8
Kaluka꞉isaleyo꞉ Gode o꞉lia꞉lo꞉ ege doma꞉no꞉ tog ho꞉gi a꞉no꞉ we
1 To nililo꞉ sio꞉ a꞉ma꞉ ha꞉go꞉ we. Nili bobalo꞉ so꞉mea꞉sen kalu alandeyo꞉ nowo꞉ a꞉lab ko꞉lo꞉, e Hebene ha꞉na꞉sa꞉ga꞉yo꞉, wabulun dowaki Iwalulo꞉ A꞉lab Gode a꞉ma꞉ dagi ililiba asifo꞉lab. 2 Eyo꞉ Galala꞉ Mada Malilo꞉le us a꞉namio꞉ nanogo꞉ dimida꞉lab. Galala꞉ a꞉no꞉ Godeya꞉ Malilo꞉ a usa a꞉lab ko꞉sega, a a꞉no꞉ kaluwa꞉ dimido꞉ma. Godeya꞉ ene dimido꞉ ko꞉lo꞉, Ya꞉su e nanogo꞉ a꞉na dimida꞉lab.
3 Bobalo꞉ so꞉mea꞉sen misa꞉ kaluwa꞉ nanog a꞉no꞉ we. Iyo꞉ tambo Godemo꞉wo꞉ boba kelego꞉wo꞉ dimiaki, a꞉la꞉ta꞉ga꞉ no꞉wo꞉lo꞉ so꞉mea꞉sen. Ililo꞉ dimido꞉ o꞉leaumbo꞉ nili bobalo꞉ so꞉mea꞉sen misa꞉ kalu Ya꞉su eyo꞉lo꞉ Godemo꞉lo꞉ boba kelego꞉ dimia꞉no꞉wo꞉ da꞉lab. 4 Ya꞉su e henfelo꞉ kalule kibo꞉bowo꞉, e bobalo꞉ so꞉mea꞉sen nanog a꞉no꞉ mo꞉dimidamabe. Mo꞉wo꞉ Mo꞉sa꞉sa꞉ ele a꞉ma꞉lo꞉ saefa꞉ o꞉leaumbo꞉, bobalo꞉ so꞉mea꞉mela꞉no꞉ kalu nolo꞉ o꞉ma da꞉fe alifelo꞉ ko꞉lo꞉ elen. 5 Kis 25.40, Kolo 2.17, Hibu 9.23Kalu i a꞉ma꞉yo꞉ henfelo꞉ wenamio꞉ Godeya꞉ ene Malilo꞉ a a꞉nami dia꞉len. Ko꞉sega a a꞉no꞉, Godeya꞉ ene Malilo꞉ a, Hebenelo꞉ a꞉lab misido꞉ a꞉no꞉ ko꞉lo꞉ dede dimido꞉. Mo꞉sa꞉s eyo꞉ Godeya꞉ Malilo꞉ ayo꞉ so꞉ga꞉ dima꞉kiyo꞉, Gode eyo꞉ emo꞉wo꞉ widakiyo꞉ a꞉la꞉sio꞉, “Na꞉no꞉ misio꞉wa dowakilo꞉ gemo꞉lo꞉ wido꞉ o꞉leaumbo꞉ giyo꞉ dede dimida꞉bi.” 6 Hibu 7.22Ko꞉sega nanogo꞉ Ya꞉suwa꞉lo꞉ dimida꞉lab a꞉no꞉ nafale fa꞉la꞉dowaki, nanog bobalo꞉ so꞉mea꞉sen kaluwa꞉lo꞉ tamin amilo꞉ dimido꞉ a꞉no꞉ a꞉ma꞉ tinio꞉ ko꞉lo꞉lab. A꞉la꞉ta꞉ga꞉ kaluka꞉isalelo꞉ Gode o꞉lia꞉lo꞉ ege doma꞉no꞉ tog ho꞉gi a꞉namio꞉ Ya꞉su e us kalu alan dowo꞉ ko꞉lo꞉, tog ho꞉gi a꞉ma꞉yo꞉ tog mo꞉lulo꞉ ya꞉len a꞉no꞉ tinio꞉ ko꞉lo꞉lab. Mo꞉wo꞉ tog ho꞉gi a꞉ma꞉lo꞉ dinali sa꞉lab a꞉ma꞉yo꞉, dinali sio꞉ mo꞉lulo꞉ elen a꞉no꞉ tinio꞉.
