4
Ọnu, Elifazu yeru
1 Tọbudu iya bụ; Elifazu onye
Temanu bya eyee ọnu sụ:
2 Nemadzụ -sụkwanu gẹ ya
yee nwọnu nwilile;
?tọo kpatsudu ngu nụ iwe?
Ọlobu ?bụ g'iphe adụje baa
nemadzụ edobe ọnu doo?
3 Leanarọya; gụbe onye ziwaru
ikpoto nemadzụ iphe.
Ndu dahụwaru adzụlakpa bẹ
i meru;
ẹphe gbakerehu.
4 Onye ada adada bẹ i pfuru
opfu yeru;
opfu ngu kwolia ya.
Mbụ l'ikpere ngwọkinaki bẹ
i meru;
ọ pfụru kẹkereke.
5 Nta-a bẹ iphe-ẹhuka
byapfutaru gụbedua
l'ishi onwongu.
Aphụ ji ngu obu ẹgube
ọwa-a;
mbụ l'ọ tụru ngu gbaa
l'ẹhu; meji tọfu ngu.
6 Eshinu ị bụ onye atsụ Chileke
ebvu; dakobenụ iya!
L'ị chịru ẹnya yeru abụbu,
ị bụ onye ụta adụdu lẹ
ndzụ iya.
7 Rịnaa ya arịri; ?bụ onye bẹ
ị makpọoru,
bụ onye iswi dụ mma,
lajẹru l'iyi?
?Bụ awe bẹ ị hụmajeru l'onye
pfụberekoto
chịhuru lẹ mgboko?
8 Ọ chikwaa iphe, mu ahụmaje
bụ lẹ ndu woru ẹjo-ememe
akọ g'onye akọ opfu;
bya eworu iphe-ẹhuka anma
iya bụkwapho
iphe ono bẹ ẹphe akpatajẹ
iya.
9 Chileke -zikwadaa unme fuu;
ẹphe ephukashịhu.
Teke ẹhu eghu iya swọlihuru;
ẹphe abụru ọla-l'iswi.
10 Oduma asụjekwa ekiri;
baa hanyịhanyi; byaa ẹnari;
obenu l'oduma,
dafụru ibogolo
bẹ eekwoshijeẹle-a eze.
11 Oduma, ahụmaduru iphe,
oo-ri alajẹ l'iswi;
ụnwu oduma agbaa
nanụ nanụ.
12 “Mbụ-a; o nwekwarụ iphe,
e pfujeru mu lẹ mpya.
Ọ bụru-a nwiphiphe bẹ mu
nụmabutaru iya.
13 Mu nọdu arwọ ẹjo nrwọ
l'ẹnyashi;
lẹ teke ono, ndiphe
adajẹwa ọdamgbenya
ono.
14 Ndzụ gụahaa mu;
ẹhu nmaahaa mu
pyaapyaapyaa;
k'ọphu ọkpu,
nọ mu l'ẹhu nmakọtaru
yilayila.
15 A nọnyaepho; nwamaa bya
eshiẹ mu phọ
l'atatiphu ghata.
Ẹdzu swịe mu phọ l'ẹhu;
ishi nyịa mu kẹ kpalaa.
16 Maa ono bya apfụerupho
kẹkereke;
ọphu mu adụkwanu ike
akọ g'ọ gbaru.
Ọ bụepho l'o nweru iphe,
pfụru mu l'iphu.
Ẹkameka dakọtaepho
nyọnyoronyo.
A nọnyaa; mu nụma olu-opfu
onye sụru mu:
17 ?O nweru g'ọo-dụnaa
nemadzụ mmanụ
abya aka Chileke
apfụbekoto?
?O nwenụru-a g'ọo-dụ
nemadzụ abya aka
onye meru iya nụ adụebe
ree?
18 Eshinu Chileke te egudedu
ire ndu ejeru iya ozi ẹka;
tẹme ọ nọdu abajẹru
ụnwu-ojozi-imigwe iya
mba l'iphe, ẹphe mesweru;
19 ?bụchia nemadzụ bẹ ọo-ha;
mbụ nemadzụ ono,
bu l'ụlo ẹpuchi,
a tụru ọkpa iya l'alị;
ndu azọ-gbu phẹ
ka nphe eme l'azọ-gbu
mbeberibe!
20 A -bya eshi l'ụtsu nọo jasụ gẹ
nchi jihu bẹ e gwewaru
phẹ uji.
Ẹphe alaa l'iyi jeye lẹ
tuutuutuu lẹ mịimiimii;
ọ tọ dụdu onye ẹnya erwu
l'ẹka ono.
21 Ọ -bụru l'a gbabufuru eri,
gude ndzụ phẹ;
?ẹphe ta anwụhudu l'ẹbe
enwe egomunggo?”