1 Yosa꞉b e ho꞉leno꞉ modo꞉wo꞉ dibolowa sa꞉ga꞉ elen amio꞉, Isib misa꞉ kalu alan, Fa꞉lo꞉wa꞉ ene nanog kaluwo꞉ a꞉la꞉, nowo꞉ misa꞉ kalumo꞉lo꞉ wain ho꞉ndo꞉ wasu mia꞉sen, nowo꞉ misa꞉ kaluwa꞉ ma꞉ndo꞉ so꞉da꞉sen ko꞉sega, a꞉la꞉ma꞉yo꞉ misa꞉ kaluwa꞉lo꞉ mo꞉asulo꞉ au dimido꞉. 2-3 A꞉la꞉dimido꞉ ko꞉lo꞉ Fa꞉lo꞉ eyo꞉ a꞉la꞉mo꞉wo꞉ mada gadia꞉sa꞉ga꞉, ene da꞉la꞉diya꞉ misa꞉ kaluwa꞉ dibolo a, Yosa꞉bdo꞉ sen a꞉na, a꞉la꞉yo꞉lo꞉ a꞉na to꞉lo alifa꞉. 4 A꞉la꞉gabikiyo꞉ da꞉la꞉diya꞉ misa꞉ kalu a꞉ma꞉yo꞉, a꞉la꞉ a꞉no꞉ Yosa꞉bo꞉ bo꞉fo꞉melea꞉ki ta꞉fo꞉ ko꞉lo꞉, a꞉la꞉yo꞉ dibolo a a꞉namilo꞉ seno꞉ ho꞉leno꞉ modo꞉ ane.

5 A꞉na silikiyo꞉, waindo꞉ wasu mia꞉sen kalu o꞉lia꞉ ma꞉ndo꞉ so꞉da꞉sen kalu o꞉lia꞉ma꞉yo꞉, nulu imilig no amio꞉ a꞉la꞉ma꞉yo꞉ ofolo꞉. Noma꞉yo꞉ ofowo꞉ ko꞉li ba꞉ba꞉, noma꞉yo꞉lo꞉ ko꞉li ba꞉ba꞉ ko꞉lo꞉, ofolo꞉ noma꞉lo꞉wo꞉ ha꞉go꞉ ko꞉li, noma꞉lo꞉wo꞉lo꞉ ha꞉go꞉ ko꞉lilo꞉ ko꞉lo꞉ ba꞉ba꞉. 6 Yosa꞉b e kea꞉fole a꞉la꞉lo꞉wa handalowaki ba꞉ba꞉ amio꞉, a꞉la꞉yo꞉ kele asula꞉li sena ba꞉ba꞉. 7 Fa꞉lo꞉wa꞉ nanog kalu a꞉la꞉ a꞉no꞉ Yosa꞉ba꞉ misa꞉ kaluwa꞉ ene dibolo a a꞉namio꞉, Yosa꞉b o꞉lia꞉ sen ko꞉lo꞉, Yosa꞉b eyo꞉ a꞉la꞉mo꞉wo꞉ a꞉la꞉dabu ba꞉ba꞉, “Ga꞉go꞉ o꞉go꞉ mo꞉sagalako꞉, o꞉b kele asula꞉leya?” 8 A꞉la꞉dabu ba꞉dabiki, a꞉la꞉ma꞉yo꞉ emo꞉wo꞉ a꞉la꞉sio꞉, “Na꞉no꞉ o꞉go꞉ ofola꞉sa꞉ga꞉, o꞉lo꞉ fanda sa꞉ma꞉no꞉wo꞉ aundo꞉ma ko꞉lo꞉, na꞉no꞉ kele asula꞉li so꞉l.” A꞉la꞉sa꞉labiki Yosa꞉b eyo꞉ a꞉la꞉sio꞉, “Gode eyo꞉ ofolo꞉ tambowo꞉ mo꞉wo꞉ fanda asulo꞉ ko꞉lo꞉, gaindo꞉ ofolo꞉wo꞉ nemo꞉ malolo꞉ mena” a꞉la꞉sio꞉.