7 Kaluka꞉isaleyo꞉ Gode o꞉lia꞉ ege doma꞉no꞉ a꞉la꞉likilo꞉ tog mo꞉lulo꞉ delen a꞉no꞉ o꞉li dowo꞉ kibo꞉bowo꞉, Gode eyo꞉ tog ho꞉gi nowo꞉ mo꞉fadamabe. 8 Jer 31.31-34Ko꞉sega Gode eyo꞉ kelego꞉ nolo꞉ mo꞉ego꞉le dowo꞉ a꞉no꞉ ba꞉da꞉sa꞉ga꞉, kaluka꞉isalemo꞉wo꞉ a꞉la꞉dinali saefa꞉,
“Alan eyo꞉ a꞉la꞉sio꞉, Ho꞉len nowo꞉ fa꞉la꞉dowalikiyo꞉, niyo꞉ kaluka꞉isalelo꞉ Gode o꞉lia꞉lo꞉ ege doma꞉no꞉ tog ho꞉gi nowo꞉ dimidama꞉nigo꞉l.
To saeto꞉l a꞉no꞉ Isolael kaluka꞉isale o꞉lia꞉ Yuda kaluka꞉isale o꞉lia꞉mo꞉ saetakigo꞉l.
9 Tog ho꞉gi we, tog tamin amilo꞉ ini ema꞉mui o꞉lia꞉mo꞉lo꞉ saefa꞉ o꞉leo꞉ngo꞉ma.
Tamin amio꞉ kaluka꞉isale i a꞉no꞉ Isib hen a꞉na a꞉la꞉ta꞉ga꞉ dagi nilo꞉ma꞉ sili alita꞉sa꞉ga꞉ tililia꞉mio꞉ ko꞉lo꞉ a꞉na saefa꞉.
Ko꞉sega to nilo꞉ saefa꞉ a꞉no꞉ iyo꞉ mo꞉kudu ane ko꞉lo꞉,
niyo꞉lo꞉ imo꞉wo꞉ fa꞉s dimi.
10 Tog ho꞉gi dia꞉takiyo꞉, nilo꞉ Isolael kaluka꞉isale o꞉lia꞉lo꞉ to saefa꞉nigo꞉lo꞉ a꞉no꞉ we.
Ele nilo꞉wo꞉ iyo꞉ asuluma꞉ki, inin asulo꞉wa sa꞉sa꞉li alifa꞉no꞉.
Iliyo꞉ ele a꞉no꞉ kudu hamana꞉kiyo꞉, inin himuwa dia꞉fa꞉no꞉.
Ili Godeyo꞉ ne doma꞉no꞉ a꞉la꞉ta꞉ga꞉
Iyo꞉ kaluka꞉isale nino꞉ doma꞉ib.
11 Iliyo꞉ ne asulaki, wilo꞉ di kalu o꞉lia꞉ wa꞉feyo꞉ kalu o꞉lia꞉ma꞉yo꞉
tambo ne mada fanda asuluma꞉ib.
Iyo꞉ o꞉ma asulufo꞉lab ko꞉lo꞉, kalu noma꞉yo꞉ ene so꞉lo꞉ o꞉lia꞉ mili kalu o꞉lia꞉mo꞉wo꞉
‘Giyo꞉ Godeyo꞉ asuluma’ a꞉la꞉bo꞉ wa꞉kabiyo꞉ mo꞉wida꞉mela꞉ib.
12 Ililo꞉ mogago꞉ dimida꞉len a꞉no꞉ halaki ga꞉lila꞉ma꞉no꞉ ko꞉lo꞉,
wa꞉kabiyo꞉ mo꞉asuluma꞉no꞉,” Gode eyo꞉ a꞉la꞉sio꞉.
13 Gode eyo꞉ tog we “ho꞉gi” a꞉la꞉wikili alitakiyo꞉, tog mo꞉lulo꞉ delen a꞉no꞉ nanogdo꞉ma dowab a꞉la꞉widakigab. Tog a꞉no꞉ halaido꞉lo꞉ma dowaki, kelegema꞉nigab.