୨
ତେସଲନିକି ଗଡ଼ାଲୋଙନ୍ ପାଓଲନ୍ ଆ କାବ୍ବାଡ଼ା
୧ ଏ ବୋଞାଙ୍ଜି, ତନାନ୍ଜି ଆମ୍ୱେଞ୍ଜି ଜନା, ଇନ୍ଲେଞ୍ଜି ଅମଙ୍ବେନ୍ ଏରିୟ୍ଲାଞନ୍ ତିଆତେ ଅଃମ୍ମୋସ୍ସାଲୋ; ୨ ✡ ୨:୨ ଅନାପ୍ପାୟ୍ ୧୬:୧୯-୨୪; ଅନାପ୍ପାୟ୍ ୧୭:୧-୯ଇନ୍ଲେନ୍ ଅମଙ୍ବେନ୍ ଏରିୟ୍ଲାଞନ୍ ଆମ୍ମୁଙ୍ ପିଲିପି ଗଡ଼ାଲୋଙନ୍ ଏଙ୍ଗାଲେ କନଞନ୍, ଗନବ୍ରଜନ୍ ଏଞାଙ୍ଲାୟ୍ ତିଆତେ ଆମ୍ୱେଞ୍ଜି ଜନା, ତି ସିଲଡ୍ଲ୍ଲନ୍ ପରାନ୍ଡଣ୍ଡନ୍ ବାତ୍ତେ ଅମଙ୍ବେନ୍ ଇସ୍ୱରନ୍ ଆ ମନଙ୍ବର୍ ଅନପ୍ପୁଙ୍ବରନ୍ ଆସନ୍ ଇସ୍ୱରଲେନ୍ ଆମଙ୍ ସିଲଡ୍ ଅନୋମଙନ୍ ଏଞାଙ୍ଲାୟ୍ । ୩ ଞନଙ୍ଞଙ୍ଲେନ୍ ପାତ୍ୟା ତଡ୍ କି ଏର୍ମଡ଼ିର୍ ତଡ୍, ଆରି ଆନ୍ନିଙ୍ଆଡଙ୍ ନିୟ୍ ଇନ୍ଲେନ୍ ଏଃକ୍କଣ୍ଡାୟ୍ଲବେନ୍ । ୪ ବନ୍ଡ ମନଙ୍ବରନ୍ ଅନପ୍ପୁଙ୍ବରନ୍ ଆ ବିଡ଼ାର୍ ଅସିଲୋଙ୍ଲେନ୍ ସୋରୋପ୍ପାୟ୍ଲଲେଞ୍ଜି, ତିଆସନ୍ ଅମଙ୍ଲେନ୍ ସିଲଡ୍ ଇସ୍ୱରନ୍ ଏଙ୍ଗାଲେ ଲଡୟ୍ତେ, ଏତ୍ତେଲେ ଇନ୍ଲେଞ୍ଜି ମନଙ୍ବରନ୍ ଏଅପ୍ପୁଙ୍ବର୍ତାୟ୍; ମନ୍ରାଞ୍ଜିଆଡଙ୍ ଅନବ୍ମଅଁଞନ୍ ଆସନ୍ ଇନ୍ଲେନ୍ ତିଆତେ ଏଃଲ୍ଲୁମାୟ୍, ଆର୍ପାୟ୍ ଅଙ୍ଗା ଇସ୍ୱର ଉଗର୍ଲେଞ୍ଜି ମାଲ୍ମାଲ୍ଲଙ୍ତନ୍, ଆନିନ୍ଆଡଙ୍ ଅନବ୍ମଅଁଞନ୍ ଆସନ୍ ଇନ୍ଲେନ୍ ତିଆତେ ଏଲୁମ୍ତାୟ୍ । ୫ ଆମ୍ୱେଞ୍ଜି ଜନା, ଇନ୍ଲେନ୍ ଆଙ୍ଗିୟ୍ ତମୟ୍ବରନ୍ ଏଃବ୍ବର୍ରନାୟ୍ କି ଅନବ୍ରଜନ୍ ଅନବ୍ସସନ୍ ଆସନ୍ ଏଃକ୍କଣ୍ଡାୟ୍ବେନ୍, କେନ୍ଆତେ ଆସନ୍ ଇସ୍ୱରନ୍ ସାକିନ୍ ଡକୋ । ୬ ଅମଙ୍ବେନ୍ ସିଲଡ୍ କି ଆନ୍ନିଙ୍ ଆମଙ୍ ସିଲଡ୍ ଅଡ଼େ ଅନ୍ନିଙ୍ ଆ ମନ୍ରା ଆମଙ୍ ସିଲଡ୍ ଅନବ୍ସେଙ୍କେନେନ୍ ଏଃସାୟ୍ଲାୟ୍ । ୭ ବନ୍ଡ କ୍ରିସ୍ଟନ୍ ଆନାପ୍ପାୟ୍ମର୍ ଅନ୍ତମ୍ ଅମଙ୍ବେନ୍ ସିଲଡ୍ ଇନ୍ଲେନ୍ ଏବର୍ତନାୟ୍, ଅୟୋଙନ୍ ଏଙ୍ଗାଲେ ଆ ପସିଜନ୍ଆଡଙ୍ ସାକ୍କେତେ ଉକ୍କେତେ, ଏତ୍ତେଲେ ଇନ୍ଲେନ୍ ଅମଙ୍ଲୋଙ୍ବେନ୍ ଲବ୍ଗଃଡମ୍ଲନ୍, ୮ ଆମ୍ୱେଞ୍ଜି ଆସନ୍ ଅମଙ୍ଲେନ୍ ଡନୁଙ୍ୟମନ୍ ଡକୋନ୍ ଆସନ୍, ଇସ୍ୱରନ୍ ଆ ମନଙ୍ବର୍ ତୁମ୍ ତଡ୍, ଆର୍ପାୟ୍ ପରାନ୍ନାଲେନ୍ ନିୟ୍ ତନିୟନ୍ ଆସନ୍ ଇନ୍ଲେନ୍ ଏତିୟ୍ଡମ୍ଲନାୟ୍, ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ଡନୁଙ୍ୟମ୍ମର୍ଲେଞ୍ଜି ଡେଲବେନ୍ । ୯ ଏ ବୋଞାଙ୍ଜି, ତନାନ୍ଜି, ଲନୁମ୍ଲେନ୍ ଡ ଲଗିନ୍ କାବ୍ବାଡ଼ାଲେନ୍ ମନ୍ନଲୋଙ୍ବେନ୍ ଡକୋ; ଏଙ୍ଗାଲ୍ଡେନ୍ ଅମଙ୍ଲୋଙ୍ବେନ୍ ସିଲଡ୍ ଆନ୍ନିଙ୍ ଆସନ୍ ଇନ୍ଲେନ୍ ଅବୟ୍ ବିଡ଼ାରନ୍ ଅନ୍ତମ୍ ଡେଡଙ୍ଲେନ୍ ତଡ୍, ତିଆସନ୍ ତଗଲ୍ ତମ୍ବା ଇସ୍ୱରନ୍ ଆ ମନଙ୍ବର୍ ଅମଙ୍ବେନ୍ ଏଅପ୍ପୁଙ୍ବର୍ଲାୟ୍ ।
୧୦ ଆମ୍ୱେଞ୍ଜି ଡର୍ନେମର୍ଜି, ଇନ୍ଲେଞ୍ଜି ଏଙ୍ଗାଲେ ମଡ଼ିରନ୍, ଡରମ୍ମନ୍ ଡ ଏର୍ନିଣ୍ଡୟ୍ଡାଗୋ ଅମଙ୍ବେନ୍ ଏଞଣ୍ଡ୍ରମ୍ଲନାୟ୍ ତିଆତେ ଆସନ୍ ଆମ୍ୱେଞ୍ଜି ସାକିନ୍ ଡକୋ, ଆରି ଇସ୍ୱରନ୍ ନିୟ୍ ସାକିନ୍ ଡକୋ । ୧୧ ଆମ୍ୱେଞ୍ଜି ଜନା, ଆପେୟନ୍ ଏଙ୍ଗାଲେ ଆଅନଞ୍ଜିଆଡଙ୍ ଞଙ୍ଞଙ୍ତଜି, ତିଅନ୍ତମ୍ ଇନ୍ଲେନ୍ ଅଡ଼୍କୋ ମନ୍ରାନ୍ଆଡଙ୍ ଏଞଙ୍ଞଙ୍ଲବେନ୍, ୧୨ ଆରି ଆମ୍ୱେଞ୍ଜି ଏଙ୍ଗାଲ୍ଡେନ୍ ଅନୋଡ୍ଡେମର୍ ଇସ୍ୱରବେନ୍ ଆ ଗନିୟ୍ଗିୟ୍ଲୋଙ୍ ଅଙ୍ଗାତେ ମନଙ୍ ତିଅନ୍ତମ୍ ଏଞଣ୍ଡ୍ରମ୍ତନେ, ସିଲଡ୍ଲ୍ଲନ୍ ଆ ରାଜ୍ୟଲୋଙନ୍ ଡ ଆ ଗନୁଗୁ ପନେମେଙ୍ଲୋଙନ୍ ଡରକୋନେନ୍ ଏଞାଙ୍ତେ, ତିଆସନ୍ ଇନ୍ଲେନ୍ ଆମ୍ୱେଞ୍ଜିଆଡଙ୍ ଏଞଙ୍ଞଙ୍ଲବେନ୍, ଏବ୍ନୁୟୁବ୍ଲବେନ୍ ।
୧୩ ଆରି, କେନ୍ ଆସନ୍ ନିୟ୍ ଡିତାନ୍ ଇନ୍ଲେନ୍ ଇସ୍ୱରନ୍ଆଡଙ୍ ଏସେଙ୍କେତାୟ୍, ଅଙ୍ଗା ଆଡିଡ୍ ଇନ୍ଲେନ୍ ଇସ୍ୱରନ୍ ଆ ମନଙ୍ବର୍ ଏଅପ୍ପୁଙ୍ବର୍ଲାୟ୍ ଆରି ଆମ୍ୱେଞ୍ଜି ତିଆତେ ଏଜାଏନ୍, ତିଆଡିଡ୍ ତିଆତେ ମନ୍ରାନ୍ ଆ ବର୍ନେ ଗାମ୍ଲେ ଏଃଜ୍ଜାଲୋ, ଆର୍ପାୟ୍ ଇସ୍ୱରନ୍ ଆ ବର୍ନେ ଗାମ୍ଲେ ଏଜାଏନ୍, ଆରି ଆଜାଡ଼ିଡମ୍ ତିଆତେ ଇସ୍ୱରନ୍ ଆ ବର୍ନେ ମା, ଆମ୍ୱେଞ୍ଜି ଡର୍ନେମର୍ଜି ତିଆସନ୍ ଉଗର୍ଲୋଙ୍ବେନ୍ ତିଆତେ ଲନୁମ୍ତନେ । ୧୪ ✡ ୨:୧୪ ଅନାପ୍ପାୟ୍ ୧୭:୫ଇନିଆସନ୍ଗାମେଣ୍ଡେନ୍ ଏ ବୋଞାଙ୍ଜି ଆମ୍ୱେଞ୍ଜି ନିୟ୍ ଜିସୁ କ୍ରିସ୍ଟନ୍ ଆମଙ୍ ଆଡ୍ରର୍ତନେଞ୍ଜି ଜିଉଦା ଡେସାଲୋଙନ୍ ଇସ୍ୱରନ୍ ଆ ମଣ୍ଡଡ଼ିଜି ଅନ୍ତମ୍ ଡେଲବେନ୍, ଆନିଞ୍ଜି ଜିଉଦିମରଞ୍ଜି ଆମଙ୍ ସିଲଡ୍ ଏଙ୍ଗାଲେ ଡନଣ୍ଡାୟନ୍ ଞାଙେଞ୍ଜି, ଆମ୍ୱେଞ୍ଜି ନିୟ୍ ଏତ୍ତେଲେ ମନ୍ରାବେଞ୍ଜି ଆମଙ୍ ସିଲଡ୍ ଡନଣ୍ଡାୟନ୍ ଏଞାଙେନ୍ । ୧୫ ✡ ୨:୧୫ ଅନାପ୍ପାୟ୍ ୯:୨୩,୨୯; ୧୩:୪୫,୫୦; ୧୪:୨,୫,୧୯; ୧୭:୫,୧୩; ୧୮:୧୨ତି ଆ ଜିଉଦିଜି ପ୍ରବୁ ଜିସୁନ୍ଆଡଙ୍ ରବ୍ବୁଏଞ୍ଜି, ଆରି ପୁର୍ବାଃତେ ବର୍ନେମରଞ୍ଜିଆଡଙ୍ ନିୟ୍ ରବ୍ବୁଏଞ୍ଜି, ଆରି