1 “No waiŋjâc fuŋqizecne jâmbâŋ, â Mamac-nanezi waiŋ gie rune. 2 Tieŋne moc norao foipiehuc fârinehec mi eme qâtâcne behec eocmu, â tieŋne moc fârinehec fome gie bacneme soka biaŋ eocte soŋaŋkeocmu. 3 Ŋoŋe ine miti ŋazape manahuc biac ɋaɋackembiŋ juŋgopieŋ hâcne. 4 Eme ŋoŋe no maŋnupie noni ŋoŋe iŋuc jaha maŋŋopapemu. Waiŋ tieŋnezi jâcnehec šušuhuc mi fohuc e jahackoaŋ sawa fârinehec mi eocmu. Eme ŋoŋe iŋuc jaha no mi maŋnuhuc wemocko fârinehec eniŋmu. 5 Waiŋjâc fuŋqizecne no, tieŋ taeŋne ŋoŋe. Moc e no maŋnuhame noni e maŋkepemu, eme iŋucnezi fârine sâkohec eocmu. Ŋoŋe no tâmiric juhuc wiac eene i mi fokac. 6 Moc e no mi maŋnume e behezo, eme waiŋ tieŋne behepie ɋaŋame qâzuckerâ behepie šocko šaekac, sâc ijaha ecnezo. 7 Ŋoŋe no maŋnuhuc dâŋnane maŋkeniŋmu, eme wiac irec me irec numupie fua-ŋareocmu. 8 Ŋoŋe fârine sâkohec ehuc motec jâmbâŋfâc-nane erâ jupie Mamac-nanere mumuteŋ fuaocmu.

9 “Mamaczi no maŋjauŋ enareekac, iŋuc jaha noni ŋoŋe maŋjauŋ eŋareekopac. Eme ŋoŋe nore maŋjauŋkoa junšepieŋ. 10 Micdâŋ-nane reŋkehuc ine nore maŋjauŋko juniŋmu, no iŋuc jaha Mamac-nanere micdâŋ reŋkehuc ere maŋjauŋko juekopac. 11 Nore bubiaŋzi ŋoŋerao fotâcneme ŋoŋerezi fufusuc foocte dâŋ ši ŋaza-fârekopac. Erâ ŋoŋerao fohuc fua sawec ezejec. 12 Micdâŋ-nane kecšiŋuc ŋazakopac: Noni maŋjauŋ eŋareekopac, iŋuc jaha ŋaŋaczia maŋjauŋ eec enšepieŋ. 13 Moc e âgofâcne jaŋere riŋ rohuc juju-ticne qaisockeocmu, irec maŋjauŋ fekicne sâko muzo. 14 Gie muŋareekopac i bapie honec-ŋopape âgofâc-nane eniŋmu. 15 No dameŋ ši kiŋaŋ qaqa mocwâc mi muŋarekopac, mana-ŋarepe âgofâc-nane eŋgopieŋ. Kiŋaŋ qaqazi bomboŋ-ticnere maŋko dâŋ foekac i mi manaekac. Noni ine Mamac-naneraonec dâŋ manapo sâc mufuarâ ŋaza-fârepore honec-ŋopape âgofâc-nane eŋgopieŋ. 16 ŋoŋe no mi rowosâecnumbiŋ, noni ŋoŋe rowosâec-ŋopapo, erâ ra juhuc fârine bâfuaniŋte muŋarepo. Eme fârine bâfuapie fofonehec ezejec. Iŋuc erâ nore šâŋe bajuhuc Mamac numucnepie sâc ŋareocmu. 17 Maŋjauŋ eec enšepieŋ, micdâŋ ine hâcne ŋazakopac.

18 “Miti tâmiriczi qaisoc-ŋopapie šiŋuc munšepieŋ: `Wofuŋ e mârâcko iŋuc hâcne fuŋkerâ qaisockembiŋ. Ž 19 Miti tâmiric jaŋere guruo rašipie muzac âgo eŋarenšapiŋ. No ine jaŋere guruonec rowosâec-ŋopape eebapa-jeŋic râpeckembiŋte qaisoc-ŋopaeŋgopieŋ. 20 No dâŋ moc kecšiŋuc ŋazapo irec manasunšepieŋ: Kiŋaŋ qaqazi bomboŋ-ticnere sâc sirickerâ jujune mi fokac. Jaŋe no râsi enarembiŋko ŋoŋe râsi jaha eŋareniŋmu, jaŋe nore dâŋ mana maŋ embiŋko ŋoŋere dâŋ iŋuc jaha mana maŋ eniŋmu. 21 Sorecnuwec e mi šâŋitaeŋgopieŋte nore erâ iŋuc hâcne eŋareniŋmu. 22 No jaŋerao mi waharâ fuŋne mi jazape muzac kiŋ tâmiric junšapiŋ. ši ine kiŋjeŋic wemocko murârâŋneniŋmu. 23 Moc e no qaisocnuekaczi Mamac-nane iŋuc jaha qaisockeekac. 24 No ŋondeŋ-ŋeŋicko mâsi sâko, ŋiczi mi bapane, i mi bazapo muzac kiŋ tâmiric junšapiŋ. ši ine bape hone-fâre-bipiehuc no qaisocnuhuc Mamac-nane iŋuc jaha qaisockeeŋgopieŋ. 25 Iŋuc epie mitio dâŋ moc kecšiŋuc fokac, i sanaŋkekac hâcne: `Jaŋe oma jâmbâŋ qaisocnumbiŋ. Ž 26 Neŋgoc ŋesiŋ, dâŋ fâri qizecnere Mâro hâcne, Mamactao jukac, e sorepe Mamactaonec waharâ fuŋne-nane mutaniŋkeocmu. 27 Erâ ŋoŋe gie fuŋkepoonec nohec juwarembiŋte iŋuc jaha fuŋne-nane mutaniŋkenšepieŋ.