2
Iona Iawe God mampe rauparileide
1 Iona owa moia bupa bedewe wandie Iawe God mampe rauparilene wanase, 2 “O Iawe God ne poka debama etedina,
bedewe manawo rauparinteno etaneana.
Bolala bolau bedewe iane aidantene
sau baiwa iririntedino etaneana.
3 E ne aubaneano
owa didiweido iane aidanten.
E rabamaa mukawa epaubanedie leusaitunedie.
E rabamaa ne osonawo epedie tutuwadie.
4 Ne insenase, e ne enabodaneano eidaene nambeido anten,
ita ando e dua kakaiwa mai osowe ewapa.
5 Ne owa bedewe iane antene nuana boidalen,
owa numanen,
ita ina owa bedewe inintoia uwana taunboden.
6 Ne iane owa bedewe aidantene wadi didiuwoido nonen.
Sape ne diburantene wainedine,
bola sa intawa moau gudulala winei.
Tane e Iawe God ne Godna e ipa sa ne inaneana,
ita e ne don sa bedewe wainedino wadaubanee inaneana.
7 Walama sawo ne insaisana koaleno boida baiwantedine.
O Iawe God ne e insaene manawo rauparinten,
ita e dua kakaiwa bedewe wainie etaneana.
8 Apana mida god lagawaau wadaposimoia,
e nuawadawadaa winakasala adiananasai.
9 Tane ne nebaida e os wadaposiepina;
Ne e manawo pulo itupa,
ne dima e manawo sauatena rua dewamopa.
Iawe God e os apana inamoiana.”
10 Walama isiwa diantono aupe Iawe God owa moia debama dieno Iona uta rua einaubeno owa waiwe nosen.