30
1 Obenu lẹ nta-a bẹ ẹphe
achịwaa mu ọchi;
mbụ ndu mu bụ ọgerenya;
ndu bụ ẹgube ndu mu gege
enwujeru nna phẹ ye
g'ẹphe lẹ nkụta,
echeru mu ẹku tụko zẹe.
2 ?Bụ urwu gụnu bẹ ọkpu ẹka
phẹ barụ mu;
eshinu ike adụedu phẹ?
3 Ẹphe anọduje eje
phururugbada eje eje
l'ẹnyashi lẹ mgbẹgu
alị ọkponku;
ẹka ẹjeka dụ phẹ;
tẹme ẹgu nọdu eme phẹ.
4 Ẹphe etsojeru ime ẹgbudu
akpakọ ẹkwo,
atsọ únú-únú ata.
Ọ bụru ọgbarabvu oshi,
amịshije ẹkali g'ẹza bẹ
ẹphe avụtaje ata.
5 Ndu-a bụ ndu a chịru achịchi
g'ẹphe ta anọshi
l'ẹka nemadzụ ibe phẹ nọ.
A nọdu atụ phẹ ụzu g'ẹphe bụ
iphuru.
6 E kebutaru phẹ;
ẹphe je eburu l'ọma nggele,
mini tahụru; buru lẹ
mgbaka agbara mkpuma;
mbụ ụtubuku ime alị.
7 Ẹphe anọduje l'ime ẹgbudu
l'ẹka ono ara mịmimi
eme kwọpfukwopfu lẹ
mkpula irwu l'ẹka ono.
8 Ndu bụ ndu mmanụ;
bya abụru ndibe ndu
enwedu ẹpha;
ndu e chiru ẹchachi gude
chịfu lẹ mkpụkpu.
9 Ọ bụru ẹgube ndu ono bẹ
ụnwu phẹ gbẹ nta-a
wata mu agụru ebvu
phuahaa mu iphu.
Mu bya bya abụru iphe,
ẹphe gude atụ phukuku.
10 Mu dụ phẹ ashị;
ẹphe nọdu anọduje
akpa mu ụzenya;
ọphu ẹphe ezejeẹdu ezeze
agbụ tụphekwa l'iphu mu.
11 Ọ bụru iphe, kparụ iya nụ bụ
lẹ Chileke tọshiwaru
ụdo mu;
bya eyewaa mu ọru;
ọphu ọ dụedu iphe,
ẹphe asọje nsọ k'anọdu mu
l'iphu mee.
12 Ọ bụru l'ẹkutara mu bẹ
ụnwu-ọgbolanu ono
eshije abya mu ọgu.
Ẹphe agbakashịa ọ́nyà
dobegbaa
l'ẹka mu a-zọ ọkpa;
bya ekephee mu
mgburugburu.
13 Ẹphe tochishia ụzo mu;
bya emekpọepho jasụ
ẹphe mebyishia mu;
ọphu ọ dụdu g'ọ ka mma
l'ọo onye lanụ,
gbaru mu mkpu.
14 Ẹphe nọdu asọ kpereree
eje abya;
awụ gbụtugbutu;
eshi ụzo, dụ l'igbulọ
mkpụkpu ono,
ẹphe tsukpọshiru ono
eje abya.
15 Ndzụ rwuta mu; nwubvu,
e shi akwabẹje mu
bẹ a chịru ọso.
O phekashịhu g'iphe,
phẹrephere pataru.
Ẹku mu phukashịhu
g'ẹka urwukpu
phukashịhuru l'igwe.
16 Nta-a bẹ ndzụ mu eribufuwa.
Iphe, zụru mu gburumu
pfụrii bụwaa eswe
iphe-ẹhuka.
17 Ẹnyashi anọduje anyapyashị
mu ọkpu.
Ẹka-iphe-nọ-mu ono,
anọduje ata mu kwaramu
kwaramu ono l'anọdujeepho
ata mu nno mkpụrumkpuru.
18 Chileke gude ọkpehu iya
lọkota uwe mu nmaa
ẹrupfureru;
bya eworu mbẹdua l'ophu
tsụpfua gẹ mu atsụpfuje
olu uwe mu-a.
19 Ọ parụ mu chie l'ime ẹpuchi.
Mu nọdu l'ẹka ono;
o woru mu gwee arakabya.
20 Mu chiku ngu lẹ mkpu gụbe
Chileke;
ọphu i yedụru mu ọnu.
Mu gbalihu pfụru apfụru;
ọ bụleru-a ẹnya bẹ i
leru mu kpoloko.
21 Ị bya aghaaru mu iphu
bya eworu mu mee
omeliwe.
I gude ogboro ẹka ngu,
ha ntụmatu eme mu
omeliwe.
22 Ị palia mu ephekerephe
woru mu tụaru
phẹrephere.
Ị nọdu apanga mu g'onye
oke phẹrephere apanga.
23 Mu makwarụ-a lẹ ị kpụwa
mu ala maa.
Ị kpụwa mu ala ẹka ono,
e doberu iphe,
bụ onye nọ ndzụ.
24 Sụ-a; ọ tọ dụkwa onye
ahụmajechaa onye ike
bvụwaru bya ejeshia
ya echi iphe.
L'ẹka oochi ojilẹka tọgbo l'iphe,
eme iya nụ.
25 ?Ọ kwa lẹ mbẹdua shi
abụjeru; mu -hụma
onye eje iphe-ẹhuka;
mu araaharu iya ẹkwa?
?Mu te eshidu abụjeru;
mu -hụma onye ụkpa;
meji awashịhu mu
awashịhu?
26 Obenu lẹ mu leru ẹnya iphe,
dụ ree;
ọ bụru ẹjo iya bẹ mu
hụmaru.
Mu lee ẹnya l'ìphóró a-dụru
mu;
ọ bụru ọchii tụkoru
ẹkameka gbachia.
27 Iphe, aswọrishi mu ime ẹhu ta
adụdu teke ọononyaje
haa mu aswọrishi.
Ọ bụepho l'ọo eswe
iphe-ẹhuka tụru mu swịswia.
28 Mu tsoru aghaphe;
gbachihuchaa agbachihu;
ọphu ọ bụdu l'ọo
anwụ chiru mu;
mu gbachihu ọbu.
Mu pfụru l'echi edzudzu-ọha
chia ojilẹka-tọgbo.
29 Mu bya bya abụru nwune
nkụta-ọswa.
Ọ bụru mu lẹ mgbashị-ujiku
aswị ọswi.
30 Akpọ ẹhu mu jihuwaru
nchi aswashịhuwaa
aswashịhu.
Ẹhu nọdu enwu mu
phuruphuru erekuta anụ.
31 Ogumogu, mu shi akpọje
bụwaa mu aphụ.
Ototo, mu shi aphụje
bụwaru erwubvu.