1 Niyo꞉ henfelo꞉ kaluka꞉isaleya꞉ to ko꞉li ko꞉lilo꞉wo꞉ o꞉li ka sa꞉ma꞉no꞉, a꞉la꞉ta꞉ga꞉ ma꞉mula꞉ kaluwa꞉ to a꞉no꞉lo꞉ dia꞉sa꞉ga꞉ o꞉li sa꞉ma꞉no꞉ ko꞉sega, kaluka꞉isale nol asulano꞉ aundo꞉malalega, ne belo madalilo꞉ so꞉no꞉wo꞉ o꞉ngo꞉ dowab. 2  Madi 17.20Ne Godeya꞉ towo꞉ kalab amilo꞉ walama꞉no꞉ asulo꞉ a꞉no꞉ dia꞉sa꞉ga꞉yo꞉, kelego꞉ wo꞉no꞉lelo꞉ da꞉labo꞉ fanda asululia꞉sa꞉ga꞉, ne mada asulo꞉wo꞉ di ko꞉sega, nol asulano꞉ ne amio꞉ aundo꞉malalega, ne ba madali o꞉ngo꞉malo꞉ngo꞉ ko꞉lo꞉ a꞉lab. A꞉la꞉ta꞉ga꞉ niyo꞉ tili dabuwo꞉ halaido꞉ dowaki, misio꞉wo꞉ o꞉li gigilima꞉no꞉ dowo꞉, ko꞉sega nol asulano꞉ ne amio꞉ aundo꞉malalega, ne ba madali o꞉ngo꞉malo꞉ngo꞉ dowab. 3 Kelego꞉ nilo꞉wo꞉ wa꞉feyo꞉ kaluka꞉isale nolbo꞉ tambo dimia꞉no꞉ a꞉la꞉ta꞉ga꞉ no꞉no꞉n do꞉mo꞉wo꞉ kalu nolba꞉yo꞉ deya so꞉fa꞉ki dimia꞉no꞉ ko꞉sega, nol asulano꞉ ne amio꞉ aundo꞉malalega, man nilo꞉ dimido꞉ a꞉no꞉ madali walab.

4 Kaluka꞉isale abeyo꞉ nolo꞉ asulo꞉ka꞉ a꞉la꞉likilo꞉ man elo꞉ dimidano꞉ we. Eyo꞉ nol o꞉lia꞉yo꞉ ha꞉fo꞉wo꞉ disa꞉laki, ha꞉sa yasi dowan. E nol o꞉lia꞉yo꞉ mo꞉etea꞉sen. E alano꞉lo꞉b a꞉la꞉asulakiyo꞉, enena꞉ma꞉la꞉yo꞉ mo꞉kaila꞉ sa꞉lan. 5 Eyo꞉ nolo꞉ mo꞉sendelo alita꞉sen. Eneko꞉ doma꞉no꞉ a꞉lakiyo꞉ mo꞉asula꞉sen. E bo꞉ebo꞉ mo꞉gadia꞉sen. Emo꞉lo꞉ hala dimidab a꞉no꞉ kabi a꞉laki ga꞉lila꞉sen. 6  Lom 12.9Eyo꞉ mogago꞉ dimidab a꞉no꞉ ba꞉da꞉ga꞉yo꞉, e mo꞉beakiyo꞉ mo꞉sagala꞉sen. Digalo꞉ man dimidab a꞉no꞉ e sagala꞉sen. 7  1Bid 4.8Kaluka꞉isale noldo꞉ asulan a꞉ma꞉yo꞉ ene tili dabuwo꞉ mo꞉ta꞉fo꞉ ha꞉naki, Godeya꞉lo꞉ dimidama꞉no꞉ a꞉no꞉ hendele dia꞉no꞉ a꞉la꞉liki yasila꞉sen. Eyo꞉ hida꞉yo꞉ ko꞉li ko꞉lilo꞉ a꞉no꞉ dia꞉i ha꞉nakiyo꞉, mo꞉ta꞉fo꞉ ha꞉naki, halale kagafo꞉ ko꞉ ha꞉na꞉sen.

8 Nol asulan man a꞉no꞉ ko꞉ngo꞉ mela꞉no꞉ doma꞉ib. Ko꞉sega Godeya꞉ towo꞉ kalab amilo꞉ widan man a꞉no꞉ elema꞉ib. To ko꞉li ko꞉lilo꞉ da꞉da꞉sa꞉ga꞉lo꞉ sa꞉lan a꞉no꞉lo꞉ elema꞉ib. A꞉la꞉ta꞉ga꞉ asulo꞉wo꞉ alando꞉ di a꞉no꞉lo꞉ tambowo꞉ kelege doma꞉ib. 9 O꞉g ho꞉len wenamio꞉, asulo꞉ nililo꞉ di a꞉no꞉, hebda꞉su di ko꞉lo꞉lab. A꞉la꞉ta꞉ga꞉ Godeya꞉ towo꞉ kalaba wida꞉likiyo꞉, hebda꞉su sa꞉la꞉lo꞉l. 10 Ko꞉sega ilili alita꞉ga꞉ nafale ta꞉fa꞉no꞉ ho꞉len a꞉no꞉ fa꞉la꞉dowalikiyo꞉, heb heb a꞉lo꞉ nililo꞉ o꞉gdo꞉ dia꞉lo꞉l we kelege doma꞉ib. 11 Ne so꞉wala꞉su silikiyo꞉, nilo꞉ to sa꞉lano꞉lo꞉, ni asulo꞉wo꞉lo꞉, nilo꞉ ba꞉dano꞉lo꞉, so꞉wagalina꞉lo꞉ dimidan o꞉leau dimida꞉len. Ne analia꞉ga꞉ kalu dowakiyo꞉, so꞉wagalina꞉ man a꞉no꞉ tambo ka ta꞉fo꞉. 12 O꞉gdo꞉ nilo꞉ ba꞉dab a꞉no꞉, hewo꞉ amilo꞉ funa꞉ ba꞉dan a꞉gaki, tambowo꞉ mo꞉fanda bo꞉do꞉l. Ko꞉sega tif amio꞉ nio꞉ hendeleyo꞉ si kudu ba꞉dakiya, fanda ba꞉ba꞉no꞉. O꞉go꞉ nelo꞉ asulo꞉ a꞉no꞉, heb heb a꞉la꞉ di ko꞉sega, Gode elo꞉ ne ko꞉lo꞉ fanda asululiab o꞉leaumbo꞉, tif amio꞉ niyo꞉ kelego꞉ tambowo꞉ fanda asululia꞉no꞉.

13  1Tes 1.3A꞉la꞉fo꞉ko꞉lo꞉ man otalen we ko꞉ngo꞉ dofo꞉ ha꞉na꞉mela꞉ib. Tili dabu mano꞉, hendele dia꞉no꞉ yasilan mano꞉lo꞉, nol asulan man a꞉no꞉lo꞉ dofo꞉mela꞉ib. Ko꞉sega nol asulan man a꞉no꞉ wa꞉la꞉b dowaki, man nolo꞉ a꞉ma꞉ tinio꞉ ko꞉lo꞉lab.