17
Israelwa kadiwa dewasaieno baiwa Iawe God waubamode
5-10 Iawe Israel apanawa Godiu mo Isibt warerewa mukawa atowe waimoio banlamono nomoiena me mampe kadiwa dewasaiena. Israel apanawa god da wadaposimoie ita uwa daitada apanawa dewau wawontoie. Mo ipa sa bauta Kanaan bolawa bedewe waimoio Iawe God Israelwa danauwo tanamono nomoiena. Mo Israelwa warereu dewantona rua god da wadaposimoie. Ita Israelwa weregainta dewa kadiwa daitada uaraia Iawe God mai menasaipona dewamoiena. Tane mo bolau kerakera ita debamau bedewainta, god lagawaau wadaposiu bolawa dewamoiena. Israel apanawa seu kakaila* Seu kakaila sa ipa Kanaan apanawa wadaposisampa seuwa. Seu ema Kanaan apanawa godiu debama ebowa Baal inainamba sabamosade. ita Asera† Asera ipa Kanaan apanawa godiu iwoa. Mo ia tasila endomoie sape mo god iwoa wadaposisai. kokoitauwa wadaposisampa baiwa wadi iwainta ita ia debamau bumpeinta endonton.
Ipawa ema baiwa tawo Asaria apanawa warereu sorodiawa Israel tawowa bedewe wimoiena onantopue Israelwa aimopu. Ita mo wimone bolawa debama Samaria enane bodane eneio ena natadea dianton. Tane ena 9 bedewe Osia warereleidia walamawe tawo Asaria warerewa sorodia bola debama Samaria wadane mamposaiena. Ita Israelwa diburau apanawa taumone Asaria bolau bedewe anton. Tawo Asaria warerewa mo bola debama Ala bedewe teamono waimoie ita isiwa Gosen bolawa bedewe esa Abo tampe waimoie, ita isiwa Midia tawowa apanawa bolau bedewainta teamono waimoiena.
Asaria warerewa bola da apanawa waubamono Israel bolau bedewe waimoiena
24 Tane tawo Asaria warerewa bola debamau Babilon, Kata, Awa, Amat ita Sepawaim apanawa otamone Samaria tawowa debama bedewe teamon. Mo Samaria bolawa bedewainta teamono Israelwa aupau wadane waimoie. 25 Bola da nambea apanawa wimoiena walamawe Iawe God mai wadaposisapona, sa baiwa Iawe God laion waubamono mo isiwa adaboiamoiena.
26 Tane apana wimone Asaria warerewa diane waienase, “Apana e waubamoano Samaria bolau debama bedewainta waimoia mo mai bola sa godiwa anaanawa atentopona ita god sa laion waubamono apana bomoi.”
27 Tane Asaria warerewa wanase, “E pirisi dea wanaaubeno leulepie Samaria tawowa bedewe alepi. Mapo pirisi Samaria tawowa bedewe waimoie, tane ne mo diburana apanawa rua otamona. Ita mo bedeuwo dea Samaria tawowa bedewe waimpaa baiwa wanaaubeiena alepi. Me sape wampie apanawa sape waimoia Samaria godiu anaanawa waeuwamopi.” 28 Sa baiwa mo pirisi dea mapo Samaria tawowa oso wandio wadane antoiena leulene bola debama Betel bedewe wisen. Ita me apana waeuwamodie ita mo Iawe God atentopue me wadaposisapu.
29 Tane bola da nambea apanawa uduudu Israel bolawa debamau bedewe waimoia muba godiu dewamoiena. Ita Israelwa wadaposiu bolawa osowe mo god sa teamoiena.