SAMAWILU
TA KITABU FLANAN
Kitabu faamucogo
Nin kitabu bɛ wele ko Samawilu ta kitabu flanan; a fana sɛbɛbaga ma lɔn, i n’a fɔ Samawilu ta kitabu fɔlɔ. An b’a ye ko Samawilu ta baaraw, ani a ta kumaw le bɛ nin kitabu kɔnɔ fana. A bɛ masacɛ Dawuda ta wagati ta kow lakari. Dawuda kɔnna ka sigi masaya ra Zuda mara le ra, min ye jamana woroduguyanfan ye. O kow bɛ sɔrɔ kitabu sura 1–4. O kɔ, a sigira masaya ra Izirayɛli jamana bɛɛ lajɛnnin kunna; o kow bɛ sɔrɔ kitabu sura 5–24.
Dawuda ka kɛrɛ caman kɛ ni siya tɔw ye, janko k’a ta masaya sabati, ani ka jamana bɔsi a juguw boro.
Dawuda tun lara Ala ra kosɛbɛ; o kosɔn a ko diyara Ala ye, a ko diyara a ta jamana mɔgɔw fana ye. Nka o bɛɛ n’a ta, Dawuda ka kojugu dɔw kɛ Matigi Ala ɲa kɔrɔ; o kow ma bɛn Ala ma. Ala ta cira min ye Natan ye, o kumana Dawuda fɛ minkɛ, a lɔra a ta jurumun na, ka sɔn Ala ta ma.
Dawuda ko diyara Izirayɛlimɔgɔw ye, o kosɔn o tun b’a fɛ a ta den dɔ le ye kɛ o ta masacɛ ye a yɛrɛ kɔ fɛ.
Ala tun ka layiri ta Dawuda ye, k’a fɔ a ye ko mɔgɔ dɔ bɛna sɔrɔ Dawuda ta gba ra wagati bɛɛ, min bɛna sigi masaya ra (sura 7).
Kitabu kɔnɔkow
Dawuda sigira masaya ra Zuda mara kunna (1–4)
Dawuda sigira masaya ra jamana bɛɛ lajɛnnin kunna (5–6)
Ala ka baraka don Dawuda ta masaya ra (7–10)
Dawuda ni Huri ta muso Baseba ta ko (11–12)
Gbɛlɛyako minw kɛra Dawuda ta so kɔnɔ (13–20)
Dawuda ta wagati labanw (21–24)
1
Sawuli ni Yonatan ta saya ko fɔra Dawuda ye
(Kibaroyaw fɔlɔ 10.1-14)
1 Sawuli sawagati k’a sɔrɔ Dawuda tun bɔra Amalɛkikaw kɛrɛyɔrɔ ra, ka sekɔ ka na Sikilagi dugu kɔnɔ. A tun ka tere fla kɛ Sikilagi ka ban. 2 A tere sabanan, cɛ dɔ barara ka na; a tun bɔra Sawuli ta kɛrɛkɛjama sigiyɔrɔ ra. A ta faniw tun farannin bɛ, buguri bɛ a kun na. A sera Dawuda kɔrɔ minkɛ, a k’a yɛrɛ ben dugu ma k’a kinbiri gban Dawuda kɔrɔ. 3 Dawuda k’a ɲininka ko: «Ele bɔra min le?» A ko: «Ne borira ka bɔ Izirayɛli ta kɛrɛkɛjama sigiyɔrɔ le ra.» 4 Dawuda ko: «O tuma a kɛra cogo di? Ko min kɛra, o lakari ne ye kɛ!» Cɛ ko: «Izirayɛlimɔgɔw borira o kɛrɛkɛɲɔgɔnw ɲa. O caman fagara yɛrɛ le. Hali Sawuli ni a dencɛ Yonatan sara.» 5 Dawuda ko kanbelen ma ko: «Ele kɛra cogo di k’a lɔn ko Sawuli ni a dencɛ Yonatan sara?» 6 Kanbelen ko: «O wagati y’a sɔrɔ ne tun bɛ Giliboha kuru kan. Sawuli tun tintinnin bɛ a ta taman kan; nka sowotorow ni sotigiw nana tugu a kɔ k’a degu kosɛbɛ. 7 A k’a ɲa munu ka ne ye minkɛ, a ka ne wele. Ne ko: ‹Naamu!› 8 A ko ne ma ko: ‹Ele ye jɔn le ye?› Ne ko: ‹Ne ye Amalɛkika le ye.› 9 A ko ne ma tuun ko: ‹Gbara ne ra, i ye na ne faga, sabu ne bɛ nin na, nka ɲanamini bɛ ne ra.› 10 Ne gbarara a ra k’a faga, sabu ne tun k’a lɔn ko a tun tɛna kisi kɛrɛ ra tuun. Masafugula min tun bɛ a kun na, ani bororanɛgɛ min tun bɛ a boro ra, ne ka o bɔ ka na ni o ye, ka na o di ne matigicɛ ma.»
