14
Anumayamo kea huhaletama hisaya yafena tusiya huno tamahaino.
1 Hagotetama veafena tusiya huno tamahau tamayamopafi tamahaino. Anile Alu Aotage Avamumo lamamisia tokiya alisaya yafe musena nehutama tusiya huno tamahaino. Ani tokiya yapiti hagotetama Anumayamoa tamakupima humainea kema huhaletama hisaya tokiyahena tusiya huno tamahaino. 2 Amakesamoa nohavia kema hisia kanomoa veala hamanopaigi Anumaya Kotina agaiage hanepaiye. Veamoya ani kea nohavigi falaki-mainea kea Avamumo hapaigeno humaine. 3 Humainegi Anumaya Kotia amakupi humainea kema huhaleya nehaya veamoya nagoamogami amametitia ali lokiya vaimatesaya kene amaya hisaya kene huhaleya humatenae. 4 Nohaviya kefiti nehaya veamoya amakaiami amakuamo tokiya vaisia yana neamiyanagi Anumayamoa amakupi humainea kema huhaleya hisaya veamoya Yisasife haviya mono nopi melitalu nehaya veamogamina amaya nehae.
5 Mukia veala amakesamoa nohaviya kefiti hisagenahena muse hugahe huanagi mukia veala Anumaya Kotia tamakupi humainea kema huhaletama hisagena aluya huna musena hugahue. Anumayamo kema huhaleno nehisia kanomoa agesamoa nohavia kefiti nehisia kanomona agase-maineanagi ani kea hu yahae hisigeya Yisasife haviya melitalu humainesaya veamoya havisageno hamamaeno amametita ali lokiya vaigahie.
6 Ani yafe nafunagana-gatama tamakaya mainesalega uvayi huna ohavinesua kefitima tamahapaisugetama ohavisayana ani kemoa tamaya ohugahianagi Anumayamo aepaa havilama huna mani kene Anumayamoa falaki-malenea kene Anumayamoa nagupi humainea kene huge hamave-lige huna huhalena hisugeno ani kemoa tamaya hugahie.
7 Nagi veamoya kepitiene otofitiene yagamema hufatago huya ohisayana veamoya havilama huya ohavigahae. 8 Nago kumatema tuma hugahe keha kehama hisageya havilama ohisaya kema hisayana vayamoya hanaa huya haviteya kamea hugahae? 9 Tamakaya ania humainae tamakesamoma ohavinesia kema hisageya hanaa huya ani kea havigahae? Ani kemoa yasimoma hia kava huno fanane hugahie. 10 Ma mopafi veamoya alu amake alu amake neaiyanagi mukia ani kemoa afa yana omalegi ani kema nehaviya veamogami aepaaene ke hane. 11 Haneanagi nago kanomoa alu kefiti, nohavisua kema hisigena “Ohavua ke nehianagina ani kanoenena tokaena omaigahue.” huna hugahue. 12 Tamakaya Anumayamo aliyama aligahena Avamumoa tokiyaama tamamisia yafena aluya hunoma tamahaisiana Yisasife haviya amakupi malenaya veala amaya hutama ali lokiya vaimatesaya aliyamo tokiyahekeya aluya huno tamahaisie.
13 Ani yafema ohavinesia kefitima hisia kanomoa ani kea hu yahae hisia tokiya alisia yafena Anumayamotega havigesie. 14 Nagesamoa ohavinesia kefiti Anumayamotega havigesuana ani kea nagesamoa nohavianagi nagu nafanemoke ani kea huno havinege. 15 Ani yafena naane hisue? Nagesamoa nohavia kefiti nagu nafanemoa Anumayamotega havigegena nagainia havua nagesaene Anumayamotega havigegahue. Mono yagamea nagesamoa nohavia kefiti nagu nafanemoa hugahianagino nagainia nagesa havimainoa mono yagamene hugahue. 16 Ania ohisanana kagu nafanemoke kagesamoa nohavia kefitila Anumayamo agia alisaga hisigeya nagoa ani yafema ohavinesaya veamoya kema hana kea nohaviyafe hanaa huya “Tamage nehie.” huya Anumayamo agia alisaga hugahae? 17 Kagaya Anumayamofe muse huka kanaleya huka agia alisaga nehananagi amakaya ohavisayana amakua ali lokiya vai noamatane.
18 Nagaya mukia veala amakasena nohavua kefitila tusiya huna nehua yafena Anumayamofena muse nehue. 19 Muse nehuanagi Yisasife haviya mono nopi melitalu hisafina huhalena hisugetama havilama hisae huna tagaiti kefitila faefua (5) ke kanoa osia tamahapaisuana teni tausenia (10,000) kema nagesamoa nohavisia kefiti hisua kemona agasegahie huna nehavue.
