14
Izimanụ alwa azụ bụ iphe-ekweru
1 “Unubẹ ndu Ízurẹlu; unu lwapfuta Chipfu, bụ Chileke unu! Ọ kwa iphe-ẹji, unu eme meru g'o gude unu daa! 2 Unu kpụru opfu l'ọnu gude lwapfuta Chipfu. Unu bya bya asụ iya: ‘Gụaru anyi nvụ l'iphe-ẹji, anyi emekọta ngu g'ọ ha! Gudenụ eme odoo nata anyi; g'anyi egudekwanụ akpụru-iphe, shi anyi l'ọnu gude gwaa ngu! 3 Ndu Asiriya taa dụekwa ike adzọ anyi. Ọphu ọ bụedu l'eli ịnya-ọgu bẹ anyi a-nmakoru. Anyi ta abyadụ egudebaa ọnu anyi woru iphe, bụ ẹka bẹ anyi gude mee ya kua “Chileke anyi;” kẹle ọo l'ẹka ngu bẹ onye enwedu nna anọduje l'a phụaru iya obu-imemini.’ ”
Chipfu ekwe ndu Ízurẹlu ukwe ndzụ ọ̀phúú
4 “Mu e-me-a g'ẹphe dụ-buhu
ghẹlegheleghele ono,
ẹphe dụ ono.
Mu abya atụshihu ẹhu;
yee phẹ obu;
kẹle mu taa vụheduru
phẹ ọvuma.
5 Mu a-dụ g'iji akwaru
ndu Ízurẹlu.
Yẹbedua abya pulapula
g'ojimbvu ẹgu.
Ọgbarabvu iya abamia
abami l'ime alị g'oshi sida,
nọ l'úbvú úbvú Lébanọnu.
6 Ụnwu iya ọphu dụ nwa
pẹnupenu amịshikwapho
evu evuvu.
Akpabiri iya adụ gẹ k'oshi
olivu.
Mkpọ, ọo-nọdu eshi
adụ gẹ mkpọ oshi sida
k'úbvú úbvú Lébanọnu.
7 Amadụ adọaharu lẹ mkpula
iya ọzo.
L'ọ sọo pulapula g'ereshi.
L'ọ baa yoyoyo gẹ vayịnu.
Ụ́dù iya atụko ẹkameka
ngaa gẹ mkpọ mẹe,
a kụtaru l'úbvú úbvú
Lébanọnu.
8 ?Bụbaa gụnu bẹ ndu
Ifuremu ẹphe lẹ nshi
emegbabaa?
L'ẹka mu a-nọdu anụ
olu iya eleta iya ẹnya.
Mu dụwaa g'oshi payịnu,
ẹkwo iya jihukọtaru
kẹ hụduu;
ọ bụru mu emeje g'unu
mịa mebyi.”
Mkpọchi-ishi iya
9 “?Bụ onye bụ onye maru iphe? G'ọ nwụtakwa iphe l'iphe-a! ?Bụ onye bụ onye iphe, edoje ẹnya ree? G'ọ tụkokwa doo ya ẹnya! L'ụzo kẹ Chipfu dụkotakwa nhamụnha. Ọ bụru ndu pfụberekoto eshi iya. Obenu lẹ ndu eme ẹjo-ememe bẹ ụpfu adụje m'ẹphe -je iya eshishi.”