11 Dawuda k’a ta faniw faran; a ta mɔgɔ minw tun bɛ ni a ye, olugu fana ka o ta faniw faran. 12 O jusukun tɔɔrɔra, o kasira; o ka sun don fɔ ka taga wula se, Sawuli ni a dencɛ Yonatan kosɔn, ani Matigi Ala ta kɛrɛkɛjama kosɔn, ani Izirayɛlimɔgɔ minw bɛɛ tun fagara o kɛrɛ ra.
13 O kɔ, Dawuda ka o kanbelen ɲininka tuun ko: «Ele bɔra min le?» A ko: «Amalɛkika minw siginin bɛ yan lonanya ra, ne ye o dɔ ta den le ye.» 14 Dawuda ko a ma ko: «A kɛra cogo di ko Matigi Ala ka mɔgɔ min ɲanawoloma k’a sigi masaya ra, ele ma siran ka i boro se o ma k’a faga?» 15 Dawuda k’a nɔfɛkanbelen dɔ wele k’a fɔ o ye ko: «Gbara, i ye nin cɛ faga!» Kanbelen benna Amalɛkikacɛ kan, k’a faga. 16 Dawuda tun k’a fɔ a ye ko: «I fagari kunko ye ben i yɛrɛ kan; i yɛrɛ da le ka i jaraki, sabu i ko, ko Matigi Ala ka mɔgɔ min ɲanawoloma k’a sigi masaya ra, ko ele ka o faga!»
Dawuda ka sangadɔnkiri la Sawuli ni Yonatan kosɔn
17 Dawuda ka nin sangadɔnkiri la Sawuli ni Yonatan kosɔn. 18 O kɔ, Dawuda ko o ye Zuda mara mɔgɔw karan o dɔnkiri ra; o dɔnkiri le bɛ wele ko «kalan dɔnkiri.» A dɔnkiri sɛbɛnin bɛ Yasari ta kitabu kɔnɔ, ko:
19 E, Izirayɛli, aw ta cɛfariw suw lanin bɛ kongoriw kan!
Mun le nana a to aw ta cɛ jagbɛlɛnw benna ka sa?
20 Mɔgɔ kana nin ko fɔ Gati dugu kɔnɔ dɛ!
Mɔgɔ kana nin kibaroya fɔ Asikalɔn dugu siraw fɛ!
Ni o tɛ Filisika sunguruw bɛna na ɲagari;
nin kɛnɛsigibariw ta sungurudenw bɛna na ninsɔndiya.
21 E, Giliboha kuruw, gɔmiji kana bɔn aw kan tuun,
sanji fana kana ben aw kan tuun fiyewu!
Mɔgɔ kana foro sɛnɛ aw kan tuun, min siman bɛ ɲa!
Sabu cɛfariw ta nɛgɛbɛnnanw lanɔgɔra aw le kan.
Sawuli ta nɛgɛbɛnnan kɔni, o tɛna jɔsi ni turu ye tuun!
22 Yonatan ta kalan tun tɛ kɔsegi fiyewu,
Sawuli ta kɛrɛkɛmuru tun tɛ kɔsegi ka na gbansan,
ni o ma a juguw faga fɔ ka o jori woyo,
ka cɛfariw sɔgɔ fɔ ka o baraka ban.
23 Sawuli ni Yonatan, kanuɲɔgɔnmanw tun lo o si bɛɛ ra;
hali saya ra, o ma faran ka bɔ ɲɔgɔn na!
O sen tun ka teri ka tɛmɛ bɔn kan,
o baraka tun ka bon ka tɛmɛ hali jara ta kan.
24 E! Izirayɛli sungurudenw, aw ye kasi Sawuli kosɔn dɛ!
Ale min tun bɛ aw fiyɛrɛbɔ ni fani dawulamanw ye,
ka aw ta faniw masiri ni sanin ye.
25 Mun le k’a to cɛfariw benna ka sa, ka o to kɛrɛ ra sa?
Mun le k’a to biɲɛ ka Yonatan sɔgɔ aw ta kongoriw kan?
26 E, ne balemacɛ Yonatan, ne deguninba lo ele kosɔn;
i ko tun ka gbɛlɛn ne ma dɛ!
I ta kanuya tun ka bon ne fɛ
ka tɛmɛ hali musow ta kanuya kan.
27 Mun le k’a to cɛ jagbɛlɛnw bɛɛ benna sa?
Mun le k’a to kɛrɛkɛminanw bɛɛ halakira sa?