ଇନ୍ଲେଞ୍ଜିଆଡଙ୍ ଡଣ୍ଡାୟ୍ଲଙ୍ଲଞ୍ଜି; ଇସ୍ୱରନ୍ ତି ଆ ମନ୍ରାଜିଆଡଙ୍ ଅଃଲ୍ଲଡଜେଜି ଆରି ଅଡ଼୍କୋ ମନ୍ରାଞ୍ଜି ଆନିଞ୍ଜିଆଡଙ୍ ଅଃଡ୍ଡନେଏଜି । ୧୬ ଇନିଆସନ୍ଗାମେଣ୍ଡେନ୍ ଏର୍ଜିଉଦିମରଞ୍ଜି ନିୟ୍ ଅନୁରନ୍ ଞାଙେତଜି ଗାମ୍ଲେ ମନଙ୍ବରନ୍ ଅପ୍ପୁଙ୍ବର୍ରବୋ ଡେନ୍, ଆନିଞ୍ଜି ତିଆତେ ରଙ୍ତଜି; କେନ୍ ଏନ୍ନେଲେ ଆ କାବ୍ବାଡ଼ାଜି ଲୁମ୍ଲେ ଆନିଞ୍ଜି ଆ ଇର୍ସେଞ୍ଜି ଅବ୍ଗୋଗୋୟ୍ତଜି; ବନ୍ଡ ଆନିଞ୍ଜି ଆସନ୍ ବନ୍ଡ୍ରାବନ୍ ଅଡ଼ୋଲାୟ୍ନି ।
ପାଓଲନ୍ ମଣ୍ଡଡ଼ିରେଙନ୍ ଆରି ବନୁଲ୍ଲେନ୍ ସାଜେନ୍
୧୭ ବନ୍ଡ, ଏ ବୋଞାଙ୍ଜି, ତନାନ୍ଜି, ଇନ୍ଲେନ୍ ଉଗରନ୍ ବାତ୍ତେ ତଡ୍, ଆର୍ପାୟ୍ ଡଅଙନ୍ ବାତ୍ତେ ବସନ୍ନେଃ ଆସନ୍ ଅମଙ୍ବେନ୍ ସିଲଡ୍ ଏସବ୍ଙାୟ୍ଲନାୟ୍, ତିଆସନ୍ ମୁକ୍କାବେଞ୍ଜି ଗିୟ୍ଗିଜନ୍ ଏସାୟ୍ଲାୟ୍ ।* ୨:୧୭ ଗିୟ୍ଗିଜନ୍ ଆସନ୍ ମାଡ୍ଡ ତଙରାଡାଲଲେନ୍ ୧୮ ଆରି ଇନ୍ଲେଞ୍ଜି ଅମଙ୍ବେନ୍ ଅନିୟନ୍ ଏସାୟ୍ଲାୟ୍, ଞେନ୍† ୨:୧୮ ପାଓଲ ପାଓଲ, ବବେଡ଼ା, ବାଗୁବେଡ଼ା ଅନିୟନ୍ ସାୟ୍ଲାୟ୍, ବନ୍ଡ ସନୁମନ୍ ଇନ୍ଲେଞ୍ଜିଆଡଙ୍ ଡଙ୍ଲଲେନ୍ । ୧୯ ଇନିଆସନ୍ଗାମେଣ୍ଡେନ୍ ପ୍ରବୁ ଜିସୁଲେନ୍ ଆଜିର୍ତାଞନ୍ ଆଡିନ୍ନା ଆ ମୁକ୍କାଗଡନ୍ ଆମ୍ୱେଞ୍ଜି ଅମ୍ମେଲେ ଇନ୍ଲେନ୍ ଅରାସାନେଲେନ୍, ସନର୍ଡାଲେନ୍, ଓଞୋଲ୍କୁୟ୍ଲେନ୍ ଆରି ଞେନ୍ ତୁମ୍ ଆଗନାମ୍ ‡ ୨:୧୯ ଅବ୍ସୋଡ଼ାନେନ୍ଅଃଡ୍ଡେଏ ପଙ୍ ? ୨୦ ଆଜାଡ଼ିଡମ୍ ଆମ୍ୱେଞ୍ଜି ଗନୁଗୁ ପନେମେଙ୍ଲେନ୍ ଡ ସନର୍ଡାଲେନ୍ ଡେତବେନ୍ ।