16
Izirayɛlimɔgɔw ka Ala tando
1 Ayiwa, Izirayɛlimɔgɔw tagara Ala ta jɛnɲɔgɔnya kɛsu* ta; Dawuda tun ka fanibon min lalaga ka o kɛ a blayɔrɔ ye, o tagara a bla yi. O ka saraka jɛnitaw* ani ninsɔndiya sarakaw* bɔ Matigi Ala ye.
2 Dawuda ka o saraka jɛnitaw, ani o ninsɔndiya sarakaw bɔ ka ban tuma min na, a ka dugawu kɛ jama ye Matigi Ala tɔgɔ ra. 3 O kɔ, a ka burukun kelen, ani tamaroburu kelen, ani rɛzɛnburu kelen di Izirayɛlimɔgɔw bɛɛ kelen kelen ma, cɛ fara muso kan.
Levi ta mɔgɔw ka Ala tando
(Zaburuw 105.1-15; 96; 106.1,47-48)
4 Dawuda ka Levi* ta mɔgɔ dɔw ɲanawoloma, ka olugu bla Matigi Ala ta jɛnɲɔgɔnya kɛsu baara ra, ko olugu ye to ka Matigi Ala, Izirayɛli ta Ala daari, ka baraka la a ye, ani k’a tando. 5 Asafu le tun ye olugu ta ɲamɔgɔ ye, ka Jakariya gban ale ra, ani Yeyɛli, ani Simiramɔti, ani Yehiyɛli, ani Matitiya, ani Eliyabu, ani Benaya, ani Obɛdi Edɔmu, ani Yeyɛli. Olugu le tun ye korafɔbagaw, ani gɔnifɔbagaw ye. Asafu tun bɛ siranɛgɛ tɛgɛrɛw le fɔ.
6 Sarakalasebaga* minw tun ye Benaya ni Yahaziyɛli ye, olugu tun bɛ buruw le fiyɛ wagati bɛɛ Ala ta jɛnɲɔgɔnya kɛsu ɲa fɛ. 7 O lon le kɛra a siɲaga fɔlɔ ye, Dawuda ka nin barakalaridɔnkiri yira, ko Asafu ni a balemaw ye a la, ka Matigi Ala bonya:
8 E, aw ye Matigi Ala fo k’a waleɲumanlɔn, aw y’a tɔgɔ wele,
aw ye a ta kabakobaw ko fɔ siya tɔw ye.
9 Aw ye dɔnkiri la a ye, aw ye tandori dɔnkiriw la a ye;
aw ye a ta koɲumanbaw bɛɛ ko fɔ mɔgɔw ye.
10 Aw ye ɲagari a tɔgɔ saninman kosɔn;
minw bɛ Matigi Ala ta jɛnɲɔgɔnya ɲini, olugu jusu ye ninsɔndiya!
11 Aw ye Matigi Ala ta jɛnɲɔgɔnya ɲini, k’a ta baraka ɲini;
aw ye gbara a ra wagati bɛɛ!
12 A ka koɲumanba minw kɛ, aw ye aw hakiri to o ra,
a ka kabako minw kɛ, ani a ka ko minw latigɛ, aw ye aw hakiri to o ra,
13 aw minw ye a ta jɔn Izirayɛli ta durujaw ye,
aw minw ye a ta mɔgɔ ɲanawolomaninw ye, Yakuba ta denw!
14 Ale le ye Matigi Ala ye, an ta Ala.
A ta fangatigiya bɛ dugukolo yɔrɔ bɛɛ kan.
15 Aw ye aw hakiri to a ta jɛnɲɔgɔnya ra wagati bɛɛ;
a ka o kuma minw fɔ duruja caman ye,
16 a ka jɛnɲɔgɔnya min don ni Iburahima ye,
ani a karira min na ni Isiyaka ye,
17 a kɔsegira o kuma le kan, ka o kɛ sariya ye k’a di Yakuba ma,
ka o kɛ jɛnɲɔgɔnya wuribari ye ka o di Izirayɛli ma.
18 A ko o ma ko: «Ne bɛna Kanaana jamana di aw le ma,
ka o kɛ aw ninyɔrɔ ye, ka o kɛ aw ta ye.»
19 O wagati ra, o tun ye mɔgɔ dama dama dɔrɔn ye,
o tun man ca, o tun bɛ lonanya ra o dugukolo kan,
20 o tun bɛ yaala siyaw ni ɲɔgɔn cɛ,
ka bɔ jamana dɔ ra ka taga dɔ ra.
21 Ala ma sɔn mɔgɔ si ye o minako juguya,
a ka masa dɔw dɔgɔya o kosɔn.
22 A ko: «Aw kana maga ne ta mɔgɔ ɲanawolomaninw na dɛ!
Aw kana kojugu si kɛ ne ta ciraw ra!»