9 A꞉la꞉fo꞉ko꞉lo꞉ misa꞉ kalumo꞉lo꞉ wain ho꞉ndo꞉ wasu mia꞉sen kalu a꞉ma꞉yo꞉ ofolo꞉ elo꞉wo꞉ Yosa꞉bo꞉wo꞉ a꞉la꞉malolo꞉ me. “Ne ofolakiyo꞉, wain iyo꞉ ne milifa elena ba꞉ba꞉. 10 A꞉la꞉ta꞉ga꞉ wain i a꞉namio꞉, eleyo꞉ otalen iliki, musugo꞉ a꞉na fa꞉la꞉dota꞉ga꞉, mamowo꞉ heda꞉sa꞉ga꞉yo꞉, fowo꞉ a꞉na heda꞉sa꞉ga꞉, gen dowabiki ba꞉ba꞉. 11 Misa꞉ kaluwa꞉ ho꞉ndo꞉ na꞉sen go꞉fo꞉wo꞉ ni dagiya꞉ ta꞉li sen ko꞉lo꞉, niyo꞉ wain fo a꞉no꞉ tulia꞉sa꞉ga꞉, ho꞉no꞉ go꞉fo꞉wa timana꞉ki, dagiya꞉ digibasi to꞉lola꞉sa꞉ga꞉, wain ho꞉n a꞉no꞉ Fa꞉lo꞉mo꞉ dimia꞉lena ba꞉ba꞉.” 12 A꞉la꞉malolo꞉ meabikiyo꞉, Yosa꞉b eyo꞉ a꞉la꞉sio꞉, “Gilo꞉ ofolo꞉ a꞉no꞉ mo꞉wo꞉ we. Wain ele otalen a꞉no꞉, ho꞉len otaleno꞉ ko꞉lo꞉ da꞉feyo꞉. 13 Ho꞉len asol fa꞉la꞉dowalikiyo꞉, Fa꞉lo꞉wa꞉yo꞉ ge sili alita꞉sa꞉ga꞉, go꞉no꞉n nanogo꞉ a꞉ma꞉la꞉ dima a꞉la꞉ma꞉ib ko꞉lo꞉, gilo꞉ tamin amilo꞉ wain ho꞉n ko꞉lo꞉ Fa꞉lo꞉mo꞉lo꞉ dimia꞉sen aumbo꞉, wa꞉ka a꞉dimia꞉ib. 14 Ko꞉sega ge sili alita꞉sa꞉ga꞉ ga꞉li dowakiyo꞉, ne giyo꞉ ga꞉lila꞉so꞉bo. Nelo꞉ dibolo ayo꞉ sili alifoma꞉kiyo꞉, giyo꞉ ne asuwa꞉taki, Fa꞉lo꞉mo꞉wo꞉ sa꞉la꞉bi. 15 Mo꞉wo꞉ ne tamin amio꞉ Hibulu hena sen amio꞉, kalu nolba꞉yo꞉ ne madali susululia꞉ga꞉, Isib tililia꞉mio꞉. A꞉la꞉ta꞉ga꞉ ne Isib sen amio꞉, mogago꞉wo꞉ mo꞉dimido꞉ ko꞉sega, iliyo꞉ ne dibolo a wena madali tolo꞉ alifo꞉lab ko꞉lo꞉, giyo꞉ ne asuwa꞉ta꞉bi.” Yosa꞉b eyo꞉ a꞉la꞉sio꞉.

