9 Wayah itu, Nabi Isa bakisah pulang ka urang urang nang maanggap dirinya paling saleh wan katuju marandahakan urang lain. 10 “Ada satu kisah,” ujar Nabi Isa, “Dua ikung lalakian tulak baimbai ka Bait Allah handak badoa. Saikung pamimpin agama, nang saikungnya tukang tagih pajak nang rancak mambunguli urang.* 18:10 Pamimpin agama ini matan golongan agama nang disambat 'Urang Parisi'. 11 Nang pamimpin agama badiri manyaurangan. ‘Ya Allah, aku basukur, aku kada kaya urang lain, nang jahat, manipu atawa bajinah wan aku kada kaya tukang tagih pajak tu’ ujarnya mamuji dirinya saurang. 12 ‘Aku bapuasa saminggu dua kali. Aku basadakah sapuluh parsen matan samunyaan pakulihanku.’† 18:12 Teks asli: 'saparsapuluh'. 13 Tapi tukang tagih pajak tu badiri jauh, kada wani manangadah ka Nang Di Atas. ‘Ya Allah, marasilah ulun, nang badusa ini’ ujarnya sambil mamusut dada.” 14 “Tahulah ikam?” ujar Nabi Isa batakun. “Tukang tagih pajak tu nang diampuni wan dihargai Allah, lain pamimpin agama tadi! Sualnya urang nang sumbung cagar dibari supan. Tapi urang nang marandahakan diri, inya cagar dihargai Allah.”

15 Wayah itu, ada babarapa urang nang mambawa kakanakan ka Nabi Isa supaya kawa dijapai wan dibarkahi ulih Sidin. “Ui, jangan mahauri Guru!” ujar bubuhan pangikut Sidin manyariki. 16 Biar nang kaya itu, Nabi Isa manyuruh kakanakan tadi baparak. “Biarakan ja kakanakan tu datangan ka Aku” ujar Sidin wan bubuhan pangikut Sidin. “Jangan ditangati. Sualnya Allah katuju maharagu wan bakuasa atas urang nang randah hati wan baiman ka Inya nang kaya kakanakan ini parcaya ka kuitannya. 17 Sabujurannya, aku bapadah ka bubuhan ikam: Nang hakun mandangar wan maasi Pirman Allah lawan hati nang tulus nang kaya kakanakan ini, inya cagaran masuk karajaan Allah.”

28 “Anu Guru ai” ujar Petrus wan Nabi Isa, “Kami ni sudah maninggalakan samunyaan lantaran maumpati Pian!” 29 “Parcaya ja!” ujar Nabi Isa, “Urang nang maanggap karajaan Allah labih panting pada harta wan kaluarganya, 30 inya cagaran dibalas balipat-lipat ulih Allah di dunia ini wan kaina inya cagaran baulihi hidup nang salawasan di surga.”

31 Lalu Nabi Isa mangiau kaduabalas pangikut Sidin. “Dangarakan lah!” ujar Nabi Isa “Wayah jaman bahari bubuhan nabi manulis manganai paristiwa paristiwa nang cagaran tajadi lawan Aku, nang datang matan surga. Samunyaan nang ini cagaran tajadi di Yarusalem. Satumat lagi, kita gin handak tulakan ka Yarusalem. Imbah itu, paristiwa paristiwa nang ditulis bubuhan nabi bahari tadi cagaran tajadi wan Aku. 32 Paristiwa paristiwa nang ditulis bubuhan nabi bahari tadi babunyi kaya ini: Aku cagaran ditangkap wan disarahakan ka urang Roma gasan diadili. Aku cagaran dihuhuluti, dibari supan, lawan diludahi. Aku cagaran dicambuki wan dimatiꞌi urang. 33 Tapi talu hari imbah Aku dimatiꞌi, Aku cagaran hidup pulang.” 34 Tapi bubuhan pangikut Sidin tanganga. Bubuhannya kada paham napa napa manganai kamatian Sidin lantaran arti pandiran Sidin tadi tasambunyi. Bubuhannya masih kada parcaya amun Nabi Isa tu kawa disiksa, dimatiꞌi wan imbah itu hidup pulang.