Ibru
1
Jisas Krais God wariye kandja dje nono aundo
1 Kamasa God dje worika propet kambono po nono Juda una kokane moi al kandja dje awi. Kondwe kayekaye ne, kun merke ga nono kokane kandja dje awi pi. 2 Ba ipon ege pora djinda manda yendo ge, God kandja dji mal yene wariye wo nono dje awi pirmon. Wariye ge God kandja dje wori yei, une wal porapora aunda inda iwa. Wariye agle al ge, God kupill makimb beke yei paro. 3 God yene poll dje au kerman djindo mal ge, yene wariye embe moro. Alla, God kaima moro mal embe ge, yene wariye ge embe mal moro. Kupill makimb wal porapora ye paro ge, wariye kandja dongall djindo al ge ye paro. Una singare ke ye wani al ge une asamoll po was yeworika, una kiwa molmaka alla are, une kupill al po God ta mal moro iwa agle woto ami dje moi.
God wariye pla moraka, tau agelo kambono kalto mor
4 Wariye embe yei al ge, une plato moi, tau agelo kambono kalto moi. Ge yene kandjiye God awi kandjiye ge, plato paro, ga tau agelo kandjine ge kalto yero. 5 God yene wariye kandja dje awi ba, une tau agelo ta moi al kandja embe ta dje nawi. Une embe dji,
Ni na warna moren. Ipon yero ge, na ni nan moro we dji (Buk Song 2.7)
Kandja ta ge embe,
Na une ne moyaka, une na warna moyaka yemboll we dji (2 Samuel 7.14, 1 Stori 17.13)
Tau agelo moi al ge kandja embe ta dje nawi. 6 Man, God yene wariye taimane dje wori makimb al woi kune ge, une kandja embe dje wori yei,
Tau agelo porapora mor ge, ga wariye kandjiye amblo pla wornembe dji (Lo 32.43)
7 God tau agelo moi ge pille embe dji,
Na kandja sigiye dje wornaka, tau agelo kambono ge kamkopo mal embe bul dje pine. Ga God boiye mal embe molo wamo kund boll kogo yene we dji (Buk Song 104.4)
8 Ba yene wariye moi al ge une kandja embe dje awi,
O God, ni king moren ge, molo pamben, pora nadjinda. Ni unaken kantau yenden al ge, ni singare du dje eri yenden. 9 Singare ke ge, ni ke kanden. Alla singare du dje paro ge ni wopake kanden. God, nenem Godin moro ge, ni embe yenden pille, une ni dje wordo. Kopong tulu dje ni bolo awika ni wo kerman pin, agan kambono wo embe napi (Buk Song 45.6-7)
10 Alla kandja ta bolo wori pai ge embe dji,
Iwa Kerman! Kamasa dumo makimb yen ge dongall paro ge, asamoll ni ye kerin. Kam kupill al yero ge ni aglen pall beke worin kona pla paro. 11 Are kupill makimb ge wo ke po kerda. Ba ni molo pamben. Konkunom gole nom djindo mal embe soka ge pora djinda. 12 Ni konkunom mal embe amblo kimbre worbenka er seke punda. Una konkunom gulo worinj mal embe kupill makimb yero ge nom dje kerda. Ba ni molo paren mal embe molo pamben, ni kognumb yero ge pora nadjinda (Buk Song 102.25-27)
13 Kamasa God tau agelo kambono moi al ta nadji ba yene wariye moi al une embe dji,
Ni wo na aglena woto ami dje mopenka, na ni kundayem una tanaka wo ni menameto moye we dji (Buk Song 110.1)
14 Tau agelo ge murble mal mor, God dje wordaka ga po una pak to awinj. Una er take dje napine, God i yem djinda una ge, tau agelo po ga amblo pille dje awinj.