U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU FILIPOS
Yol tiꞌ u uꞌ tzaꞌ
Aatz u uꞌ tzaꞌ, aꞌ tzꞌibꞌan u Pablo. Atich tu tzeꞌ tu Roma aas itzꞌibꞌataꞌ. Aꞌ chit siꞌchtexhyatzꞌpi, kamal tixoꞌl qꞌu yaꞌbꞌ 59 — 61 m.t.J. Tu yolbꞌal griego itzꞌibꞌava. Tikuenta u Pablo tuchꞌ u Silas ok u bꞌaxa niman tetz u Jesuus tu u tenam Filipos. Ayaꞌ u xeen tzeꞌ, aꞌich imol initxaꞌa. Choktaj Qꞌu Bꞌaꞌnla Chaj Kam Bꞌanel (Hechos) 16.11-40. Aꞌ chit iꞌantaꞌ tu u kaꞌpaj ibꞌen u Pablo.
Nitalcheꞌ aas aꞌ u uꞌ tetz txuqꞌtxunchil tzaꞌ tan, chiꞌbꞌebꞌal iyolon u tzꞌibꞌan tetz tuul kꞌuxh tu tzaꞌl atilka.
Yeꞌk maꞌj kam aas nim tuul niyolon u Pablo tiꞌ tzaꞌ, pek kalabꞌ koꞌxh kam niyolonka. Nitaleꞌ aas yeꞌxhkantuꞌ kꞌuxh tu tzeꞌ atilka tan, niveet taltu u yolbꞌal Tioxh tu qꞌu preexhu. Nitaqꞌ nimal ikꞌuꞌl tereꞌn qꞌu paxsan tetz u yolbꞌal Tioxh majte. Nital majte aas yeꞌxhkam niqeon tu u kamchil. Tan kꞌuxh itzꞌlele utz, kꞌuxh maꞌt ikameꞌ, taꞌxh bꞌanel saok iqꞌii u Jesuus. Ech aatz u kamchil siatz utz, bꞌenchil koꞌn xeꞌ u Tioxh. Utz aatz u vatz iqꞌii isaj, aꞌ tokeꞌ atinchil kꞌatz u Jesuus tiꞌ inimaleꞌ.
Nitaleꞌ aas nitxuqꞌtxun u Pablo tiꞌ qꞌu niman tetz u Jesuus tu Filipos tziꞌ tan, tiira nichibꞌan tii tibꞌilaj. Niꞌxhichiloch tibꞌ; nitxuqꞌtxun tibꞌilaj.
Nital vatzsaj aas sailax ok etz tiꞌ u Jesuus. Tan kꞌuxh Tioxh nal tatineꞌ utz, Tioxh bꞌenamen, yeꞌxhkam itꞌanbꞌaꞌ tibꞌ. Pek aal taqꞌ bꞌens tibꞌ aanima. Loqꞌ tiira inima vitxumbꞌal u Tioxh. Utz tiira maanxho itxumbꞌal, asta taqꞌ tibꞌ tu kamchil. Utz tiꞌ vinimaneꞌ, tꞌanbꞌaꞌl tu u Tioxh majte. Taqꞌ tijleꞌm viꞌ qꞌu kam kajayil.
Aꞌ u jatxbꞌal tibꞌ qꞌu yol tu u uꞌ tzaꞌ.
1) 1.1-11 Nixeꞌtiyoloneꞌ. Nitaqꞌ ichajlichil qꞌu niman tetz u Jesuus tu Filipos. Utz nitaleꞌ aas niꞌxhibꞌan tii tiꞌ tan, tiira nimotxikꞌuch u yolbꞌal Tioxh tu vibꞌanoneꞌ.
2) 1.12—2.18 Nitaleꞌ aas taꞌxh maꞌl ibꞌoꞌqꞌol tu u vatz kuqꞌii kusaj sakubꞌaneꞌ, ayaꞌ vichꞌii u kutxumbꞌal tiꞌ tootzajil u Jesuus.
3) 2.19—3.21 Nital tiꞌ u taqꞌon u Pablo tiꞌ u Tioxh tuchꞌ qꞌul imol.
4) 4.1-20 Nitaleꞌ aas echen sauch chiꞌbꞌichil tu u atinchil kꞌatz u Jesuus. Utz bꞌenamen sakꞌamabꞌel tiꞌ kajay qꞌu kam.
5) 4.21-23 Ech vitzojpu qꞌu yol tu u uꞌ tzaꞌ.
1
U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU FILIPOS
Ichajlichil qꞌu niman tetz u Jesuus tu Filipos
1 Nunqꞌilabꞌenex hermanos, in u Pablo. Aꞌ unmol u Timoteo, oꞌ taqꞌonom u Jesucristo. Nikuqꞌilaꞌex jankꞌal ex atilex tu u tenam Filipos, ex niman tetz u Jesuus tuchꞌ ex, ex qꞌesala utz, tuchꞌ ex diaakono. 2 Atin koj vibꞌaꞌnil u Tioxh sekꞌatza. Ayaꞌ vaꞌl nitaqꞌ u kuTat tu Amlika, tuchꞌ u kuBꞌaal Jesucristo. Utz atin koj u paas tetaanima taqꞌo majte.
