1 Ani kanafina Helotia ala sauve kanogino nagoa Yisasife haviya amakupi malenaya veala alino haviya humatene. 2 Humateteno Yemesia Yonina nepuamona ayaaya naepeleti ageya fakaligeno fali-maine. 3 Falitegeno Helotia ageana aniama hia kavafena Yuta veamoya amaipa haviya kanale haya yafe Pitana haegahe atafa humaine. Hale oki kaihame maya imu kiya kanafi ani kavala humaine. 4 Helotia Pitana atafa huno kina huteteno sikisitinia (16) ati vayamogamifena mage huno humaine “Foa (4) maite maite hutama tokiyaage hutama yagaiho.” huno humaine. Ala imua Anumaya Kotima amakinagomo amaugafama aligati-mainea yafe amakesa hao hisaya imu kitesageno vaya amaufi avaleno kaiyekea huteteno haegahe humaine. 5 Pitaa kina nopi mainegeya Yisasife haviya amakupi malenaya veamoya tusiya huya Anumaya Kotima aya hisiafene huya nunamupitila havigemainae.

6 Havinegageno Helotia “Ega avalena kaiyekea hutegahue.” huno nehigeno ani kegela Pitana tole ati kanolatamogani amunopi tole seni nofiteti aluga aluga ayatalapi ayeteya tole ati kanolatamogani anayapiene aye-maletageno faeno mainegeya nagoa ati vayamoya hetiya ani kina nomo fiate yagaiya mainae. 7 Yagai-mainageno nagola Anumayamo ensole kanomoa evayi higeno ani kina nomo agupinaga tusiya huno aivasa higeno ani ensole kanomoa Pitana haopale kayo neaino aligafa nehuno mage huno hapaiye “Aupaa hetio.” huno higeno hetigeno ayapiti seni nofimoa atumaelavi-maine. 8 Atumae-lavigeno ani ensole kanomoa mage huno hapaiye “Kenakaa nefaika kaiya noene vaiyo.” huno higeno Pitaa ania hutegeno mage huno hapaiye “Siotaka nevaika nakave eno.” huno hie. 9 Higeno ani kina nopitila Pitaa hati-lavino akave neuno tole agesa haviteno aneginagi huno mage hie “Ensole kanomoma hia kavala himona neagofi afaa falotega neagoe?” huno humaine. 10 Anakaya vaana hagotenoma yagai-mainea ati kanoa agaseana uana nago ati kanomona mogaseana uana ala kumatema nevaya fiate uvayi haana tokiyaage aenileti talo humalenaya fitagino kitalako humalenaya fitamoa agaia aiyaki-lavigeana nago nona agaseana osi kate vaafiti ensole kanomoa motaleno fanane humaine.

11 Fanane higeno Pitana agu agesamoa aikalo higeno mage huno hie “Menia nagaya havilama huna nehavue Anumayamoa agaia ensole kanoa hutegeno Heloti ayapitila melinatale. Yuta vayamoya nagaila nagoa kava hunategahe amakesa havi havi haya yapitilagi naugafa meligatie.” huno humaine. 12 Ani agesa havime havime Malia notega umaine. Ani Maliaa Yoni Makina itaamoe. Ani nopi mukia veala melitalu huya Anumayamotega havinegeya mainae. 13 Mainageno Pitaa kumategati ani nomo fitale mekalu kalu nehuno ke higeno nagola aliya munamona agia Lotae yakigahe emaine. 14 Emaineno haviana Pitana alenaga agele haviteno aipamoa havino muse huteno ani fita oyakino ataleno aiyayeno nopinaga haino mage huno veamogamina hamapaiye “Pitaa ago fiate me heti-maine.” huno hie. 15 Higeya “Aifonafo ke nehane.” huya hageno “Aao, tamage nehue.” huno higeya “Agaya omaigi ensole kanoa emainegi mogeho.” huya humainae.

16 Nehageno Pitaa fitale akalu kalu maino huge huge nehigeya fita yakiya agayana higeya ageteya tusiya huya atali talua humainae. 17 Amamayoa neaigeno Pitaa “Kea ohutama maiho.” huno hamapaisia yafe ayateti aigo-sigosi huteno Anumayamoma nofi nopiti avaleno emainea yafena hamapaiteno mage huno hamapaiye “Ani kea Yemesiene nagoa tafu-taganagamina hamapaiho.” huno hamapaiteno hati-lavino alualega umaine.

18 Utegeno kola otinegeno yagea vayima nehiana ati vayamoya atali talu huteya “Pitaa hanaa huno hanate tataleno vie?” huya ala ke nehuya amamayoa tusiya huno aimaine. 19 Helotia haviteno “Pitafe atiyeho.” huno higeya ati ayayana ali falote ohageno ati vayamogamina kaiyeke huneamateno “Hamaegeya faliho.” huno humaine. Huteno Yutiati tavino Sisalia mo maine.

20 Helotia kava yagai-mainea mopafiti kaveamia nealiya yafe Helotia Taiya nemaiya veanene Saitoni veanenefe tusiya huno aipa haviya humategeya nago amaku amakesa haviteya alitalu huya Helotina hagote aliya kanoamote Palasatusite mage huya me hae “Falu huta maisuna yafe kagaya Helotina hapaiyo.” huya hageno agaya nago aipa ani veanene huteno Helotite emainae.

21 Ageno Helotia nago kanaa amamiteno ani yupa sauve konagali kenaa faiteno sauve kanomo siale maineno ayaaya ke hamapaiye. 22 Hamanepaigeya melitalu humainaya veamoya mage huya nehae “Mopale kanomo hia augafa kea nohanagi Anumaya Kotia kema nehia kava huka nehane.” huya humainae. 23 Nehageno “Havige nehae.” huno ohuno Anumaya Koti agima alisaga ohia yateti aupaa Anumayamo ensole kanomoa me aikolino kalia amigeno hagifayagamoya aipa laga hageno fali-maine. 24 Falitegeno Anumaya Koti kemoa tokiyaage huteno mukia kumate ute ete humainegeya kasagoya veamoya haviteya Yisasina amakua amitafa humainae. 25 Panapasiene Soloene ani monea Yelusalemu kumate aliana momamiteana Yoni Makina avaleana Yelusalemuti Atioku kumate emainae.