1 Bini Abram, nang bangaran Sarai tu, kada sing anakan jua. Tagal, inya baisi saikung budak babinian urang Mesir nang bangaran Hajar.

2 “Pian tahu ai, kalo? Allah kada mambulihakan ulun baranak. Lantaran itu pang, kawini ja budak ulun tu. Kalo ai ulun kawa baulihi anak matan inya” ujar Sarai baucap lawan Abram.

Abram akur haja lawan kahandak bininya tu. 3 Lalu disarahakan Sarai budaknya tu lawan lakinya gasan jadi madunya. Wayah itu, sudah sapuluh tahun Abram bagana di banua Kanaꞌan. 4 Abram guring bakumpul lawan Hajar. Lalu batianan ai Hajar. Tagal imbah Hajar tahu amun inya tu batianan, inya jadi wani lawan majikannya, Sarai.

5 “Imbah batianan, inya mahina ulun. Bujur ja ulun saurang nang manyarahakan inya ka Pian. Tapi wayahini inya wani lawan ulun, itu pang kasalahan Pian. Biar haja Allah nang mahakimi siapa nang bujur antara ulun wan Pian” ujar Sarai maniwas lakinya.

6 “Inya tu budak ikam, kalo? Diapa-i ja inya sakahandak ikam napa nang ikam anggap baik” ujar Abram manyahut.

Lalu bakajam ai Sarai lawan Hajar, sampai inya tajun maninggalakan majikannya.

7 Lalu malaikat ALLAH manamuinya parak sumber banyu di padang pasir, yaitu di jalan nang baampah ka Syur.* 16:7 Syur: Wadah nang ini parak tambitan nagara Mesir.

8 “Ui Hajar, budak Sarai, ikam matan mana wan handak ka mana?” ujar malaikat tadi.

“Ulun tajun maninggalakan Sarai, majikan ulun” ujar Hajar manyahut.

9 “Babulik ja ka majikan ikam. Biar ja inya balaku kajam lawan ikam, turuti ja napa nang kahandak inya. 10 Aku pacang manjadiakan juriat ikam banyak banar, sampai kada kawa direkeni lantaran saling banyakan” ujar malaikat Allah tadi. 11  12  13  14  15 Hajar manuruti suruhan malaikat wan babulik ka Sarai, lalu inya maranakakan saikung anak lalakian gasan Abram. Anak tu dingarani Ismail ulih Abram. 16 Wayah itu, Abram baumur lapan puluh anam tahun.