23
Ọ-dụ-l'ifu a-ka mma
1 “Aphụ a-tsọkwaru ndu ono, eche atụru, bụ ẹphe emebyishi atụru iya; l'achịkashi iya achịkashi l'alị iya ono.” Ono iphe Ojejoje ekfu ndono. 2 Ọo ya meru iphe Ojejoje, bụ Nchileke kẹ ndu Ízurẹlu ekfu okfu ẹhu ndu ono, eleta ndibe iya ono; sụ: “Keshinu unu chịkashiru atụru iya achịkashi; mbụ chị-phua ya achị-phu; unu te eleta iya ẹnya; bẹ ya e-letakwanu unu ẹjo eleta; chia unu iphe iphe dụ ẹji ono, unu meru ono.” Ono iphe Ojejoje ekfu ndono. 3 “Ọo yẹbedua l'onwiya e-je achịkota nwa ndu phọduru nụ l'ụnwu atụru iya ono l'iphe bụkpo alị ẹke ya chịru ẹphe je eye; duphuta ẹphe azụ l'ẹke ẹphe atajẹ nri, bụ ẹke ẹphe a-nọdu wata azụzu; l'aka igwe l'eje. 4 Ya e-ye ndu nche atụru, a-nọdu eleta ẹphe ẹnya. Teke ono bẹ ẹphe ta tsụhedu egvu; meji te ebuhuhe ẹphe; ọphu ọ dụhedu ọphu aachọkwadu achọcho.” Ono iphe Ojejoje ekfu ndono.
5 Ọwaa iphe Ojejoje ekfu:
“L'e -metsua;
bẹ ya e-metaru Dévidi ẹkali iya
ọphu e-dobe ẹka ndoo;
mbụ onye eze,
e-gude mmamiphe chịa.
Ọo-nọdu ekpe ikpe, dụ maa;
l'emee iphe dụ chịriru werere l'alị-a.
6 L'oge nk'iya bẹ aa-dzọta ndu Júda.
Ndu Ízurẹlu anọdu;
tọ dụhedu iphe eme ẹphe.
Onye ono bẹ iphe ee-ku iya bụ:
‘Ojejoje bụ odobe ẹka ndoo ayi.’ ”
7 Ọwaa iphe Ojejoje ekfu: “L'o -rua mbọku ono; bẹ ndiphe te egudehedu ẹpha Ojejoje ekfu: ‘Kamẹnu; mbụ onye ono, dufutaru ndu Ízurẹlu l'alị Íjiputu ono.’ 8 Iphe ẹphe a-nọdu ekfuchia bụ: ‘Kamẹnu; l'onye ono, dufutaru ndu eri Ízurẹlu l'alị ndu isheli; mẹ l'iphe bụ mbakeshi, bụ ẹke o shi chị-phushia ẹphe je edoo ono.’ Teke ono; bẹ ẹphe e-buru l'alị k'ẹka ẹphe.”
Oye Nchileke ẹka l'ọnu
9 A -bya l'okfu ẹhu ndu nkfuchiru;
ọkpoma adakwa mu gidigidi.
Ọkpu, nọ mu l'ẹhu l'ọ ha
anmakọtakwa mu jijiji.
Mu dụlephu l'ọ bụ onye mẹe atsụ;
mbụ l'ọ bụ onye mẹe
tụ-tsuru atụ-tsu.
tụ-tsuru atụ-tsu.
Iphe kparu iya nụ abụru Ojejoje
yẹle okfu iya, dụ nsọ.
10 Alị ẹke-a l'ọ ha bụ ndu eri ogori jeru iya ejiji.
Yọ bụru kẹ okfu ọnu ono,
a tụru ono meru iphe alị-a nọ l'aphụ.
Ẹke anụmanu akpajẹ nri
l'echi-ẹgu kpọhuwaru jegiri jegiri.
Ndu nkfuchiru eme iphe dụ ẹji;
ẹphe gude ike ẹphe l'eme
iphe ẹ-ta gbadụnu.
11 “Ndu nkfuchiru mẹ ndu
achịjeru Nchileke ẹja tụko
bụru ndu ẹ-te emedu ele Nchileke.
Mbụ lẹ ya aphụje iphe dụ
ẹji ẹphe eme ọbu l'eze-ụlo iya.”
Ono iphe Ojejoje ekfu ndono.
12 “Yọ bụru iya kparu iphe
ụzo ẹphe a-wata ochi ẹturu.
Aa-chịru ẹphe chị-phua
l'ẹke agba ọchi.
Yọ bụru l'ẹke ono; bẹ ẹphe a-da iko.
Ya e-gude iphe dụ ẹji
dakfu ẹphe teke ono,
ee-chi ẹphe iphe ono.”
Ono iphe Ojejoje ekfu ndono.
13 L'ẹhu ndu nkfuchiru,
shi Samériya; bẹ ya phụru ahụma:
mbụ l'ẹphe ekfuchiru Bálụ;
shi ẹge ono l'eduphu ndibe iya,
bụ ndu Ízurẹlu.