Viqꞌilat sikꞌlet Tioxh u Pablotiꞌ qꞌu niman tetz u Jesuus
3 Chajpaj nivulsaꞌex sunkꞌuꞌl, nunkꞌama u Tioxh setiꞌ. 4 Utz chajpaj nunqꞌila sikꞌle u Tioxh setiꞌ sekajayil tuchꞌ chit txuqꞌtxunchil nunbꞌaneꞌ. 5 Tan tiira txayel qibꞌ tixeꞌtebꞌal utz, ulyukoꞌxhoꞌ tzaꞌ tuul tiꞌ u bꞌaꞌnla chusbꞌal nimamal qaqꞌo. 6 Echixeꞌat tekꞌ vootzajle aas saꞌkojtelabꞌekaꞌex u Tioxh tiꞌ vitxumbꞌal vaꞌl niꞌan setiꞌ. Pek aal maas siqꞌanbꞌixsaꞌex tu vetatin sikꞌatza. Ech siꞌaneꞌ ulnalen u kuBꞌaal Jesucristo tikaꞌpaj.* Choktaj u Salmos 138.8. 7 Ech ijikomal nunnacheꞌ aas ech nivitzꞌa setiꞌ tziꞌ. Tan tiira atilex tu vaanima. Kꞌuxh tu tzeꞌ atilkꞌin tan, ex unmol tiꞌ vibꞌaꞌnil u Tioxh. Ex unmol nikutxakbꞌaꞌ qibꞌ tiꞌ ipaxsal itziiul u bꞌaꞌnla chusbꞌal. Utz ex unmol tiꞌ itzaqꞌbꞌel qꞌuꞌl nikoontrain. 8 Nojchit u Tioxh ootzajin tetz aas tiira tiiꞌin setiꞌ kajay ex. Echaꞌ tel taanima u Jesucristo setiꞌ.
9 Utz nunqꞌila sikꞌle u Tioxh setiꞌ. Nunjaj te aas tiira ebꞌan koj tiiꞌex setibꞌilaj majte chajpaj. Taqꞌ koj tereꞌn etootzajibꞌal tuchꞌ etxumbꞌal ech setootzaji kaniꞌch ikꞌultu tibꞌ etxumbꞌal setibꞌilaj sebꞌaneꞌ. 10 Ech setootzaji qꞌu kam qꞌuꞌl tiira techal. Utz jikom chit qꞌu kam sebꞌaneꞌ. Ech yeꞌxhkam koꞌxh saꞌalax setiꞌ. Utz bꞌaꞌn ex liꞌan vatz u Cristo aas luꞌul tikaꞌpaj. 11 Kaana bꞌaꞌnla chaj kam lekꞌucha, echaꞌ bꞌaꞌnla chaj vatz tzeꞌ. Ayaꞌ qꞌu jikomla ebꞌanon tu viqꞌaqꞌal etatin kꞌatz u Jesucristo. Ech saoksal iqꞌii u Tioxh taqꞌo utz, satꞌanbꞌaꞌli.
Vibꞌoꞌqꞌol u atinchil kꞌatz u Jesuus
12 Hermanos, ootzajitaj aas iyakꞌil u bꞌaꞌnla chusbꞌal nitiqꞌo kꞌuxh nunpaal tu tzaꞌl. 13 Aal tootzaj tek kajay qꞌu sol xeꞌ u ijlenal tzaꞌ, tuchꞌ tereꞌn qꞌu aqꞌonom aas tiꞌ koꞌn ipaxsal itziiul u Cristo kꞌuxh atilkuꞌin tu preexhuil.† Choktaj Qꞌu Bꞌaꞌnla Chaj Kam Bꞌanel (Hechos) 28.30-31. 14 Utz ech koꞌnkoxhtuꞌ, pek sibꞌal qꞌu niman tetz u kuBꞌaal latzaꞌ, aal nitiqꞌo iyakꞌil tiꞌ ipaxsal paal u yolbꞌal Tioxh. Yeꞌk ixoꞌval, kꞌuxh atilin tu tzeꞌ tiꞌ.