16 A꞉la꞉ta꞉ga꞉ ma꞉ndo꞉ so꞉da꞉sen kalu elo꞉ ofolo꞉ malolo꞉ me a꞉ma꞉ ha꞉go꞉ nafale malolo꞉ meabo꞉lo꞉b a꞉la꞉asula꞉sa꞉ga꞉yo꞉, elo꞉ ofolo꞉ a꞉no꞉lo꞉ Yosa꞉bo꞉wo꞉ malolo꞉ meaki a꞉la꞉sio꞉, “Niyo꞉lo꞉ ofolo꞉ ko꞉lo꞉ maloloma꞉nigo꞉l. Ne ofolakiyo꞉, fafowo꞉ otalen amio꞉ ma꞉n dowo꞉fa꞉ fo꞉fo꞉lela꞉yo꞉ ni misa꞉ wa꞉la delena ba꞉ba꞉. 17 Fafo wa꞉l amio꞉ ma꞉n dowo꞉fa꞉ ko꞉li ko꞉lilo꞉ fo꞉fo꞉lo꞉ a꞉no꞉ misa꞉ kalu, Fa꞉lo꞉ eno꞉ ko꞉sega, ma꞉n fo꞉fo꞉lo꞉ a꞉no꞉ o꞉ba꞉ya꞉ na꞉lena ba꞉ba꞉.” 18 A꞉la꞉malolo꞉ meabiki, Yosa꞉b eyo꞉ a꞉la꞉sio꞉, “Gilo꞉ ofolo꞉ a꞉no꞉ mo꞉wo꞉ we. Fafo otalen a꞉no꞉, ho꞉len otaleno꞉ ko꞉lo꞉ da꞉feyo꞉. 19 Ho꞉len asol fa꞉la꞉dowalikiyo꞉, Fa꞉lo꞉ eyo꞉ gi misa꞉yo꞉ gedela꞉sa꞉ga꞉, gi do꞉mo꞉wo꞉ iya sunu hele alitaliki, gi howo꞉ o꞉ba꞉ya꞉ ma꞉ib.” Yosa꞉b eyo꞉ emo꞉wo꞉ a꞉ma꞉la꞉bo꞉ a꞉la꞉sio꞉.

20 A꞉la꞉ta꞉ga꞉yo꞉, ho꞉len otaleno꞉ fa꞉la꞉dowabikiyo꞉, Fa꞉lo꞉ elo꞉ sa꞉la꞉li ho꞉leno꞉ dowo꞉ ko꞉lo꞉, ene nanog kalu i o꞉lia꞉ sagalema꞉niki, eyo꞉ ma꞉no꞉ alan dowo꞉fa꞉. Iyo꞉ sagalakiyo꞉, nanog kaluwa꞉ siwa꞉l amio꞉, waindo꞉ wasu mia꞉sen kalu o꞉lia꞉ ma꞉ndo꞉ so꞉da꞉sen kalu o꞉lia꞉ dibolo ayamilo꞉ eleno꞉ sili alita꞉sa꞉ga꞉ tililia꞉mio꞉. 21 A꞉la꞉ta꞉ga꞉ waindo꞉ wasu mia꞉sen kalu a꞉no꞉ Fa꞉lo꞉wa꞉yo꞉ nanog enedo꞉ tamin amilo꞉ dia꞉sen a꞉no꞉ enebo꞉ dima꞉ki dimi ko꞉lo꞉, kalu a꞉ma꞉yo꞉ wain ho꞉no꞉ Fa꞉lo꞉mo꞉wo꞉ wa꞉ka wasume. 22 Ko꞉sega Fa꞉lo꞉ eyo꞉ ma꞉ndo꞉ so꞉da꞉sen kaluwa꞉ do꞉mo꞉wo꞉ iwalu sunu hele alifa꞉. A꞉la꞉do꞉ go꞉ a꞉no꞉ Yosa꞉b elo꞉ a꞉la꞉mo꞉lo꞉ sio꞉ o꞉leaumbo꞉ hendele fa꞉la꞉dowo꞉. 23 Ko꞉sega waindo꞉ Fa꞉lo꞉mo꞉lo꞉ wasu mia꞉sen kalu a꞉ma꞉yo꞉ e nanog diakiyo꞉, Yosa꞉bo꞉ mo꞉asulaki ga꞉lila꞉.