nagoa veamoya nagaife haviya amakupi maleya amametiti hisayana faliteya hetiya agola maige maige hisaya hamaimula aligahae. 26 Nagoa veamoya afaa maineya nagaifena haviya amakupi maleya amametiti hu-mainaya veala maige maige hugahayanagiya ofaligahae. Kagaya mani kea ago havilama huka kagupi maleka kametiti nehapi nohane?” huno havige. 27 Havigegeno ani munamoa mage hie “E, Alanimoga nagaya nehavina ago nagupi malena nametiti hu-mainoe. Tamage nehae kagaya Kalaisigae Anumaya Kotia hu-ga-tegeka taugafa ali-gatigahe ma mopafi elavisana kano emainane. Anumaya Koti nafane mainane.” huno hie.

28 Mataa mani kea huteno eteno viayamo aganaamona Maliana sumi sumi huno mage huno hapaiye “Hu-mave-nelia kanoa ago emaineno kagaife ke nehie.” huno hapaiye. 29 Hapaigeno Maliaa ani kea haviteno aupaa he-tino Yisasi mogegahe umaine. 30 Nevigeno Yisasia kumatela omenegi Mataene fotuma huana kea keama haalega maine. 31 Mainegeya Yuta veamoya Maliaene nopi maineya hanauma hu-nateyama emainaya veamoya Maliaa aupaa he-tino kumatega via yafe agayana higeya “Vae Maliaa asaamo komulega avitegahe nevie.” huya akave umainae.

32 Akave vageno Maliaa Yisasi mainelega mogeteno aiyafi mope hu-maineno mage hie “Alanimogae kagayama malema mainateasina nasanimoa ofalileasine.” huno hapaiye. 33 Hapaiteno avi neategeno agaienema emainaya Yuta veamoya ania huya neatageno Yisasia Maliana neagegeno aipamoa tusiya huno haviya hu-maine.

34 Aipamoa haviya hu-mainefiti hama-vigeno mage hie “Hanate he-vai-tenae?” huno higeya “Alatimoga eka mego.” huya hae. 35 Nehageno Yisasia avi-te-maine. 36 Neategeya Yuta veamoya mage hae “Ageho Lasalusifena tusiya huno hau ayamopafi nehaiye.” huya hae. 37 Hageya nagoa veamoya mage hae “Ma kanoa amaulagama asu hu-mainea veama aligali hu-neamatea kanogi naa higeno Lasalusina kalia alino kanale hu-tegeno ofalino afaa maiyanagi fali-maine.” huya hae.

38 Yisasina aipamoa nagoene haviya higeno he-vai-tenaya komulega umaine. Ani komua yafa kapi he-vai-teteya komumo avayalela ala yafateti aliya ai-lile-malenae. 39 Ai-lile-malenageno Yisasia mogeteno mage hie “Mani komumo avayaleti yafana ali-taleho.” huno higeno fali-mainea kanomo asaamoa, Mataa, mage huno hie “Alaniamogae mani kanoa ago he-vai-tageno foa (4) yupa komufinaga haneanagino tusia himana hugahie.” huno hie. 40 Higeno Yisasia mage hie “Nagaya ago kaha-pai-mainofi? ‘Kagayama nagaifema tamage nehane huka kagupi maleka kametitima hisanana Anumaya Koti agi alisaga hisaya tokiya yana agegane huna kaha-pai-mainofi?’ huno havinege.”

41 Ani yafana ali-taletageno Yisasia anafinaga agesaga huno age-maineno mage hie “Nenafaga nunamunia ago havimainana yafe musekaa nehue. 42 Havimainanagina nagaya mukia kanalema kahavi-goa kea nehavinagi afaa menia manilema mainaya veamoya kagayama hu-na-tanagena emainoa yafema ‘Tamage nehane.’ huya amakupi maleya ametiti hisaya yafe kahavi-negoe.” huno hie. 43 Mani kea huteno ala kegefafiti mage hie “Lasalusiga he-tika elavio.” huno hie. 44 Higeno Lasalusia, fali-mainea kanoa, eteno he-tino elavigeya aiyafima ayapima augosafima kenaletima aye-gasagi-malea kanoa elavigeno Yisasia mage huno hama-paiye “Kalu hetama atalegeno vino.” huno hama-paiye.

45 Mukia Maliaenema emainaya Yuta veamoya Yisasima hia kavala ageteya amakupi maleya amametiti hu-mainae. 46 Amakua amiyanagi nagoa vayamoya ataleya Falasia vaya mainalega uya Yisasima hia kavafena mo hama-pai-mainae. 47 Hama-paigeya Falasia vayaene ala mono note kava vayaene Kanisole vayafe ke hageya ageya mage huya hae “Ma kanoa kasagoya tokiya avame yayaga nehigi naa hisune? 48 Afaama atalesunagenoa mukia kanalela aniageyama hisigeya mukia veamoya ‘Tamage nehie.’ nehuya haviya amakupi maleya amametiti hisageya kava vayatia, Lomu vayamoya eya mukia veanene ala mono notiene ali haviya hugahae.” huya hae.

49 Hageno Kaiyafasia ani kafufina ala mono note hagote kava kano maineanagino ani vayapiti he-tino mage hie “Tamakaya tamaku tamakesa nomale. 50 Tamakaya ohavinafi na ya kanale tamaya hisia yana hane? Mukia veati ali haviya hisafi nagoke kanomoa mukia veaamogami anonaa falisie?” huno hama-vige. 51 Ani kafufina Kaiyafasia ala mono note hagote kava kanogino mani kea Anumaya Kotia hapaigeno aune laga huno hu-maine. Agaia agesafiti ohune. Ani aunema laga hia aepaamoa mage hu-maine “Yisasia Yuta veamogamife huno faligahie. 52 Amakaiamigetefena huno ofaligahigi alu kumate kumate mainaya Anumaya Koti nafaneyaga amavaleno nagoke anaga hu-ma-tesigeya maisaya yafe Yisasia faligahie.”

53 Ani kanaleti aepa heya Yuta vayamogami kava vayamoya Yisasina haesaya kea huya haviteya huge havige hu-mainae. 54 Ani yafe Yisasia nagoene Yuta veamogami amaulagafina vai oayenegi nago kumala Efalaimie huya nehaya kumala vaya omai kola aupa hu-mainegeya agaiaenema tokaeya nemaiya anagaene anilega uya mo mainae.

55 Yuta veamoya kafuahe kafuahena Anumaya Kotima amakinagomogami amaugafama ali-gati-mainea yafe haviya alitalu huya imu negiyane. Ani imuma kisaya kanamoa aupa higeya mukia veamoya mukia kumateti haiya kahegi kemo hama-paiya kava huya amaugafaene amakuaene sese hugahe Yelusalemu umainae. Ago mo sese huteya ani imuamia nenae. 56 Ala mono nopi molitalu huya maineya Yisasife moge mege huya ati-yegetayana higeya amakaiamifi mo hama-vige me hamavige huya mage hae “Naane tamakesa nehaviye? Kavema nesutela egahifi omegahie?” huya hae. 57 Hageya ala mono note kava vayaene Falasia vayaene Yisasina atafa hugahe mage hu-mainae “Maa hiho. Yisasima faesia kumama agenutamahena aupaa ani kea alitama me laha-paiho.” huya hu-mainae.