1 Wayah itu, Nabi Isa lagi badoa di satu wadah. Imbah tuntung badoa, saikung pangikut Sidin mamaraki Sidin. “Oo, Junjungan, lajari pang kami cara badoa nang kaya Nabi Yahya malajari bubuhan pangikut sidin” ujar pangikut Nabi Isa tadi. 2 Lalu Nabi Isa baucap, “Wayah bubuhan ikam badoa, sambat ja: Ya Allah, Abah kami nang di atas, kami maakui amun Pian tu Nang Maha Suci. Bakuasa lah atas kami wan samunyaan urang. 3 Bariꞌi lah kami saban hari makanan nang sacukupnya. 4 Ampunilah dusa dusa kami nang kaya kami jua maampuni urang. Jangan lah biarakan kami kalah wayah digudai Iblis.” 5 Lalu Nabi Isa bakisah manganai cara badoa. “Jaka ikam landung malam baucap ka kawal ikam di subalah rumah, ‘Wal, inta baras pang, 6 lantaran kawalku nang datang matan jauh. Inya handak bamalam di wadahku. Tapi kami kada baisian napa-napa gasan tamu kami.’ 7 Kaina kawal ikam tu cagaran manyahuti, ‘Mauk banar ikam ni! Malam sudah landung banar! Lawangnya sudah bakancingan, kakanakan gin sudah guringan. Wayah ini aku ni kada kawa mambariꞌi napa-napa gasan ikam!’ 8 Tapi kupadahilah bubuhan ikam, biar si ampun rumah pamulaannya kada hakun mambariꞌi napa napa gasan ikam, kaputingannya, inya cagaran mambariakan jua samunyaan nang ikam inta. Sualnya ikam tadi cangkal mainta tarus, kada sing ampihan. Nang kaya itu jua saharusnya amun bubuhan ikam badoa ka Allah. 9 Jadi lantaran kisah tadi, inta ja ka Allah, ikam cagaran dibariꞌi. Cari ja, ikam cagaran baulihi. Kiau ja tarus, maka lawang cagaran dibukaakan. 10 Sualnya samunyaan nang mainta ka Allah, cagaran baulihi. Wan samunyaan nang mancariꞌi, cagaran mandapat. Gasan samunyaan nang mangiau tarus, lawang cagaran dibukaakan. 11 Kadada pang abah nang mambariꞌi ular gasan anaknya amun anaknya mainta iwak! 12 Kadada jua abah nang mambariꞌi kalajengking gasan anaknya amun anaknya mainta intalu! 13 Bubuhan ikam nang badusa gin tahu mambariꞌi nang baik gasan kakanakan ikam. Maginnya ai Abah Nang Di Atas. Musti Inya labih tahu. Ruh-Nya gin cagar dibariakan-Nya gasan urang nang maintanya.”* 11:13 Abah Nang Di Atas di sini baarti 'Allah'.