14 L'ẹhu ndu nkfuchiru kẹ
Jerúsalemu bẹ ya phụkwaruphu
iphe l'anyị ishi ẹdzu.
Ẹphe anọduje eri ogori;
ndzụ ẹphe abụru ọdzu ẹjo-ire.
Ndu eme iphe dụ ẹji;
bẹ ẹphe anọduje eme
t'ẹka ka ẹphe oshihu ike
l'iphe ẹphe eme; k'ọphu bụ
l'ẹ tọ dụdu onye ọphu
aghajẹru iphe dụ ẹji, oome azụ.
L'ẹhu nk'iya bẹ ẹphe
dụkotalephu l'ọ bụ ndu Sódomu;
ndu Jerúsalemu adụkota
lẹ mu phụ l'ọ bụ ndu Gọmóra.
15 Ọo ya bụ l'agha; ọwaa kwa iphe Ojejoje, bụ Ọkaribe-Kakọta-Ike kfuru l'okfu ẹhu ndu nkfuchiru:
Ya e-me t'ẹphe ria nri,
atsọ ile;
atsọ ile;
ẹphe angụa mini, e yeru nshi.
Ishi iya abụru l'ọo l'ẹka ndu
nkfuchiru, shi Jerúsalemu b'o shi;
mbụ ẹjo ụru-alị, jiru alị-a l'ọ ha.
16 Ọwaa iphe Ojejoje bụ Ọkaribe-Kakọta-Ike ekfu: “Unu ba angajẹkwa nchị l'iphe ndu nkfuchiru ekfuru unu. Ẹphe emejekwa t'unu chịru ẹnya ye l'iphe ẹ-te emedu ememe. Ẹphe asụje l'ẹphe phụru ọphulenya; ama l'ọo iphe ẹphe rịtaru l'ọkpoma ẹphe; l'ẹ tọ bụdu iphe shi yẹbe Ojejoje l'ọnu. 17 Tekenteke bẹ ẹphe anọduje ekfuru ndu akpọ iya ẹbo-ẹbo; sụ ẹphe: Ojejoje sụru: Ẹhu a-dụkwaa unu agu! Ndu ọphu bụ ẹjo iphe shi ẹphe l'obu bẹ ẹphe anọduje eme; bẹ ẹphe asụje: L'ẹ to nwedu iphe eme ẹphe.”
18 Obenu; ?bụ onye ole l'ime ndu ono byajẹwaru tẹ yẹle Ojejoje chịa idzu; k'ọphu ẹphe a-phụkwanu iphe eme nụ; m'ọ kwanu nụa okfu iya? ?Bụ onye ngabẹjeru nchị nụa okfu iya? 19 Lekwa; Ojejoje gudeekwa ẹhu-eghughu l'ezi oke phẹrephere; mbụ ẹjo oke phẹrephere l'ishi ndu ẹjo ọkpoma. 20 Ọphu ẹhu t'eghubuhukwa nụ Ojejoje eghughu gbururu jeye teke oo-meebe ẹge obu dụ iya. L'oge l'ifu bẹ oo-dokota-a unu unu ẹnya ọhuma.
21 Ya te zikwa ndu nkfuchiru-a ozi.
Ẹphe egudele-e ozi ẹphe
agba tụgburu kwasẹru.
Ya te kfukwaru okfu yeru ẹphe;
ẹphe asụle-e l'ọo iphe ya
kfuru bẹ ẹphe ekfu.
22 Obekwanu; ndẹge ọ -bụru l'ẹphe nọdujewa;
t'ẹphe l'iya chịa idzu;
m'ọ bụru iphe ya kfuru
bẹ ẹphe gege eje je araaru
ndibe iya arara;
ndibe iya arara;
mẹ ẹphe emekwanua;
ẹphe aghakọbe; haa ẹjo
ụzo, ẹphe etso;
yẹle iphe dụ ẹji, ẹphe eme.