15 Atil aanima nipaxsa itziiul u Cristo; loqꞌ tetz isaꞌ tiꞌ. Echaibꞌ isaꞌ sunkꞌatza aas nitaleꞌ; sipaasa tibꞌ sunviꞌ nitaleꞌ. Pek aatz unjote, jikom chit ayaꞌl ikꞌuꞌl niꞌaneꞌ. 16 Aatz qꞌuꞌl echaibꞌ nititzꞌa tziꞌ, yitꞌ jik koj ayaꞌl ikꞌuꞌl niꞌaneꞌ. Pek aꞌ isaꞌ takꞌbꞌixsal tereꞌn qꞌu tzaꞌl viꞌ. 17 Pek aatz unjote, tiira ayaꞌl ikꞌuꞌl niꞌaneꞌ. Tan tootzajle aas aꞌ unmol txaklelin tiꞌ itzaqꞌbꞌel qꞌuꞌl nikoontrain u bꞌaꞌnla chusbꞌal. 18 Loqꞌ aꞌtzii. Taꞌxhtzii aas aꞌ nipaxsal itziiul vibꞌii u Cristo, kꞌuxh vet sikꞌuꞌl siꞌan sataleꞌ utz, kꞌuxh tinujul siꞌaneꞌ. Ech nuntxuqꞌtxuneꞌ. Utz satxuqꞌtxunin bꞌenamen.
19 Tan vootzajle aas saelin tu tzeꞌ tzaꞌ tu veqꞌilat esikꞌlet Tioxh viꞌ utz, tu vilochtꞌin u Tioxhla Espiiritu vaꞌl nitaqꞌ u kuBꞌaal Jesucristo. 20 Pek tiira aꞌ unsaꞌ saꞌxhilax vitxumbꞌal u Cristo sunkꞌatza, kꞌuxh lakamin oj laitzꞌeꞌin. Taꞌxhtzii yeꞌxhkam sunxoꞌva.
21-22 Pek oj atil vatz unqꞌii saj, txꞌanel tan, aꞌ unmol u Cristo. Utz aal tereꞌn saaqꞌonin tiꞌ. Pek kankojtuꞌ majte untzꞌoj sakamin tiꞌ. Aal techal tan, aꞌ sunbꞌan kanaal u atinchil bꞌenamen kꞌatz u Cristo. Ech tiira ela bꞌaꞌn utz, yeꞌ tek vootzaj abꞌiste suntxay te.‡ Choktaj Qꞌu Niman Tetz U Jesuus Tu Galaacia 2.20. 23 Loqꞌ niꞌxhipensaarinsaꞌin kaꞌvaꞌl qꞌu kam tziꞌ. Tan aal tiira nitekvachva sakamin, ech saꞌatinin xeꞌ u Cristo. Tan aꞌ vaꞌl tiira techal. 24 Pek ibꞌoꞌqꞌol setetz aas saꞌtereꞌnatin vatz unqꞌii unsaj. 25 Utz kꞌujlel unkꞌuꞌl aas saꞌtereꞌnkaaꞌin texoꞌl tiꞌ elochleꞌ, tiꞌ etxuqꞌtxunsal kꞌatz u Tioxh. Ech setiqꞌo eyakꞌil tu vikꞌujeꞌ ekꞌuꞌl tiꞌ. 26 Ech saꞌxhetoksa iqꞌii u Cristo Jesuus viꞌ aas laꞌpajoponin texoꞌl.
27 Pek taꞌxh nunjaj sete aas ech chit ebꞌanon sebꞌaneꞌ vaꞌl nital u bꞌaꞌnla chusbꞌal tetz u Cristo. Ech kꞌuxh seꞌnvilex utz, kꞌuxh yeꞌxhkaꞌtin texoꞌl, taꞌxhtzii jikom etatineꞌ. Aꞌ unsaꞌ savabꞌi aas tiira txaklelex tu u bꞌaꞌnla chusbꞌal. Maꞌl koꞌn etxumbꞌal tiꞌ. Maꞌl koꞌxh etaanima. Maꞌl etxakbꞌaꞌt etibꞌ tiꞌ u bꞌaꞌnla chusbꞌal vaꞌl kꞌujlel kukꞌuꞌl tiꞌ. 28 Utz yeꞌ koꞌxh etaqꞌ tzii sixoꞌvixsaꞌex qꞌu aanima qꞌuꞌl nixeꞌkꞌulanex tiꞌ u bꞌaꞌnla chusbꞌal. Tan kꞌuxh niꞌan ech tziꞌ, aꞌ u techlal atziꞌ aas sabꞌen tu choobꞌal paav. Pek aatz ex, chitpinajex tu vepaav tu venimat u bꞌaꞌnla chusbꞌal. Utz u Tioxh vaꞌl niaqꞌon. 29 Utz aatz ex, ex tek niman tetz u Cristo. Maꞌl bꞌaꞌnil aꞌ vetekꞌula tziꞌ. Utz ech koꞌnkoxhtuꞌ, pek bꞌaꞌnil majte aas saꞌnalpaalex tu tzaꞌl tiꞌ. Ech oksataj yakꞌil. 30 Aꞌtzii. Kꞌuxh atilex tu u tzaꞌl cheel, echaꞌ vaꞌl etil unpaal tuul atichꞌin texoꞌl. Utz echaꞌ vaꞌl netabꞌi atilin tuul cheel.