8
Nim talcheꞌ u Jesús uvaꞌ atoꞌk tu nachbꞌal Tiixh tu almikaꞌ
1 As aꞌ isuuchil u yoleꞌ uvaꞌ ni val sete tiꞌ itzaeleꞌ uvaꞌ at veꞌt ok chiteꞌ u Jesús qꞌesalil oksan iyol tenam vatz Tiixh. As xonleꞌl veꞌt Aak tisebꞌal u Tiixheꞌ uvaꞌ nim talcheꞌ tu almikaꞌ.
2 As Aakeꞌ ni nachon Tiixh sqiꞌ tu u Tiixhla atinbꞌaleꞌ uvaꞌ tabernáculo ibꞌii uvaꞌ kꞌujleꞌl taꞌn u Kubꞌaal Tiixheꞌ. As aꞌeꞌ u atinbꞌaleꞌ uvaꞌ ninachpukat Tiixh tu almikaꞌ uvaꞌ jit umaj uxhchil kat bꞌanon.
3 As junun unqꞌa iqꞌesal oksan iyol tenam vatz Tiixh as kꞌujlu kan tiꞌ toksal iyol unqꞌa tenameꞌ vatz Tiixh. Estiꞌeꞌ uvaꞌ techal la toksa u Jesús umaj oy vatz u Tiixheꞌ.
4 Pet attel koj u Jesús cheel, as jit Aak oksan iyol tenam vatz Tiixh la ibꞌaneꞌ vatz u txꞌavaꞌeꞌ, tan at veꞌt unqꞌa oksan iyol tenam vatz Tiixh sukuxoꞌl tiꞌ toksat unqꞌa oyeꞌ vatz u Tiixheꞌ echeꞌ uvaꞌ ni tal u tzaqꞌiteꞌ uvaꞌ tzꞌibꞌamal kan taꞌn u Moisés.
5 As aꞌ chajnajeꞌ uveꞌ ni oksan unqꞌa oyeꞌ vatz u Tiixheꞌ tu u atinbꞌaleꞌ uvaꞌ tabernáculo ibꞌii uvaꞌ ninachpukat Tiixh. As aꞌeꞌ ni bꞌanon ivaatzil u atinbꞌaleꞌ uvaꞌ tabernáculo uvaꞌ echen tu almikaꞌ echeꞌ uvaꞌ kat tal u Tiixheꞌ te u Moisés, tan ech tal veꞌt Aak ileꞌ te u Moisés tul uvaꞌ aalik ibꞌanat veꞌt u atinbꞌaleꞌ uvaꞌ tabernáculo uvaꞌ nik inachpukat Tiixh: «La chit abꞌaneꞌ kam uveꞌ kat val see viꞌ u vitzeꞌ,» tiꞌk Aak.
6 As kat aqꞌpu veꞌt te u Jesús uvaꞌ Aak kat oksan iyol tenam vatz u Tiixheꞌ. As echat u akꞌ tzaqꞌiteꞌ uvaꞌ kꞌujlu kan taꞌn u Jesúseꞌ, tan at pal tiꞌ u tzaqꞌiteꞌ uvaꞌ atik bꞌaxa. As nim talcheꞌ unqꞌa yoleꞌ uvaꞌ tal u Tiixheꞌ tiꞌ u Jesúseꞌ.
7 As jik koj chit kat ibꞌan unqꞌa uxhchileꞌ taꞌn u tzaqꞌiteꞌ uvaꞌ atik bꞌaxa, as yeꞌleꞌxh u kaꞌv tzaqꞌiteꞌ kat kꞌujebꞌi.
8 Pet kat til u Kubꞌaal Tiixheꞌ uvaꞌ yeꞌ nik ibꞌan unqꞌa tenameꞌ u bꞌaꞌneꞌ. Estiꞌeꞌ uvaꞌ ech kat tal veꞌt Aak ileꞌ stiꞌ:
As la ilej veꞌt umaꞌl u qꞌii
uvaꞌ la unkꞌujbꞌaꞌ veꞌt umaꞌt u akꞌ tzaqꞌiteꞌ setiꞌ,
ex unqꞌa aa Israel
tukꞌ ex unqꞌa aa Judá.
9 Pet jit eela u akꞌ tzaqꞌiteꞌ tukꞌ u tzaqꞌiteꞌ uvaꞌ kat unkꞌujbꞌaꞌ kan xoꞌl unqꞌa qꞌesla ebꞌaaleꞌ,
tul uvaꞌ kat veqꞌo el tzan tu u Egipto.
Ech nunbꞌaneꞌ echeꞌ nibꞌan umaj bꞌaala uvaꞌ txeyel iqꞌabꞌ vitalaj intxaꞌeꞌ staꞌn tiꞌ ilochataꞌ.
As yeꞌ kat inima unqꞌa qꞌesla ebꞌaaleꞌ u tzaqꞌiteꞌ
uvaꞌ kat unkꞌujbꞌaꞌ kan bꞌaxa.
Estiꞌeꞌ uvaꞌ yeꞌ kat vabꞌi veꞌt viyol u tenameꞌ.
10 As tul maꞌt ipal veꞌt iyakꞌil u txumbꞌaleꞌ uvaꞌ unkꞌujbꞌaꞌ kan te unqꞌa tiaal Israel bꞌaxa,
as aꞌ u viꞌlaꞌ uvaꞌ tuk unkꞌujbꞌaꞌ kan stiꞌ, tan ech ni val ileꞌ:
«La voksa veꞌt vuntzaqꞌiteꞌ tu vitxumbꞌaleꞌ.
As la voksa veꞌt vunyoleꞌ tu u taanxelaleꞌ.
As in veꞌt iTiixh;
as aꞌeꞌ untenam la ibꞌaneꞌ.
11 As jit tzꞌajinal la ichus veꞌt unqꞌa uxhchileꞌ vimooleꞌ.
As mitaꞌn ech la tal ileꞌ te u titzꞌin tatzikeꞌ:
Qootzitaj u Kubꞌaal Tiixheꞌ setukꞌ, chaj koj la taleꞌ,
tan kajayil chit unqꞌa tenameꞌ la ootzin veꞌt in,
kꞌuxh at tijleꞌm as kꞌuxh yeꞌl tijleꞌm ati.
12 As la unsotzsa veꞌt ipaav unqꞌa uxhchileꞌ.
As yeꞌxh jatu la vulsa veꞌt vipaav unqꞌa uxhchileꞌ sunkꞌuꞌl uvaꞌ kat ibꞌana,» tiꞌk u Tiixheꞌ.
13 As tul uvaꞌ kat tal veꞌt Aak uvaꞌ la ikꞌujbꞌaꞌ kan Aak umaꞌt u akꞌ tzaqꞌit, as aꞌ isuuchileꞌ uvaꞌ nipal veꞌt iyakꞌil u tzaqꞌiteꞌ uvaꞌ atik bꞌaxa. As ileꞌ nisotz veꞌteꞌ.