23 Ọwaa iphe Ojejoje ekfu: ?Ya bụlephu Nchileke, nọ ntse; ya ta abụhedu Nchileke, nọ ote-ẹnya tọo? 24 Nnajiufu sụru: ?Nanụ ẹge madzụ e-shi domia onwiya tẹ ya ba aphụ iya. ?Ya te jidunua igwe; ji mgboko tọo? Ono iphe Ojejoje ekfu ndono. 25 Ya nụakwaru iphe ndu nkfuchiru ono ekfu; mbụ ndu egudeje ẹpha iya l'ekfu iphe ya te ekfudu. Ẹphe asụje: “L'ẹphe rọru nrọ! L'ẹphe rọru nrọ!” 26 ?Bụkpo teke ole bẹ egbe iphe ọwaa a-nọ-bebe l'ọkpoma ndu nkfuchiru-wa, ẹ-te ekfudu ire-lanụ-a; mbụ ndu bụlephu ẹjo ọriri, bataru ẹphe l'obu bẹ ẹphe ekfuje. 27 Ẹphe arịje lẹ nrọ ono, ẹphe anọduje ezeru ibe ẹphe ono e-me tẹ ndibe iya zahaa ẹpha iya ẹge ono, nna ẹphe oche ẹphe shi l'ẹja, ẹphe shi abaru Bálụ zahaa ya ono. 28 T'onye nkfuchiru, arọ nrọ zekwaa iphe, ọ rọru. Onye ọphu bụ okfu iya b'ọ nụru ekfua ya l'ẹge ọ dụ. Ọ dụdu; ?nanụ ẹge ẹswa akpe yẹle akpe l'onwiya e-shi hakọ. Ono iphe Ojejoje ekfu ndono. 29 Ọwaa iphe Ojejoje ekfu. Ọ sụru: “L'okfu, shi iya l'ọnu dụkwa l'ọ bụ ọku; ọ dụkwaphu l'ọ bụ ọngu, etsuje mkpuma yọgiriyogiri. 30 Ọo ya bụ lẹ ya nọ-chikwaru ndu nkfuchiru ono ụzo; mbụ ndu nkfuchiri ono, ejeje je ezita okfu, ibe ẹphe kfuru; bya ekfua; sụ l'ọo ya kfuru iya ono.” Ono iphe Ojejoje ekfu ndono. 31 “Mbụ l'agha; ndu nkfuchiru ono, asajẹ ọnu sụ lẹ ya sụru ono bẹ ya nọ-chikwaru ụzo.” Ono iphe Ojejoje ekfu ndono. 32 Ọwaa iphe Ojejoje ekfu: “Ndu ono, anọduje arọ nrọ ẹregede ono bẹ ya nọ-chikwaru ụzo; mbụ ndu anọduje ezeshi nrọ ọbu; shi ẹge ono l'edusweshi ndibe iya ụzo; Ya te zikwa ẹphe; ọphu ọ dụkwanu ekemu, ya tụru nụ ẹphe. Ọo ya bụ l'ẹ tọ dụkpodua uru, ẹphe abaru ndu-a lẹ phuu.”
Ono iphe Ojejoje ekfu ndono.
33 “Teke ndu-wa; m'ọ bụ onye nkfuchiru; m'ọ bụ onye achịjeru Nchileke ẹja -jịru ngu: ‘?M'ị jịru Ojejoje; ọ sụru l'ọo egbe iya ole a-dakwuta ẹphe?’ Nggu asụ ẹphe: ‘?Egbe iya ole? Ọ sụru lẹ ya a-gbado unu! Ono iphe Ojejoje ekfu ndono.’ 34 Ọ -bụkwanu l'ọo onye nkfuchiru; m'ọ bụ onye achịjeru Nchileke ẹja; m'ọ bụ onye ọdo waru kfulahaaru sụ lẹ ya jịkwaru Ojejoje; yọ sụ l'ọo iphe ya ee-me ndọ-ọ; bẹ ya a-nụkwa onye ọbu aphụ yẹle ndibe iya l'ẹphe ha. 35 Iphe unu anọduje ajị ndu ọnya unu; mẹ ndu abụbu unu phẹ bụ: ‘?Nanụ ẹge Ojejoje yeru ọnu teke a jịru iya?’ M'ọ kwanụ: ‘?Bụ ngụnu bẹ Ojejoje kfuru?’ 36 Ọle agha; unu be gudehekwa ọnu unu kfua iphe unu jịru Ojejoje; kẹ l'ọ kwa ntụmatu, unu atụ bẹ unu l'iya eme; unu egude ẹge ono woru okfu kẹ Nchileke, nọ ndzụ ghaa ịgharafu; mbụ Ojejoje, bụ Ọkaribe-Kakọta-Ike; bya abụru Nchileke ayi. 37 Ọwaa iphe ii-kfujeru ndu nkfuchiru ndọ-ọ: ‘?Unu jịhunuru Ojejoje; yọ sụ unu agha?’ M'ọ kwanụ: ‘?Bụ ngụnu bẹ Ojejoje kfuru?’ 38 A makwaru-a l'unu ekfu l'unu jịru Ojejoje; yo zia iphe e-me nụ. Ọle; ọwaa kwa iphe Ojejoje ekfu: L'iphe unu anọduje ekfu bụ: ‘Ọwaa iphe a jịru Ojejoje; yọ sụ l'ọo dakfuta unu’; mbụ l'ẹke ya sụkwaru unu t'unu be kfujekwa ẹge ono. 39 Ọo ya bụ lẹ ya a-gwọbekwa unu; chịfu unu l'ifu iya; unu lẹ mkpụkpu ono, ya nụru unu lẹ nna unu oche ẹphe ono. 40 Ọnu, ya a-tụ unu a-nọkwa gbururu jeye lẹ gbururu; mbụ yọ bụru iphe-iphere, a-nọ jeye lẹ tutu yoyo; ọphu 'o nwedu l'a azahaa ya azaha.”