23 Dunuɲamɔgɔw bɛɛ ye dɔnkiri la ka Matigi Ala tando!
Aw ye a fɔ lon o lon, ko ale le ye an kisibaga ye.
24 Aw ye a ta bonya lakari siyaw bɛɛ ye,
aw ye a ta kobaw lakari mɔgɔw bɛɛ ye.
25 Sabu Matigi Ala ka bon, a ka kan ni tandori ye kosɛbɛ;
an ka kan ka siran a ɲa ka tɛmɛ batofɛn tɔw bɛɛ kan.
26 Siya tɔw ta alaw ye batofɛn gbansanw le ye,
nka Matigi Ala le ka sankolo dan.
27 Bonya ni nɔɔrɔ ye ale ta le ye,
sebagaya ni hɛra bɛ sɔrɔ a ta so kɔnɔ.
28 Dunuɲa siyaw bɛɛ, aw ye bonya ni fanga di Matigi Ala ma,
aw y’a di Matigi Ala ma.
29 Aw ye bonya la Matigi Ala tɔgɔ kan,
aw ye na ni sarakaw ye Matigi Ala ɲa kɔrɔ,
aw ye saninya ka na aw kinbiri gban Matigi Ala ɲa kɔrɔ.
30 Dunuɲamɔgɔw bɛɛ lajɛnnin ye siran Matigi Ala ɲa fɔ ka yɛrɛyɛrɛ;
ɔnhɔn, dugukolo b’a nɔ ra, a tɛ jɛngɛ ka bɔ a nɔ ra ka ye.
31 Sankolokɔnɔfɛnw ye ɲagari!
Dugukolokanfɛnw ye ninsɔndiya,
k’a fɔ siyaw bɛɛ ye ko: «Matigi Ala le ye Masa ye!»
32 Kɔgɔji ni a kɔnɔfɛnw bɛɛ ye mankanba bɔ!
Kongokɔnɔyɔrɔw, ani kongokɔnɔfɛnw bɛɛ ye ɲagarikanba bɔ!
33 Kongoyiriw bɛɛ ye ɲagari, ka dɔnkiri la Matigi Ala ɲa kɔrɔ,
sabu a bɛ nana ka na dunuɲamɔgɔw ta kiti tigɛ!
34 Aw ye Matigi Ala fo k’a waleɲumanlɔn, sabu a ka ɲi,
a ta ɲumanya tɛ ban ka ye.
35 Aw y’a fɔ fana ko: «E, an kisibaga Ala, an kisi!
An lajɛn ka bɔ siyaw cɛ ra, ka an bɔsi
janko an ye i fo ka i waleɲumanlɔn i tɔgɔ saninman kosɔn,
ka an ta bonya kun kɛ ele tandori ye.»
36 Matigi Ala, Izirayɛli ta Ala, baraka,
wagati bɛɛ, ani tuma bɛɛ!
O tuma jama bɛɛ lajɛnnin k’a fɔ ko: «Amina!» O ka Matigi Ala tando.
37 O ra Dawuda ka Asafu ni a balemaw to Matigi Ala ta jɛnɲɔgɔnya kɛsu ɲa fɛ, ko o ye to ka o baara kɛ jɛnɲɔgɔnya kɛsu ɲa fɛ wagati bɛɛ; lon o lon baara minw tun ka kan ka kɛ, o tun bɛ o kɛ. 38 A ka Obɛdi Edɔmu ni a balemacɛ biwɔɔrɔ ni seegi fara olugu kan; nka Obɛdi Edɔmu min tun ye Yedutun dencɛ ye, ale ni Hosa, olugu tun ye dakɔrɔsibagaw le ye.
39 O kɔ, Matigi Ala ta fanibon min tun bɛ Gabahɔn kongori kunna, Dawuda ka sarakalasebaga* Sadɔki ni a balema sarakalasebaga tɔw bla ka taga o yɔrɔ ra, 40 janko o ye to ka saraka jɛnitaw bɔ Matigi Ala ye, sarakajɛnifɛn* kan wagati bɛɛ, sɔgɔma ni wula fɛ; min bɛɛ sɛbɛra Matigi Ala ta sariya ra, a ka o sariya min di Izirayɛlimɔgɔw ma, o tun b’a kɛ ka kaɲa ni o le ye. 41 Heman ni Yedutun tun bɛ ni o mɔgɔw ye, ani mɔgɔ tɔ minw tɔgɔ fɔra, ko o ye to ka baraka la Matigi Ala ye, sabu a ta ɲumanya tɛ ban ka ye. 42 Heman ni Yedutun, olugu tun bɛ buruw fiyɛ, ka siranɛgɛ tɛgɛrɛw fɔ, ani fɔrifɛn tɔw, ka dɔnkiriw lamina ka Ala bonya.
43 Ayiwa, o kɔ, mɔgɔw tagara o ta so; Dawuda fana tagara a ta so, ka taga dugawu kɛ a ta somɔgɔw ye.