1 Nafunagana-gatama menia Alu Aotage Avamumoa tokiya neamamia ke havisae huna nehue. 2 Nayona Yisasi kema ohavinaya kanafina Satania tamavayu higetama agea oaino ago fali-mainaya veafena “Anumayati mainae.” hutama amakisana nevaitama havi kate umainaya yafena tamakaya ago havilinae. 3 Anumaya Koti Avamumoa nago kanomo aguafima mainesigenoa mani kea ohugahie “Anumaya Kotia Yisasife hai vaiteno hani yapi maiyo huno hutesie.” huno Yisasina hu-haviya hu oategahie. Nago kanomona Alu Aotage Avamuma agupi omainesia kanomoa “Yisasia Alaniamo maine.” huno ohugahie.

4 Anumayamo aliya aligahe alua lua muse yamo tokiya nelamianagi nagoke Alu Aotage Avamumo nelamie. 5 Anumayamo aliyana alua lua aliya hanegeta nealunanagi nagoke Anumaya maine. 6 Mainegi alua lua aliya alisuna tokiyatia hanegeta nealunagi nagoke Anumaya Kotia aliyamaa alisuna tokiya nelamianagino agaia aliyana nealie. 7 Mukia veane amaya hisunafe Avamumoa tokiyaa tave-nelino tahaote tahaote tamine. 8 Alu Aotage Avamumoa nagoa veamogamina Anumaya Kotina agu agesaene kea hamapaisia tokiya amamiteno nagoa veamogamina falaki-mainea kemo aepaa havisaya amaku amakesa amamine. 9 Ani Avamumokeya nagoa veamogamina Anumayamofe haviya tokiyaage amametiti hisaya amakua neamamino nagoa veamogamina kalima nealiya veane aliya kanale humatesaya tokiya nagoke Avamumokeya amamine. 10 Nagoa veamogamina tokiyaage avame yama hisaya tokiya neamamino nagoa veamogamina Anumayamo kea amakupinaga humainea kea huhaleya hisaya tokiya amamine. Nagoa veamogamina havilama huya fako hisaya tokiya amamigeya “Mani kavala Anumayamo Avamumo nehio? Veamoya amaku amakesafiti nehao? Kefo Avamumo nehio?” huya havisaya tokiya amamine. Nagoa veamogamina nohaviya kefiti alu amake alu amakefiti hisaya tokiya amamine. Ani kemona aepaa hu yahae huya hisaya tokiya nagoa veamogamina amamine. 11 Haote haote tokiya nagoke Avamumokeya tamine. Agaia haiya kava huno tahaote tahaote alu lokiya alu lokiya fako huno lamine.

12 Taugafafitila taiya, tayana, taulaga aote aote haneanagi taugafa nagoke yane. Ania huta Kalaisife havita lagupi malenona veala alu veane alu veane mainonanagi mukia veala Kalaisina nagoke augafa mainone. 13 Nagoke Avamumoa tina falelamatea kava huno nagoke augafale alino aikamaelategeta Yuta vea omainaya veanene, Yuta veanene, nofipi maineya mone oali aliya veanene, miyaamima alisaya aliya nealiya veanene alino aigamaelategeta nagoke taugafa mainonageno nagoke Avamumona timoma hia kava huno ani li nesunafe nelamie.

14 Taugafa nagoke yamaagela omalegi taugafafitila taiya, tayana, taulaga hane. 15 Aiyamoa “Nagaya ayana omainoafe mani augafafiti kanoa omainoe.” hunoma hisiana havige afaa ani augafafiti kano maine. 16 Agesamoa “Aulaga omainoafe mani augafafiti kanoa omainoe.” huno hisiana havige afaa ani augafafiti kano hane. 17 Mukia augafafima aulagaagema haneleasina hanaa huno agesa havileasine? Mukia augafafima agesama haneleasina hanaa huno mana havileasine? 18 Naa ohunegi Anumaya Kotia agesa haviteno agaia haiya kava huno taulaga, taiya, tayana talo hulateteno aote aote yana nagoke taugafafina alino malete malete higeno hane. 19 Nagoke yamaagema hanesina mukia laugafa omalesine. 20 Alu tupa-tapama alino talo higenoa taiya, tayana haneanagi nagoke taugafale hane.

21 Aulagamoa ayafena “Kagayama omaiteasina nagaya kanaleya huna mauleasine.” huno ohugahie. Anumoa aiyahena “Kagayama omaiteasina nagaya kanaleya huna mausine.” huno ohugahie. 22 Naa ohugahigi nago kaiyaga taugafamofema “Tokiyaa omalene.” huta nehunanagi ani kaiyaga taugafamoa tusia aliyamaa hane. 23 Nago kaiyaga taugafamofena “Afa ya kana humaine.” huta ali hilato huneatonanagi tagaye hisuna kaiyaga falakita kena fai nealune. 24 Fai nealunagi kanalema humainea kaiyagatia afaa kena nofaunagi Anumaya Kotia agaia agesa haviteno mukia laugafa talo humaleteno afa ya kana huno haviya humainea taugafamo kaiyaga kanaleya huno agia alisaga nehie. 25 Mukia laugafamoya ali fako ohisayafe ani kavala humalegeno “Nagoke taugafa hane.” nehuta nago avamete maineta kava yagai-mainone. 26 Nago kaiyaga taugafamoa tagatama aiyana mukia laugafamoa tagata neaiye. Nago kaiyaga taugafamoa ala agima aligenoa mukia taugafamoa muse nehie.

27 Lamakaya mukia Yisasina augafa aiya, aya, aulagaa mainae. 28 Yisasife havita lagupi malenona veamogatama nagopima maunana alu aliya alu aliyana Anumaya Kotia agaia huyogino lamine. Hagoteno Aposolo vayala humateteno anile Anumayamo amakupi humainea kema huhaleya hisaya veala humateteno anile Anumaya Koti ke huge amavelige hisaya veala humateteno anile tokiya avame yama hisaya veala humateteno anile kali vea ali hetimatesaya veala humateteno anile vea amaya hisaya veala humateteno anile kava veala humateteno anile amakesamoa nohavia kefiti hisaya veanene alino hetimatene. 29 Mukia vayamogata Aposolo vaya mainao? Ifi mukia veamogata Anumayamo amakupi humainea kea huhaletama hisaya vea mainao? Ifi mukia veamogata huge amavelige aliyana nealiyo? Ifi mukia veamogata tokiyaage avame yana nehao? 30 Ifi mukia veamogata kalima aliya veala ali kanale huneamatao? Ifi mukia veamogata tagesamoa ohavinea kefitila nehao? Ifi mukia veamogata ani amakema aiya kea hu yahae hutama nehao? 31 Aao naa nohunagi tamakaya Avamumo uhagote hanea muse yana alisayafe tokiyaage huno tamahaisie huna nehue.

Menia nagaya nago yamoa lamage huno uhagote hanea auavafe tamahapaigahe hugi haviho.