1 “A sai-à Shìdun má na kùrwá áni níng, má shi àràg barà yann uwà big dwib zìg pitilaká bubá mi ri yag abig shà ango. 2 Uwà swana áyaubá ni shi sig ma yar, swana bó, í àning. 3 Aning káníng zìg pitilabá, n pànn kwonn fig ma byìr á vùbá ni bàna. 4 Ama uwà yar káníng pànn kwonn sig ma byìrbá í zyun á àkwìnn-à ni, kwonn ma pitilabá. 5 Ango-à hi bi fonn fig kíni bàna, hár uwà káníng ri dìm ná, big í na jànn rìg-à.

6 “Ama áyau fi-à ni, big fig nài jir bìr mpìrká, mpìrká ri dang rag ango ri bi, aning bi shà ku. 7 A byar-à níng hi, uwà dwib káníng fim zir n sa samyib pitilabá. 8 Uwà àning káníng dinya uwà yar káníng n rag, ‘Aning ya yi byìr títi, jir kai bàna pitilayí ri dim.’ 9 Ama uwà yar káníng dinya kàng big n rag, ‘Má màg fig yi hár ma ning bàna. Bu-à ná sa bàna, aning yag mà fir ati-à ni aning wann buná.’ 10 A byar-à níng hi, big dù jirà abig yag wann byìr-à hi, sái ango í bi fòr rìg-à ásimbá ni. Uwà swanaká dà sig níng, kà yag sig ma ku, í byar-à mpìrká kìg dim rìg nu nkyun-à, uwà swana bi ji buju ban-à ma ango.

11 “Uwàká zyun-à yag sig abig wann byìr-à níng, í fòr bi rìg-à. Big kwìb nu nkyun-à n rag, ‘Shinn Luyí, Shinn Luyí, á pù ya yi nu nkyun-à.’ 12 Ango dinya big n rag, ‘Mì ri dinya ning àjai, ǹ yì fig ning bàna.’ ”

13 Yesu dinya kinn big jírwá n rag, “Aning shi àzír, jir kai bàna ning yì fig àyúnn-à má kàng bi á dunyaru bàna.

14 “Byar-à Shìdun má na kùrwá má shi àràg mpìr-à yag sig kyìnn, n bar kwonn bi sig fàuwá big, n ya sig big bài. 15 Ku ya mpìr zyun bài dubu swana, zyun dubu pyànà, zyun bó dìg dubu zyun. Ku ya kó ni bar swàmwá. Barà ku ya vinn rìg káníng àdòníng, ku í yag rìg-à kyìnn. 16 Fàu-à big ya sig ku dubu swana-à níng, yag n dìg swàb kà dubu swana á shinn-à ni. 17 Mpìr zyun-à big ya sig ku dubu pyànà níng, dìg swàb kà dubu pyànà á shinn-à ni. 18 Ama mpìr-à big ya sig ku bài dubu zyun níng, ku yag n kab shar n tàm jànn rìg bài-à àsàin luwá ya sig ku níng.

19 “Barà shi nonn nonn í byar-à àsàin lubá kàng bi, ku yag dìg fàuwá big, n bib big bu-à big sa sig ma bài-à ku ya sig big níng. 20 A byar-à níng hi, fàu-à big ya sig ku bài dubu swana-à níng bi, n ya àsàin luwá bu-à ku dìg swàb kà sig dubu swana. Ku dinya àsàin luwá n rag, ‘Asàin lumí, à ya sig mì dubu swana, tàma-à níng bu-à ǹ dìg swàb kà sig á shinn-à ni bàna, í dubu swana tìnn.’ 21 A byar-à níng hi, àsàin luwá yan ku n rag, ‘Isoko ma swàm-à à sa sig, wù í fàu-à ǹsàn. A sa hing swàm ma pìkyinn ńzyun ma bài títi-à ǹ ya sig wù níng. A dìg swàb kà bi hing bu á shinn-à ni àràg barà ǹ ya sig wù níng. Tàma-à níng, má ya wù wà kab wàrì níng. A bi ayi fig àjwár ábìr-à ni.’ 22 Zyun-à big ya sig ku dubu pyànà níng, kà bi n rag, ‘Asàin lumí, à ya sig mì bài dubu pyànà, tàma-à níng bu-à ǹ dìg swàb kà sig bàna, í dubu pyànà.’ 23 A byar-à níng hi, àsàin luwá yan ku n rag, ‘Isoko ma swàm-à à sa sig, wù í fàu-à ǹsàn. A sa hing swàm ma pìkyinn ńzyun ma bài títi-à ǹ ya sig wù níng. A dìg swàb kà bi hing bu á shinn-à ni, àràg barà ǹ ya sig wù níng. Tàma-à níng ma ya wù wà kab wàrì níng. A bi ayi fig àjwár ábìr-à ni.’ 24 Fàu-à big ya sig ku dubu zyun-à níng, bi n rag, ‘Asàin lumí, ǹ yì hing pìkyinnwú bai. Wù ri binn kwonn buju-à à tàg fíg nì bàna. Wù ri zà kwonn yìr bujuká zyun-à à minn fíg nì bàna. 25 Mì ri shàr zinnwú, í bu-à sa ǹ yag n tàm jànn rìg bàiwú á shar-à ni. Tàma-à níng á zìg bàiwú.’ 26 A byar-à níng hi, àsàin luwá dinya ku n rag, ‘Wù í fàu àbai, wù í mpìr dìjar. A yì hing, mì í mpìr pìkyinn àbai, mì ri binn kwonn buju-à ǹ tàg fíg nì bàna, mì ri zà kwonn yìr buju-à ǹ minn fíg nì bàna. 27 Wàníng wù nìm ma zìg yag rìghing bàimí mà tonn byar-à big ri sìnn gbam bài, tàma-à níng barà ǹ kàng bi sig níng, ǹ nìm má dìg swàb kà bu zyun á shinn-à ni. 28 To, aning zìg rìg bài-à á vùwá ni, aning ya zyun-à shi sig ma bài dubu dwib níng. 29 Mpìr-à ma shi sig ma bu, bá ya swàb kà ku, kwá dìg swàb kà ùwài nímá. Ama mpìr-à ma bàna ma bu, títi zyun-à ku shi sig ma kàhi níng, bá zìg rìg á vùwá ni. 30 Aning kan tafinn yag rìg fàu bibai-à níng mà byar zufi á byar-à kwá kig mínn wàni hár kwá zwàm kà vù á nginn.’