20 Nafunagana-gatama kefo yama hisaya yafena nute nafanemoya nehaviya amakesamo avamete hu havitama maiho huna nehuanagi alopa veamoya nehaviya amaku amakesamo avamete havitama kanaleya hutama ma ma Alu Aotage Avamumoa tokiyama tamamisia kema tamahapauva kea fako hutama nafanemoya nehaviya avamete tamaku tamakesa ohaviho. 21 Anumayamoa mage higeya avopina kae-malenayane
“Yuta veafe nayona mage huna humainoane ‘Nagaini veafe alu veamogami kefiti hamapaisuanagi ania huya veganokano nehuya nagai kea haviya akave omalegahae.’ huno humainayane.”
22 Naa humaineafe ohavinesia kefiti nehisageya Yisasina amakaveno hutenaya veamoya haviya Anumaya Kotina tokiya avame yamaa neageya “Anumayamo kea tamage nehie.” huya hisayafe amave-lianagi Yisasife haviya amakupi malenaya veafe ani avame kea nohigi Anumaya Kotia avayafiti humainea kema huhaleya nehageno amaya nehie.
23 Yisasife haviya melitalu hisafina mukia veamoya nohavisaya kefiti kema hisageya ani kavama oagenesaya vealo Yisasina amakaveno hutenaya vealo me havisayana hinageya “Havigunagu kava nehae.” huya hugahae. 24 Hugahagi mukia veamoya Anumayamoa amakupi humainea kema huhaleya nehisageya ani kavama oagenesaya vealo Yisasina amakaveno hutenesaya vealo hainefaleya havinuya Yisasife huhaleya hisaya keleti amakaiami “Kefo ya nehune.” huya hisageno hisaya kemoa amakaila kaiyeke humateteno fako humategahie. 25 Fako hamaisigeya amakupima falaki-mainesia yana falote hisigeya ageteya Anumaya Kotite ape huya Anumaya Koti agia alisaga nehuya “Anumaya Kotia tamakaiene maine.” huya hugahae.
Mukia Anumayamo agima alisaga hisuna auava kavala fatago kavakeya hisune.
26 Nafunagana-gatama naa hisaya yafena naane hisune? Melitalu hisayana nago veamoya yagamea hisageya nago veamoya Anumaya Koti kea hisae. Nago veamoya Anumayamo falaki-malenea kea agupi hapaiya kea huhaleno hisayana nago veamoya Avamumo aminea kea agesamoa nohavia kefiti nehisageno nago veamoya ani kea huya aiyahae hisae. Ani kavakeya hutama veala amakua ali lokiya vaisaya kea hiho. 27 Nagoa veamoya amakesamoa nohaviya kefitima hinuyahena tolemoganio tagufa veamoyao amahaote amahaote hisageya nagoa veamoya ani kea aiyahae hiho. 28 Ani kema aiyahae hisia kanoma omainesigeya mono nopina ani kea ohuya amakupinaga Anumayamofena ani kea hisae. 29 Tolemoganio tagufa veamoyao Anumaya Kotia amakupi humainea kea huhaleya hisageya nagoa veamoya ani kehena amakesa havi havi huya fako huya haviho. 30 Nago kanomoa Anumaya Koti kea huhaleno nehisigeno Anumayamoa nago kanomona agupi kea nehisigenoa hagote kanomoa kea ohuno mainesigeno anile kanomoa kea hisie. 31 Mukia vea amaya hisageya haviya kanaleya huya mai-lokiya vaisayafe mukiamogatama tamahaote tamahaote Anumaya Kotia tamakupi kea higetama huhaletama hiho. 32 Anumayamoa amakupi humainea kema huhaleya hisaya veamoya mani kea hisaya yafeene ohisaya yafeene amakaiami amakuale kava yagaiya mainae. 33 Anumaya Kotia haviya havaya hisaya kavafena nohaigi ako hutama maisaya yafe nehaiye.
Mukia Yisasife haviya melitalu nehaya veamogami ani kava nehae. 34 Anemoya mono nopina kea ohuya ako huya maiho. Kahegi kema akave maleya anauamimo amaiyafinaga maineya mono nopina ke haviya nago kea ohuya maiho. 35 Nago kemoa kanama hamaisigeya noamifinaga umaineya anauamimona ani kehena hamavigesae. Anemoya mono nopina kea hisayana amakaye hisia kava hugahae.
36 Yisasi kanale mono kea hagoteno tamakaipiti falote humaineo? Aao ania ohune. “Tagaitige havimainone.” hutama nehao? Aao ani kemofena veganokanola ohiho. 37 Nago kanomoa “Anumayamoa nagupi kea higena huhalena hisua kano mainogeno Avamumo tokiya namigena mainoe.” huno hisia kanomoa ma ma kae-malenoa kemona “Anumayamo kahegi kehe humaine.” huno hise. 38 Manima hua kema amakaveno hutesaya veamogami kea ohaviho.
39 Nafunagana-gatama Anumayamo kea huhaletama hisaya tokiyahe aluya huno lamahaigahianagi amakesamoa nohavia kefitima hisaya veafena “Aao.” hu oamateho. 40 Mukia kavama mono nopima melitalu hutama nehaya kavala kaliso oatitama fatago hutama hisaya kavakeya hiho.