1 Saan a kadakami, O Yahweh, saan a kadakami, ngem iti naganmo ti pangtedam iti pammadayaw, gapu iti kinapudnom iti tulagmo ken iti kinamatalekmo. 2 Apay koma nga ibaga dagiti nasion, “Sadino ti ayan ti Diosda?” 3 Ti Diosmi ket adda sadi langit; ar-aramidenna ti aniaman a pagayatanna. 4 Pirak ken balitok dagiti didiosen dagiti pagilian nga aramid dagiti ima dagiti tattao. 5 Addaan iti ngiwat dagitoy a didiosen, ngem saanda nga agsao; addaanda iti mata, ngem saanda a makakita; 6 addaanda iti lapayag, ngem saanda a makangngeg; addaanda ti agung ngem saanda a makaangot; 7 addaanda iti ima, ngem saanda a makarikna; addaanda iti saka, ngem saanda a makapagna, wenno agsao kadagiti ngiwatda. 8 Dagiti nangaramid kadakuada ket kasla kadakuada, kasta met kadagiti amin nga agtaltalek kadakuada. 9 Israel, agtalekka kenni Yahweh; isuna ti tulong ken kalasagmo 10 Dakayo a sangkabalayan ni Aaron, agtalekkayo kenni Yahweh; isuna ti tulong ken kalasagyo. 11 Dakayo nga mangidaydayaw kenni Yahweh, agtalekkayo kenkuana; isuna ti tulong ken kalasagyo. 12 Laglagipennatayo ni Yahweh ket bendisionannatayo; bendisionanna ti pamilia ti Israel; bendisionanna ti pamilia ni Aaron. 13 Bendisionanna dagiti mangraraem kenkuana, dagiti ubbing ken nataengan. 14 Paadduennakayo koma ni Yahweh iti kasta unay, dakayo ken dagiti kaputotanyo. 15 Bendisionannakayo koma ni Yahweh, a nangaramid iti langit ken daga. 16 Kukua ni Yahweh ti langit; ngem intedna ti lubong iti sangkataoan. 17 Saan a dayawen dagiti natay ni Yahweh, wenno ti siasinoman a napanen iti kinaulimek. 18 Ngem idaydayawtayo ni Yahwen ita ken iti agnanayon. Idaydayawyo ni Yahweh.