31 “Ayúnn-à Wùn Mpìr Jíkwìnn má bi áni, kwá bi àràg í kùr, kwá bi kwonn ma yann aswamwá big í zyun. Kwá shi á byar shu kùrwá ni. 32 Mpìrká á jànn-à ni bidìm pár má kwonn bi rìg á pyànnwá ni. A byar-à hi, kwá gàfinn mpìr káníng kyau pyànà àràg barà aza àdùnká ri kyàb gàfinn àdùnká ma byínnká. 33 Kwá sìnn kà àdùnká agunn vìm nuwá ni, ama kwá sìnn kà byínnká agunn vìm súrwá ni. 34 A byar-à hi, kùr-à ma dinya ká zyun-à shi sig agunn vìm nuwá ni níng, má rag, ‘Aning kà bi ning mpìr ǹsànká bu Tamí, aning bi shi ngàng á lu-à big sa sìnn ya sig ning, tun daka sai-à big màm fig ma dunyaru bàna. 35 Amor rì gban mì, ning ya mì buju ǹ ji, ajor zàpìr rì gban mì, ning ya mì zàpìr ǹ wa, ǹ rì bi sig kyìnn, ning pag mì byar ná. 36 N rì kyann dìr áyonn, ning wìr mì jà, ǹ rì na sig dor, ning bi myàng kwonn ma mì í zyun. Big rì kìg kà sig mì mà tonn fi-à ni, ning bi bib kà hing mi.’ 37 A byar-à hi, mpìr ǹsàn káníng má zìm má rag, ‘Shinn Luyí, yi myàng sig wù ákaun, amor rì gban sig wù hár yi ya wù buju rà? Ajor zàpìr rì gban sig wù ákaun, hár yi ya wù zàpìr á wa rà? 38 A bi sig kyìnn á byaryí ni ákaun, hár yi pag wù byar ná rà? A kyann sig dìr áyonn ákaun, hár yi ya wù jà rà? 39 Yi myàng wù à na sig dor ákaun, big kìg sig wù mà tonn fi-à ni ákaun, hár yi bi bib kà wù rà?’ 40 A byar-à hi, kùr má rag, ‘Mì ri dinya ning àjai, barà ning sa ya sig wunzàmí zyun-à títi buká ǹsàn níng, ning sa ya sig mì.’

41 “Kwá dinya ká zyun-à shi sig á vìm súrwá ni má rag, ‘Aning dù á byarmí ni, ning zyun-à ning í bu Shìdun bàna níng. Aning yag kà mà lu pyìr-à big sa sìnn sig wà má dim fig ádim bàna, jir shinn Shaitan ma yann aswamwá big. 42 Amor rì gban mì, ning ya fig mì buju ń ji bàna, ajor zàpìr rì gban mì, ning ya fig mì zàpìr ń wa bàna. 43 N rì bi sig kyìnn, ning pag fig mì byar ná bàna, ǹ rì kyann dìr áyonn, ning ngàng wà ná wìr mì jà, ǹ rì na sig dor, ning ngàng wà ná yag má bib kà mì, big kìg kà mì mà tonn fi-à ni, ning ngàng wà ná yag má bib kà mì.’ 44 A byar-à hi, bá dang má rag, ‘Shinn Luyí, yi myàng sig wù ákaun, amor rì gban wù, ajor zàpìr rì gban sig wù ákaun rà? A bi sig kyìnn ákaun rà? A kyann sig dìr áyonn ákaun rà? A na sig dor ákaun rà? Big kìg kà sig wù ákaun, wà yi ngàng wù rà?’ 45 A byar-à hi kwá dang má rag, ‘Mì ri dinya ning àjai, barà ning ngàng sig wunzàmí zyun, n sa ya fig ku bu ǹsàn bàna níng, ning ngàng síg mì.’ 46 A byar-à hi, mpìr káníng, bá tìr yag big mà lu pyìr-à má dim fig ádim bàna, ama mpìr ǹsànká bá dìg yonki zyun-à má vinn fig ávinn bàna.”